O MATIUS24
1Wa'utu o Yesus wamada ma Jou ma Dutu awi woa, awi ni-nii'i ya'aino de wihidumutu ma Jou ma Dutu awi woa.2O Yesus wotemo ona'a, <<Niama'e'au, moi-moi geena? Tinitemo e, done 'ao heleo geena moio ma aima'aretenu'uwau ma dingio'a. Moi-moi aha itoropaha.>>3Geena'a de o Yesus wotagi wohawu o Saitun ma de'ude, Ho Wogogelu'u geena'a, de awi ni-nii'i ya'ai'a mangale yomau, yoma'aade-ade 'aona'a. Ona yohano, <<Nimihingahunou, muluo'a moi-moi geena imadadi. De 'o'iau ma dudunguu nage Ngona noboali, de o dunia ma baha ma?>>4O Yesus wopaluhu, <<Nimahidi-diai, uwa hiadono o nyawa nidaa'ala.5Hababu o nyawa aha manga lepe yoboa de yaaha 'ai ronga, de yotemo, <Ngoiou neena, ma 'Oana o nyawa wohiha-halamata!> Ona geena aha yo'idaa'ala o nyawa'a magilepe la yonii'i ona'a.6Ngini aha niogiihene o paraanga ma ilingi de ma habari, ma uwa niohawana. Hababu moi-moi geena halingou idadi, ma geena ama wa'utuwahi o dunia ma baha.7O bangiha moi, aha yoma'ahaturu de o bangiha. De o pareta'u moi, aha yoma'ahaturu de o pareta'u. Ia'a o dunia ma amo'ino neena, aha idadi o baulaco de o ohu.8Geena moi-moi aha 'imulaenge, ma hau'u harage 'a o ngewe'a momatengo moma'ualengou.9Geena'a de ngini ma aha nitago'o, de ngini aha nihigiama ma hoata la nihangihara de nitooma. Moi-moi o nyawa aha nibuhulu, hababu ngini geena, 'ai ni-nii'i.10Ma wa'utu geena o nyawa manga lepe aha ayonga'uwau Ngoino, de yoma'abuhulu moi de moi.11O nabi-nabi ma ngelu'u manga lepe aha yoboa, de yo'ielu'u o nyawa-nyawa'a.12O tingi'ai 'ai dogo monga, hiadono o nyawa ayadadiwau yoma'ahayanga.13Ma o nyawa nage tatapu 'Inga'u hiadono ma baha'a, ona geena aha ma Jou ma Dutu wo'ihihalamata.14De o Habari ma Owa, mangale icara'iau ma Jou ma dutu wopareta, aha ihihabari o dunia'a moi-moi, la moi-moi o nyawa yoihene.>> Geena ipaha de aha o dunia ma baha.15<<Ngini aha niwima'e, <Womatengo nage 'awidomote'uwa ma Jou'a aha wodiai ma Jou ma Dutu awi woa 'a iofiwau>, harage o nabi Daniel watehongo'au, (Nagoonau yabaca neena, niataila'o icara'iau ma mangariti)16Wa'utu geena, o nyawa-nyawa ge yomanoa-noa o Yudea'a halingou yoloa o de'ude.17O nyawa nage da'u manga woa ma de'uo'a, uwau youti manga woa ma doda'u mangale manga 'iani yaehe.18O nyawa nage manga bailo'a yai'a, uwa yoma'ilio yaehe manga baju i'a'a'ulu'u.19De duru yohangihara ma wange'u geena, nage o nge-ngewe'a yohiaha-aha, de o nge-ngewe'a yongoa'a ma ehano.20Nimadahaubayanga la uwa o beha-beha'a ho o Hiaini ma Wange'u de ngini nioloa!21Ma oraha geena o hangihara aha idadi nage omaiwahi idadi imulaenge o dunia idadi hiadono neena, de aha 'omaiwau idadi.22Na'o ma Jou ma Dutu 'awohitipowa ma oraha, maraio'au 'amoiwau yowango-wangohi. Ma duga Awi 'awaha, ho wohitipo'o ma oraha geena.23Ma oraha geena na'o moi yotemo ngini'a, <Bee'a niwima'e! Ma 'Oana wohiha-halamata nengo'a bolo geena'a naga>, Uwa nio'inga'u.24Hababu aha demaena yohiha-halamata ma ngelu'u de o nabi-nabi ma ngelu'u. Ona aha yodiai o 'iau hona ge 'abiahawa de o haala 'ihera-heranga mangale yo'ielu'u de poelua ma Jou ma dutu awi 'awaha ma yo'ielu'u.25Ngoi tinihidemo'au 'a ma orahuwahi ma haala geeena idadi, ho nioda-danganono.26Na'o o nyawa yotemo ngini'a, <Una do'a o tona'a 'i'a-'aha'a,> uwa nia'ai'a. E'ola na'o yotemo, <Una womaiyuni'a nengo'a o ngiio'a,> uwa nionga'u.27Hababu o Nyawa ma Ngoa'a woboa harage 'a o leletongo 'ica-cawi daiiha o wange ma hiwa'a de ma hiwa hiadono o wange ma dumuniha.28'Ia'a naga o 'aewani ma honenge geena'a o wogono 'imalomu.