O MARKUS13
1Ma oraha o Yesus wamada ma Jou ma Dutu awi woa, de awi ni-nii'i womatengo wotemo, <<Aba guru, bee'a nagelelo ma Jou ma Dutu awi Woa neena, de nagelelo nohidi-diai ma heleo 'ihi'aretenie, hara 'ama rahaio'a!>>2O Yesus wopaluhu, <<Ngona nama'e'au ma woa 'ira-rahai geena! Ma aha ma woa geena ma heleo 'amoio ma 'aima'areteniewau. Moi-moi aha 'ituraba.>>3Geena'a de o Yesus wohawu o Zaitun ma de'ude de wogogele o ngii moio'a nage 'itaali ma Jou ma Dutu awi woa'a. De o Petrus, o Yakobus, o Yohanes de o Andreas yomahidutu'u o Yesusi'a mangale yoma'aade-ade 'a ona duga bato.4O Yesus awi ni-nii'i yohano o Yesusi'a, <<Aba guru, bee'a nohingahu ngomino, muluo'a done de ma Jou ma Dutu awi woa 'ituraba? De o 'iau ma dudunguu na'o ma oraha geena yaadonou?>>5O Yesus wotemo, <<'Iani nimahidi-diai, uwa hiadono ngini o nyawa nielu'u.6O nyawa manga lepe aha yoboa de yaaha 'Ai ronga, de yotemo, Ngoiou neena ma 'Oana wohiha-halamata! De ona yo'iaha o nyawa manga lepe o nge'omo ma diiha'a.7Na'o ngini niogiihene naga yoma'paraanga nia daera'a e'ola ma homoa'a, ngaro uwa niohawana. Moi-moi geena 'iani idadi itihila. Ma geena o ma orahuahi o dunia ma baha.>>8<<O Bangiha moi aha yoma'aparaanga de o Bangiha ma homoa'a, o Pareta'u moi yo'iparaanga moi'a. Moi-moi'a done aha idadi o ohu, de o hawini. Moi-moi geena aha 'a imulaenge harage o ngewe'a momatengo midahau'u mangale moma'ualengou.9Ngini halingou nimahidi-diai, hababu ngini done niitago'o de niaha o agama ma ha'imi'a. Ngini aha nipoha o dodoomu ma woa'a. De ngini aha nihitaali yopa-pareta'a de o 'oa-'oana manga biono'a matiti ngini to Ngoi 'ai ni-nii'i. De geenau nia oraha la nihingahu ona'a mangale Ngoi.10Ma o Habari ma Owa ma Jou ma Dutuno halingou ihidagio'ahi itihila moi-moi o ba-bangiha'a.11De na'o ngini nitago'o de niaha o ha'imi'a, uwa niohawana mangale o iau halingou ngini niopalulu. Na'o ma oraho'au nimaade-ade, nihidemou, o iau naga ge o Omaha 'Iofi-ofi ihidemo'au ngini'a ma oraha yaadono. Hababu o demo-demo nage ngini nihidemo geena 'atinginiwa ma hirete nia demo-demo, ma geena iboa o Omaha 'Iofi-ofino.12O nyawa aha yohigiama ma hoata manga dodoto ma dutu la yo'itooma. 'Ogeenali ma aha idadi o dea de ngoa'a. O ngoa-ngoa'a aha 'ayo'igihenua manga eha de manga dea'a, de o ngoa-ngoa'a aha yo'ihigiama ma hoata manga eha de manga dea la yo'itooma.13Ngini done nibuhulu o nyawa moi-moi, matiti ngini ni-nii'i Ngoino. Duga nagoonau yotongohono hiadono ma baha'a, ona geena ma Jou ma Dutu aha wo'ihalamata.>>14O Yesus wotemo, <<Aha yaadono naga womatengo wilawa-lawana ma Jou'a woboau. Ma nyawa guuna womahigo'ou ma Jou ma Dutu awi woa'a, o dingiio'a ge 'ayadaenua una. (Nagoonau yabaca neena, niataila'o nihidi-diai, la idadi niomangariti) Na'o ma nyawa ge durue wolawa-lawana guuna womahigo'ode'au geena'a, o nyawa-nyawa ge naga o Yudea ma daera'a geena 'iholoi yaowa yoloa yomaiyunou o de'u-de'uo'a.15O nyawa ge da'u manga woa ma de'uo'a uwa youti dau manga woa ma doda'u mangale manga 'iani yaehe.16O nyawa ge naga o bailo'a uwa yolio manga baju yaehe.17De 'iholoioli yohangihara ma wa'utu geena, o nge-ngewe'a ge yohiaha-aha de ge o nge-ngewe'a manga ngoa'a 'a yohihu-huhuohi!18Nimadahaubayanga la geena uwa idadi ma oraha o beha-beha'a.19Hababu ma oraha geena durue 'ihangihara, 'iholoi 'ihangihara de ge yamao-mao'au. 