O LUKAS4
1O Yesus wiomango'a de o Omaha Iofi-ofi, ma oraha una wamada o yordan ma ngaili. De aha o Omaha Iofi-ofi wiaha o Yesus, o 'ahane iamo-amo'i'a.2Una geena'a awi wange moruata, de o wutu moruatino witaili o to'ata ma 'oana. Ma daaono geena, o Yesus 'awoodomua ho duru wamao wihawini.3O to'ata ma 'oana witemo o Yesus i'a, <<Ngona neena ma Jou ma Dutu awi ngowa'a. Ho bee'a nadiai o heleo neena imadadi o inomo.>>4Ma o Yesus wopaluhu <<O Bo'u 'Ibe-berehi ma doda'u ituliho'au, 'ade o inomua aha o nyawa 'powango.>>5De aha o to'ata ma 'oana wiaha o Yesus o dingii i'a'a'ulie'a, de hoola'o jajawi ena wihimaiti o dunia ma 'oa-'oana de ma araata moi-moi.6De ma to'ata ma 'oana itemo o Yesusi'a, <<Moi-moi o 'uaha de o araata neena aha to'ula ngona'a.>> Hababu moi-moi neena iihiataho'au ngoino, de ngoi aha to'i'ula nagoona'au taigo to'i'ula.7Ho moi-moi geena 'atongonau, itigoo'o ngona noihuba ngoino.8O Yesus wopaluhu, <<Naga o Bo'u ibe-berehi ma doda'u ituliho'au, ngona 'iani nowihuba duga-duga 'ama Jou ma Dutu'a de nowileleani duga 'auna'a.>>9De aha o to'ata ma 'oana wiaha o Yesus o Yerusalemie de winoa'u ma Jou ma Dutu awi woa ma ponato'a de witemo una'a, <<Ngona igou-goungu ma Jou ma Dutu awi ngowa'a, ho Bee'a noma tebulu neena'a de nau'u.10Hababu o Bo'u ibe-berehi'u ituliho'au, ma Jou ma Dutu aha wahulo'o awi malai'ata la nigoana.11De o malai'ata aha nilegono, la Ani dou uwa yatigi o heleo'u.>>12De o Yesus wopaluhu, <<O Bo'u Ibe-berehi'u ituliho'au; Uwa nowitaili ani Jou ma Dutu'a.>>13Ho de iduangino o to'ata ma 'oana witaili o Yesus, de ma ini'i ma lepe'u geena, de aha wimada'a de itamaali o oraha yaowa-owa.14De aha o Yesus wolio o Galilea'a de una wiomango'a de ma Jou ma Dutu awi Omaha Iofi-ofi. De moi-moi o Galilea ma tona'o'a geena yaedo-edoni'a de o Yesus awi habari.15Una wo'idoto'o o dodoomu ma woa-woa'a, de o nyawa moi-moi wipuji Una'a.16O Yesus wo'ai'ali o Nazareti'a geena'a ma hila una wodalamo'o. Ho de o hiaini ma wange'u, imote'e Awi hilahi o Yesus woohama o dodoomu ma woa'a. Una womahigo'ono wobacau o Bo'u iofi-ofi,17ho geena'a de wi'ula o Yesusi'a o nabi Yesaya awi bo'u, o iluulu-lu'ino'a. Ho de wapelenga, Una waili'i ma rue neena,18<<Ma Jou Awi Omaha Iberehio'a naga ngoio'aHababu geena tohihabario habari ma owa o nyawa yohu-huha'a.Una woihulo'o ngoi, la tohi'a'angahu,Yo'itago-tago'ino yo'ipidili,de yopilo-pilo'o yomahima'eo nyawa nage yo'ihi'a'au'u to'igoa'a.19De to'ihingahu ma oraha ya adonou ma JouWo'ihihalamata Awi nyawa.>>20De aha Yesus walulu'oli ma bo'u geena, de wohigilio, de aha wogogele. Moi-moi o dodoomu ma woa'a geena manga la'o 'auna'a.21De o Yesus womaade-adeli ona'a wotemo, 'onaneda, <<Ma rue tabaca-baca'au 'aano ge o wange neena idadio'au, ma oraha ngini nioihene.>>22Matiti o demo-demo watehongo duru itero, ho o nyawa moi-moi geena'a wihi gihene de duru yoheranga. Ho ona yotemo <<Wolo! Ma guuna 'a o Yusuf awi ngoa'a.>>23Ho o Yesus wo'iade-ade ona'a wotemo, <<Done ngini aha niihidemo ngoino de o dora bolo-lo neena, <Ee dotere nahoulo'ahi Ani roehe mahirete. O nana'o ihera-heranga nage mioiheno'au, nodidiai do'a o Kapernaumo'a. Ho, bee'a nodiai ani hoano'a mahirete.