>>29<<Nage o huha ma oraha ipaha'a, 'aitaaowa de o wange italuhu, o mede 'aihiwawau, o ma-mamanga o diwango'a ma iota'a, de moi-moi da'u o ngawa-ngawa'a i'aruae.30Geena iduangino, aha niama'e o du-dungu o diwango'a mangale o Nyawa ma Ngoa'a woboa. Wa'utu geena moi-moi o nyawa o dunia'a neena aha yo'o'iali. Ona wima'e o nyawa ma Ngoa'a woboa wihaono o 'amo-amo de awi uaha de awi 'umati 'iamo-amo'o.31De o trompet ma ilingi nage duru iamo-amo'ie yawua'a, de o Nyawa ma Ngoa'a aha wo'ihulo'o awi ma-malai'ata yo'ilomu awi awaha o dunia ma libu'u hoata, o diwanga ma baha'a hiadono o diwanga ma baha'a.>>32<<Nimadegehe, de nimadoto'o ara ma utuno, na'o ma jaga-jaga ibo-boo'o de tooli, geena ngini niana'o o ngogoro ma oraha ihorio'au.33O geenali ma, na'o ngini nima'e o huha de o hangihara nage tinihideno'au moi-moi geena la idadi, geena ngini aha nia na'o o Nyawa ma ngoa'a 'ihorio'au woboa.34Nioihene hididiai! Ma haala geena aha idadi, ge o nyawa ayowango-wangohi o oraha neena, ayobotuahi yohonenge.35O diwanga de o dunia aha iihanga, ma 'ai demo-demo 'ahiado-adoni'a.>>36<<Amoiwa yana'o muluo'a ma wange de ma oraha, o ma-malai'ata o horoga'a ma 'ayana'owa, ma Jou ma Dutu awi Ngoa'a ma awana'owa, duga 'a ma Dea wana'o.37Na'o o Nyawa ma Ngoa'a woboa, geena imadadi harage ama hila ma oraha o Nuh.38Nage wa'utu o nguuihi ma amo-amo'o 'ai boawahi, moi-moi yoodomo de yoo'ele, yomodo'a, o geenau aitauria hitigi o Nuh woohama o 'apa'a.39Wa'utu o nguuihi yo'idoboa, geena'a de aha yomatodo'ana o 'iau idadio'au. O geenali de o Nyawa ma Ngoa'a woboa.40Ma oraha geena, na'o o nyawa yamididi manga bailo'a yoarajaanga, womatengo o Nyawa ma Ngoa'a aha wiaha de womatengo wimada'u.41Na'o o ngewe'a yamidi yotutu'i'a o gandumu, momatengo o Nyawa ma Ngoa'a aha miaha, de momatengo mimada'u.42Ho, halingou nimagoa-goana, hababu ngini 'ania na'owa muluo'a nia Jou woboa.43Niangano-nganono neena! Na'o ho o woa ma dutu womatengo wana'o'au, o ta'o muluo o wutu'u de yotohi-tohi'i yoboa, maraio'au aumaiduwa, la yotohi-tohi uwa yodongohama awi woa'a.44Hababu genau ho, ngini ma iani nimagoa-goana. Hababu o Nyawa ma Ngoa'a woboa ma oraha aniana'owa.>>45O Yesus wotemoli, <<Na'o o geena, o gilaongo naguunau wohingou-ngounu de wobarija una geena aha awi tuanga wigoa'a la wo'ihidadibaluhu o gilaongo'a ma regu, la wo'ihiodomo na'o ma wa'utu'u.46Duru wohanganga ma gilaongo guuna. Na'o awi tuanga woliono ena una awi arajanga wagoa'a ma gi-giria'a.47Tinitemo e, ma tuanga guuna aha wihigagao moi-moi awi 'arata awi gilaongi'a guuna.48Ma na'o o gilaongo awi hininga itiiha, aha awi hininga'a wotemo,49<'ai tuanga ma daaohi aha wolio,> Geena'a de una wo'ipoha o gi-gilaong ma regu'a, de yomahidoodomo de yomahidoo'ele de o nyawa yomaeto-eto.50Geena'a de awi tuanga wolio ma wange de ma oraha awa na'owa ena woboa'au.51Ma tuanga guuna wipoha awi gilaongi'a witii-tiiha'a, de wiumo o nyawa yoelu-elu'u manga ngii'a, geena'a do'a ona yoali de duru yohangihara.>>
The Seed Company