O MATIUS9
1Geena iduangino, de o Yesus de awi ni-nii'i yopalene o ngootilie de yoma'ilioli o talaga ma hononga'a, Awi hoani'a.2Geena'a do'a, yamuluo naga wiaha womatengo wopa-paluga o Yesusino wiiduha o 'o'owa'a. Wa'utu o Yesus wo'ima'e to ona manga ngonga'u ma 'uata, de wotemo wopa-paluga'a ge, <<'ai ngoa'a, nohanangou. Ani baradoha taapongo'au.>>3Ho o Yahudio'a manga agama'a yodoto-doto'o yamuluo naga geena'a manga hininga'a yotemo, <<Ma nyawa nuuna wihohedu ma Jou ma dutu'a!>>4Ma o Yesus wana'o manga hininga ma doda, ho wotemo, <<idodoau ho nia didibanga iti-tiiha?5'Ia'a 'iholoi 'igapanga totemo wopa-paluga'a, <Ani baradoha taapongo'au>, e'ola totemo, <nomomi'i de notagiou?>6Ho neena Ngoi una towihiai'i, la naina'o, o dunia'a neena o Nyawa ma Ngoa'a de Awi 'uaha'a mangale waapongo o nyawa manga baradoha>> Geena'a de o Yesus wotemo wopa-paluga'a, <<Nomomi'ou, nagoa'ou ma ani 'o'owa, de noliou ani woa'a!>>7Geena'a de wopa-paluga guuna womomi'i, de wolio awi woa'a.8Yama'e 'ogeena, de o nyawa yolepe-lepe goona yohawana de wipuji ma Jou ma dutu'a, hababu ma Jou ma Dutu wo'ula'au o 'uaha ma amo'o o nyawa'a guuna o dunia'a neena.9Geena'a de, o Yesus wotagi wamada ma dingi geena, de Una wima'e womatengo o balahiteenge woga-gaaho'o wo'arajaanga wogogelu'u o balahiteenge ma kantoro'a. Awi ronga o Matius. O Yesus wotemo una'a, <<Naino noinii'i Ngoino.>> Geena'a de o Matius womagoa'a de winii'i o Yesusi'a.10Wa'utu'o Yesus wo'odomo ma gigiria'a o Matius awi woa'a, geena'a de yoboa o balihetenge yogagaaho'o ma reguoli, de o nyawa yoba-baradoha nage yote de yomahidoodomo de o Yesus de Awi ni-nii'i.11Gena'a de o Farisio'a ma nyawa yama'e ma haala geena, de ona yohano o Yesus awi ni-nii'i'a, <<Dodoau ho ania guru yomahidoomo de o balahiteenge yogagaaho'o de o nyawa yoba-baradoha?>>12O Yesus woihene yotemo 'ogeena ho wotemo, <<O nyawa 'ayopa-panya'ewa 'ayoparaluuwa o dotere, duga 'ao nyawa yopa-panya'e.13Ho niotagi nimadoto'o o Bo'u 'Ibe-berehi ma doda itemo: <'Ai mau geenala nia dora, de 'ania hada'awa,> Hababu Ngoi toboa 'ato'iaho'ua o nyawa yotitiai, duga 'ao nyawa yoba-baradoha.>>14Ge'ena'a de o Yohanes woohi-ohi'i awi ni-nii'i ya'aino o Yesusino de yohano, <<Dodoau ho ngomi o Fariso'a mio puaha, ma Ani ni-nii'i 'ayopuahawa?