O MARKUS10
1Geena iduangino, de o Yesus womagoa'a geena'a de wotagi o Yudea ma daera'a de o Yordan ma ngaili ma hononga'a. Geena'a ma, o nyawa manga lepe ya'aino o Yesusino wihigilolitino. Geena'a de o Yesus wodoto'oli harage awi biaha'au.2Aha de o Farisio'a yamuluo naga ma yoboano yahali-hali'i awi hala. Ona yohano onane, <<Na'o 'imote'e nanga agama ma 'autoranga, bote 'aidadi o naulu ge womodo'a'au de mi'olu'u awi we'ati'a?>>3Ma o Yesus wohanoli ona'a, <<O Bo'u 'Ibe-berehi'u, o nabi Musa o 'iau wohulo'o ngini'a?>>4De ona yopaluhu, <<O Musa wotemo 'aidadi o naulu manga we'ata yo'iolu'u, iti o ngolu'u ma hurata yatulihi'ahi.>>5De aha o Yesus wotemo ona'a, <<O Musa wotulihi 'ogeena, hababu nia hininga 'iopini.6Ma ma didihila'a ma Jou ma Dutu wohidadi o dunia neena, wo'itulada o naulu de o ngewe'a.7Hababu geenau ho o naulu aha yo'imada manga eha de manga dea de yorimoi de manga we'ata.8Ho yamididi goona yodadi 'amoiou, o yamididiwau.9Mangale geena, o 'iau naga ge ma Jou ma Dutu wohirimoio'au, o nyawa 'aidadiwa yo'ihi'ati-tinga'a!>>10Wotemo iduangino geena, de o Yesus de awi ni-nii'i yoohama o woa'a. Geena'a de o Yesus awi ni-nii'i yohanoli o Yesusi'a mangale o do-doto'o 'aano ge.11De o Yesus wo'itemo onane, <<Naguunau awi we'ata miolu'o'au de womodo'ali de o ngewe'a moioli, una geena wobaradoha'au awi we'ata 'ididihila'a hababu wohowono.12'Ogeenali ma, nagumunau ami o'ata miolu'o'au de momodo'ali de o naulu moioli, muna geena ma mobaradoha'au ami o'ata 'ididihila'a hababu mohowono.>>13Geena'a de o nyawa manga ngoa-ngoa'a yo'iaha o Yesusino, la wo'idonoa Awi giama de wo'ihibara'ati. Duga awi ni-nii'i yo'ingamo ona'a ge!14Ho de o Yesus wo'ima'e 'ogeena yodiai de wo'ingamo Awi ni-nii'i'a wotemo, <<Ni'imada'a o ngoa-ngoa'a goona ya'aino Ngoino. Uwa ni'itaaele, hababu o nyawa ge yadawongo ma Jou ma Dutu awi pareta harage 'ao ngoa-ngoa'a noona, ona yodadi ma Jou ma Dutu awi 'awaha. 15Nioihene nihidi-diai e, Nagoonau 'awidawongua ma Jou ma Dutu harage o ngoa'a ma ete'e noona, ona 'ayodadiwa ma Jou ma Dutu awi 'awaha nage ma Jou ma Dutu awi pareta'a.>>16Iduangino o Yesus wotemo 'ogeena, de wo'ioono ma ngoa-ngoa'a goona. De Awi giama wo'idatami de wo'ihibara'ati.17Wa'utu o Yesus awi dodagi wohigila-gilali, de o nyawa womatengo wa'aino o Yesusino womapa-palitana. O nyawa guuna watilabu'u'u wihuba o Yesusi'a, de wohano, <<Aba guru, ani hininga 'ira-rahai, ngoi halingou o 'iau tadiai la tama'e o wowango ma dutu 'ahiado-adoni'a?>>18O Yesus wohano, <<Idodoau ho notemo Ngoi 'ai hininga 'irahai? 'Amoiwa manga hininga 'irahai, duga 'a ma Jou ma Dutu womatengo'a.19Ngona ma hirete marai nana'o'au ma Jou ma Dutu awi pareta onane: <Uwa notooma, uwa nohowono, uwa notohi'i, uwa nodadi o ha'ihi ma ngelu'u, uwa nobalehuta, no'ihoromati ani eha de ani dea.