O MATIUS23
1Geena'a de o Yesus wo'itemo o nyawa yolepe-lepe'a de awi ni-nii'i'a,2<<O agama'a yodoto-doto'o de o Farisio'a ma nyawa yo'i'ula o haaka, la ihimangariti o Musa awi hu'umu.3Ho, o iauhona yohulo'o niodinii'i, ma uwa niadiai o 'iau yadiai, hababu ona yodinii'ua o'iau nage yohidoto-doto'o.4Ona ihigegoto o haala ihu-huha, de o autoranga itu-tubuho, ena momongo ona mahirete ma, ona 'ayo'iduhunua la onyawa yadiai ma 'autoranga geena.5Moi-moi geena yadiai duga 'ayomau la o nyawa yama'e. Ona yaigo yomahinoa o bo'u 'ibe-berehi ma ngii ma bubuhu'u 'ingoa-ngoata ge manga hae'o'a de manga giamo'a, de manga baju i'a'-a'ulu'u ma renda-renda ya'a-'a'ulu'u!6Na'o ona yoohama o rame'a de o dodoomu 'ibe-berehi ma woa'a geena ona yaigo yogogele o dingii yaowa-owa'u dina ma bioniha.7Ona yohanaanga na'o o nyawa-nyawa o paharo'a yo'ihoromati ona'a, de yo'iaho'o, <Aba guru>.8Ma ngini, uwa niomode'e niaho'o, <Aba guru>, hababu nia Guru geenala aumatengo'a, de ngini neena moi-moi 'a o riado-doto.9De o nyawa o dunia'a neena 'amoi ma uwa ni'iaho'o, <Aba>, hababu nia Aba geena duga 'awomatengo'a da'u o horoga'a.10De ngini ma uwa niomau niaho'o, <Tuanga ma amo'o>, hababu nia tuanga ma amo'o geena, duga awomatengo'a, geenala ma 'Oana nihiha-halamata nage ma Jou ma Dutu wohijajio'au.11O nyawa nage neena naga iholoi woamo'o nginio'a, geena halingou wodadi o gilaongo ngini'a.12O nyawa nage yomahiie, geena ma Jou ma Dutu aha wo'ihidaduu'u, de o nyawa nage yomahidaduu'u, aha wo'ihidaduie.>>13<<Niobodito ngini, o agama'a nio doto-doto'o, de Farisio'a ma nyawa, moi-moi ngini nimaelu-elu'u. Nginiou geena nii'i tato'o nyawa nage yomau yodadi ma Jou awi 'awaha. Ma ngini mahirete anioolu'u nio dadi ma Jou awi 'awaha. De o nyawa ma regu nage ayomede'e ma ngini nii'i tato'o.14[Niobodito o agama'a nio doto-doto'o, de o Fariso'a ma nyawa, ngini nimaelu-elu'u. Ngini ni'idaa'ala o ba-bao de niaora manga woa. De na'o nimadahaubayanga geena nia'a-'a'uli'a la o nyawa nina'o ngini o nyawa ma owa. Geenau ho tingini nia hu'umu aha 'iholoi aha 'itubuho.]15Niobodito ngini, o agama'a niodoto-doto'o, de o Farisio'a ma nyawa! Ngini nimaelu-elu'u! Ngini nio'a-'adagi o tona'a de ngooti'a, mangale nio mau wotengo woohama 'ania agama'a, ngini niwidiai ma nyawa guuna aha woohama o naraka'a, nage iholoi itiiha dedengini.16Niobodito ngini o balu-baluhu ge niomau nio'ituda ena momongo 'animahima'ewa! Hababu ngini ni'idoto'o 'onane, <Na'o o nyawa yo'oboto de ma Jou ma Dutu awi Woa, ngaro 'ayodiaiwa ma 'aido-doawa. Ma na'o Yo'oboto de ma Jou ma Dutu awi woa ma gurahi, manga 'oboto geena halingou yadiai.>17Ngini o nyawa niohuma-huma de niopilo-pilo'o! Ia'a iholoi ibaraguna: O Gurahi bolo ma Jou ma Dutu awi woa nage ihi Ofi ma gurahi geena?18Ngini ma ni'idoto'o onane, <Na'o moi yo'oboto de o hada'a yodu-dutuu'u ma ngii, geena ngaro manga 'oboto 'ayadiaiwa ma 'aido-doawa ma na'o yo'oboto de o hu-huba nage to ena ma ngiio'a, geena halingou yadiai.