O LUKAS5
1Ma moi'u o Yesus womahi go'ono o Genesaret ma talaga ma 'ahane'a. O nyawa manga lepe hiadono yo'apeeto, mangale yomau yoihene o habari ma Jou ma Dutuno.2O Yesus wama'e o ngootili modidi o talaga ma 'ahane'a. Ma ngootili ma dutu goona youti'u'au, ho yoiho'o manga homa.3O Yesus wopalene to Simon, awi ngootilie de wihulo'o o Simoni'a la watila o gahi'o ma ube i'a'ulo'o. O Yesus o ngootilo'a wogogelu'u de wo'idoto'o o nyawa manga lepe-lepe'a, o ngootilo'a de waiha.4Ho de iduangaino wo'idoto'o, o Yesus witemo o Simoni'a, <<Nimahioru ma lu'u'o la ninadohoma o nao'o.>>5O Simon wopaluhu, <<Aba guru, o wutu moiou, durue mio hali'i ma 'amoio de 'oiwa! Ma duga ngona Aba nohulo'o ho 'ogenau; ngoi aha tona dotonoli ma homa.>>6Ho ona ma yohomali ho ma baha'u, duru 'aolepe ma nao'o yomaadama'e ho manga homa ma, hali'i iracangou.7Hiadono ona 'ayomahi gaho'ou manga manai'a o ngootili moi'a. Toona manga manai ge yoboano, ho yoma'a duhunu ihibalene manga nao'o o ngootilie, hiadono ma ngootili modidihona geena hali'i ilutuou.8Ma oraha o Simon wama'e geena, una tilabu'u'u o Yesus awi biono'a, de wotemo, <<Noi mada'au ngoi Jou! Hababu ngoi neena o nyawa baradoha!>>9O Simon de ma nyawa-nyawa geena'a, moi-moi yoheranga yama'e onao'o geena ma lepe yohidaene.10O geenali de o Simon awi ma-manai, o Yakobus de o Yohanes, o Sebedeus awi ngowa-ngowa'a. O Yesus witemo o Simoni'a, <<Uwa nohawana! Neena'a de imahii'a ngona nodadio'au o nyawa ma hahali'i la inii'i ngoi.>>11O Simon de awi ma-manai yatoba'iha manga ngootili o 'ahaneha, de yamada'a geena dau moi-moi, de winii'i o Yesus.12O wange moi'u, o Yesus o bendara moio'a wai'a. Geena'a womatengo awi roehe yaomango'a de o pado. Ma oraha una wima'e o Yesus, una watilabu'u'u awi biono'a de womahigaho'o, <<Aba, na'o 'aidadi, de tanu ngoima noihiai'i 'ai panya'e iipe-peree'e neena!>>13O Yesus wigagao'u de wotemo, <<Ato mode'e, ho notogumou!>> De 'aooraha geena awi panya'e ma itogumu.14De o Yesus 'awihigumadawa 'ao nyawa moi'ama uwa una wo'ihingahu, de wiitemo, <<Notagi ma imami'a, de nogaaho'o una nowitaila'o la wana'o itiai ngona notogumo'au. De aha notagi ani hada'a nohihuba harage o Musa wohulo'o'au, la o nyawa moi-moi nina'o, ngona itiai notogumo'au.>>15Ma o Yesus awi habari 'aitagi monga ho hiadono yogiihene moi-moi'a, de o nyawa manga lepe yoboa, la wihigihene de wo'ihiai'i manga panya'e.16Iduangino geena, o Yesus wotagi womadahaubayanga o ngi ili-liilo'a.17O wange moi'u ma oraha o Yesus wodoto'i'a, yamuluo naga o Farisio'a yoboano de o agama'a yodoto-doto'o geena'a yogogelu'u. Ona yoboa o Yerusalemino, o Galilea'a de o Yudea ma benda-bendarino. Ma Jou awi 'uaha o Yesuso'a ho wo'ihiai'i manga panya'e.18Ma oraha geena yamuluo naga wihiboano womatengo wopapaluga wiiduha awi ti'aro'a. Ona yohi'ahali'i la yoohama o woa ma doda'a, la ona winoa ma nyawa guuna o Yesus awi bionu'u.19Ma matiti o nyawa 'ayolepeli geena'a, ho ona 'aidadiwa wihiohama. Geena'a de ona 'awihidoau o woa ma de'ude, de yahoroma ma 'atu ho wihia de awi ti'aro'a o Yesus awi bionu'u, o nyawa yolepe-lepe manga hidogorona'u geena.20Ma oraha o Yesus wama'e toona manga ngonga'u 'ogeena ma amo'o, una wotemo, <<Ria dodoto, ani baradoha ii'ilo'au.