O MATIUS8
1O Yesus wouti o de'uo'a de wau'u geena, de o nyawa manga lepe winii'i Una'a.2Ma oraha geena o nyawa womatengo wopado-pado woboa Unano. Ma nyawa guuna watilabu'u'u o Yesus awi biono'a de wotemo, <<Ee Aba, na'o nomode'e de noihiai'i.>>3De o Yesus wigagao ma nyawa'a guuna de wotemo, <<Ngoi tomode'e. Ho neena noai'ou.>> De 'ageena'a ena ma nyawa guuna awi panya'e 'iai'o'au.4Geena iduangino, de o Yesus wotemo ma nyawa'a guuna, <<Noda-danganono e, Uwa nohi'a-'angahu 'a moi'a ma, ma notagi o imami'a de nogaaho'o wonitaila'o la wana'o 'igou-goungu ani panya'e 'iai'o'au. De aha nohihuba o huhuba nage harage ma nabi o Musa wohulo'o'au, geena ho'a o dudunguu na'o 'igou-goungu ani panya'e 'iai'o'au.>>5Wa'utu o Yesus woohama o Kapernaum ma bendari'a, geena'a de ma 'apita womatengo woboa de wogaaho'o Una'a:6<<Aba, 'ai gilaongo wopanya'e magigiria'ao do'a o woa'a. Wopaluga'au. Una duru wohangihara.>>7O Yesus wotemo una'a, <<Ngoi aha ta'ai'a towihiai'i.>>8De ma 'apita guuna wotemo o Yesusi'a, <<Aba, 'uwau na'ai'a 'ai woa'a, hababu ngoi oyadaenua Tonidawongo 'ai woa'a Aba, Iti Aba notemo o demo o ngale moi neena'a de naino, maraio'au 'ai gilaongo guuna woai'i.9Hababu ngoi tana'o Aba 'anadadi napareta o nyawa'a la yoai'i, harage de ngomi o hurudado ma idadi mi'ipareta mia nyawa'a. Ngoio'a demaenahi iholoi yo'a'ulie, de ngoio'a de u'u demaenali ma o hurudado halingou yodinii'i 'ai pareta. Nao to'ipareta 'ai nyawa-nyawa'a tote, <Notagi!> Maraio'au una wotagi. Na'o to'ipareta 'ai nyawa'a ma reguoli tote, <Na'aino!> Maraio'au una wo'aino. De na'o to'ipareta 'ai nyawa yo'a-'arajaangi'a ma reguoli, <Neena nodiai!> Maraio'au wadiai o 'iau nage to'ipareta.>>10O Yesus woihene ma haala geena iduangino, de o Una duru woherana, de Wotemo o nyawa-nyawa'a nage winii-nii'i Una'a, <<Nioihene nihidi-diai e, 'omaiwahi Tama'e o nyawa womatengo awi ngonga'u ma amo'o o Israel ma bangihano.11Nioda-danganono e, 'ahao o nyawa manga lepe nage 'a o Yahudio'awa o dunia'a neena, o wange ma hiwa'a hiadono o wange ma dumuno'a, ona moi-moi yodadiou ma Jou awi 'awaha, de yogogelou yomahidoomo de ma Aba o Abraham, o Ishak de o Yakub ma Jou ma Dutu awi pareta'a.12Ma ngaro ma Jou ma Dutu wo'ili'i o Yahudi ma bangiha yodadi Awi 'awaha, ma manga lepe onano 'ayo'iiwa do'a. Ma Jou ma Dutu aha wo'iumo o dingii 'italu-taluhi'a. Geena'a, ona aha yoali de duru yohangihara.>>13Geena iduangino, O Yesus wotemo ma 'apita'a guuna, <<O oraha neena, aba noliou! Aba nonga'u ngaro Ngoi 'aneena'a tomaade-ade, aba ani gilaongo 'aidadi woai'i. Harage de ngona ani nonga'u.