O MARKUS2
1O wange muluo ipaha'a, o Yesus woma'ilioli o Kapernaumi'a ma bendari'a. Geena'a de o nyawa-nyawa wigiihene, bali Una o woa'a.2Ho o nyawa duru manga lepe yoboa yomalomu geena'a, hitigi o ngoano'a ma 'ao nyawau. Geena'a de o Yesus wohingahu ona'a ma Jou ma Dutu awi demo.3Womaade-ade ma gigiria'a o nyawa yahoata yoboa wimo'uno wopa-paluga de wiaha o Yesusino.4Ma o nyawa 'ayolepeli ho, 'aidadiwa yomahidutu'u o Yesusi'a. Ho ona yaai'i ma woa ma de'u ipahi o Yesus awi de'ude de wihia ma nyawa guuna de awi 'o'owa'a ipahi o Yesus awi bionu'u.5Wa'utu o Yesus wama'e manga ngonga'u ma guata Una'a, ho o Yesus wotemo wopa-paluga'a, <<'E wala ani baradoha taapongo'au.>>6Geena'a, o agama'a yodoto-doto'o yamuluo naga yogogelu'u de manga hininga'a itemo,7<<Wolo awidomooino'a woma ade-ade 'ogeena! 'Amoiwa yadadi yaapongo o baradoha, ma 'iani 'a ma Jou ma Dutu. Ho Una wiete-ete ma Jou ma Dutu.>>8'Ageena ma oraha o Yesus wana'o'au manga hininga ma doda'a. Ho o Yesus wotemo ona'a, <<Dodoauho 'ania hininga ma doda'a ihano-hano 'ogeena?9'Ia'a iholoi igapanga totemo wopapaluga'a, <Ani baradoha taapongo'au!> E'ola totemo, <Nomomi'i nalulu'u ani 'o'owa ho nomadagiou!>10Ma neena tinihimaitou, na'o o dunia'a neena o Nyawa ma Ngoa'a, to 'uaha to'ihiapongo manga baradoha.>> Geena'a de o Yesus wotemo wopa-paluga'a,11<<Nomomi'i, nalulu'u ani 'o'owa de noliou ani woa'a!>>12Geena'a de ma nyawa guuna womomi'i walulu'u awi 'o'owa de wohupu, o nyawa manga lepe yama'e de yoheranga de wipuji ma Jou'a. De yotemo, <<'Omaiwahi pama'e o neena idadi.>>13O Yesus wa'ainoli o Galilea ma talaga ma date'ino, de o nyawa manga lepe yaino, ho una wo'idoto'o.14Wa'utu o Yesus waboa geenano, Una wima'e womatengo o balahiteenge woga-gaaho'o awi ronga o Lewi, una geena o Alfeus awi ngoa'a wogogelu'u o balahiteenge ma woa'a. O Yesus wotemo una'a, <<Naino noini'i,>> O Lewi ma womagoa'a de winii'i o Yesusi'a.15Wa'utu o Yesus woodomo ma gigiria'a o Lewi awi woa'a, o balahiteenge yoga-gaaho'o de o nyawa yoba-baradoha manga lepe yoboa de yoodomo de o Yesus de awi ni-nii'i. Hababu manga lepe winii'i o Yesusi'a.16O agama'a yodoto-doto'o o Farisino ge, wima'e o Yesus yomahidoodomo de o balahiteenge yoga-gaaho'o de o nyawa yoba-baradoha, ho ona yohano o Yesus awi ni-nii'i'a, <<Idodoau ho nia guru yomahidoodomo de o balahiteenge yoga-gaaho'o de o nyawa yoba-baradoha?>>17O Yesus wogiihene manga hahano geena de wotemo ona'a, <<O nyawa yoha-hanaanga 'ayoparaluuwa o dotere, ma duga 'ayopa-panya'e. Ngoi toboa 'ato'iaho'ua o nyawa yoti-tiai, ma duga 'ao nyawa yoba-baradoha.>>18Ma moi geena, o Yohanes woohi-ohi'i awi ni-nii'i de o Farisio'a ma nyawa yopuaha, geena'a de o nyawa yoboa de yohano o Yesusi'a, <<Aba idodoau ho o Yohanes woohi-ohi'i awi ni-nii'i de o Farisio'a manga ni-nii'i yopuaha? Ma to Ngona ani ni-nii'i 'ayopuahawa.>>19O Yesus wopaluhu <<Na'o o modo'a ma rame'a de ge womo-modo'a geena'a de una'ahi, bote 'aidadi awi ma-manai yopuaha? Maraio'au yoodomo.20Ma ma wa'utu aha yaadono, womo-modo'a ge aha wiehe onano, geena'a de aha yopuaha.21'Amoiwa o nyawa manga moha ma hila ihitapa de o moha ma hungi. Hababu ma moha ge ihitapa-tapa'a aha ya'ooromo, de ma moha geena 'age'au iracanga.22'Ogeenali 'amoiwa o nyawa, na'o o angguru ma hungi de yodalihi ma ngi ma hila'u. Hababu ma ngi ma hila geena, aha ipela'a mangale ma angguru hungi geena, de ma angguru ma ipoa, done ma angguru de ma ngi geena o iwau. Ho 'o anggur ma hungi halingou podalihi ma ngi ma hungi'u.>>23Ma moi o hiani ma wange'u, o Yesus de awi ni-nii'i yaboa o gandum ma bailino, geena'a de o Yesus awi ni-nii'i yautu'u o gandumu.24Geena'a de o Farisio'a ma nyawa yotemo o Yesusi'a, <<Idodoau ho ani ni-nii'i yapalene nanga agama ma behehongo, de yadiai ge 'aidadiwa padiai o hiani ma wange'u?>>25O Yesus wopaluhu, <<Mode 'ania bacawahi? 'O'iau o Dautu wodiai ge, wa'utu o Abyatar wodadi o imam ma amo'o. Wa'utu o Dautu de awi nyawa-nyawa yo'ihawini, de 'oiwa manga inomo, o Dautu woohama ma Jou awi woa'a, de waehe o roti ge 'ihihuba-huba'au ma Jou'a. De ma roti geena ma wo'i'ula awi nyawa-nyawa'a. Ena momongo imote'e nanga agama ma behehongo, 'iani 'ao imam-imam de aha idadi yaodomo ma roti geena.>>27Geena'a de o Yesus wotemoli, <<O hiani ma wange ma Jou wohidadi'u mangale o nyawa, ma o nyawa yo'itulada'u mangale 'ao hiani ma wangewa.28Ho Ngoi o Nyawa ma Ngoa'a ma, tapareta o Sabat ma wange.>>
The Seed Company