O MATIUS28
1Wa'utu o sabat ma wange i paha'a, o dedewelano o hiaiini ma wange'u, o ngo Maria Magdalena de o ngo Maria nage maregu oli goona yo tagi ya taila'o o Yesus awi boohu'u geena.2I'todo'anino o tona'a itiwiwili duru ao guatino. Womatengo ma Jou awi malai'ata wo uti o horogano de wa lulu o heleo ma dadamunu geena, de wo gogele ma heleo ma de'u o'a.3Ma biono ma malai'ata guuna ma dararono harage ao leletongo, de awi pa'eanga duru ao garehe.4O hurudado ma nini'i nage yo goa-goana geena'a duru yohawana hiadono ona yo totowoworo, de manga rupa harage ao nyawa yo honengo'au.5O Malai'ata guuna 'itemo ma nge-ngewe'a'a goona, <<Uwa ngaro nio hawana! Ngoi ta na'o ngini niwihali'i o Yesus nage wihidelo'au geena.O malai'ata ihingahu na'o Yesus womomi'o'au6Una awi iwa neena'a. Una wo womomi'o'au harage awatehongo'au ma hila. Niaino nia taila'o awi diingi Una wipatiranga.7O oraha neena, nio tagi nimataiti nihingahu awi ni-nii'i'a, <Una wo womomi'o'au de neena naga wo hila'a wo ma hiadono de ngini o galilea'a. Do'a aha ngini niwi ma'e Una'a!> Nio da-danganono o i'au nage Ngoi to temoa ngini'a.>>8Ma nge-ngewe'a goona ayo ma taiti ya mada ma boohu'u geena. O dodato de o garago ima'aganu'u, ona yoma papalitana la yohingahu ma haala geena o Yesus awi ni-nii'i'a.9Itodo'anino o Yesus waino de yoma'ama'e de o nge-ngewe'a goona, de wote, <<tabea!>> Ho ona yai'a yoma hitigi Una'a, aha de ya'oo awi douno de wihuba Una'a.10<<Uwa nio hawana,>> o Yesus wotemo ona'a, <<Tagi nihingahu 'ai riadodoti'a la ona yotagi o galiea'a; do'a aha ona i'ma'e Ngoino.>>11Wa'utu ona o nge'omo ma gorona'a, o hurudado nage yogoa-goana o Yesus awi boohu'uo goona yolio o bendari'a de yohingahu o imam ma hae-hae'i'a moi-moi nage ida-dadio'au.12O imam ma hae-hae'e yoma'aaturu de o Yahudio'a manga balu-baluhu, geena'a de yo'ula o pipi hu-hurudado'a goona duru ao lamo'o.13De yote: <<Ngini halingou nio temo, geenala awi ni-nii'i yaino o wutu-wutu de Witohi'i wa'utu ngini nimaiduo'a.14De na'o ma Gubernuuru woihene ma haala geena, ngomi aha miwibaja una'a la ngini onidodoawa.>>15Ona yadawongo geena ma pipi de yadiai harage yo'ihibehehongo'au ona'a. De ma jarita neena yaedono'au o yahudi ma nyawa'a hiadono neena naga.16O Yesus awi ni-nii'i yamogio'o de moi goona yotagi ode'u o galilea'a hara de nage o Yesus wo'ihulo'o yo'ai'a.17Wa'utu ona wima'e o Yesus do'aena'a, ona wihuba Una'a. Ma maregu nage ona 'a yonga'uwahi.18O Yesus womahidutu'u ona'a, de wotemo, <<Moi-moi o 'uaha o horoga'a de o tona'o'a ihigiama ma hoato'au Ngoino.19Hababu geena nio tagi'au o hagala bangiha'a o dunia'a moi-moi, ni'idiai ona 'ai ni-nii'i. Ona ni'iohi'i de o Aba awi ronga, de Awi Ngoa'a, de o Omaha.20Ni'i doto'i'a ona ya mote'e nage tini hulo'o'au. De nio da-danganono Ngoi aha halalu dedengini hiadono o dunia ma baha.>>
The Seed Company