O Hu-hulo'o28
1Geena o dudungo'au miaiha 'amioha-hananga aha de miana'o ma nuuhu geena ma ronga o Malta.2Ma nyawa geena'a manga hininga ma rahai ngomino. Ona midawongo 'imihidi-diai ngomino moi-moi de o u'u midataulu hababu o beha'a de o loo'o ho.3O Paulus o gota wotoomu de wohitaulu, wohitau-taulu 'ogeena de o ngia moi ibiha-biha ihupu hababu o u'u ma hau'u, de witudu'u awi giami'a.4Ma oraha ma nuuho'a yomanoa-noa nage yama'e o ngia geena ihidelu'u o Paulus awi giamo'a, de yoma'atemo, <<Ayo yaii, o nyawa nuuna marai woto-tooma, hababu una ngaro wodo-doawa o ngooto'a, ma o Gomanga ge ma ronga Iti-tiai 'awihigumadawa wowango.>>5Ma o Paulus wohigaawiwi o ngia geena o u'u'a, duga una 'awodo-doawa.6Ona yomangitu bali ma du-dubehi de awi giama ioboho e'ola ma oraha geena de wohongene. Ma nage yodamaa ma daao, wige-gelelo ma o Paulus 'a wodo-doawa, ho manga hininga 'ingalioli hiadono yomangitu o Paulus guuna o gomanga.7Geena'a i'a'uli'awa demaena o nuuho'a manga baluhu awi tona'a, awi ronga o Publius. Una geena awi hininga ma rahai miaho'o awi woa'a mimanoa, ho ngomi geena'a mia wange haangeno.8Ma oraha geena ma dea wigogamu'u de o aunu wohidagi. O Paulus wai'a witaila'o de widahaubayanga de awi giama widatami'u ho awi panya'e iai'i.9Hababu geenau idadi ho o nyawa yopa-panya'e'u o nuuho'a geena de moi-moi yoboa o Paulusino wo'ihiai'i.10Ona mihoromati ngomino, de nage miohidetou de yohi'adiai o 'iau hona nage mia paraluu mia nge'omo'a.11Mia mede haange geena o Malta'a, de miotagi miobalene o 'apa'a moi o Aleksandriano nage imatapu'u ma nuuho'a geena ma daao o loo'o ma orahu'u. Ma 'apa geena ma dulada, <<O Gomanga ihago o Kastor de o Poluks.>> 12Ngomi mimatapu'u o Sirakusa ma bendaro'a de mimanoa geena'a o wange haangeno.13Geena'a de miotagi miohidetoli 'a ma date-date'iha mia ni'i hiadono o Regium ma bendaro'a. Ma dewelano de o dado'o da'uu'u o orehara'u, ho 'ao wange modidi ena mimahiadono'au o Putioli ma bendaro'a.14Geena'a ngomi mima'ama'e de yamuluo naga yonga'u-nga'u o Yesusi'a, de imiaho'o ho mimanoa de de ona o minggu moino. Geena'a de mimadagioli mia dumutu o Roma ma bendari'a.15O Roma'a nage yonga'u-nga'u o Yesusi'a migiihene, hiadono yoboa mihobo'o o bendara moi'a ma ronga o Apius ma Pahara de maregu mihobo'o ngomino o bendaro'a moi ma ronga o Tiga Penginapan. Wa'utu o Paulus wo'ima'e ona'a, de wotemo 'amaowa'a ma Jou ma Dutude, de awi hininga idadi i'uata.16O Roma ma bendari'a mimahiadonu'u, de ma pamareta wihigumada o Paulus womahido-dogumu womatinga'i'a, ma hurudado womatengo wigoana.17O wange haange ipahano, de o Paulus wo'iaho'o o Yahudio'a manga balu-baluhu ho yomalomuno de wotemo, <<Ria dodoto! Ngoi 'a tahalawa