O FILIPI1
1Tabea! Ri-riadodoto nage niodadio'au ma Jou ma Dutu awi 'awaha nage nimanoa-noa o Filipi ma bendaro'a, de nage niorimoio'au de ma Kristus Yesus. Geena dau ma doda'a o jama'ata ma balu-baluhu de o jama'ato'a yoduhu-duhunu. Ngoi o Paulus de o Timotius ma Kristus Yesus awi gilaongo nimihidingoto o hurata ngini'a.2Ngomi miogaaho'o tanu ma Jou ma Dutu to ngone nanga Dea, de ma Jou Yesus Kristus niwi'ula ngini'a o bara'ati de o hanaanga.3Nage tinidanganono ma noimi, totemo 'amaowa'a ma Jou ma Dutu'a nage powihuba-huba.4De nage tinidahaubayanga ngini moi-moi, ma noimi 'ai hingina 'aiga-garago.5Ngoi totemo 'amaowa'a ma Jou ma Dutu'a hababu ngone porimoio'au pohi'awaha o Habari ma Owa ma Jou ma Dutuno ma oraha 'a idi-dihila'ahi ngini nionga'uo'au o Yesusi'a hiadono o oraha neena.6Ma Jou ma Dutu ma hirete womulaengo'au wo'arajaanga yaowa-owa nia hingina'a, de ngoi tonga'u Una aha wohigila-gila wo'arajaanga hiadono waduanga nage ma oraha ma Yesus Kristus woboali.7'Igoungu yadaene to ngoi 'ai hininga'a tamao 'ogeena ngini'a, hababu ngini moi-moi tinida-danganono. De hababu ngini ma niama'e ma do'u o 'arajaanga 'ira-rahaio'a nage ma Jou ma Dutu wo'ula'au ngoino. Niduhunu ngoi nage ma oraha neena ngoi o buio'a e'ola ma oraha 'a o buio'awa ma ngale tohi'ua-'uata o Habari ma Owa de tohimaiti na'o o Habari ma Owa geena itiai.8Ma Jou ma Dutu wana'o 'igou-goungu, ngoi de ma Kristus Yesus awi dora 'a tinihi-hininga ngini'a.9De ngoi tinidahaubayanga onane: Tanu ngini 'a niwidora monga ma Jou ma Dutu'a de nimahingini-ngini'a ma, de 'aidogo monga niana'o 'o'iau hona iti-tiai, de niobarija.10De 'ogeena ngini idadi niaili'i o'iau naga nage 'iholoi yaowa, la nia wowango iberehi de o baradoha 'a ma ile-ile ma 'a'oiwa nginio'a ma oraha ma Kristus woboali.11Ma hababu duga 'a ma Yesus Kristus ho nia di-diai moi-moi geena 'igou-goungu 'irahai, la o nyawa wihoromati de wipuji ma Jou ma Dutu'a.12Ri-riadodoto ponga'u-nga'u ma Kristusi'a! Ngoi tomau ngini niana'o, na'o moi-moi nage idadio'au ngoio'a geena ngaro ihuha, ma geenau ho o nyawa manga lepe yoihene de yonga'u o Habari ma Owa.13Ma baha'u o hurudado o 'adato'a yogoa-goana de o nyawa ma homoa neena ma bendaro'a, moi-moi yana'o itiaio'au na'o ngoi 'ibui hababu towileleani ma Kristus.14De hababu ngoi 'ibui, ho o nyawa yonga'u-nga'u neena'a manga lepe 'iholoioli winga'u ma Jou'a, ho 'iholoi yomooini yohihabari ma Jou ma Dutu awi demo. Ona 'a yohawanua.15Ona'a naga munu'a wihihabari mangale ma Kristus geena hababu 'a yobu'u ngoino de yomau 'iributu. Ma naga munu'a wihihabari mangale ma Kristus geena hababu manga dumutu iti-tiai.16O nyawa noona wihihabari ma Kristus hababu widora ma Jou ma Dutu'a de