O LUKAS7
1Ho de iduangino o Yesus uma ade-ade o nyawa yolepe-lepe'a manga bino'a, Una wotagi o Kapernaumi'a.2Geena'a, o Roma'a manga 'apita awi gilaongo uma tengo, duru 'awihibohono. Awi gilaongo geena wopanya'e ho hali'i wohongenou.3Ma oraha ma 'apita guuna wigiihene o Yesus, una wo'ihulo'o yamuluo naga o Yahudio'a ma balu-baluhu, yotagi o Yesusi'a, la yogaaho'o Una woboa wihiai'i awi gilaongo.4Ho de yomahi adoni'a o Yesuso'a ona wibaja la Una wiiduhunohi ma 'apita geena. Ona yotemo o Yesusi'a <<Aba, ma 'apita nuuna 'iani nowi duhunu!5Hababu una 'awonahibohono ngone o yahudio'a de wohigo'o'au tongomi mia dodoomu ma woa.>>6Ho o Yesus wotagi yoma'anii'i de ona. Ho de yomahi adonou ma woa'a geena, ma 'apita wo'ihulo'o awi ma-manai'a la yo'ai'a wihingahu o Yesusi'a 'onaneda, <<Aba! Ngaro uwau noma'angela na'aino 'ayadaenua noiadono 'ai woano.7Ma hababu geena ho, atomooinua tonidaali Aba. Ho ngaro 'ano ade-ade o demo o ngale moi modidi la 'ai gilaongo woai'i.8Hababu ngoi ma, todomote'e woihi balu-baluhu awi huhulo'o. De aitimi'u de ma enahi o hurudado-hurudado, ona 'iani yamote'e 'ai hu-hulo'o, na'o totemo <Notagiou!> Una ma wotagi; de na'o totemo moi'ali, <Nainohi!> Unama wa'aino. De na'o ngoi towihulo'o 'ai gilaongi'a, <Nadiai neena> unama wadiai.>>9O Yesus woheranga woihene geena. Una wo'itaila'o awi ninii'i yolepe-lepe'a de wo'itemo <<E wolo 'aogu-guulewa ma nyawa nuuna. Ngaro de o Israelo'a ma nyawa ma, ngoi 'atama'ewahi manga ngonga'u o neena ma amo'o!>>10Ma oraha wo'ihulo-hulo'o ge yolio ma 'apita awi woano, ma gilaongo guuna woai'o'au.11Ho 'aitaaowa ipahano o Yesus wotagi o Nain ma bendari'a. Awi ni-nii'i de o nyawa manga lepe yotagi yoma'anii'i de o Yesus.12Ma oraha o Yesus womahi hori'a'au, o bendara ma ngoana ma amo'i'a, ona yoma'a ma'e'a de o nyawa yolepe-lepe, yoota'a manga hongene o boohu'i'a. Ma hongene geena o bao-bao ami ngowa'a o naulu, 'a womatengo'a. O bendara ma nyawa ma ngalepe minii'i ma eha.13Ma oraha ma Jou Yesus mima'e ma ngewe'a geena, Una midora de mitemo, <<E owade! Uwau noali!>>14De aha o Yesus womahihori'a o hongene ma mo-mo'u'a, de wagagao ma hongene geena ho yomo'u mo'u yomatogumu. De o Yesus wotemo, <<Ee doguulu, Ngoi tohulo'o nomomi'i!>>15Ma doguulu wohonge-hongene ge womomi'i, ho wogogelu'u de womaa ade-ade. De aha o Yesus wiihigiama ma hoata ma ngowa'a geena ma eha'a.16Moi-moi o nyawa yohawana de wipuji ma Jou ma Dutu. Ona yotemo, <<O nabi moi woamo-amo'o woboa'au nanga hidogorona'a! Ma Jou ma Dutu woboa'au la wohihalamata awi nyawa!>>17Ho o Yesus awi habari neena yogiihene o Yudea'a moi-moi'a de ma heba-hebangi'ahi.18O Yohanes awi nini'i yohingahu moi-moi ida-dadio'au ge o Yohanesi'a. Ho o Yohanes awi ni-nii'i yamididi wo'iaho'ino19de wo'ihulo'o yotagi ma Jou Yesusi'a la yohano yotemo, <<Aba, marai ngonau neena nage aha noboa imote'e ma Jou ma Dutu awi jaji? E'ola ngomi mitamaahi o nyawa ma homoali?>>20Yamididi o Yohanes awi ni-nii'i geena yotagi o Yesusi'a de yotemo, <<O Yohanes woohi-ohi'i wohulo'o ngomino, miohano ngona'a Aba, bote ngonau neena imote'e ma Jou ma Dutu awi jaji aha woboa ge, e'olah mio tamaahi o nyawa moioli?