O MATIUS10
1Ma moi geena o Yesus wo'iaho'o o hu-hulo'o yamogioo'o de yamididi. Geena'a de wo'i'ula o 'uaha mangale yaginii'i o omaha ma diiha de yohiai'i o panya'e 'iini-ini'o'a de o nyawa nage manga roehe 'aitiaiwa.2O hu-hulo'o yamogioo'o de yamididi goona manga ronga-ronga onane: Ma di-dihila'a, o Simon nage wihironga o Petrus, de ma dodoto o Andreas, geena'a de o Yakobus de ma dodoto o Yohanes, geena la o Zebedeus awi ngoa-ngoa'a.3Geena'a de o Filipus de o Bartolomeus, o Tomas, de o Matius o balahiteenge woga-gaaho'o, de o Yakobus o Alfeus awi ngoa'a, o Tadeus,4de o Simon o Zelot ma nyawa , de o Yudas Iskariot nage o wihigiama ma hoata o Yesus.5Geena'a de o hu-hulo'o yamogioo'o de yamididi goona o Yesus wo'ihulo'o de wo'ihibehehongo onane: <<Uwa niotagi ge 'ao Yahudio'awa manga daera'a e'ola o Samaria manga benda-bendari'a ma.6Ma niotagi o Israeli'a nage 'ayonii'uau ma Jou ma Dutu'a, harage de o duba 'a'oiwa ma dutu.7Ho niotagi niohingahu ona'a onane, 'Aitaowau de ma Jou ma Dutu woparetau.8Nio'ihiai'i o nyawa ge yopa-panya'e; nio'ihiwango o nyawa ge yohone-honengo'au; niohiai'i o nyawa ge yopado-pado de nioginii'i o omaha ma diiha. Ngini niadawongo'au geena moi-moi 'aniohanguwa. Ho, nio'ula ma ma bo-bangu 'oiwa.9Uwa nioaha o pipi o gurahi, o pipi o hala'a, bolo o pipi o tambaga.10Ma uwa nioaha nia beta-beta, e'ola nia ga-gali o dobi'i modidi nia do-dagio'a, e'ola nia tarupa e'ola nia papadi. Hababu o nyawa yo'arajaanga geena maraio'au yo'i'ula o'iau naga yoparaluu.11Na'o ngini nimahiadono'au o bendaro'a bolo o hoano'a, niohali'i o nyawa moi nage yomode'e nimahido-dogumu. Niomanoa de de ona hiadono niotagioli.12Gee nioohama manga woa'a, de nio'itabea.13Na'o o woa ma dutu goona nidawongo, mada'a la nia tabea geena naga ona'a. Ma na'o ona 'anihigumadawa, niohigilioli nia tabea geena. 14Na'o naga o woa'a bolo o bendaro'a 'anihigumadawa bolo 'anihigumadawa, niamada'a ma ngii geena de nia dou ma hoata ma 'a'awo niodabarihu'u geena ma ngale ngini nihinganono ona yohala'au ma Jou ma Dutu'a15Niohi-hininga! O dunia ma do-dogumoka, o Sodom de o Gomora ma nyawa dua manga hu'umu 'iholoi i'ualenge de gee o Sodom de o Gomora ma bendara geena!>>16O Yesus wotemoli awi ni-nii'i'a, <<Niohi-hininga neena: Ngoi tinihulo'o harage, o duba o haewani 'iti-tingi'ai ma hido-dogorana'a. Ngini halingou niopade harage de 'ao ngia de nia hingina 'irahai harege de o namo dara.17Nimagoa-goana hababu ngini aha nitago'o de niaha o agama ma balu-baluhu. Ngini aha nipoha o dodoomu ma woa-woa'a.18Ngini dua niaha yopa-pareta'a de o 'oa-'oana hababu ngini to ngoi 'ai ni-nii'i. De geenau ma oraha ngini nio'ula o ha'ihi ona'a mangale Ngoi de o nyawa-nyawa'a ma nage ma Jou ma Dutu 'awina-o-na'owa.19Ma na'o niaha o ha'imi'a mangale niadili, 'uwa niohawana ma ngale o'iau aha halingou niotemo e'ola cara'iau halingou nimaade-ade, hababu geenau ma oraha, ma Jou ma Dutu aha wo'ula ngini'a o 'iau halingou nimaade-ade ona'a.20Hababu nimaade-ade o oraha geena, geena nginiwa ma hirete nia demo-deno ma ena nia Dea o horoga'a awi Omaha.21'Ahao de ma wa'utuo'a, o nyawa aha yohigiama ma hoata 'ai riadodoto 'a la yo'itooma. De done aha 'ogeenali idadi naga o dea de o ngoa'a. O ngoa-ngoa'a aha yolawana manga eha de manga dea'a, de yo'ihigiama ma hoata o nyawa'a