O MATIUS17
1O wange butanga ipaha'a o Yesus wo'iaha o Petrus, o Yakobus de ma dodoto o Yohanes, ona yoma'anii'i yohawu o de'u moi i'a'a'ulie. Geena'a amoiwa o nyawa ma homoa.2Geena'a manga biono'a, o Yesus awi biono ingali: Awi biono ma hiwa harage 'ao wange de awi baju i'a'a'ulu'u ma iarehe ileto-letongo.3Geena'a de awi ni-nii'i yo'ima'e o Musa de o Elia yoma'ade-ade de o Yesus.4Geena'a de o Petrus wotemo o Yesusi'a, <<Aba guru, duru 'a o hanaanga ngone neena'a. Ho na'o 'anomode'e, ngomi tohigo'o o woa-woa haange neena'a: Moi to Ngona Aba guru, moi to Musa de moi to Elia.>>5Wa'utu o Petrus awomaade-adehi, itodo'anino o 'amo-amo ita-tararono iuti de yo'itamunu. Geena'a de ona yoihene o ilingi o 'amo-amo ma dodano itemo 'onane, <<Nuuna to Ngoi 'ai ngoa'a to wihiboho-bohono, Una 'ai hininga wahanaanga. Niwigihene Una'a.>>6Wa'utu o Yesus awi ni-nii'i yoihene ma ilingi geena ona duru yohawana hitigi ona yomapaga o tona'u'u.7Geena'a de o Yesus wa'ai'a de wo'i 'ayabete, de wotemo, <<Nio momi'i. Uwa niohawana!>>8Wa'utu ona manga hae'e yapetade geena'a 'amoiwau duga 'a o Yesusou womatengo'a.9Wa'utu ona youti ma de'u'u geena, o Yesus wo'ihibehehongo ona'a, <<Uwa nihi'a'angahu amoi'a ma 'aano ge nia ma'e-ma'e, hitigi o Nyawa ma Ngoa'a womomi'i o honengino.>>10O Yesus awi ni-nii'i yohano Una'a, <<Idodoau ho o agama'a yodoto-doto'o yotemo bali halingou o Elia ihila woboa?>>11O Yesus wopaluhu, <<Itiai, o Elia aha woboa ihila la wohi'adiai o hagala moi-moi.12Ma Ngoi tinitemo, o Elia woboa'au, duga o nyawa-nyawa awi na'owa; Ona widiai imote'e to ona manga mau. O geenali ona aha widiai o Nyawa ma Ngoa'i'a.>>13Geena'a de aha ona yomama-mangariti, na'o o Yesus awi ade-ade mangale o Elia, geenala ma dumutu 'ao Yohanes woohi-ohi'i'a.14Wa'utu o Yesus de awi ni-nii'i ge yahaange yoma'iliooli o nyawa yolepe-lepe'a, geena'a o ngoa'a o naulu womatengo woboa de watilabu'u'u o Yesus awi biono'a.15De wotemo, <<Aba guru, tanu nowidora 'ai ngoa'a. Una wimuhu-muhu'u duru hangihara, ho na'o widoboano i'ade woota'a o u'u'u de o a'elu'u.16Ngoi towiaha'au ani ni-nii'i'a ma ona ayadadiwa yaai'i.>>17O Yesus wopaluhu, <<Wolo hara 'ao gu-guulewa ngini neena! Itiaio'au ngini o nyawa 'anio nga'u-nga'uwa de nio ba-baradoha, ma daao muluonohi halingou Ngoi dede ngini? De ma daao muluonohi Ngoi halingou toma tongohono.? Niwiahano ma ngoa'a guuna.>>18Geena'a de o Yesus wodorohu ma to'ata geena de wahulo'o la ihupu ma ngoa'ino geena. Geena'a de ma to'ata ma ihupu, ho 'ageena ena ma ngoa'a guuna wotogumo'au.19Geena'a de awi ni-nii'i yotagi o Yesusi'a wa'utu o Yesus 'awoma tengo'a de yohano, <<Aba guru, Idodoau ho ngomi amiadadiwa mia ginii'i ma to'ata geena?