>19Ngini duru niopilo'o'au! Ia'a iholoi ibaraguna? O huhuba, bolo o huhuba yodu-dutu'u ma ngii ge Ihiofi ma huhuba geena?20Mangale geenau ho, na'o moi yo'oboto de o huhuba ma ngii yodudutu'u, geena ma mangariti ona yo'oboto'au de o hada'a ma ngii yodudutu'u, de moi-moi o huhuba nage ma ngiio'a geena.21De na'o moi yo'oboto de ma Jou ma Dutu awi woa, geena ma ona yo'oboto'au de ma Jou ma Dutu, hababu Una womanoa geena'a.22De na'o moi yo'oboto de o horoga, geena ona yo'oboto'au de ma Jou awi gogogele, de nage ma Jou ma Dutu'a nage wogogelu'u geena'a.23Niobodito ngini o agama'a niodoto-doto'o de o Farisio'a! Ngini nimaelu-elu'u. O rampa-rampa harage o sulasi o adas manisi de jintana ma nio'ula ma do'u mogioo'o ma Jou'a. Ena momongo, o 'iau naga ge 'iholoi ibaraguna o agama ma hhu'umu harage de o adili, o dora de o hingounu 'aniodinii'uwa. Ena geenau iholoi ibaraguna niodinii'i de ma ho-homoahi ma niodinii'i.24Ngini neena niohibalu-baluhu niopilo-pilo'o! O guulu nia a'elo'a geena nia'ayahi, ena momongo o unta aniaahilou.25Niobodito o agama'a nio doto-doto'o, de o Farisio'a ma nyawa! Ngini nima elu-elu'u! Ngini nia wowango harage de nia hawo-hawo, de nia hude-hude ama dudunino niaiho'o niabe-berehi'a, ma ma doda'a duru 'a o beree'e, hababu moi-moi nia ma'e geena, 'a de nia hininga ma diiha de nia dopo'ana.26Ee ngini! O Farisio'a ma nyawa nage niopilo-pilo'o, nia berehi'ahi nia hawo-hawo'o de hude-hude ma doda'u, la ma dudunino ma iberehi.27Niobodito ngini o agama'a nio doto-doto'o, de o Farisio'a ma nyawa! Ngini nimaelu-elu'u! Ngini harage 'ao boohu'u nage ma dudunino yaceeto'a ma ceete 'iare-arehe, ho ma duduni'ia pama'e'a ma rahaio'a, ena ma doda'a do'a o 'obongo de o gaaailide duru ibounu.28O geenali de ngini. O nyawa nima'e'a 'aniaowa, ena nia hininga ma doda'a, geena yaomango'a de o ngelu-ngelu'u de o diiha.29Niobodito ngini o agama'a niodoto-doto'o de o Farisio'a ma nyawa nage nimaelu-elu'u! Ngini niodiai o nabi manga boohu'u de o nyawa ma owa-owa manga tugu mangale ni'ida-danganono.30De niotemo, <Na'o ho ngomi miowango ma oraha mia edete de mia dotumohi ma hila, tanu ngomi amionii'ua miotooma o nabi-nabi.>31Ho nginiou mahirete nimahidemo na'o ngini geena o nabi-nabi yo'ito-tooma manga guti'u.32Na'o 'ogeena de ika nihigila-gilade niohitotomi'a o ba-baradoha nage nia edete de nia dotumu yamulaengo'au.33Ee ngini neena o nyawa ma diiha ge o nyawa ma diiha manga guti'u harage de o ngia 'ibiha-biha. Maraio'au ngini idadiwa nimahilehene o hu'umino nage o naraka'a.34Hababu geena, ngoi aha to'ihidingoto ngini'a o nabi-nabi de o nyawa yopade-pade de yodoto-doto'o; munu'a aha nio'itooma, de munu'a nio'ihidele o salipo'a, de munu'ali nio'ihangihara o do-doomu ma woa-woa'a, de nio'iginii'i o bendara moio'a de o bendara maregu'a.35Geenau ho, ngini aha nihu'umu hababu ni'itooma o nyawa nage manga hala 'a'oiwa 'imulaenge o Habelo'a, hiadono o Zakharia o Berekhya awi ngoa'a nage niwitooma ma Jou ma Dutu ma hirete awi woa de o hu-huba yodu-dutuu'u ma ngii ma hidogorona'a.36Ngoi tinitemo e,: Ma haala neena moi-moi aha o nyawa-nyawa ma oraha neena naga yamo'u.>>37Geena iduangino de o Yesus wotemo, <<Sio o Yerusalem ma nyawa! Ayosio ee! Ngini ni'itooma'au o nabi-nabi! Nio'iheleo nio'ihonengo'a ma Jou ma Dutu awi hu-hulo'o! 'Igi-giliou tomau tiniduhunu harage o namo ma eha, ma ngoa'a yagoanino yaporonu'u, ma ngini nioolu'u!38Hababu geena ma Jou ma Dutu 'a de de nginiwau.39Nioda-danganono e! Neena de 'imahi'ai'a ngini aha 'anima'ewau ngoi. Hiadono niotemo, <Ucehehe! Niwihibara'ati Una ge woboa de ma Jou awi 'uaha!> Aha de nima'eli.>>
The Seed Company