>>21O oraha geena o Yesus wo'ihiai'i ma ngalepe, de ma lepe wagini'i oto'a-to'ata, de yopilo-pilo'o manga lepe yomahi ma'e.22Ho o Yesus wopaluhu, <<Niolioli o Yohanesi'a de niohingahu o'iau nioihene, de niama'eau: yopilo'o yomahi ma'e, yopaluga yomadagi, o nyawa yopado-pado yoai'i, yopongo yomahi ihene, o nyawa yohongeno'a yowangoli, de o habari ma owa ma Jou ma Dutuno, ihingahuo'au o nyawa yohu-huha'a.23Duru youtumu o nyawa nage Inga'u de manga hingina ma ngodumu.>>24O Yohanes wo'ihulo-hulo'o yolio'a, o Yesus womaade-ade o nyawa yolepe-lepe'a, ma dumutu o Yohanesi'a, wotemo <<Ngini niotagi o tona'a i'a'ahane'a la o'iau niataila'o? 'Iani'a o ubutu ma ho'a moio'a o dado'o yawua-wua'a.25Ngini niotagi la o'iau niataila'o? O nyawa moi awi baju itero-tero? Marai 'ouwa hababu na'o manga pa'eanga itero-tero de manga wowango yaowa, ona geena yomanoa o 'adato ma woa'a!26Ho ngini niohupu mangale o'iau? Niwi taila'o o nabi moi? Itiaio'au una iholoioli de o nabi.27O Yohanes nuunau ituliho'au o Bo'u ibe-berehi ma rue'u ma demo o onane,Ma Jou Ma Dutu wotemo nuunau tongoi 'ai huhulo'o,<Ngoi aha towi hulo'o una wohila dede Ngonala una wadiai tongona ani nge'omo.> >>28O Yesus wotemoli ona'a <<Nio hi-hingina o dunia'a neena 'amoiwa iholoi yodaduie de o Yohanes woohi-ohi'i. Ma, o nyawa duru woete'e ma Jou ma Dutu awi 'awaha'a, Una iholoi woamo'o de o Yohanes woohi-ohi'i.>>29O nyawa moi-moi de balahiteenge yoga-gaaho'o yoihene, o Yesus o geena wotemo, ona yonga'u ma Jou ma Dutu wotiai ho ona yomode'e o Yohanes wo'iohi'i.30Ma, o Farisio'a de o agama yodoto-doto'o 'ayoolu'u yadawongo ma Jou ma Dutu awi dumutu ona'a. Hababu ona 'ayoolu'u o Yohanes wo'iohi'i.31O Yesus woma ade-adeli, wotemo, <<De o'iau Ngoi to'ihitero ma nyawa-nyawa o oraha neena? Hara 'ao'iau noona?32Ona harage 'aongowa-ngowa'a yogogelu'u o paharo'a; O doomu moi yoaho'o o dodoomu moi'a, <Ngomi miota'o'au o damunu, ma ngini 'a niohodawa, ngomi mio nyanyio'au o hongeno'a ma nyanyi ma ngini 'anio aliwa!>33O Yohanes woohi-ohi'i woboa, una wopuaha de o angguru woo'elua de ngini niotemo, <Una o to'ata widongohami'a!>34Ma ma Jou Awi ngowa'a woboa, Una woodomo de woo'ele de aha niotemo, <Bee'a niwima'ehi e! O nyawa guuna moi 'a widopo'ana, witabaeto, o balahiteenge yogagaoho'o de o nyawa yobabaradoha manga manai.>35Ngaro o geena, ma Jou ma Dutu Awi barija imahi maito'au itiai o nyawano moi-moi nage yadawo-dawongo'au.>>36Woma tengo o Farisio'a, awi ronga o Simon, wiiaho'o o Yesus woodomo. Ho o Yesus wo'ai'a awi woa'a de wogogelu'u woodomo.37Ma bendaro'a geena momatengo ami roehe momawu'u-wu'unu. Ma oraha moihene o Yesus woodomo, o Farisio'a ma nyawa awi woa'a, muna moboa de moahano o botolo moi ma doda o gooro ma bounu ihemo-hemo.38Muna moma higo'ono o Yesus awi duduno'a, awi dou ma date'o'a de moali hiadono o Yesus awi dou ipeha'a de ami 'ongo. De aha ma i'ili o Yesus awi dou de ami utu, de aha ma ame awi dou'u de mohidauhu de o gooro ma bounu ihemo-hemo.39Ma oraha o Farisio'a wiaho-aho'o o Yesus ge, wama'e o geena modiai, awi hingina'a itemo, <<Nuuna 'awonabiiwa, hababu na'o wonabi maraio'au mina'o ma ngewe'a numuna ami roehe ma wu'uwu'unu!>>40Geena'a de o Yesus wiitemo o Simoni'a, <<Simon, noihenohi neena moi tonihi ngahu ngona'a.>>
