O MATIUS16
1Geena'a de o Farisio'a de o Sadukio'a ma nyawa-nyawa yoboa o Yesusi'a de yomau witaili. Ona yogaaho'o o Yesusi'a la wohimaiti ona'a o haala moi ihera-heranga o la yana'o Una geena woboa ma Jou ma Dutuno.2Ma o Yesus wopaluhu: <<Na'o o wange itumunou de o diwanga iterebo'o, ngini niotemo: Neena o ngogorou3Ma o dewela o dedewelano mangale o diwanga o iterebo'o de ilobi, ngini niotemo: Neena o beha'ou. O gitawa o diwango'a 'ai dadi niata'ihiri, ma o dunia ma baha ma du-dungu ania dadiwa.4O nyawa yoti-tingi'ai de yopihi-pihi yogaaho'o o dudunguu. Ma o Yesus awo'i'ulawa o dudunguu, duga ato ma nabi Yunus.>> Iduangino womaade-ade o geena, o Yesus de awi ni-nii'i yotagi de yo'imada.5O Yesus de awi ni-nii'i yotagi o Galilea ma talaga ma hononga'a. Wa'utu geena, ona yamongo yoaha manga roti.6Ho o Yesus wotemo ona'a, <<Ngini iani nimahidi-diai o Farisio'a de o Sadukio'a ma nyawa manga ragi.>>7Ona yoihene o Yesus wotemo o geena de yoma'atemo moi de moi, <<Ee, ma Aba Guru o geena womaade-ade mangale 'apoahawa nanga roti.>>8Ma o Yesus wana'o o 'iau 'aano ge yoama'aade-ade, ho Una wotemo ona'a, <<Bote niotemo o geena tomaade-ade hababu 'a nioahawa o roti? Waee, ho ngini ma ani nga'uwahi!9Ngini nimahina'o'au! Hababu ngini marai 'anio danganonohi, wa'utu ngoi tapela-pela'a o roti motoa de to'ihiodomo o nyawa yaribuhu motoa yoholoi. Wa'utu geena o udi muluohi ma boloi ngini nia lomu?10De wa'utu to'ihiodomo o nyawa yaribuhu hoata yoholoi 'ade o roti tumudiingi, o udi muluohi ngini nia lomu ma boloi?11Ho na'o o geena, dodoau ho o oraha neena ngini animahina'owahi? Hababu, 'aano ge 'ai ade-ade 'ai ma'uhuutu 'ao rotiwa. Ma tinitemoli ngini'a, ngini iani nimahidi-diai o Farisio'a de o Sadukio'a ma nyawa manga ragi!>>12Geena'a de aha awi ni-nii'i yomahina'o. Nage o Yesus wo'ihitiari yomahididiai de o ragi, o Yesus awi ma'uhuutu 'ao ragiwa ge o nyawa yadi-diai o roti, ma 'ao Farisi de o Sadukio'a ma nyawa manga dodoto'o ma diiha, uwa hiadono yodinii'i.13O Yesus de awi ni-nii'i yomahiadoni'a o daera o Kaisarea Filipi ma bendara ma date'o'a. Geena'a o Yesus wohano awi ni-nii'i'a, <<O nyawa yotemo, o Nyawa ma Ngoa'a geena naguunau?>>14Ho ona yopaluhu, <<Ma regu yotemo o Yohanes woohi-ohi'i, ma regu yotemo ma nabi Elia. Ho ma regu yotemo ma nabi Yeremia, e'ola moi o na-nabiino.>>15Geena'a de o Yesus wo'ihano ona'a, <<Ho na'o imote'e ngini Ngoi neena naguunau?>>16O Simon Petrus wopaluhu, <<Aba Guru Ngonau ma 'Oana nimihiha-halamata. Ngonau ma Jou ma Dutu wowango-wango awi Ngoa'a!>>17Geena'a de o Yesus wotemo o Simoni'a, <<Simon, o Yunus awi ngoa'a! Ngona duru nohanango'au, hababu o 'iau 'aano ge notemo 'a o nyawawa nihingahuno, ma 'ai Dea da'u o horoga'a nowihingahu.18Mangale geena, Ngoi tonihi ronga o Petrus, ma mangariti, o heleo i'ua-uta. De geena ma heleo ma de'uo'a Ngoi tohigo'o 'ai Jama'ata. De 'ai Jama'ata geena 'ademaena 'ahiado-adoni'a, amoiwa yadadi yahoroma 'ai jama'ata geena, ngaro de o honenge ma 'uaha ma.19Ngoi aha toni'ula o haaka la natuda ma jama'ata geena. Geena harage toni 'ula o horoga ma 'uci, la o 'iau natuumungu o dunia'a neena, geena ma ma Jou ma Dutu watuumungu. O geenali de o 'iau nohigumada o dunia'a neena, geena ma ma Jou ma Dutu wohigumada.>>20Iduangino Womaade-ade, Una wo'itaaele awi ni-nii'i la 'a o nyawa moi'a ma uwa ihingahu, na'o Una geena ma Oana wonahiha-halamata, nage ma Jou ma Dutu wohijajio'au.21Geena de imahi'ai'a o Yesus womahingahu womahito-tongoti'a awi ni-nii'i'a, Una halingou wotagi o Yerusalem ma bendari'a, ido'a aha waohana o hangihara o Yahudi ma balu-baluhino, imam ma hae-hae'ino de o Yahudi ma agama'a yodoto-doto'o. Ona noona aha witooma o Yesusi'a, ma 'a o wange haange ena wowango'auoli.22Ma o Petrus witoba'a o Yesus ma date'i'a de witaaele, wotemo <<Aba Guru uwa 'ogeena Nomaade-ade. Tanu ma Jou nowihitinga'a geena moi-moi. Uwa hiadono naohana!>>23Ma o Yesus womalelo'o de witaele o Petrusi'a, <<Nomaliili! Ani demo geena harage 'ao to'ata ma 'oana ma demo. Ngona uwa noi'adu'ulu ma Jou ma Dutu awi mau tadiai ho. Hababu ngona napa'e 'a de o nyawa ma dibanga, de 'ato ma Jou wa awi dibanga napa'e.>>24Geena'a de o Yesus wo'itemo awi ni-nii'i'a, <<Nagonau yomau inii'i, geena 'ai dadiwa yamote'e toona manga mau. Yamo'u o salipi, de inii'i Aitauri'a.25Hababu nagonau yowango de yatibanga atoona manga roehe mahirete, ona geena aha manga wowango iihanga 'ahiado-adoni'a. Ma nagonau yo'ula manga wowango de iini'i ngoi, ona aha yomadama'e o wowango 'ahiado-adoni'a.26O iwa ma utumu na'o o nyawa womatengo de wama'e o arata moi-moi o dunia'a neena, ma awa ma'ewa o wowango 'ahiado-adoni'a ma Jou ma dutuno.27Habau o nyawa ma Ngoa'a woboali o duniano neena, yoma'anii'i de ma Dea awi ma-malai'ata ma 'uaha. Wa'utu geena o Nyawa ma Ngoa'a aha wabalaha o nyawa-nyawa'a imote'e o 'iau ona yadiao'au.28Nio ihene nihididiai 'aano ge o'iau Totemo'au. Neena'a naga niahidogorona'a, aha de maena 'ayohonengua, na'o awi ma'ewahi o Nyawa ma Ngoa'a woboa wodadi wo 'Oana.>>
The Seed Company