>>20O Yesus wopaluhu, <<Hababu nia ngonga'u 'ai 'uatua. Nia ngano-nganono! Na'o nia ngonga'u de maena, ngaro ma ete'e harage 'a o Sawi ma mui, ngini 'aidadi nio temo o de'u'a neena, <Nomahelo do'angi'a!> Maraio'au ma de'u geena imahelo. Moi-moi 'ania dadi niadiai! Ho itigoo'o nio nga'u ma Jou'a.21[Ma ngini ma halingou nia na'o, o omaha ma diiha o ne-neena 'ai dadi paginii'i duga 'a de o haubayanga de o puaha.]>>22Wa'utu o Yesus de awi ni-nii'i yolomuno o Galilea'a, Una wotemo ona'a, <<'ai taaowau ena o Nyawa ma Ngoa'a wihigiama ma hoata o nyawa-nyawa'a.23Una aha witooma, ma 'a o wange haange ena wowango'auoli.>>
Wa'utu awi ni-nii'i yoihene o geena de manga hininga duru ihuha.24Wa'utu o Yesus de awi ni-nii'i yomahiadoni'a o Kapernaum ma bendaro'a, o nyawa ge yoga-gaaho'o o balahitenge mangale ma Jou ma Dutu awi woa yo'aino o Petrusino de yohano, <<Ani guru wohangu bolo o uwa o balahitenge mangale ma Jou ma Dutu awi woa?>>25O Petrus wopaluhu, <<Iolo wohangu!>>
Wa'utu o Petrus woohamou o woa'a, o Yesus wihano ihila o Petrusi'a, <<E Simon na'o imote'e ingona, nagonau halingou yohangu o balahiteenge ma o'a-o'ani'a neena o dunia'a? O 'awaha bolo o nyawa yotagi-tagino?>>26O Petrus wopaluhu, <<O nyawa yotagi-tagino,>> O Yesus wotemo, <<Ho o 'awaha ngarouwa yohangu o balahitenge.27Ma uwa hitigi manga hininga apadaenua. Ho notagi o talaga'a la nomeme'ana. O nao'o ididihila'a nameme'ana naehe de napelenga ma ulu, geena'a aha nama'e o tiwi ipahi pohihangu tongone inamididi nanga balahitenge to ngona de to Ngoi.>>
Wa'utu awi ni-nii'i yoihene o geena de manga hininga duru ihuha.24Wa'utu o Yesus de awi ni-nii'i yomahiadoni'a o Kapernaum ma bendaro'a, o nyawa ge yoga-gaaho'o o balahitenge mangale ma Jou ma Dutu awi woa yo'aino o Petrusino de yohano, <<Ani guru wohangu bolo o uwa o balahitenge mangale ma Jou ma Dutu awi woa?>>25O Petrus wopaluhu, <<Iolo wohangu!>>
Wa'utu o Petrus woohamou o woa'a, o Yesus wihano ihila o Petrusi'a, <<E Simon na'o imote'e ingona, nagonau halingou yohangu o balahiteenge ma o'a-o'ani'a neena o dunia'a? O 'awaha bolo o nyawa yotagi-tagino?>>26O Petrus wopaluhu, <<O nyawa yotagi-tagino,>> O Yesus wotemo, <<Ho o 'awaha ngarouwa yohangu o balahitenge.27Ma uwa hitigi manga hininga apadaenua. Ho notagi o talaga'a la nomeme'ana. O nao'o ididihila'a nameme'ana naehe de napelenga ma ulu, geena'a aha nama'e o tiwi ipahi pohihangu tongone inamididi nanga balahitenge to ngona de to Ngoi.>>
The Seed Company