O MARKUS1
1Neena o Habari ma owa mangale o Yesus Kristus, ma Jou ma Dutu awi Ngoa'a.2O Habari ma Owa neena imulaenge, harage 'aitulihu'u'au o nabi Yesaya awi bo'u'u, 'onane:<<Ma Jou ma Dutu wotemo, <Nuuna to Ngoi 'ai hu-hulo'o;Ngoi towihulo'o una nowi hihila,La wohidiai to ngona ani nge'omo.>3Naga o nyawa o tona'a 'i'a'a'aha'a wohigaho-gaho'o, wotemo,<Nihidiai o nge'omo mangale ma Jou,Nihiri'oto o nge'omo mangale Una!> >>4Hara 'aitulihu'u'au ge, 'ogeenali o Yohanes woboa o tona'a 'i'a'aha'a. Una wo'iohi'i o nyawa de wohingahu o Habari ma owa ma Jouno. Una wotemo, <<Nimatogumu niodiai o baradoha de nio'ula nia roehe la niohi'i, la ma Jou ma Dutu waapongo nia baradoha>>5Moi-moi o Yudea'a de o Yerusalemo'a ma nyawa, yotagi o Yohanesi'a, ona yomanga'u manga baradoha, de o Yohanes wo'iohi'i o Yordan ma ngailo'a.6O Yohanes awi pa'eanga yadiai'u 'o unta ma gogono. Awi bulu 'ao aewani ma 'aino, de awi inomo 'ao 'aladede de o madu o bongani'a.7O Yohanes wohingahuoli o Habari neena, <<Neena ngoi iduangino, aha de womatengoli woboa Una iholoi wo'uaha dede ngoi. Tomaponu'u awi tarupa ma gumini tahohe ma 'oyadaenua.8Ngoi tiniohi'i de o a'ele, ma Una aha niwiohi'i de o Omaha 'Iofi-ofi.>>9Wa'utu geena o Yesus o Nasarete de waino o Galilea ma daera'a, de o Yohanes wiohi'i o Yesusi'a o Yordan ma ngailo'a.10Wa'utu o Yesus womapuda o a'elie, de wama'e o diwanga ipelenga de ma Jou ma Dutu awi Omaha widuguti, harage 'ao namo dara.11Geena'a de yoihene ma Jou ma Dutu awi ilingi o horoga'u itemo, <<Ngona 'Ai ngoa'a, tonihiboho-bohono. Ngona duru nodiai 'Ai hininga ihanaanga.>>12Geena iduangino, ena ma Jou ma Dutu awi Omaha 'awihigila-gila Wiaha o tona'a 'i'a-'a'aha'a.13O wange moruatino o Yesus geena'a, de o to'ata ma 'oana witaili. O aewani nage 'apapa-paliarawa ma demaena geena'a. De o ma-malai'ata wileleani Una'a.14Wa'utu o Yohanes woohi-ohi'i wihiohamo'au o bui'a, o Yesus wotagi o Galilea ma daera'a, de wohingahu o Habari ma Owa.15O Yesus wotemo 'onane, <<O wa'utu nage ma Jou ma Dutu wohitatapuo'au yaadono'au. Ma Jou ma Dutu woparetau o nyawa yonga'u-nga'u manga hidogorona'a. Mangale geenau ho, niamada niodiai o baradoha de nima'ilio ma Jou ma Dutu'a, de nionga'u o Habari ma Owa ge ma Jou ma Dutuno.>>16Wa'utu o Yesus waboa o Galilea ma talaga ma date'ino, o Yesus wo'ima'e ma talaga'a geena o Simon de ma dodoto o Andreas, ona ma gigiria'a yomadohoma o nao'o ma talaga'a geena.17Geena'a de o Yesus wo'iaho'o de wotemo, <<Niaino ni-nii'i Ngoi! Ngoi aha tinidoto'o o nyawa ni'ilomu-lomu la inii'i Ngoino.>>18'Ade yoiheni'a ena, ona yamada'au manga homa de winii'i'o'au o Yesusi'a.19Geena'a de o Yesus wohigila-gilali awi dodagi de wo'ima'eli o lia'a de dodoto ma homoali, geenala o Yakobus de o Yohanes, ona noona o Zebedeus awi ngoa-ngoa'a. Ona o ngootili ma doda'a, manga homa yohi'adiai ma gigiria'a.20Geena'a de o Yesus 'awogila-gila wo'iaho'o. Ho ona ma wimada'au manga dea o ngootili ma doda'a de yo'a-'arajaanga ge yo'ihewa-hewa. De ona ma yotagi winii'i o Yesusi'a.21O Yesus de awi ni-nii'i yomahiadoni'a o Kapernaum ma Bendari'a. Ipahi o hiani ma wange'u, geena'a de o Yesus 'awogila-gila woohama o Yahudio'a manga dodoomu ma woa'a de womulaenge wodoto'o geena'a.22Moi-moi o nyawa geena'a yoihene awi do-doto'o de duru yoheranga, hababu Una wodoto'o de awi 'uaha'a, 'aimaterowa de o agama'a yodoto-doto'o.23Wa'utu geena, o dodoomu ma woa'a geena womatengo o to'ata widongohami'a, ho ma nyawa guuna womaore-orehe, 'onane,24<<E Yesus o Nasaret ma nyawa nimidodoau ngomino? Nimihohonengou? Ngoi tonina'o'au, na'o Ngona geena ma Jou ma Dutu awi huhulo'o Noofi-ofi.