'Imulaenge madidihila'a ma Jou ma Dutu o dunia wohidadi hiadono o oraha neena, o hangihara 'a'oiwau nage idadiou harage de 'ageena, de geena aha 'aidadiwau idadi.20De, na'o ma Jou ma Dutu 'a wohitipo'owa o hangihara ma oraha geena, maraio'au o nyawa 'amoiwa wo'ihihalamata. Ma mangale wo'idora awi umata ho, wohitipo'o ma oraha geena.21Ma oraha geena na'o o nyawa yotemo ngini'a, <Ee bee'a niataila'o, ma 'Oana o Nyawa Wo'ihiha-halamata Una nengo'a!> E'ola, <Una geena'a!> Geena uwa ni'inga'u ma nyawa'a goona.22Hababu done o nyawa manga lepe aha yoboa de yotemo, ona geena ma 'Oana o nyawa Wo'ihiha-halamata, e'ola yotemo, ona geena o Nabi nage yohigila-gila ma Jou awi behehongo ena momongo 'ayoelu'u. De ona ma yodiai o haala 'ihera-heranga de o dudunguu nage yohimaiti de manga 'uaha la o nyawa yo'inga'u ona'a de uwa yonga'uoli ma Jou ma Dutu'a. De na'o 'aidadi, ona yo'iahau o nyawa-nyawa ge ma Jou ma Dutu wo'iili'o'au o nge'omo iti-tiiha'a.23Ho, ngini halingou nimahidi-diaiou! Moi-moi neena tinihidemo'au ngini'a 'ihila ma oraha geena 'aidadiwahi.>>24O Yesus wotemoli, <<O hangihara ma oraha 'ibootou, o wange de o mede 'aihiwawau.25O ma-mamanga aha 'iota'a da'u diwangu'u, de moi-moi ge o diwango'a iruau.26Ho o wa'utu geena o nyawa aha wima'e o Nyawa ma Ngoa'a o horoga'a de wau'u o 'amo-'amo wihaono de o 'uaha moi-moi de awi 'umati.27Una aha wo'ihulo'o awi malae'ati'a yo'itoomu o nyawa wo'iili-ili'i 'ianou naga bato o dunia'a moi-moi.>>28O Yesus wotemo o hi'atero moi onane <<Bee'a nimadoto'o o ara ma utuno. Na'o ma jaga-jaga 'ibo-boo'ou de 'itooliou, ngini niana'o geena ma oraha 'ihorio'au o ngogoro.29'Ogeenali na'o ngini niama'e o hangihara ma oraha ge tohingahu-ngahuo'au 'aano ge, moi-moi idadiou ho ngini aha niana'o ma oraha geena 'ihorino'au.30Nioihene nihidi-diai e, Ma haala geena idadi, aha ge o nyawa yowango-wango o oraha neena 'a yobootuawahi yohongene.31O diwanga de o tona'a aha 'iihanga, ma 'Ai demo-demo aha 'itatapu demaena 'ahiado-adoni'a.>>32<<Ngaro 'ogeena ma, 'amoi ma oyana'owa ma oraha e'ola ma wa'utu o Nyawa ma Ngoa'a woboa. O malai'ata o horoga'a ma oyana'owa, de o Nyawa ma Ngoa'a ma hirete ma 'awana'owa, 'a ma Dea duga wana'o.33Ho Halingou ngini nimahidi-diai de nima goa-goana! Hababu ngini 'oniana'owa muluo'a moi-moi geena idadi.34Wa'utu o Nyawa ma Ngoa'a woboali o horoga'a de wau'u, geena tohitaili harage 'ao woa ma dutu womatengo awi woa wamada mangale wotagi o daera ma homoa'a. Ma oraha 'awotagiwahi wo'ihulo'o awi hu-hulo'i'a la awi woa yogoana, de wo'i'ula to ona moi-moi manga 'arajaanga. De una ma wohulo'o gee o ngoana wogoa-goani'a la wogoana 'aitauri'a.35Ho ngini halingou nimagoa-goana, hababu ngini oniana'o'awa muluo'a de ma woa ma dutu guuna woboa. Marai o wange 'i'umulu'ou, e'ola o wutu igo-goronano, e'ola i'initau, e'ola o de-dewelano.36Uwa hiadono 'itodo'anino de una woboa de ngini nionihu'o'a.37'O'iau naga gee tinihibehehongo'au ngini'a, tohibehehongoli o nyawa'a moi-moi: Nimagoa-goanou!>>
The Seed Company