> >>24O Yesus wotemoli, <<Niohi-hininga, 'amoiwa o nabi yo'ihoromati toona manga hoano'a mahirete.25Ma nioihene ma oraha o Elia 'awowangohi, o taunu haange de ma hongonano 'aobeha'ua ho o baulaco maamo'o yo'idutu'u manga tona'o'a. Ma oraha geena manga lepe o ngewe'a o babao o Israelo'a.26Ngaro o genau ma, ma Jou ma Dutu 'awihulo'uwa o Elia wotagi yobao-bao'a o Israel ma nyawa'a ma o Elia wotagi duga-duga 'aongewe'a'a moi muna o Sarfat ma nyawa o Sidon ma tona'o'a.27O geenali de ma orahu'u ma Nabi Elisa, o Israelo'a manga lepe yo'ipado-pado, ma o Elisa 'amoio de wo'ihiai'ua o Israel ma nyawa'a, duga'a o Naamani'a una geena o Siria'a ma nyawa.>>28Ma oraha yoihene 'ogeena, moi-moi o dodoomu ma woa'a geena yongamo.29Ona yomagoa'ie de wigini'i o Yesus o bendara ma duduni'a, de wiaha o baa'ori'a, toona manga bendara yohigo'o-go'o ma date'o'a. Ona manga hingina'a tanu witilau o Yesus o baa'oru'u30Ma o Yesus womahi-hihu manga hidogorona'a de womajobo'a.31De aha o Yesus wotagi o Kapernaum ma bendari'a o Galilea'a. Do'a wai'a o hiaini ma wange'u Una wo'idoto'o o nyawa manga lepe.32Ona yaigo ma oraha yama'e wodoto'o, matiti Una woma ade-ade de awi 'umatio'a.33O dodoomu ma woa'a geena womatengo wite'eohami'a o to'ata. Ma nyawa guuna womaore-orehe.34<<Ee Yesus, o Nazarete ma nyawa, nimi do-doauoli ngomino. Ngona noboa marai 'animihi murutu ngomie? Ngoi toni na'o ngona geena: ngona ma Jou ma Dutu awi hu-hulo'o noofi-ofi!>>35O Yesus wodorohu o to'ati'a geena <<Issu! Nomaliili. Nohupu o nyawano neena!>> De o to'ata geena wihiboha ma nyawa guuna, o nyawa manga lepe-lepe manga bionu'u, de aha ihupu ma nyawano geena, de 'ama ube ma 'owo tohau'ua.36O nyawa moi-moi yoheranga, de yoma'a ade-ade yotemo <<Ee wolo 'aogu-guulewa awi demo-demo. Hababu de awi 'umatio'a de awi 'uaha, una wahulo'o o to'ata ihupu de ena ma ihupuho!>>37Geena'a de o Yesus awi habari itagi matona'o'a geena yaedo-edoni'a.38Geena'a de o Yesus wamada o dodoomu ma woa geena, de wotagi o Simon awi woa'a. O Simon awi diotono o ngewe'a muna migogama duru ami roehe ihau'u ho o nyawa-nyawa geena'a wihingahu o Yesusi'a.39O Yesus wo'ai'a uma hidutu'u ami daha, de wahulo'o o gogama geena iai'i. Ho ami gogama geena iai'o'au, de mo-momi'i de aha mo'i leleani ona.40Ma oraha italuhou, yo'iaha o nyawa nage manga riadodoto yopapanya'e o Yesusi'a de manga panya'e maini'i ilepe-lepe. O Yesus wo'idatami awi giama ho ona moi-moi yotogumu.41O to'ata ma ihupu o nyawa manga lepe-lepeno yo'idodongohami'a nage, de ima ore-orehe itemo, <<Ngona ma Jou ma Dutu awi ngowa'a!>>
O Yesus wodorohu ena'a de wohigumadawa ima ade-ade, matiti ena wina'o'au Una o 'oana wohiha-halamata.42Ma oraha o wange ipuda, o Yesus wamada ma bendara geena, de wotagi moi o ngi ilii-liili'a. Ho, o nyawa manga lepe wihali'i o Yesus. Ho de wima'e, ona wituumungu la uwa Wo'imada.43Ma o Yesus wo'itemo, <<O Habari ma owa mangale itoto'iau ma Jou ma Dutu awi pareta halingou ngoi tohihabari o bendara ma homoa'ahi hababu geenau ho ma Jou ma Dutu woihulo'o Ngoi o duniano.>>44Geenau ho o Yesus wanoimo'au wo'idoto'o, o dodoomu ma woa-woa'a o Yudea ma tona'o'a.
O Yesus wodorohu ena'a de wohigumadawa ima ade-ade, matiti ena wina'o'au Una o 'oana wohiha-halamata.42Ma oraha o wange ipuda, o Yesus wamada ma bendara geena, de wotagi moi o ngi ilii-liili'a. Ho, o nyawa manga lepe wihali'i o Yesus. Ho de wima'e, ona wituumungu la uwa Wo'imada.43Ma o Yesus wo'itemo, <<O Habari ma owa mangale itoto'iau ma Jou ma Dutu awi pareta halingou ngoi tohihabari o bendara ma homoa'ahi hababu geenau ho ma Jou ma Dutu woihulo'o Ngoi o duniano.>>44Geenau ho o Yesus wanoimo'au wo'idoto'o, o dodoomu ma woa-woa'a o Yudea ma tona'o'a.
The Seed Company