>> Ho 'ageena'a ena ma 'apita awi gilaongo woai'o'au.14Geena iduangino, o Yesus wotagi o Petrus awi woa'a. De mima'e o Petrus ma diotono o ngewe'a momaiduo'a o dangilo'a hababu migogama.15Geena'a de o Yesus wagagao ami giami'a, de ami panya'e geena 'iai'i, ho momomi'ie de mohidiai la o Yesus woodomo.16Wa'utu o wutuou, de o nyawa-nyawa ge o to'ata yo'ido-dongohami'a manga lepe yo'iaha o Yesusino, de wa'o'iginii'i ma to'ata geena 'a de o demo o ngale moi, de Una ma wohiai'i moi-moi o nyawa yopa-panya'e.17O geena idadi la harage de o Nabi Yesaya wohidemo'au onane, <<Una wamo'u to ngone nanga hangihara de wohiai'i nanga panya'e!>>18Wa'utu o Yesus wo'ima'e o nyawa manga lepe wihigilolitino, de Una wohulo'o awi ni-nii'i'a la yodihidete do'a o talaga ma hongona'a.19Geena'a de o Yahudio'a manga agama'a yodoto-doto'o womatengo woboa de wotemo o Yesusi'a, <<Aba Guru, ngoi tonii'i o 'ia'a naga bato!>>20De o Yesus wopaluhu, <<O 'aewani 'iti-tingi'ai de ma aru'o'a. 'Ogeenali ma de o namo o ginita'a, de ma iguto'a. Ma o Nyawa ma Ngoa'a a'oiwa awi dingii mangale womahiaini.>>21De o Yesusi'a ge wi ni-nii'i womatengo wotemo, <<Aba! Tanu toliohi 'ai dea towipoohu'u ihila.>>22Ma o Yesus wopaluhu, <<Noinii'ou! Mada'a la o nyawa nage 'a yodo-domote'ua ma Jou ma Dutu awi mau yapoohu'u manga nyawa yohone-honenge.>>23Geena'a de o Yesus wopalene o ngootilie, de awi ni-nii'i ma yonii'i.24De itodo'anino o rato geena ma talaga'a, ho manga ngootili o mo'u-mo'u yapo'a. Ma ma oraha geena o Yesus womaiduo'a.25Ho awi ni-nii'i ya'ai'a witomanga yotemo, <<Aba! Nonaduhunohi, polutuou ho!>>26De o Yesus wotemo ona'a, <<Ee Ngini o nyawa nage i'uranga nionga'u-nga'u, Dodoau ho niohawana?>> Geena'a de o Yesus womagoa'ie de wodorohu o rato de mo'u-mo'u geena, ho ma talaga geena 'iogo.27Yama'e o geena, de o Yesus awi ni-nii'i yoheranga, de yoma'a-atemo, <<O nyawa o 'iau Nuuna e? Hiadono o rato de o mo'u-mo'u ma yodinii'i Awi pareta.>>28Ma oraha yomahiadoni'a do'a o talaga ma hononga'a, o Gadara ma daera'a, de yamididi o to'ata yo'idongohami'a yohupu o bo-boohu'o'a de ya'aino o Yesusino.29De ma to'ata geena 'imaorehe nage ma nyawa'a yamimidi goona, <<Adede, Jou ma Dutu awi ngoa'a! Nomau nimidodoau? Ani wa'utu mangale nimihangihara 'ayaadonuahi, dodoau ho o oraha neena nimihangiharau?>>30Geena ma date'o'a, de o boo-booko ma lepe geena'a 'imaduhumele magigiria'a.31De ma to'a-to'ata geena 'imagaaho'o o Yesusi'a onane, <<Na'o nimiginii'i, nimihulo'o la mioohama o boo-booki'a geena.>>32De o Yesus wotemo ona'a, <<Tagi niohupu!>> Geena'a de ma to'a-to'ata geena 'ihupu ma nyawano goona yamididi de 'iohama o boo-booki'a geena. De ma boo-booko geena 'ihuruputu o baa'oro ma date'i'a, de moi-moi 'imatebulu o talaga'u de ilutu ho 'ihonenge.33Yama'e 'ogeena de, o nyawa nage yogoa-goana ma boo-booko geena yoloa, yomahiadoni'a o bendarao'a, yohijarita moi-moi ge 'ida-dadio'au. Ona ma yohijarita mangale o'iau idadio'au nage ma nyawa yamididi'a goona.34Geena yoihene iduangino, ho o nyawa-nyawa o bendaro'a geena yomahidobooto'a yotagi o Yesusi'a. Wa'utu yoma'ama'e de o Yesus, ona yogaaho'o o Yesusi'a la Una wa mada manga daera geena.
The Seed Company