> >>20De una wopaluhu, <<Aba guru, o pareta moi-moi geena 'a to doguulunohi ena todinii'o'au .>>21O Yesus wigelelo ma nyawa'a guuna de widora, de wotemo una'a, <<Duga moiohi o nadiaiwahi. Notagi nawu'unu ani 'arata moi-moi de ma pipi o nyawa yohu-huha'a no'i'ula. De ngona aha nama'e o 'arata o horaga'a. Geena de aha na'aino la noinii'i Ngoino.>>22Wa'utu woihene o Yesus wotemo 'ogeena, de ma nyawa guuna awi hininga 'ihuha, ho wotagi de awi hininga ma huha'a hababu una duru wo'aya.23Ho o Yesus womataila'o awi ni-nii'i'a de wo'itemo onane, <<Duru 'ao huha'a o nyawa yo'aya-'aya yodadi ma Jou ma Dutu awi nyawa!>>24Wa'utu yoihene 'ogeena de o Yesus awi ni-nii'i yoheranga. Ma o Yesus wotemoli, <<'Ai ngoa-ngoa'a, 'igoungu, duru 'ao huha'a o nyawa yo'aya-'aya yodadi ma Jou ma Dutu awi nyawa.25'Iholoi 'igapanga o unta o dutu moi 'iohama o huhumu ma pidahi'a pohitero de o nyawa yo'aya-'aya moi yoohama ma Jou ma Dutu awi pareta'a.>>26Yoihene 'ogeena, de o Yesus awi ni-nii'i 'aiholoioli yoheranga de yoma'atemo moi de moi, <<Na'o 'ogeena nagoonau aha yohalamata?>>27O Yesus wo'igelelo ona'a de wopaluhu, <<Na'o o nyawa 'aidadiwa yohihalamata to ona manga roehe mahirete, duga 'a ma Jou ma Dutu wadadi o nyawa wo'ihihalamata.>>28Geena'a de o Petrus wotemo onane, <<Ngomi neena, mia 'iau hona moi-moi miamada'au mangale niminii'i Ngona'a Aba.>>29O Yesus wopaluhu, <<Nioihene nihidi-diai e, nagoonau manga woa yamada e'ola manga riadodoto, e'ola manga eha de bilanga, e'ola manga eha de manga dea, e'ola manga ngoa-ngoa'a, e'ola manga baili hababu Ngoi de o Habari ma Owa ma Jou ma Dutuno,30Ona aha yama'e 'iholoioli o oraha neena, 'ilio imadadi 'ilape o ratuhu moi: Manga woa e'ola manga riadodoto, manga eha de bilanga, manga eha, manga ngoa-ngoa'a, manga baili de o hangihara ma. De ma oraha aha iboa, ona aha yama'e o wowango 'ahiado-adoni'a de ma Jou ma Dutu.31Ma o nyawa manga lepe ge ma oraha neena yoba-baraguna aha yodadi o nyawa 'ayoba-baragunawa, de o nyawa 'ayobaragunawa, ona aha yodadi yobaraguna.>>32O Yesus de awi ni-nii'i yomadagi, yotagi ya'aie o Yerusalem ma bendarie. Wa'utu yomadagi, o Yesus wohila-hila. O Yesus awi ni-nii'i yoheranga de o nyawa-nyawa nage winii'i Awi duduniha ma yohawano'au. Geena'a de o Yesus wo'iaho'oli awi ni-nii'i'a ho yomatinga'i'a 'aona'a de wo'ihingahu o 'iau nage aha idadi Una'a.33O Yesus wotemo ona'a, <<Nioihene e! O oraha neena ngone potagiou o Yerusalem ma bendarie. Do'a de aha o Nyawa ma Ngoa'a wihigiama ma hoata o 'imam ma hae-hae'i'a de o agama'a yodoto-doto'o. De Una aha wihu'umu wiho-honenge, geena'a de wihigiama ma hoatoli 'ao Yahudioawa ma nyawa.34De ona aha wihohedu, wiobili, wihangihara de wihidele o salipo'a. Ma 'ao wange haange'a de Womomi'o'auoli.