>>21O agama yodoto-doto'o de o Farisio'a ma nyawa, yoma'a ade-ade moi de moi'a yotemo, <<Naguunau nuuna, ho hiadono womooini wiete-ete'e ma Jou ma Dutu? 'Amoiwa yadadi o baradoha yai'ili, 'iani'a ma Jou ma Dutu.>>22Ma o Yesus wana'o manga hingina'a ho wo'itemo, <<Idodoau ho niahingina ma doda'a ihano-hano?.23'Ia'aena iholoi igapanga totemo <Ani baradoha tonihi apongo'au, e'ola totemo nomao'o de notagiou!>?24Ma o oraha neena, ngoi aha tohimaiti ngini'a, o dunia'a neena o Nyawa ma Ngowa'a wo'uaha waapongo o baradoha.>> Aha o Yesus wiitemo wopa-paluga'a ge, <<Nomomi'i! Nagoa'a ani ti'ara de noliou!>>25De ma nyawa guuna womomi'i toona manga biono'a moi-moi de aha wagoa'a awi ti'ara, de wolio de awi puji monga ma Jou ma Dutu'a.26Ona moi-moi duru yoheranga de wipuji ma Jou ma Dutu. De 'ayohawa-hawani'a ona yotemo, <<Ngone duru poheranga pama'e-ma'e o wange neena!>>27Iduangino geena o Yesus wohupu'a de wima'e woma tengo o balahiteenge wogagaaho'o, Awi ronga o Lewi, wogogelu'u awi kantoro'a. O Yesus wiitemo una'a, <<Naino! La noi nii'i ngoi.>>28O Lewi womagoa'ie de wamada'a geena dau moi-moi de winii o Yesus.29Iduangino geena o Lewi wodiai o ngodomo maamo'o awi woa'a ma ngale o Yesus. Manga lepe o balahiteenge yogagaaho'o de o nyawa ma homoahi yomahinii'i yoodomo de ona.30Yamuluo naga o Farisio'a de o agama yodoto-doto'o manga hingina 'oyadaenua ho yo'iade-ade o Yesus awi ni-nii'i'a <<Idodoau ho ngini nioodomo de nioo'ele, de o balahiteenge yoga-gaaho'o, de o nyawa ma di-diiha?.>>31O Yesus wopaluhu, <<O nyawa manga panya'e 'oiwa yo'ihali'ua yohou-houlu 'iani 'ao nyawa de manga pa-panya'e'a.32Ngoi toboa to'iaho'ua o nyawa nage manga wowango iti-tiaio'au ma, 'ao nyawa yoba-baradoha'a la yamada yodiai o baradoha, de yoma'ilio ma Jou ma Dutu'a.>>33O nyawa-nyawa goona yotemoli o Yesusi'a, <<O Yohanes awi ni-nii'i de o Farisio'a ma nyawa ona yopuaha de yomadahaubayanga. Ma tongona ani ni-nii'i, 'ayo odomo de yoo'ele.>>34O Yesus wopaluhu, <<'Bote 'aniadadio'a ni'ihulo'o womomodo'a awi ma-manai'a yopuaha o awi modo'a ma ngodomo'a, ma oraha ma naulu womo-modo'a de una'ahi geena'a? Marai 'aidadiwa!35Ma 'iani ma oraha yaadono, ma naulu guuna wiehe'a, de aha ona yopuaha.>>36De aha O Yesus wo'ihiade-ade o hi'atero neena, <<'Amoiwa o baju ma hungi yaracanga de ihitapa o baju ma diiha'a. Matiti done yaracanga o baju ma hungi'a geena. De ahali o baju ma hungi aima'adaenua ihitapa de o baju ma hila'a.37O geenali 'amoiwa o nyawa o angguru ma duulu, de yodalihi ma ngi-ngi ma hila'u, hababu ma angguru ma duulu geena done yapela'a. De ma angguru i'opoa de ma ngi-ngi ihoroma.38O angguru ma duulu halingou yoodalihi ma ngi-ngi ma duulu'u.39O geenali 'amoiwa o nyawa yomode'e yao'ele o angguru ma duulu, na'o yapahano'au o angguru ma hila. Yotemo bali, o angguru ma hila iholoi ihemo.>>
The Seed Company