O LUKAS21
1Ma Jou awi woa'a, o Yesus wo'ige-gelelo o nyawa yo'aya-'aya yohiohama manga pipi o hu-huba ma ngii'u.2Una ma mima'e momatengo o ba-bao duru mohuu-huha mohiohama ami pipi o hala'a o ngodumu modidi.3De o Yesus wotemo, <<Nio ihene: Ma ba-bao numuna iholoi iamo'o mo'ula de geedau ma homoa.4Hababu ona manga arata iholoi'u ho yo'ula de ma bo-boloio'a. Ma o ba-bao neena, durue 'a amihuha, ma moi-moi mohidu'ula'au ngaro duru, mooparalu tomuna ami wowango'a.>>5O nyawa yamuluo naga yohiade-ade yotemo ma Jou ma Dutu awi woa itero, hababu yohidiai'a de o heleo itero-tero, de nage yohihuba-huba ma Jou ma Dutu'a. Geena'a de o Yesus wo'itemo ona'a,6<<Naga de ma oraho'a, moi-moi niama'e-ma'e o oraha neena aha ihoroma; Done 'aoheleo moio de 'oiireteniewa ma dingio'a neena!>>7O Yesus awi ni-nii'i yohano o Yesusi'a, <<Aba guru, muluo'a done geena aha idadi? De o'iau ma dudunguu na'o ma oraha geena yaadonou?>>8O Yesus wotemo, <<'Iani nimahidi-diai, uwa hiadono ngini niielu'u. O nyawa yolepe aha yoboa de yaaha 'ai ronga, de yotemo, ngoi neena una! De ma oraha yaadono'au. Ma uwa ni'idomote'e ona.9Ngaro uwa niohawana na'o ngini niogiihene naga o paraanga de yoma'arohu. Moi-moi geena 'iani idadi ihila. Ma geena 'a ma orahuahi o dunia ma baha.>>10De o Yesus wohigila-gilali awi ade-ade, wotemo, <<O Bangiha moi aha yoparaanga o Bangiha ma homoa'a, o Pareta moi yo'iparaanga moi'a.11Moi-moi'a done aha idadi o ohu duru 'aopau, de o hawini de o boba'u. Aha idadi moi-moi geena duru poodo-domodongo o diwango'a.12Ma geenadau 'oidadiwahi, ngini done niitago'o de nihangihara. Ngini done niuruhu o dodoomu ma woa-woa'a de nihiohama o bui'a. De ngini done nidodoba'a o 'oa-'oana manga biono'a de yopa-pareta'a matiti ngini ni-nii'i ngoi.13Geenau ma oraha ira-rahai ngini niohingahu o habari ma owa ma Jou ma Dutuno.14Niahingina niabitumino ngini uwa niododato de o'iau aha niotemo la niaroehe nihiduhunu.15Ngoi mahirete aha tini'ula o demo-demo de o barija geena, hiadono 'amoiwa niahaturu niganamoto e'ola yahagata o'iau nage ngini niotemo.16Ngini done nida'angelu'u niaeha de niadea, niariadodoto, nia nyawa-nyawa de niama-manai. Ma regu neena ngini done nitooma.17Ngini done nibuhulu o nyawa moi-moi, matiti ngini ni-nii'i ngoi.18Ma niautu niahae'o'a 'aolia moio de o iihanguwa.19Na'o ngini niangonga'u ibitumu de niotongohono ngini aha niohalamata.>>20Na'o ngini niama'e o Yerusalem ihi'agooromo'au o hurudado, ngini aha niana'o ma bendara geena 'aitaaowau de ihoroma.21Ma oraha geena o nyawa o Yudea'a 'iani yoloa o de'u-de'u'a. Ona nage yomanoa-noa o bendaro'a 'iani yamada de ona nage o bendara ma duduno'a uwa yoohama o bendarino.22Hababu ma oraha geenau ma Jou ma Dutu awi hu'umu wohiguti, la imadadiou nage ituli-tuliho'au o Bo'u iofi-ofi ma doda'u.23Duru yotoohau'u ma oraha geena o nge-ngewe'a nage yohiahano de manga ngowa'a 'ayohuhuohi! <Ma tona'a neena aha yaohana o huha ma amo'o, de ma Jou aha waho-howono o bangiha neena24Naga ma regu yo'ihitooma de o dia, ma reguoli yo'idiai manga bana'ono ho yo'iaha manga tona-tona'i'a; o nyawa nage awina'o-na'owa ma Jou ma Dutu, aha yo'a'agido'u o Yerusalem, hiadono ma oraha yaadono ma Jou wo'ihitatapu ona'a.25<<Done o wange, o mede, de o mamanga'a aha niama'e o dodunguu. O tona'a ma de'uo'a moi-moi o bangiha aha yohawana, de ayomahina'owau ma oraha yoihene, olu-luhu de o ngooto imo'u-mo'u.26O nyawa aha yohawana yohonewutuo'a, ma ngale 'aidadiwa yodaali, nage ida-dadi o dunia ma amo'ino neena, hababu o diwanga ma 'uaha aha i'aruae.27Ma oraha geenau Ngoi o Nyawa ma Ngowa'a toboa, o 'amo-'amo ihaono de 'ai 'uaha'a de 'ai 'umati duru iamo'o.28Na'o geena idadiou, nima goa'a niahingina niabitumino, hababu 'oitaaowau ngini done ma Jou ma Dutu niwihihalamata.>>29De aha o Yesus wo'ihiade-ade o hi'atero moi oli, Wotemo, <<Niataila'o o ara ma gota, de gedau o gota ma homoahi.30Na'o ma boboo'o niama'e'au, ngini niana'o-na'o ihiwau.31O geenali na'o niama'e geenadau idadi, ngini aha niana'o ma Jou ma Dutu wo'oana ihorio'au.32Tiniihingahu! Ma oraha geenadau imadadi neena naga yowango-wango 'ayobootuahi yohongene.33O diwanga de o tona'a done iihanga, ma 'ai demo done 'ahiado-adoni'a.>>34<<Nimaa goa- goana, uwa hiadono 'anihihuha o rame-rame de nioo'ele o dalu'u ibiha-biha, e'ola nihihuha niawowango, hiadono 'animatadaenuwa ma oraha itodo'anino iboa.35Ma oraha geena iboa, harage 'aolili'o o nyawa moi-moino, o tona'a ma de'uo'a neena.36Nima goa-goana de nimadahaubayanga 'aitauri'a, la ngini niopau niodaali moi-moi nage aha ida-dadi, de ngini aha niwidaali o nyawa ma ngowa'a.>>37O Yesus wodoto'o o wange'a ma Jou ma Dutu awi woa'a, ho de ma wutu'u una wotagi o Zaitun ma bohu'a de womanoa geena'a.38Yohiwange moi 'aode-dewelanohi o nyawa manga lepe yoboa ma Jou ma Dutu awi woa'a la yohigihene o Yesus wodoto'o.
The Seed Company