O MATIUS18
1Wa'utu o Yesus awi ni-nii'i yo'ai'a de yohano Una'a, <<Nagonau iholoi yoamo'o ma Jou ma Dutu awi 'awaha ma hidogorona'a?>>2O Yesus wo'iaho'o o ngoa'a ma ete'e moi de wohulo'o la womahigo'ono manga biono'a.3Geena'a de Wotemo, <<Nio nga'u! Duga nagonau yadadi yomangali harage 'ao ngoa'a ma ete'e neena, geena aha yodadi ma Jou ma Dutu awi awaha.4O nyawa nage manga hininga yohitipo'o'u de yodadi hara'ao ngoa'a ma ete'e neena, goona iholoi yoamo'o ma Jou ma Dutu awi 'awaha manga hidogorona'a.5De nagonau yo'idawongo o ngoa'a ma ete'e neena mangale inga'u Ngoino, geena ona idawongo'au Ngoi.>>6O Yesus wotemoli, <<Nagonau yo'idiai o ngoa'a ma ete-ete'e neena hitigi 'ai nga'uwau, iholoi yaowa manga toma'u ihili'o o heleo 'iamo-amo'o de yo'itapu o gahi ilu'u-lu'u'u.7Nio bodito o nyawa-nyawa o dunia'a neena, mangale o haa-haala geena hitigi o nyawa yobaradoha. Igoungu o haala o ge-geena aha de maena, ma yobodito o nyawa yodi-diai o hababu!8Na'o la ani giama 'e'ola ani dou, nidiai nobaradoha, naoto la naumo'au. Hababu iholoi yaowa nowango de ma Jou ma Dutu de ani giama 'e'ola ani dou ama hononga'a, uwahiadono de ania giama de ani dou imahiodu-odumu ma niumo o naraka'u.9De na'o ani la'o nidiai ho nobaradoha, iholoi yaowa na'uapete la naumo'au. Hababu iholoi yaowa na'o ngona nowango de ma Jou ma Dutu de ani la'o ama hononga'a. Uwa hiadono de la'o modidio'a ma niumo o naraka'u.>>10Nia hi-hingina, 'ao nyawa moi'a ma 'aidadiwa ni'ihohedu o nyawa biaha, harage 'ao ma ete'e noona. Hababu o nyawa-nyawa noona de manga malai'ato'a da'u o horoga'a de ma Jou ma Dutu.11Hababu o Nyawa ma Ngoa'a woboa o duniano neena duga wo'ihihalamata o nyawa yoba-baradoha!12Icara'iau nia ma-ma'e? Na'o bali womatengo awi o duba o dutu o ratuhumoio'a, de iihanga o dutu moi, bee'a done o 'iau wodiai ma nyawa guuna? Maraio'au una wamada awi duba ge o dutu morihiwo de hiwo ge o de'uo'a, de wotagi wahali'i ge iiha-ihanga.13Tinitemoe, na'o una wama'e awi duba geena, una duru womagarago mangale o dutu moi geena, ngaro de o dutu morihiwo de hiwo ge aiiha-ihangua.14O geenali de nia Dea da'u o horoga'a, Awoolu'u de o nyawa moio yonga'uo'au ge Ngoino de yoihanga.15<<Na'o 'ani riado-doto wodiai o baradoha ngona'a, no'ai'a de nowihimaiti awi hala. Nadiai geena 'a nima hibongonino nimididio'a. Na'o una wodomote'e ani demo-demo, geena ngona nowia'unu uma'ilio.16Ma na'o o uwa, no'iaha o nyawa wometengo e'ola yamididi. Hababu o bo'u Ibe-berehii'u itulihu'u'au, <Na'o ngone powitae wahala, halingou ma ha'ihi ma 'urangu'u yamididi e'ola yahaange.>17Na'o una awoihenua ania hitiari geena, nihingahu o jamaa'ati'a awi haala geena. De na'o una awoihenua o jama'ata manga hitiari, una geena powihitero harage 'ao baliteenge yoga-gaaho'o ge yoba-balehuta, nage ma Jou awi na'owahi.>>18<<Tinitemoe: O 'iau nage anihigumadawa o dunia'a neena, geena ma ma Jou ma Dutu awohigumadawa. De o 'iau iigumada o dunia'a neena, geena ma ma Jou ma Dutu wohigumada o horoga'a.19De tinitemoli ngini'a: Na'o neena'a naga nginio'a yamididi o dunia'a neena yohaubayanga de 'ao hininga moi, o 'iau hona ona yogaaho'o manga haubayanga geena wadawongo 'ai dea da'u o horoga'a.20Hababu 'ia'a yamididi e'ola yahaange yolomuno mangale yonga'u Ngoino, Ngoi naga dede ona.>>21Geena'a de o Petrus wohano o Yesusi'a, <<Jou, na'o 'ai riado-doto wodiai o baradoha ngoino, halingou ma muluo ngoi towiapongo? Hitigi ma tumudiingi?>>22O Yesus wopaluhu, <<O uwa hitigi 'ama tumudiingua, ma ma moritumudiingi de nohidigali ma tumudiingi!23Hababu na'o ma Jou ma Dutu wopareta geena harage 'ao hi'atero neena: Ma 'oana womatengo yoma'adoimi manga nagimi de awi gi-gilaongo.24Wa'utu una wo'ipiri'iha, wihitaali woma tengo awi gilaongo nage awi nagimi ijuta-juta.25Ma gilaongo guuna awaaunuau wohangu awi nagimi. Ho, ma 'oana wopareta, la ma wigilaongo guuna, de awi ngoa'a, de awi we'ata, de awi arata moi-moi, yawu'unu la ihihangu.26Ma gilaongo guuna watilabu'u'u, ma oana awi biono'a de wogaaho'o, <Tuanga, tanu uwahi noido-doa'ani. Maraio'au ngoi to hangu moi-moi 'ai nagimi.>27Geena'a de ma 'oana widora una'a, ho una wai'ili moi-moi awi nagimi.28Wa'utu ma gilaongo guuna wohupu, una yoma'ama'e de awi manai o 'arajaanga moi, una ma de awi nagimo'a o ribuhu muluo naga. Una witago'o awi manai guuna, de wigoodongo, de wotemo, <Nohangu moi-moi ani nagimi!>29Geena'a de awi manai guuna watilabu'u'u awi biono'a, de wogaaho'o, <Uwahi manai, moi-moi aha tohangu!>30Ma una awoolu'u. Walelono de awi manai guuna wihiohama o bui'a, hitigi moi-moi wohangu awi nagimi.31Wa'utu ma gi-gilaongo ma regu yama'e 'ogeena idadi, ona duru manga hininga ihuha, ho yohingahu ma haala geena ma 'oani'a.32Geena'a de ma 'oana wiaho'o awi gilaongo ge awi hininga iti-tiiha de wotemo una'a, <Ee gilaongo ani hininga iti-tiiha! Moi-moi ani nagimi tai'ilo'au mangale anoma dodora'u.33Ho ngona ma halingou no'idora ani ma-manai'a, harage 'angoi tonidora'au ngona'a?>34Ma 'oana duru wongamo ho ma gilaongo awi hininga iti-tiiha ge wihiohama o bui'a, hitigi awi nagimi wohangu wabo-boti'a.>>35O Yesus wohibobaha awi jarita, de o demo-demo 'onane, <<O geenali de 'ai Dea da'u o horoga'a aha niwihidiai ngini'a moi-moi, na'o ngini ni'iapongo 'ania riado-doti'a de 'ania hininga 'ade ma ngodumu.>>
The Seed Company