nanga nyawa-nyawa'a o Yahudio'a, bolo nanga adati'a nage nanga edete de nanga dotumino. Ngaro 'ogeena ma o Yerusalemuo'a de 'itago'o ho 'ihigiama ma hoata o Roma ma nyawa'a.18O Roma'a ma nyawa o Yudea'a nage 'iuru-uruhu yomau ipidilou, hababu inyata'au 'a tahalawa nage yadaene ihu'umu ihiho-honenge.19Ma o Yahudi ma nyawa yotoributu, ho togaaho'o 'ai haala geena ma Kaisar wauruhu o Roma'a. Todiai 'ogeena 'a ma dumutua 'ai nyawa ma hirete naga tini'ala'i.20Geenau ho togaaho'o poma'ama'ehi de de ngini la poma'aade-ade; hababu ngoi 'ili'o mangale tonga'u ma 'Oana Wohiha-halamati'a. Una guuna ngone o Israelo'a ma nyawa powida-damaa.>>21Ma o Yahudio'a ma balu-baluhu yotemo o Paulusi'a, <<Ngomi 'amiama'ewahi o hurata o Yudeano mangale ngona. De do'aino 'omaiwa moi yaino nihiade-ade bolo ani ronga yatiiha.22Ma ngomi miomau mioihene duga 'a to ngona ani ngonga'u, hababu ngomi mioiheno'au o nyawa 'ia'a naga bato 'ayaiigowa o do-doto'o nage nani-nii'i.>>23Ho ona de o Paulus yaputuho'au mangale yoma'ama'e ma wange. Geena ma wange o nyawa manga lepe yoboa o Paulus awi woa'a nage womahido-dogumi'a. O de-dewelano hiadono o wange itumunu o Paulus wohimaiti de wohihabari ona'a, mangale ma Jou ma Dutu awi pareta. O Paulus wohidaila'o la ona yonga'u o Yesusi'a, geena wapa'e o Musa de Nabi munu'a manga bo'u ma reguo'a.24Munu'a yonga'u o'iau naga una wotemo nage, ma munu'a 'ayonga'uwa.25De manga di-dibanga yoma'alimodio'a ona yomagoa'a geena'a ena o Paulus 'awotemohi onane: <<Duru igoungu, o'iau naga nage o Omaha 'Iofi-ofi ihingahuo'au nanga edete de nanga dotumi'a ma nge'omo ma Nabi Yesayano!26Ma Jou ma Dutu wotemo ma nabi Yesaya'a,<Tagi no'ihingahu neena o Israel ma nyawa-nyawa'a,Ngini aha 'aitauri'a niohigihene ma 'a niomahina'owa;ngini aha 'aitauri'a niada-dananoho ma 'a niohi'ana'owa o'iau idadi.27Hababu o nyawa noona yomapihio'au.Yomapongo'aude yomaruwuto'au.'Oneena yodiai la manga la'o uwau yomahima'e,manga ngau'u uwau yohiihene,de manga di-dibanga uwau yohi'ana'o.Hababu geena, ona idadiwau yoma'ilio Ngoinomangale to'ihiai'i manga wowango.> >>28O Paulus wotemoli, <<Geenau ho ri-riadodoto, halingou niana'o na'o o habari ma owa mangale o halamata nage ma Jou ma Dutuno, neena naga ihihabario'au 'a o Yahudio'awa. Ona aha yodomote'e!>> [29O Paulus 'ogeena wotemo'a, de o Yahudio'a yoma'atinga'a geena'a ma de yoma'aributu moi de moi.]30O Paulus awi taunu modidino o Roma'a nage o woa wohewa-hewa'a. Una de awi hininga ma ngodumu wo'idawongo o nyawa moi-moi nage yo'ai'a una'a.31De 'awomo-moiini wohihabari ona'a mangale cara'iau ma Jou ma Dutu awi pareta, de mangale ma Jou Yesus Kristus. O Paulus wodiai 'ogeena, 'amoiwa witato'o.
The Seed Company