O MATIUS3
1O wa'utu geena, o Yohanes woohi-ohi'i woboa o tona'a 'i'a-'a'aha'a o Yudea ma daera'a de womulaenge wodoto'o wotemo,2<<Niotobau o baradoha niodiai de nima'ilio ma Jou ma Dutu'a, hababu ma Jou ma Dutu Woparetau wodadi o 'Oana!>>3O Yohanes nuunau nage ma nabi Yesaya wotemo'au onane,<<Naga o nyawa manga ilingi yohigaho'o o tona'a i'a-'a'aha'a,<Nihidiai ma Jou awi nge'omo,nihiri'oto to Una awi nge'omo.> >>4O Yohanes awi baju 'i'a-'a'ulu'u o unta ma gogono yadiai'u. Awi bulu geena o aewani ma 'aino. Awi inomo o 'aladede de o madu o bongani'a.5Manga lepe o Yerusalemo'a de o Yudea'a de o Yordan ma ngaili ma date-date'ino ge, yo'aino o Yohanesino.6Ona yomanga'u manga baradoha, ho o Yohanes wo'iohi'i o Yordan ma ngailo'a.7O Farisio'a de o Sadukio'a ma manga lepe yoboa o Yohanesino la wo'iohi'i. Ma wa'utu o Yohanes wo'ima'e, de wotemo, <<Ee, ngini o nyawa-nyawa ma diiha harage de 'ao ngia! Uwa niote na'o nioboa'au neenano la tiniohi'i, de ngini idadi nimahilehene ma Jou ma Dutu awi hu'umino ge aha 'iboa.8Na'o 'igou-goungu niotoba'au o baradoha niodiai, niohimaiti nia go'oie de niagogelu'u yaowa-owa9Uwa niote o hu'umu onidaenua hababu ngini geena o Abraham awi guti'u. Tinitemo e, Ma Jou ma Dutu wadadi wadiai o he-heleo neena idadi o Abraham awi guti'u.10O patu naga 'inoau'u'au o gota ma goa'a, mangale ihitodanga o gota hiadono ma ngutu-ngutu'u'u. O gota nage ma howo'o itiiha, geena aha yatodanga de yaumo o u'u'a.11Ngoi tiniohi'i de o a'ele, ma dudu'ngu na'o ngini niotoba'au o baradoha niodiai. Ma ngoio'a de aha womatengo woboa, Una awi 'uaha 'iholoi 'iamo'o de-de ngoi. Awi tarupa taai'i ma o yadaenua.12Una wo'ihi'ati-tinga'ou o nyawa ma owa de o nyawa ma diiha. Geena harage de o nyawa awi tatapa wagagaono wohitado'o awi gandumu mangale wohi'atinga'a ma afa de ma owa. O gandum geena aha walomu o tila-tila'a, duga ma afa wohitaulu o u'u'a nage 'aihone-honengua.>>13Wa'utu geena, o Yesus woboa o Galilea ma daerano de wotagi o Yordan ma ngaili'a la o Yohanes wiohi'i Una'a.14Ma o Yohanes wamao'u o yadaenua wiohi'i o Yesusi'a, ho wotemo, <<Aba, Ngona halingou noiohi'i, de idodoau ho Aba na'aino ngoino?>>15Ma o Yesus wotemo una'a, <<O geenau ngaro. Hababu de podiai 'ogeena, podiaio'au moi-moi ge ma Jou ma Dutu awi mau.>> Woihene 'ogeena, de o Yohanes wodinii'i o 'iau nage o Yesus wotemo'au.16Wiohi'i iduangino, de o Yesus womapuda ma a'elie. 'Ageena ena, o diwanga 'ipelenga de o Yesus wama'e ma Jou ma Dutu awi Omaha harage de 'ao namo dara widuguti Una'u.17Geena'a de ma Jou ma Dutu awi ilingi 'itemo, <<Nuuna to Ngoi 'ai Ngoa'a towihiboho-bohono. Una 'Ai hininga wahanaanga.>>
The Seed Company