O LUKAS6
1O wange moi'u o Hiaini ma Wange'u, o Yesus de awi ni-nii'i yanonu o gandum ma bailino, de Awi ni-nii'i yautu'u o gandum. Ona yateo de manga giama, de yaodomo.2Yamuluo naga o Farisio'a yotemo, <<Idodoau ho ngini niapalene tongone nanga agama ma behehongo? Hiadono niodiai o geena o Hiaini ma wange'u?>>3O Yesus wopaluhu <<Ngini marai niabaca'au, o Daut wodi-diai ma oraha una de awi nyawa yo'ihawini?4Una woohama ma Jou awi Woa'a de waehe o roti ihihuba-huba'au ma Jou ma Dutu'a de waodomo. De aha wo'i'ula awi nyawa-nyawa'a. Ena mo-mongo imote'e tongone nanga agama ma behehongo, duga 'ao imam-imam 'iani yaodomo ma roti geena.>>5De aha o Yesus wotemoli, <<Ngoi o Nyawa ma Ngoa'a to'uaha o 'iau 'iani podiai o hiani ma wange'u!>>6Ma moi'u ma oraha o hiaini ma wange moi oli, O Yesus wotagi o dodoomu ma woa'a la wodoto'o. Geena'a woma tengo awi giama ma guida'a ihongeno'a.7O agama yodoto-doto'o de o Farisio'a yamuluo naga, yohali-hali'i o Yesus awi hala, na'o wima'e wo'ihiai'i o nyawa o hiaini ma wange'u, geena aha ona wihihala.8O Yesus wana'o manga hingina'a ho Una witemo o nyawa awi giama ihonge-hongeni'a, <<Naino nomagoa'ie ma biono'a!>> Ma nyawa guuna womagoa'a, de womahi goono geena'a.9De aha o Yesus wo'ihano ona'a moi-moi, <<Imote'e nanga agama, ngone 'iani o'iau podiai o Hiaini ma wange'u? Podiai o owa e'ola podiai o diiha? Po'ihi halamata e'ola po'ihi bodito?>>10O Yesus wo'itaila'o'a moi-moi, de wiitemo una'a <<Ani giama natoa'ino.>> Ho una ma watoa'ino awi giama de 'ageena ma oraha awi giama iai'o'au.11Ho, o agama yodoto-doto'o de o Farisio'a geena duru yongamo, de yomahi'aduga o'iau halingou widiai o Yesusi'a.12Ma oraha geena o Yesus wohawu o tona'a ma bohude moi, la womadahaubayanga. Geena'a Una womadahaubayanga ma Jou ma Dutu'a o wutu moino.13Ho de i'initade, Una wo'iaho'o awi ni-nii'i, de wo'iili'i ona yaamogio'o de yamididi. Una wo'ihironga ona, o hu-hulo'o. Ona geena:14O Simon (nage wihi ronga o Petrus), de o Andreas o Simon ma dodoto, o Yakobus de o Yohanes, o Filipus de o Bertolomeus,15o Matius de o Tomas, o Yakobus o Alfeus awi ngowa'a, de o Simon (witeho-tehongo o Selot ma nyawa),16o Yudas o Yakobus awi ngowa'a, de o Yudas Iskariot nuunau nage wiwu'unu o Yesus.17De aha o Yesus de awi hu-hulo'o youti o de'u'u geena de yoma togumu'u o ngi moi iti-tiaio'a de ona yomahi go'o-go'ono. Geena'a manga lepe awi ni-nii'i o Yesus ma homoahi, de manga lepehi yoboa o Yudeano moi-moi, o Yerusalemino, o Tirusino, de o Sidon ma benda-bendarinohi, ma de o gahi ma date-date-'inohi.18Ona yoboa la wihigihene o Yesus, de wo'ihiai'i manga pa-panya'e. Yo'ite-te'eohama o to'ata, ma yoboa ho yoai'i.19O nyawa moi-moi yomahi hali'i la, wigagao o Yesus, matiti o 'uaha ihupu Awi roehino de yo'ihiai'i ona moi-moi.20O Yesus wo'igelelo'a awi ni-nii'i'a de wotemo,<<Nioutumo'u ngini nio huu-huha,Hababu ngini ma Jou ma Dutu awi umata!21Nioutumo'u ngini nage o oraha neena nii hawini,Ngini aha nii punuhu.Nioutumo'u ngini nioali-ali, o oraha neenangini aha nioiyete!22Nioutumo'au ngini na'o nibuhulu, yomahi gumadanowa, nihohedu, de niaronga yatiiha matiti ngini ni-nii'i o Nyawa ma Ngowa'a23O nabi-nabi ma hilano ma yo'idiai o geena. Na'o o geena idadi, tanu ngini niahingina imaere de nihiroge-roge matiti niado'u 'aoamo'o da'u o horoga'a.24Ma niobodito ngini nage o oraha neena nio'aya-'aya;Hababu ngini niama'e'au yaowa-owa.25Niobodito ngini nage nii punuhu o oraha neenaHababu ngini aha nii hawini!Niobodito ngini nage o oraha neena nioiyete;Hababu ngini aha niahingina ihuha de nioali!26Niobodito ngini, na'o o nyawa moi-moi nipuji; hababu toona manga edete de manga dotumu ma hilano yo'ipuji o nabi-nabi yote-tengulu'u.