O MATIUS11
1O Yesus wodoto'o awi ni-nii'i'a goona iduangino, Una wamada ma dingii geena. De wotagi wodoto'o de wohingahu o Habari ma Owa mangale ma Jou ma Dutu o benda-bendaro'a o Galilea ma daera'a.2Wa'utu geena, o Yohanes o buio'a. De wa'utu o Yohanes woihene mangle moi-moi ma Yesus Kristus wodiai, una wohulo'o awi ni-nii'i'a yotagi o Yesusi'a yohano.3Yohano onane, <<Aba, Ngonau neena nage ma Jou ma Dutu wojajioau mangale woboa? E'ola halingou o nyawa ma homoahi miodamaa?>>4De o Yesus wotemo ona'a, <<Nima'ilio o Yohanesi'a de niohingahu una'a o 'iau nage niama'e'au de nioiheno'au:5yopilo-pilo'o yomahima'e'au, yopa-paluga yomadagio'au yopado-pado yoai'o'au, yopongo-pongo yomahiiheno'au, yohonengu'u yomomi'oli, de yohu-huha yoiheno'u o Habari ma Owa ma Jou ma Dutuno.>>6De o Yesus wo'ihulo'oli yotemo o Yohanesi'a, <<O nyawa ge 'idawongo Ngoino de yonga'u ona goona duru yohanaanga.>>7Wa'utu o Yohanes awi ni-nii'i yotagio'au, o Yesus womulaenge womaade-ade o nyawa-nyawa'a geena'a mangale o Yohanes. Una wotemo onane, <<Ma moi'u ge wa'utu o Yohanes wodoto o tona'a 'i'a-'aha'a, niotagi una'a niomau niododoau? Bote niomau niwima'e ma nyawa ge o wange neena womaade-ade ma homoa de ma dewelano womaade-ade ma homoa, harage de o ubutu ya'ai'a ya'aino hababu o dado'o yawua'a? Maraio'au 'ouwa to?8E'ola mangale o 'iau ho niotagi do'ai'a? Bote niomau niwima'e ma nyawa nage womahinoa'u o pa'eanga 'ira-rahai? Maraio'au 'ouwa to? Hababu o nyawa ge yomahinoa'u o pa'eanga 'ira-rahai, awi ngi ma 'oana awi 'adato'a.9Ho mangale o 'iau ho niotagi do'ai'a? 'Igoungu, unahi 'ihiloi woamo'o de o nabi.10Hababu o Yohanesi'au ma dumutu o Bo'u 'ibe-berehio'a itemo,<Niagelelo, Ngoi tohulo'o 'ai huhulo'o wohila de de Ngona,'una aha wohidiai o nge'omo mangale Ngona.>11Nioda-danganono e! O dunia'a neena 'amoiwa moi 'iholoi yoamo'o de o Yohanes Woohi-ohi'i. Ngaro 'ogeena, ma o nyawa gee 'iholoi yoete'e ma Jou ma Dutu awi awaha ma hidogorona'a, ona 'iholoi yoamo'o de o Yohanes.12'Imulaenge o Yohanes wohihabari awi do-doto'o hiadono neena, naga o nyawa yoti-tingi'ai, yoributu nage o nyawa-nyawa ma jou ma Dutu awi 'awaha.13Hiadono o yohanes woohi-ohi'i woboa, moi-moi o Musa awi behehongo de o nabi manga do-doto'o ihila'au 'ihingahu o'iau naga gee halingou idadi.14De na'o ngini niomau nionga'u, o Yohanes geena la o Elia, nage awi bo-boa ihingahuo'au 'ihila.15Na'o de nia ngau'o'a, nioiheni'a!16De o'iau halingou tohitero o nyawa ma oraha neena? Ona harage o ngoa-ngoa'a yogogelu'u o paharo'a. O bolu moi yotemo ma regu'a,17<Ngomi o bangiheli miniduwua'o'au ma ngini 'a niorogewa! Ngomi mionyanyi o hininga huha ma nyanyi ma ngini 'anioaliwa!>18O Yohanes woboano ika de wopuaha. Una o anggur 'awao'e-o'eluwa. De o nyawa yotemo, <Una o to'ata widongohamu'u.>19Neena o Nyawa ma Ngoa'a woboano, una woodomo ma de woo'ele de yotemo, <Niwima'e o nyawa guuna! Una wotopo'ana de witabaeto. Una o balahiteenge yoga-gaaho'o de yoba-baradoha manga manai.> Ngaro 'ogeena, ma o di-dibangia 'ira-rahai ma Jou ma Dutuno, 'inyata naga o nyawa manga go'oie'a.>>20Geena'a de o Yesus womulaenge wo'ihito-tobioni'a o benda-bendara nage 'ayotoba-tobawa o baradoha yodiai, ngaro geena'a 'iholoi 'ilepe o haa-haala 'ihera-heranga wodiai ma.21<<Niobodito ngini o Khorazim ma nyawa de o Betsaida ma nyawa! Hababu na'o o haa-haala 'ihera-heranga harage nginio'a neena la idadio'au o Tiruso'a de o Sidono'a, maraio'au 'ona ma daaou yotoba o baradoha yodiai de yomahinoa o hininga ma huha ma pa'eanga de manga mumu'o'a o 'a'awo yodonoa'u.22Nioda-danganono! O dunia ma baha'a aha, o Tirus de o Sidon 'iholoi i'ualenge manga hu'umu de to ngini neena!23De ngini o Kapernaumo'a! Bote niote ngini ma Jou ma Dutu niwigoa'a o horogade? Maraio'au 'ouwa! Ho ena aha o naraka'a niumo. Hababu na'o o Sodomo'a la idadio'au o haala 'ihera-heranga nage harage nginio'a, maraio'au ma Bendara geena hiadono neena 'a demaenahi!24Nioda-danganono! O dunia ma baha'a done aha o Sodom ma nyawa 'iholoi i'ualenge manga hu'umana de ti ngini neena!>>25Ma oraha geena o Yesus wohaubayanga, <<Aba, Jou ge o diwanga de o tona'a naparetano! Amaowa'a, hababu moi-moi neena Ngona 'anohimaitua o nyawa'a ge yopade-pade de yomahina'o-na'o'a o hagala moi-moi, ma Ngona nohimaiti o nyawa biaha'a, nodiai hiadono yomangariti.26Geenau ani hingina yadaene Aba.>>27Geena'a de o Yesus wotemo, <<O hagala moi-moi 'ai Dea Woihidu'ula'au. De 'amoiwa moi ngoi ina'o, duga 'a 'Ai Dea. De 'amoiwa moi 'ai Dea wina'o duga 'a awi Ngowa'a, de o nyawa-nyawa nage o Nyawa ma Ngoa'a wo'iili-ili'i mangale wina'o ma Aba.28Niainou ngoino moi-moi ge nio'a-'angela de niamao nia gina 'itu-tubuho. Ngoi aha tinihihanaanga.29Niodomote'e 'ai pareta de nimadoto'o ngoino. Hababu ngoi 'ai hingina 'itipo'o'u, ho ngini aha niamao niohanaanga.30Hababu 'ai pareta geena nihihananga de nia gina tini'ula ma i'ualenge.>>
The Seed Company