>>15O Yesus wopaluhu, <<Bote 'ai dadi o naulu ge womo-modo'a ge awi ma-manai de de unaahi de manga hininga ihuha? Maraio'au o uwa! Ma duga aha yaadono ma wa'utu, nage ma naulu womo-modo'a aha wiehe onano. Geena aha de ona yopuaha.16Amoiwa o nyawa manga baju 'itiimuno'au de yohitapa'a de o moha ma dobi'i ma hungi. Hababu na'o ma pa'eanga geena iwo'a, ma moha ma hungi geena ya'ooromou ho ma baju 'itiimuno'au ge 'iracanga 'iholoi 'iamo'o.17'Ogeenali ma, 'amoiwa o nyawa yodalihi o angguru ma hungi o dingi ma hila'u ge o 'aewani ma 'aino. Hababu done ma angguru ma dingii ge o 'aewani ma 'aino ipela'a de ma angguru ma ipoa. Mangale geena, o angguru ma hungi 'iani podalihi ma ngii ma hungi'u, la ma angguru de ma ngii geena uwa itiiha.>>18Wa'utu o Yesus ma gigiria'a yoma'ade-ade de o Yohanes woohi-ohi'i awi ni-nii'i, geena'a de o Yahudio'a ma agama'a ma baluhu woboa. Una watilabu'u'u o Yesus awi biono'a de wotemo, <<Aba Guru, 'ai ngoa'a o ngewe'a aha ami ngomaha 'itoa'u'u, duga tanu noiduhunu hio'o tanu na'ai'ahi, de nodonoa Ani giama la momomi'oli.>>19Geena'a de o Yesus de awi ni-nii'i yotagi yoma'anii'i de ma nyawa guuna.20Manga do-dagi ma hidogorona'a de momatengo ami aunu 'ipoa-poa ma daao o taunu mogioo'o de modidinou, momahidutu'u o Yesus awi dudunino. Muna matibanga, <<Ngaro 'a tatigi awi baju i'a-'a'ulu'u geena toai'i.>> Geena'a de matigi Awi baju i'a-'a'ulu'u ma balene.22De ma oraha geena o Yesus womalelo'o de mima'e o ngewe'a gumuna de wotemo muna'a, <<'ai ngowa'a! Uwa ani hingina 'ihuha, hababu noinga'u Ngoino ho, ani panya'e 'iai'i!>> De 'ageena'a ena, de ami panya'e geena 'iai'o'au.23O Yesus woboa o dodoomu ma woa ma baluhu awi woa'a, Geena'a o nyawa yosulingi de yogalibetongo ma gigiria'a.24De o Yesus wotemo ona'a, <<Niohupu'a ngini moi-moi, hababu o ngowa'a numuna 'amohongenua 'amomaiduo'a.>>
Ma ona 'awihiiete Una'a.25O nyawa yolepe-lepe goona yo'iginii'i, de o Yesus woohama ho wagagao ma ngowa'a gumuna ami giami'a de momomi'i.26Ho ma habari geena itagi ma daera'a geena yaedono'ou.27O Yesus womagoa'a geena'a, de o nge'omo ma gorona'a de yopilo-pilo'o yamididi winii'i. Ona yomahigaho-gaho'o, <<Ee Dautu awi guti'u! Nimidoranohi!>>28Ma oraha o Yesus woohami'a o woa moio'a, de yopilo-pilo'o yo'aino o Yesusino de wotemo ona'a, <<Nionga'u? Na'o ngoi idadi tinihiai'i?>>
De ona yopaluhu, <<Mionga'u, Aba!>>29Geena'a de o Yesus wagagao manga la'o'a de wotemo, <<Hababu nionga'u, idadi 'imote'e ti ngini nia mau.>>30Geena'a de yomahima'e'au. O Yesus wo'ihitiari, <<Uwa niohingahu ma haala geena 'a moi'a ma.>>31Ma wa'utu yotagi de 'ayogila yohi'awaha ma daera'a geena.32Wa'tu yopilo-pilo'o yopaha'a, de womatengo womou-mou o to'ata widongohamu'u wi'aha o Yesusino.33O Yesus waginii'i ma to'ata geena, de idadio'au womaade-ade. Ho o nyawa yolepe-lepe geena'a yoheranga de yotemo, <<'Omaiwahi miama'e 'oneena idadi o Israelo'a.