ngoino, hababu yana'o'au na'o ngoi neena ma Jou ma Dutu woihulo'o to'arajaanga mangale tohimaiti na'o o Habari ma Owa geena itiai.17Ma o nyawa nage yobu'u ngoino ona wihihabari ma Kristus geena ma ngale manga dumutu 'ihala. Ona wihihabari ma Kristus geena ma ngale 'a yohiamo-amo'o to ona manga roehe ma hirete, de o geena, ona yomau ngoi 'iholoioli 'ihangihara o buio'a.18Ma 'aido-doawa! Hababu ngaro manga dumutu iti-tiai bolo 'ihala-hala, ma itigoo'o wihihabario'au mangale ma Kristus. Ho ngoi togarago. De done aha tatapu 'atoga-garago,19hababu ngoi tana'o'au ngoi aha tohalamata o hangihara ma dodano neena, ma nge'omo ngini 'aitauri'a nidahaubayanga, de ma Yesus Kristus awi Omaha 'iduhunu ngoino.20Hababu nage ngoi taigo-igo de toda-danganono geena la ngoi idadi tadiai moi-moi nage halingou tadiai, la uwa 'imae'e. De ngoi tomau la oraha neena harage de 'a ma hila, ngoi duru tomooini la de to ngoi 'ai wowango, towango bolo tohongene, ngoi aha todiai la o nyawa wihilamo'o ma Kristusi'a.21Hababu 'imote'e ngoi, ngoi towango duga 'a ma Kristus towileleani! De tohongene geena toutumu.22Ma na'o 'atowangohi o dunia'a neena, ngoi idadi tohigila-gila tadiai 'ai 'arajaanga nage ma haidaa duru ma amo'o, ho 'atana'owa 'aneena halingou taili'i.23Modidi Geena 'a ihuha taili'i. Tomau tohonengou la tomanoa de ma Kristus hababu geena duru 'iholoi yaowa,24duga ma ngale tiniduhunu ngini, ho 'iholoi yaowa towangohi o dunia'a.25Ngoi tamao halingou 'ogeena, ho tana'o na'o ngoi 'a towangohi o dunia'a, la idadi tiniduhunu, la nia ngo-nga'u ma Jou'a 'a i'uata monga de 'anioga-garago hababu nia ngonga'u geena.26Ma hababu geenau, na'o ngoi aha tai'ali ngini'a, ngini aha niamao niogarago hababu ma Kristus Yesus, mangale o'iau nage wadiaio'au ngoino.27'A, 'iholoi 'iparaluu geena la ngini nia wowango 'imote'e 'o'iau naga 'itemo'au o Habari ma Owa ma ngale ma Kristus. De 'ogeena na'o poma'ama'eli bolo 'ouwa, aha toihene ma ngale ngini nia ngo-nga'u tatapu i'uata de 'ao hininga moi de nimaduhunu ma ngale nia dumutu 'a moi de nia igo-igo 'a moi, geena la o ngo-nga'u nage 'imote'e o Habari ma Owa ma Jou ma Dutuno.28Ngini halingou 'aniomo-mooini de uwa niododato ona'a nage yolawa-lawana ngini'a. 'Ogeena niodiai geena niohimaiti na'o ona ma raio'au yomurutu, de ngini ma niohimaiti na'o ngini aha niama'e o halamata ma Jou ma Dutuno.29Ma Jou ma Dutu niwi'ula'au Awi hininga ma owa ngini'a ma ngale nionga'u ma Kristusi'a, ma 'ageenawa duga, iholoioli ngini idadi niohangihara hababu niwinii'i ma Kristus.30Geenau ho ngini ma niohangihara de de ngoi, nage harage ma hila niama'e'au ngoi tohangihara. De hiadono neena ngoi tohangihara harage nage nioihe-ihene neena naga.
The Seed Company