la yo'itooma.22Ngini aha o nyawa moi-moi nibuhulu hababu ngini to ngoi 'ai ni-nii'i. Ma nagoonau yotongohono hiadono ma baha'a, ona aha yohalamata.23Na'o ngini nihangihara naga o bendara moi'a, geena nioloa o bendara ma homoa'ali. De ngoi tinitemo e, 'aniabootuahi niodongohama o Israelo'a ma benda-bendara, ena o Nyawa ma Ngowa'a woboa'au.24O ni-nii'i 'ayoholoidewa de o guru, de o nyawa yo'a-'arajaanga 'ayodaduiewa de manga baluhu.25Yaowa'au na'o o ni-nii'i moi yodadio'au harage de o guru, de o nyawa moi yo'a-'arajaanga harage de manga baluhu. Na'o o woa moi ma baluhu wihironga'au o Beelzebul, de hongoli o woa ma doda'ali? Ona aha yo'ihironga iholoi itiiha!>>26O Yesus wotemoli <<Uwa nio'idomodongo o nyawa'a. 'A'oiwa naga 'ihigiiunino nage aha 'ayama'ewa, de 'a'oiwa naga 'ihibongonino nage aha 'aihupuwa.27O 'iau naga gee tinitemo ngini'a nage o nyawa ma regu 'ayoihenua, halingou nio'ihingahu nihito-tongooti'a o nyawa-nyawa'a. De o 'iau nage tinihihudu nia ngau'i'a, halingou nihingahu o nyawa-nyawa manga biono'a harage de nimaade-ade o woa ma de'uo'a de yau'u.28Uwa ni'idomodongo ona gee yato-tooma nia roehe, ma 'ayaa'unuwa yotooma nia nyawa. Halingou niwidomodongo ma Jou ma Dutu ge wo'uaha wabinaha nia roehe de nia jiwa ma o u'uo'a ge 'aihone-honenguau.29O tui-tui o dutu modidi idadi pagoo'o de o pipi 'ai haliwa. Ngaro 'ogeena ma, 'a o dutu moi ma 'oiwa 'iota'a o tonau'u na'o nia Dea 'awamauwa.30De ngini nia utu nia haeo'a ma wana'o ma lepe.31Hababu geena uwa niodomodongo! Ngini 'iholoi niobaraguna de o tui-tui neena!>>32<<Nago'ona yomanga'u na'o ona geena to Ngoi 'ai ni-nii'i o 'awaha manga biono'a, ngoi ma aha tomanga'u ona'a 'ai Dea o horoga'a awi biono'a.33Ma nagoonau yomahipongono o 'awaha manga biono'a na'o ona 'ato ngoiwa 'ai ni-nii'i, ngoi ma aha tomahipongono ona 'ai Dea o horoga'a awi biono'a.>>34<<Uwa niotemo bali, Ngoi toboa o duniano neena geena la ngini nima'adame. Ma Ngoi toboa neena aha idadi nima'aributu la nima'ati-tinga'a.35Ngoi toboa la aha todiai o ngoa-ngowa'a o naulu 'ayo'ihingounua manga dea'a, o ngowa'a o ngewe'a 'ayo'idomote'ua manga eha'a, de o modo'a 'ayo'ihingounua manga dunungi'a o ngewe'a.36Aha idadi o haturuu ma amo'o geena la 'ao woa ma doda'u!37O nyawa ge yohibohono manga eha de manga dea'a 'iholoi'a de Ngoino, ona geena oyadaenua inii'i Ngoino. 'Ogeenali ma o nyawa nage yohibohono manga ngoa'i'a o naulu de o ngewe'a'a 'aiholoi de ngoi geena oyadaenuwa idadi inii'i Ngoino.38De o nyawa gee 'ayoolu'u yamo'u o saliipi de 'ainii'uwa, geena oyadaenuwa inii'i Ngoino.39Nagoonau gee manga wowango mangale awi roehe mahirete, geena yohonenge de yoma'ati-tinga'a de ma Jou ma Dutu 'ahiado-adoni'a.>>40O Yesus wotemoli, <<Nagoonau nidawongo ngini, geena ma ngale 'idawongo Ngoi. De nagoonau 'idawongo Ngoino, geena ma mangariti widawongo Una nage woihulo-hulo'o.41O nyawa nage widawongo o nabi geena ona aha ma Jou wo'ula manga hewa harage de o nabi yama'e. De nagoonau yo'idawongo o nyawa nage manga hingina 'irahai, geena ona aha ma Jou wo'i'ula manga hewa harage o nyawa manga hininga 'ira-rahai yama'e.42Nagoonau yo'ihio'ele o nyawa nage 'ao'iawa yo'idae-daene ngaro 'a o a'ele ma homoa ma hababu ona yoinii'o'au Ngoino, nioda-danganono ma raio'au ona aha yama'e ma hewa ma Jouno!>>
The Seed Company