>>27<<Ma, ngini'a nage o oraha neena niihigihene Ngoi, Ngoi to'ula o behehongo neena: Ni'idora niaha-haturu, de niodiai yaowa-owa o nyawa nibuhu-buhuli'a.28Ni'idagaaho'o o bara'ati o nyawa nihi lo-lolai'a, de ni'idahaubayanga o nyawa manga hingina iti-tiiha ngini'a.29Na'o o nyawa nipo'a nia gotoa'a ma hongonano, nio'ulali ma hongona. Na'o nia baju i'a-'a'ulu'u yaora, nia baju ma nio'ula'au.30Na'o o nyawa o'iauhona yogaaho'o ngini'a, ni'i'ula geena ona'a; de na'o niado'u yaora, uwa nio gaaho'o ihigilio.31Nio'idiai o nyawa ma homoa'a, harage 'angini niaigo nidiai ngini'a.32Na'o ngini ni'idora 'aonyawa nidora-dora ngini'a 'ao'iawa ma utumu. O nyawa yoba-baradoha ma, yo'idora 'aonyawa'a nage yo'idora-dora onano!33De na'o ngini niodiai yaowa duga 'aonyawa'a nage niaha yaowa-owa'a 'ao'iawa ma utumu ma Jou awi biono'a. O baradoha ma nyawa, ma yodiai o geena!34De na'o ngini ni'ihibau o pipi 'aonyawa yadaa-dadi'a ihigilio, 'oiwa ma utumu o baradoha ma nyawa ma yo'ihibau o pipi o nyawa yoba-baradoha'a de aha yo'idagaaho'oli ihigilio.35Ngini 'Iani uwa o geena! Ngini halingou ni'idora niahaturuu'a de niodiai yaowa ona'a. Ngini 'iani ni'ihi bau, de uwa niongano-no ilio. Na'o o geena niado'u 'aoamo'o, de ngini aha niodadi ma Jou ma Dutu wo'a'a'ulie awi ngowa-ngowa'a. Hababu ma Jou ma Dutu awi hingina itero o nyawa'a, ngaro 'aiwihi do-doa'awa de o nyawa ma diiha'a ma o geena.36Ho tanu ngini 'iani nima'adora harage'a nia dea de awi dora'a!>>37<<Uwa ni'ihihala o nyawa'a, la ngini ma uwa ma Jou ma Dutu niwihihala. Uwa ni'ihu'umu o nyawa ma homoa la nginima, uwa niwihu'umu ma Jou ma Dutu. Ni'ihiapongo o nyawa la ma Jou ma Dutu, ma niwihi apongo ngini'a.38Ngini 'iani ni'i'ula o nyawa'a la ma Jou ma Dutu ma niwi 'ula ngini'a: ngini aha niama'e o do'u 'iamo-amo'o yatuga'u'au de yodu-duu'u'u de yodeleelu'u hiadono i'o'opoa. Matiti o duduga nage o nyawa'a ni'ihituga'a, ngini'a ma, ma Jou ma Dutu aha niwihituga.>>39Geena'a de o Yesus wo'ihi ade-ade ona'a o hi'atero moi oli neena, <<'Ai dadiwa o nyawa yopilo-pilo'o yo'ituda o nyawa yopilo-pilo'i'a, done yamidi-di hona yomahidoota'a o guhu'u.40'A moiwa o nyawa yomadoto-doto'o iholoi yobarija de manga guru. Ma na'o yaduangino'au Yomadoto'o, done 'ayomatero de manga guru.41Idodoau ho, niariadodoto awi la'o ma geneo iete-ete'e 'aniama'e'a, ma harage 'ao bala'a ma dobi'i niala'o ma doda'a ma ngini 'aniama'ewa?42Itoto'iau ho nimaa ade-ade nia riadodoti'a niotemo <Nainou, la taai'o'ahi ani la'o ma geneo geena,> ena momongo tingini nia la'o ma doda'a harage'a o bala'a ma dobi'i ma 'a niama'ewa? E wolo tengelu'u! 'Iani nihihupuo'ahi o bala'a ma dobi'i niala'o'a. De aha nama'e itiai la idadi nohihupu ma geneo geena ani riadodoto awi la'oha.>>43<<O gota i'u-'utuwulu 'oiwa ma howo'o itiiha. O geenali de o gota ipepelela'a 'a'oiwa ihowo'o yaowa-owa.44O gota moi-moi panana'o 'amahowo'o'a. O rutu'u ihi-hi'a aiihowo'ua o ara, de o hi-hi'a ihihowo'ua o angguru.45O nyawa ma owa yohihupu 'amaowa-owa, matiti manga hingina'a yaomango'a de o owa. O nyawa ma diiha, yohihupu 'aiti-tiiha, matiti manga hingina'a, yaomango'a de o diiha. Matiti na'o o'iau manga ulu itemo geena ihupu manga hinginade.>>46O Yesus wotemoli, <<Ma haidaa 'oiwa ngini nimahigaho'o Ngoino, <Jou, Jou,> ma ngini 'ania diaiwa tinihidemo-demo'au ngini'a nage?47O nyawa nage yoboa ngoino, la yoihene 'ai demo de yadiai, de o nagoonau ngone po'ihitero ma nyawa noona? Yaowa ngoi tinihi maiti ngini'a.48Ona geena harage o nyawa moi, awi woa womahigo'o una wapaiti walu'u-lu'u'u, de o heleo wohipangini. Ma oraha o ngaili 'inguuihi ho o a'ele yadoa, ma ma woa geena 'ai lubawa, matiti ihigo'o ma angi ipau-pauo'a.49Ma o nyawa yoiheno'au 'ai demo de 'ayadiaiwa, ona geena hara'ao nyawa moi wohigo'o awi woa ma angi 'oiwa. Ho na'o o ngaili inguuihi de o a'ele yadoa, ma woa geena iluba de 'irutu-rutu'u'u.>>
The Seed Company