O MATIUS7
1O Yesus wotemoli, <<Uwa ni'ihihala o nyawa'a la ma Jou ma Dutu ma 'a niwihihalawa ngini'a.2Hababu harage ho'o'ia ni'ihihala o nyawa'a, ma Jou ma Dutu ma niwihihala ngini'a o geena. De o duduga nage nihipa'e o nyawa'a mangale ni'ihituga manga hala, ma Jou ma Dutu ma aha wapa'e mangale niwihituga nia hala.3Dodoauho niage-gelelo o nyawa manga hala ma ete'e, ma nia hala ma amo'o ma 'aniomalii-liillo'a? Geena harage o geneo 'iete-ete'e nia ma'e nia riado-doto manga la'o'a, ena momongo bala'a ma dobi'i nage yatamuno'o ma nia la'o'o ma hirete, ma 'aniama'ewa.4Ho icara'iau ngini 'aidadi niotemo nia riadodoti'a, <Ino taai'i ani la'o ma geneo>, ena momongo tinginio'a ma nia la'o'a mahirete o bala'a ma dobi'i.5Ee, tengelu'u! Tingini 'ihila nihihupu o bala'a ma dobi'i nia la'o'a, la nimahima'e itiaio'ahi aha de niohihupu o bala'a ma dobi'i nia riado-doto manga la'o'a.6Uwa nio'ula o 'iani 'iofi-ofi o 'aho'a, la ma 'aho geena 'imalelo'o de nigoli. De uwa nio'ula o mutiara o booki'a, la ma booko geena uwa yado'o-do'o ma mutiara geena.>>7O Yesus wotemoli, <<Nimagaaho'o ma Jou ma Dutu'a la aha niwi'ula, nimadahali'i la nimadama'e. Nimatoilingi la aha o ngoana Niwidapaata.8Hababu nagoonau yomagaho'o aha wo'i'ula de nagoonau yomadahali'i aha yomadama'e, de nagoonau yoomatoilingi aha o ngoana Niwidapaata.9'Amoiwa na'o manga ngoa'a yogaaho'o o roti de ma dea wo'ula o heleo,10e'ola na'o o ngoa'a yogaaho'o o nao'o de ma dea wo'ula o ngia.11Ngaro niotingi'ai, ma 'aniana'o nio'ula yaowa-owa nia ngoa'i'a. Hongoli nia Dea da'u o horoga'a, Una aha 'iholoi wo'ula yaowa-owa o nyawa ge yomagaaho'o Una'a!12Ho niodiai o nyawa'a nage harage de ngini niaigo o nyawa yodiai ngini'a, geena o Musa de o nabi-nabi manga do-doto'o matiti.>>13O Yesus wotemoli, <<Nioohamou o ngoana 'ipe-peeto! Hababu, na'o nioohama niaboa o ngoana 'imo-amo'i'a geena, 'ihi'ai'a o naraka'a, ma nge'omo geena 'ai hangirawa de geena'a o nyawa manga lepe yaboa.14Ma na'o nioohama niaboa o ngoana 'ipe-peeto'a, geena 'ihi'ai'a o wowango'a, o nge'omo geena 'ipeeto de 'ihangihara de 'ayolepewa geena'a yaboa.>>15O Yesus wotemoli, <<Ngini halingou nimahidi-diai de o nabi-nabi'a ge yoelu-elu'u hababu ona nidoboa harage de o domba, ena momongo ona geena harage de o 'aewani 'iti-tingi'ai.16Ngini aha ni'ina-na'o de to ona manga go'oie de manga gogelu'u. O gota 'ihi-hihi'a, maraio'au 'aihowo'ua o anggur ma howo'o e'ola 'aihowo'ua o ara ma howo'o.17Moi-moi o gota ma owa-owa maraio'au ma howo'o ma ma owa-owa, ma o gota iti-tiiha maraio'au ma howo'o ma itiiha.18Maraio'au o gota ma owa, de ma howo'o itiiha, e'ola o gota ma diiha ma 'aihowo'o.19Ho o gota ge 'ihowo'o iti-tiiha, maraio'au aha yatodanga de yohidaulu o u'u'a.20O geenali ma de o nabi yoelu-elu'u ngini aha nio'ina-na'o de to ona manga go'oie de manga gogelu'u.>>21O Yesus wotemoli, <<'A moi-moiwa o nyawa 'iaho'o Ngoino, <Jou, Jou,> aha podadi ma Jou ma Dutu awi 'awaha, ma 'a o nyawa-nyawa nage yadinii'i 'ai Dea o horoga'a awi mau.22O dunia ma baha'a aha, o nyawa manga lepe yotemo Ngoino, <Jou! Jou! De to Ngona ani ronga ngomi mihihabario'au ma Jou ma Dutu awi behehongo, o to'ata mioginii'i, de o haala 'ihera-heranga ma miodiai!>23Ma Ngoi aha totemo, <Ngoi 'a tinina'owa! Nimagoa'i'a nena'a ngini ge nioti-tingi'ai.> >>24O Yesus wotemoli, <<Nagoonau yoiheno'au 'ai demo neena de yodomote'e, ona geena harage de womatengo awi woa wohigo'o o heleo ma de'uo'a.25Ho ma oraha o beha'a hiadono 'inguuihi, de o rato ma, ma 'ailubawa hababu ma woa geena wohigo'o o woa ma babangino'a o heleo nage i'ua-'uata.26Ma o nyawa ge yoiheno'au 'ai demo neena de yodomote'ua, ona geena harage de o nyawa ge yohuma-huma nage wohigo'o awi woa o dowongio'a.27Wa'utu o beha'a de yodunguihi de yodarato, ma woa geena 'iluba 'ihoroma ibooto'a.>>28Wa'utu iduango'au o Yesus womaade-ade, de o nyawa yolepe-lepe geena'a ge duru yoheranga yoihene awi dodoto'o geena.29Hababu Una wo'idoto'o 'a de to Unama hirete awi 'uaha 'aimaterowa de to ona manga agama'a yodoto-doto'o.
The Seed Company