>>35Geena iduangino o Yakobus de o Yohanes o Zebedeus awi ngoa-ngoa'a ge, yomahidutu'u o Yesusino de yotemo, <<Aba guru, o 'iani moi miomau miogaaho'o. Ho na'o 'aidadi de, tanu Aba guru nohimode'e.>>36De o Yesus wo'ihano, <<O 'iau niogaaho'o Ngoino?>>37Ona yopaluhu, <<Na'o ma oraha Aba guru No'oano'au de nouaha, miogaaho'o Aba guru tanu nimipa'e ngomi mimididi miogogele ani borihononga'a. Womatengo Ani guida'o'a de womatengoli Ani gubalio'a.>>38Geena'a de o Yesus wotemo ona'a, <<Ngini 'aniana'owa o 'iau niogaaho'o. Ngoi neena taohanou o hangihara ma lepe. Bote niaa'unu niamo'u o huha de o hangihara hiadono pomahidohonenge?>>39De ona yopaluhu, <<Miaa'unu!>>
Ho o Yesus wotemoli ona'a, <<itiai, ngini aha nia mo'u o huha de o hangihara hiadono niohonenge harage 'a Ngoi.40Ma nagoonau aha yogogele 'ai guidao'a de 'ai gubalio'a, geena 'a to ngoiwa 'ai haaka tohitatapu. Ma 'a ma Jou ma Dutu wohitatapu nagoonau aha yogogele geena'a.>>41Wa'utu Awi ni-nii'i yamogio'o goona yoihene geena de yongamo o Yakobus de o Yohanesi'a.42Ho o Yesus wo'itoomu ona moi-moi de wotemo ona'a, <<Ngini niana'o, yopa-pareta ge 'awina'owa ma Jou ma Dutu, ona goona manga 'awaha yo'ido'o-do'o ho manga wowango 'ihangihara. De 'ogeenali o nyawa yola-laagomo yo'ihangihara manga 'awaha.43Ma ngini 'aidadiwa 'ogeena. Nagoonau yomau yoamo'o nginio'a naga, halingou harage 'ao nyawa yoleleani ngini'a.44De nagoonau yomau yodaduie naga nginio'a, halingou yodadi o gilaongo mangale yoleleani o nyawa'a moi-moi.45Hababu o Nyawa ma Ngoa'a ma woboano 'awileleaniwa. Ma Una waino mangale woleleani de wo'ula awi wowango la wo'ituuhu o nyawa yolepe-lepe manga baradoha.>>46O Yesus de awi ni-nii'i yomahiadoni'a o Yerikho'a. Wa'utu ona yomadagio'au yamada ma bendara geena, o nyawa yolepe-lepe ma yoma'anii'i de-de ona. O nge'omo ma date'o'a womatengo wopilo-pilo'o wogogelu'u woga-gaaho'o, awi ronga o Bartimeus, o Timeus awi ngoa'a.47Wa'utu woihene o Yesus o Nasaretino watoa'a geenano de una womahigaho'o, <<Ee Yesus o Daut awi guti'u, tanu Noidoranohi!>>48Yoihene 'ogeena womaorehe de o nyawa yolepe-lepe wingamo yote, <<Nomaliili!>> Ma una 'age'au womaorehe <<Daut awi guti'u, tanu noidora!>>49Ho o Yesus womatogumu de wotemo onane, <<I'au niwiaho'ino!>>
Ho ona yotemo ma nyawa'a wopilo-pilo'i'a guuna, <<Nomaliili, nohi'uatia ani hininga, de nomagoa'ou, o Yesus nowiaho'o ho!>>50Geena'a de wopilo-pilo'o guuna awi baju ma 'a wohi'aweliou de womaja-jai womagoa'a ho wotagi o Yesusi'a.51O Yesus wohano o nyawa wopilo-pilo'i'a <<O 'iau nomau To diai ngona'a!>>
De una wopaluhu, <<Aba guru, ngoi tomau tomahima'e!>>52Geena'a de o Yesus wotemo, <<Mangale Noinga'u, ani panya'e 'iaio'au. Ho notagiou!>>
'A ma oraha geena de wopilo-pilo'o womahima'e'au de wotagi winii'i o Yesus o nge'omi'a.