O Simon wopaluhu <<'iyolo, Aba guru ngaro'a notemou.>>41O Yesus wotemo, <<Naga yamididi yomada nagimi o pipi yohibau-bau'a. Womatengo una womagehe o hala'a o ratuhu motoa, de womatengoli womagehe 'aohala'a moritoa.42Yamidi-dihona 'ayabootua yahangu manga nagimi geena, ho wo'ihi bau-bauge, manga nagimi wai'ilo'au. Bee'a nagoonau yamidi-di geena iholoi wihibohono wo'ihi bau-bau'a ge?>>43O Simon wopaluhu <<Na'o angoio'a awi nagimi 'iamo-amo'o ii'ilo'au ge.>>
O Yesus wotemo <<Ani mama'e itiaio'au.>>44De aha o Yesus mitaila'o'a ma ngewe'a'a geena de o Simoni'a wiitemo, <<Nomima'e'au ma ngewe'a numuna? Ngoi toboano ani woa'a, ma ngona 'anoehewa o a'ele la naiho'o 'ai dou; ma muna neena ma iho'o'au 'ai dou, de ami 'ongo de mohidudungu de ami utu.45Ngona noiamewa ma o ngewe'a numuna 'atoboanohi de 'amomatogumua ma ame 'ai dou.46Ngona 'anoodalihua o gooro 'ai hae'u-'u, ma muna neena mohii'ilo'au 'ai dou'u de o gooro, ma bouunu ihemo-hemo.47Igoungu: ami dora 'aoamo'o, geena imahi maito'au itiai ami baradoha ma lepe geena ma iapongo'au! Na'o o nyawa 'aiete'e manga baradoha iapongo, manga dora ma 'aiete'e.>>48De aha o Yesus mitemo ma ngewe'a'a gumuna, <<Ani baradoha moi-moi tonihi apongo'au.>>49O nyawa ma homoa nage yoodo-odomo geena'a yoma'a ade-ade, <<Naguunau ma nyawa nuuna hiadono o nyawa manga baradoha wo'ihi apongo?>>50De, o Yesus mitemo ma ngewe'a'a gumuna, <<Matiti noi nga'u, ho ngona nohalamato'au. Ngaro'a notagiou de ani wowango done 'aya owa-owa!>>
O Simon wopaluhu <<'iyolo, Aba guru ngaro'a notemou.>>41O Yesus wotemo, <<Naga yamididi yomada nagimi o pipi yohibau-bau'a. Womatengo una womagehe o hala'a o ratuhu motoa, de womatengoli womagehe 'aohala'a moritoa.42Yamidi-dihona 'ayabootua yahangu manga nagimi geena, ho wo'ihi bau-bauge, manga nagimi wai'ilo'au. Bee'a nagoonau yamidi-di geena iholoi wihibohono wo'ihi bau-bau'a ge?>>43O Simon wopaluhu <<Na'o angoio'a awi nagimi 'iamo-amo'o ii'ilo'au ge.>>
O Yesus wotemo <<Ani mama'e itiaio'au.>>44De aha o Yesus mitaila'o'a ma ngewe'a'a geena de o Simoni'a wiitemo, <<Nomima'e'au ma ngewe'a numuna? Ngoi toboano ani woa'a, ma ngona 'anoehewa o a'ele la naiho'o 'ai dou; ma muna neena ma iho'o'au 'ai dou, de ami 'ongo de mohidudungu de ami utu.45Ngona noiamewa ma o ngewe'a numuna 'atoboanohi de 'amomatogumua ma ame 'ai dou.46Ngona 'anoodalihua o gooro 'ai hae'u-'u, ma muna neena mohii'ilo'au 'ai dou'u de o gooro, ma bouunu ihemo-hemo.47Igoungu: ami dora 'aoamo'o, geena imahi maito'au itiai ami baradoha ma lepe geena ma iapongo'au! Na'o o nyawa 'aiete'e manga baradoha iapongo, manga dora ma 'aiete'e.>>48De aha o Yesus mitemo ma ngewe'a'a gumuna, <<Ani baradoha moi-moi tonihi apongo'au.>>49O nyawa ma homoa nage yoodo-odomo geena'a yoma'a ade-ade, <<Naguunau ma nyawa nuuna hiadono o nyawa manga baradoha wo'ihi apongo?>>50De, o Yesus mitemo ma ngewe'a'a gumuna, <<Matiti noi nga'u, ho ngona nohalamato'au. Ngaro'a notagiou de ani wowango done 'aya owa-owa!>>
The Seed Company