O MATIUS19
1Iduangino o Yesus wodoto'o geena moi-moi, Una wamada o galilea ma daera de wotagi o Yudea ma daera'a ge o Yordan ma ngaili ma hononga'a.2Manga lepe o nyawa winii'i, de wo'ihiai'i yopa-panya'e geena'a.3Geena'a de o Farisio'a ma nyawa yoboa de wibole ma goa-goa. Ona yohano Una'a, <<Imote'e nanga agama ma autoranga, bote 'aidadi mia we'ata mi'iolu'u, ngaro o iwa ma hababuma?>>4O Yesus wopaluhu, <<Ngini ma marai nia baca'au, o bo'u Ibe-berehi ma doda, hababu wa'utu o nyawa idi-dihila'a wo'itulada geenala o ngewe'a de o naulu?>>5De iduangino Una womaade-ade, <<Mangale geenau ho, o nau-naulu yo'imada manga eha de manga dea, de yorimoi de manga we'ata, ho ona yamididi yodadi amoiou.>>6Ho ona 'amodidiwau, ma 'amoiou. Mangale genau ho, o 'iau nage ma Jou wo'ihi'arimoio'au, 'aidadiwa o nyawa ihi'atinga'a.7Geena'a de o Farisio'a ma nyawa yohano Una'a, <<Na'o o geena idodoau ho, o Musa wo'ihigumada yoma'aolu'u, itigoo'o de manga ngo-ngolu'u ma hurato'a?>>8O Yesus wopaluhu, <<Mangale 'ania hae'e ma gopini ho, o Musa niwihigumada ni'iolu'u nia we'ata. Ma na'o ma hila 'a'o geenawa.9Ho nioihene nihidi-diai: Nagoonau manga we'ata ayohowonua de yo'iolu'u, geena'a de yomodo'a de o ngewe'a moioli, geena ma nyawa guuna wohowono'au.>>10Ho awi ni-nii'i yohano o Yesusi'a, <<Na'o o giabere'i la imadadi ma rupa o geena, iholoi yaowa uwau pomodo'a.>>11Ma o Yesus wotemo ona'a, <<'Ama moiu'uwa o nyawa yodinii'i ma demo-demo geena, duga 'ao nyawa nage ma Jou wo'iili-ili'o'au.12Hababu, naga ma regu o nyawa 'ayo modo'awa, mangale ayomaboanohi ena o geenau. Ma regu ayomodo'awa mangale o nyawa yo'idiai. De ma reguoli ona mahirete ayoolu'u yomodo'a, mangale yomau wile-leani ma Jou'a. Nagonau yoma-mangariti ma ade-ade neena, mada'au la yoma-mangariti.>>13Geena'a de o nyawa yo'iaha o ngoa-ngoa'a ma ete'e o Yesusi'a, la Awi giama wo'idatami manga hae'ie, de wo'idahaubayanga. Ma awi ni-nii'i yo'i ngamo ma nyawa-nyawa goona.14Ma o Yesus wotemo ona'a, <<Ni'i mada'a o ngoa-ngoa'a yo'aino Ngoino! Uwa ni'itaaele, hababu, o no-noonau ma nyawa geena yodadi ma Jou awi umata.>>15Geena'a de o Yesus wodonoa awi giama manga hae'ie de wo'ihibara'ati. Geena'a de Una wotagi.16O wange moi'u, o nyawa womatengo wo'aino o Yesusino, de wotemo, <<O haala yaowa-owa itoto'iau tadiai la tama'e o wowango 'ahiado-adoni'a?>>17O Yesus wopaluhu, <<Idodoau ho nohano Ngoino, o 'iau yaowa-owa? Duga 'amoio'a yaowa-owa. Na'o ngona nomau nowango, ngona halingou nodinii'i moi-moi ma Jou awi pa-pareta.>>18Ma nyawa guuna wohanoli, <<Ia'aena geena ma pareta.>> O Yesus wopaluhu, <<Uwa notooma, uwa nohowono, uwa notohi'i, uwa nodadi o ha'ihi ma ngelu-ngelu'u,19no'ihoromati ani eha de ani dea; de no'idora nimahinyawa-nyawa'a, harage nadora to ngona ani roehe ma hirete.>>20Ma nyawa ma goo guuna wotemo o Yesusi'a, <<Moi-moi geena tadiao'au, ho o iahi ma 'uranga?>>21O Yesus wotemo una'a, <<Na'o nomau notiai, notagi nawu'unu moi-moi ani arata. Ma pipi no'i'ula o nyawa yohu-huha'a, la ngona aha nama'e o arata o horoga'a, geena iduangino na'aino de noinii'i Ngoi!>>22Wa'utu una woihene o Yesus awi demo-demo o geena, una wotagi de awi hininga ma huha, hababu una duru wo'aya.23Geena'a de o Yesus wotemo awi ni-nii'i'a, <<Tinitemoe, duru 'ao huha o nyawa yo'aya-'aya yoohama ma Jou awi pareta'a.24Tohigalioli tinitemo ngini'a, Iholoi igapanga o unta iohama o huhumu ma pidahi'a, na'o o nyawa yo'aya yoohama ma Jou awi pareta'a.>>25Wa'utu awi ni-nii'i yoihene o Yesus womaade-ade o geena, ona duru yoheranga, ho ona yotemo, <<Na'o 'ogeena nagonau aha yohalamata?>>26O Yesus wo'ida-dananoho de wotemo, <<Na'o 'ao nyawa'au, maraio'au adadiwa! Ma mana'o ma Jou o'iauhona maraio'au idadi.>>27Geena'a de o Petrus wotemo, <<Nimitaila'o, ngomi moi-moi mia mada'au, la niminii'i Ngona'a Aba. Ho o 'iau aha mia ma'e?>>28O Yesus wotemo ona'a, <<Nio nga'u: Wa'utu o dunia ma hungi idadioli, o Nyawa ma Ngoa'a aha wodogogele o 'oana ma go-gogele ibe-berehi. Wa'utu geena ngini 'ai ni-nii'i aha nio o go-gogele mogio'o de modidi, de nia pareta o Israel ma bangiha mogio'o de modidi!29De nagonau yamada'au manga woa, manga riadodoto o ngewe'a e'ola o naulu, e'ola manga eha de manga dea, manga ngoa-ngoa'a, e'ola manga baili, ma nyawa goona aha yama'e ilio, muna ilape o ratuhu moi'a. De ona aha yama'e o wowango 'ahiado-adoni'a.30O nyawa manga lepe o oraha neena yobaraguna aha ayobaragunawau, de o nyawa 'ayobaragunawa aha yobaraguna.>>
The Seed Company