Ho o Yesus wotemoli ona'a, <<itiai, ngini aha nia mo'u o huha de o hangihara hiadono niohonenge harage 'a Ngoi.40Ma nagoonau aha yogogele 'ai guidao'a de 'ai gubalio'a, geena 'a to ngoiwa 'ai haaka tohitatapu. Ma 'a ma Jou ma Dutu wohitatapu nagoonau aha yogogele geena'a.>>41Wa'utu Awi ni-nii'i yamogio'o goona yoihene geena de yongamo o Yakobus de o Yohanesi'a.42Ho o Yesus wo'itoomu ona moi-moi de wotemo ona'a, <<Ngini niana'o, yopa-pareta ge 'awina'owa ma Jou ma Dutu, ona goona manga 'awaha yo'ido'o-do'o ho manga wowango 'ihangihara. De 'ogeenali o nyawa yola-laagomo yo'ihangihara manga 'awaha.43Ma ngini 'aidadiwa 'ogeena. Nagoonau yomau yoamo'o nginio'a naga, halingou harage 'ao nyawa yoleleani ngini'a.44De nagoonau yomau yodaduie naga nginio'a, halingou yodadi o gilaongo mangale yoleleani o nyawa'a moi-moi.45Hababu o Nyawa ma Ngoa'a ma woboano 'awileleaniwa. Ma Una waino mangale woleleani de wo'ula awi wowango la wo'ituuhu o nyawa yolepe-lepe manga baradoha.>>46O Yesus de awi ni-nii'i yomahiadoni'a o Yerikho'a. Wa'utu ona yomadagio'au yamada ma bendara geena, o nyawa yolepe-lepe ma yoma'anii'i de-de ona. O nge'omo ma date'o'a womatengo wopilo-pilo'o wogogelu'u woga-gaaho'o, awi ronga o Bartimeus, o Timeus awi ngoa'a.47Wa'utu woihene o Yesus o Nasaretino watoa'a geenano de una womahigaho'o, <<Ee Yesus o Daut awi guti'u, tanu Noidoranohi!>>48Yoihene 'ogeena womaorehe de o nyawa yolepe-lepe wingamo yote, <<Nomaliili!>> Ma una 'age'au womaorehe <<Daut awi guti'u, tanu noidora!>>49Ho o Yesus womatogumu de wotemo onane, <<I'au niwiaho'ino!>>
Ho ona yotemo ma nyawa'a wopilo-pilo'i'a guuna, <<Nomaliili, nohi'uatia ani hininga, de nomagoa'ou, o Yesus nowiaho'o ho!>>50Geena'a de wopilo-pilo'o guuna awi baju ma 'a wohi'aweliou de womaja-jai womagoa'a ho wotagi o Yesusi'a.51O Yesus wohano o nyawa wopilo-pilo'i'a <<O 'iau nomau To diai ngona'a!>>
De una wopaluhu, <<Aba guru, ngoi tomau tomahima'e!>>52Geena'a de o Yesus wotemo, <<Mangale Noinga'u, ani panya'e 'iaio'au. Ho notagiou!>>
'A ma oraha geena de wopilo-pilo'o womahima'e'au de wotagi winii'i o Yesus o nge'omi'a.
The Seed Company