>>34Ma o Farisio'a yotemo, <<O to'ata ma 'oana wi'ula'a o guata ma ngale waginii'i o to'ata geena.>>35O yesus waloliti o bendara de o hoana moi-moi, de Wodoto'o o Yahudio'a manga dodoomu ma woa-woa'a. Una wohingahu o Habari ma Owa mangale ma Jou ma Dutu awi pareta o nyawa-nyawa'a nage yonga'u-nga'u. Una ma wo'ihiai moi-moi o nyawa manga panya'e de wo'ihiai'i o nyawa nage itiaiwa.36Wa'utu, o Yesus wo'ima'e'a o nyawa yolepe-lepe goona de wo'ihininga hababu ona manga huha ilepe harage de o duba ma gogoana 'aoiwau mangale yo'igoana37Geena'a de o Yesus wotemo awi ni-nii'i'a, <<'Iumu'u'ou ma amo'o'a ma youtu-utu'u 'a yolepewa.38Hababu geena niogaaho'o ma Baili ma Dutu'a la wo'ihidingoto youtu-utu'u mangale youtu'u.>>
Ma ona 'awihiiete Una'a.25O nyawa yolepe-lepe goona yo'iginii'i, de o Yesus woohama ho wagagao ma ngowa'a gumuna ami giami'a de momomi'i.26Ho ma habari geena itagi ma daera'a geena yaedono'ou.27O Yesus womagoa'a geena'a, de o nge'omo ma gorona'a de yopilo-pilo'o yamididi winii'i. Ona yomahigaho-gaho'o, <<Ee Dautu awi guti'u! Nimidoranohi!>>28Ma oraha o Yesus woohami'a o woa moio'a, de yopilo-pilo'o yo'aino o Yesusino de wotemo ona'a, <<Nionga'u? Na'o ngoi idadi tinihiai'i?>>
De ona yopaluhu, <<Mionga'u, Aba!>>29Geena'a de o Yesus wagagao manga la'o'a de wotemo, <<Hababu nionga'u, idadi 'imote'e ti ngini nia mau.>>30Geena'a de yomahima'e'au. O Yesus wo'ihitiari, <<Uwa niohingahu ma haala geena 'a moi'a ma.>>31Ma wa'utu yotagi de 'ayogila yohi'awaha ma daera'a geena.32Wa'tu yopilo-pilo'o yopaha'a, de womatengo womou-mou o to'ata widongohamu'u wi'aha o Yesusino.33O Yesus waginii'i ma to'ata geena, de idadio'au womaade-ade. Ho o nyawa yolepe-lepe geena'a yoheranga de yotemo, <<'Omaiwahi miama'e 'oneena idadi o Israelo'a.>>34Ma o Farisio'a yotemo, <<O to'ata ma 'oana wi'ula'a o guata ma ngale waginii'i o to'ata geena.>>35O yesus waloliti o bendara de o hoana moi-moi, de Wodoto'o o Yahudio'a manga dodoomu ma woa-woa'a. Una wohingahu o Habari ma Owa mangale ma Jou ma Dutu awi pareta o nyawa-nyawa'a nage yonga'u-nga'u. Una ma wo'ihiai moi-moi o nyawa manga panya'e de wo'ihiai'i o nyawa nage itiaiwa.36Wa'utu, o Yesus wo'ima'e'a o nyawa yolepe-lepe goona de wo'ihininga hababu ona manga huha ilepe harage de o duba ma gogoana 'aoiwau mangale yo'igoana37Geena'a de o Yesus wotemo awi ni-nii'i'a, <<'Iumu'u'ou ma amo'o'a ma youtu-utu'u 'a yolepewa.38Hababu geena niogaaho'o ma Baili ma Dutu'a la wo'ihidingoto youtu-utu'u mangale youtu'u.>>
The Seed Company