>>25Ma o Yesus wodorohu ma to'ata geena, <<Nomaliili, tagi nohupu nowimadau ma nyawa guuna.>>26Ma to'ata geena widiai ma nyawa'a guuna hiadono woto-towoworo ho imaoreho'a de aha ihupu wimada ma nyawa guuna.27Moi-moi ma nyawa geena'a duru yoheranga de yotemo, <<Wolo bee'a niataila'o ho! Neena o do-doto'o ma hungi! Awi demo de ma 'uaha'a, ho o to'ata ma yanii'i awi pareta de 'i'o'ihupu.>>28Geena'a de imahi'ai'a o Habari mangale o Yesus yaedono'au o Galilea ma daera'a moi-moi.29Wa'utu o Yesus de awi ni-nii'i yohupu o dodoomu ibe-berehi ma woano, o Yesus, o Yakobus de o Yohanes yotagi o Simon de o Andreas manga woa'a.30Wa'utu geena, o Simon ma diotono o ngewe'a momaiduo'a o daha'a hababu migogama. Ho o Yesus de awi ni-nii'i yomahiadoni'a o Simon awi woa'a, o nyawa-nyawa yotemo o Yesusi'a, <<O Simon ma diotono o ngewe'a migogama.>>31O Yesus wa'ai'a de wagagao ami giami'a de miduhunu momomi'i. 'Ageena ena muna motogumo'au, ho muna mo'ihidiai yoodomo.32Wa'utu italuhou o wange 'itumuno'au, o nyawa yopa-panya'e de o to'ata yo'idodongohami'a yo'iaha o Yesusino.33Ho moi-moi ma nyawa o Bendaro'a geena, manga lepe yomalomuno ma woa ma ngoano'a.34Geena'a de o Yesus wo'ihiai'i o nyawa manga panya'e iini-ini'o'a, Una ma ma lepe waginii'i o to'ata nage yo'ido-dongohami'a. O Yesus 'awohigumadawa o to'ata geena imaade-ade, hababu ma to'a-to'ata geena wina'o'au o Yesusi'a.35Ma dewelano i'initau, o Yesus womomi'i de wohupu ho wotagi o diingi ilii-liili'a o bendara ma duduno'a de womadahaubayanga geena'a.36Ma o Simon de awi ma-manai wihali'i o Yesusi'a.37Wa'utu yoma'ama'eno de o Yesus, ona yotemo, <<Aba guru moi-moi o nyawa nihali'i.>>38Ma o Yesus wopaluhu, <<Niaino ngone pohigila-gila nanga dodagi o Bendara ma regu'ali nena'a naga nanga date-dateino. La geena'a ma Ngoi tohingahu o Habari ma Owa, hababu geenau ho Ngoi toboa'au.>>39Geena'a de o Yesus wo'a'adagi moi-moi o Galilea ma daera'a, de wohingahu o Habari ma Owa o dodoomu ma woa-woa'a, wo'ihiai'i o nyawa yopa-panya'e nage o to'ata yo'ido-dongohami'a.40O nyawa womatengo wopado-pado wa'aino o Yesusino de watilabu'u'u awi biono'a de wotemo, <<Aba na'o nomode'e, Aba 'anadadi 'ai panya'e nohiai'i.>>41O Yesus widora ma nyawa'a guuna, ho o Yesus wodonoa awi giama ma nyawa guuna awi hae'ie, de wotemo, <<Ngoi 'a tomode'e. Ho notogumou.>>42'Ageena'a de ma nyawa guuna awi panya'e 'iai'o'au, de wotogumo'au.43Geena iduangino, o Yesus wihulo ma nyawa guuna wotagi, de wihibehehongo 'onane,44Uwa nohi'a'angahu o nyawa-nyawa'a. Ma ngona 'iani notagi, de nohimaiti ani roehe ma imami'a, na'o ngona notogumo'au. Iduangino geena, ngona naaha ani aewani de nohihuba ma Jou ma Dutu'a, harage 'ao Musa wobehehongo'au. 'Ogeena ngona nodiai, la imadadi o du-dungu moi o nyawa-nyawa'a, na'o ngona igou-goungu ani panya'e 'iai'o'au.45Ma ma nyawa guuna 'awota-tagi'au wohiade-ade o nyawa-nyawa'a, o 'iau ida-dadio'au una'a. Ho o Yesus 'aidadiwau woohama womahimaiti o Bendari'a, Una womanoa 'ao Bendara ma duduno'au o dingii ilii-liilo'a. Ma ngaro 'ogeenau ma o nyawa 'aitoa-toa'ua yo'aino o Yesusino o 'ianou hona.
The Seed Company