O LUKAS19
1Ma oraha o Yesus womahiadoni'a o Yerikho'a, Una wogila-gila waboa o bendara ma hidogoronaha geena.2Ma bendaro'a geena womatengo o balahiteenge wogagaaho'o manga hae'e wo'aya-'aya. Awi ronga o Zakheus.3Una womau wima'e, o Yesus guuna nagunau, ma matiti o nyawa yolepe, de monga una wotipo'o'u ho, 'aidadiwa wima'e o Yesus.4Hiadono, una womapapalitana wo'i palene yolepe-lepe, de wodoa o gota'ade la, una wima'e o Yesus maube geeenano waboa.5Ho de o Yesus womahi adono ma gota ma timino geena, Una womataila'o wa'aie de wotemo, <<E Zakheus, itaiti'a nouti! Hababu o wange neena, ngoi halingou to tulu ani woa'a.>>6O Zakheus awi dataito'a wouti de duru 'a awi garago'a widawongo o Yesus.7Ma o nyawa yolepe-lepe yama'e o geena idadi, ona yo'ulubungu. Yotemo, <<Waee! Wolo ma guuna o nyawa ma diiha'a de wotulude!>>8Geena'a de awi woa'a de aha o Zakheus womahi go'ono de wotemo o Yesusi'a, <<Jou, 'ai araata ma hongona aha to'i'ula o nyawa yohuhuha'a; de o nagoonau hona to'ihori'io'au tohigilioli ona'a ilape ma hoati'a!>>9Geena'a de o Yesus wotemo, <<O wange neena, ngona de ani woa'u, moi-moi ma Jou ma Dutu niwi hihalamato'au, de niwi'ula o wowango ma hungi. Hababu, ngona ma o Abraham awi guti'u.10Ngoi, o Nyawa ma Ngowa'a toboa la to'ihali'i de to'ihihalamata o nyawa yoiha-ihangi'a.>>11O nyawa ma gigiria'a o Yesus awi demo yohigihene, Una wohiade-ade o hi'atero moi. Hababu, ma oraha geena una o Yerusalem ma date'o'a, de o nyawa yotee bali ma Jou ma Dutu wohidagiou awi pareta ma ngale wo'oanou o dunia'a.12O Yesus wotemo, <<Naga womatengo o 'oana ma ngoa'a wotagi o tona'a i'a'a'uli'a la, wigoa'o'a wo'oana de aha wolioli.13Ma una 'owotagiwahi, wo'iaho'ino wilele-leani yaamogioo'o, de wo'i'ula ona'a o pipi o gurahi yomamo-moi. Una wo'itemo ona'a <Nimawu'unu de ma pipi neena, ma oraha ngoi totagio'a>14Ma touna awi tona'o'a ma nyawa guuna 'aiwiigowa. Ho, de wotagio'au ona yo'ihulo'o o nyawa ya'ai'a la yotemo, <Ngomi 'amioolu'u o nyawa nuuna wodadi mia'oana.>15Ma ma 'oana awi ngowa'a guuna wigoa'a wodadi 'oana, de aha wolioli awi tona'ino. De wo'iaho'o yolele-leani yo'aino, la wana'o o 'iamoio'a toona manga utumu.16Wole-leani ma dihila woboano de wotemo, <Tuanga, ma ani gurahi moi no'ula-'ulanono ge, idadio'au mogioo'o.>17Ma tuanga guuna wotemo una'a, <Duru 'a matero'a ngona neena o lele-leani ma owa! Matiti o haala nage iete-ete'e ma ngona 'aidadi toni nga'u ho, ngoi aha tonigoa'a na'uaha o bendara mogioo'o>.18Wolele-leani ma homoali woboano de wotemo, <Tuanga, o pipi o gurahi o ngai moi no'ula-'ulanono ge, idadio'au motoa.>19Wolele-leani'a geena ma 'oana wotemo, <<Ngona aha napareta o bendara motoa.>>20Wolele-leani moioli woboa de wotemo, <Tuanga, inane ma ani pipi ngoi 'ataiyuni'a de o moha ma duele.21Ngoi neena 'atoni domodongo Tuanga, ma ngale Tuanga ani hingina iopini. Hababu Tuanga naehe ngaro 'atongonawa, de ngona napolu ma howo'o, ngaro'angonawa notudu'u'u.>22Ma 'oana geena wotemo una'a, <Ngona neena igoungu o lele-leani ma diiha! Imote'e tongona ani demo ho ngoi 'iani toniho-howono ngona. Ngona nana'o ngoi 'ai hingina iopini; ngoi taehe o'iau nage 'atongoiwa de tapolu ma howo'o nage ngoi 'a totudu-tudu'ua.23Na'o o geena idodoau ho ano'i'ulawa o nyawa yohihali-hali'i mautumu la taino taehe de ma utumo'a?>24Geena'a de ma 'oana wo'itemo o nyawa yomahi go'o-go'ono geena'a, <Niaehe ma pipi moi una'a ge, de nio'ula wolele-leani'a, nage wadidiaio'au o gurahi mogio'o.>25Ma, ma nyawa-nyawa geena'a yotemo, <Tuanga, touna mogioo'o'au.>26Ma 'oana wopaluhu, <Nio hi-hingina toonyawa de maena'au aha yo'i'ulali duru ilepe. Ma o nyawa nage 'amoi ma 'oiwa ona'a, geena aha yaehe'ali onano.27O oraha neena ni'iahano 'ai haturuu goonadau nage 'ayoolu-olu'u ngoi to'oana. La ni'itooma moi-moi 'ai biono'a!> >>28Ho de o Yesus watehongo'au moi-moi geena Una wo'ihi-hila yotagi o Yerusalemie.29Ma oraha yomahi hihorio'au o Betfage de o Betania'a, o Zaitun ma bohuo'a, Una wo'ihulo'o awi ni-nii'i yamididi yohila.30De o Yesus wo'itemo, <<Nio tagi ma hoana nanga biono'a, de na'o nimahiadoni'a la niama'e o keledai ma goo ihili'o'a. Ma keledai geena 'omaiwahi o nyawa yoobalene. Niahohe ma keledai ma li-li'o, de niatoba'ino31Na'o o nyawa yohano ngini'a, yotemo <Idodoau ho ngini niahohe o keledai geena?> Ngaro'a niotemo, <Ma Jou wa paralu.> >>32Yamididi awi ni-nii'i geena yotagi, de yama'e'a moi-moi itiai harage'a o Yesus watehongo'au.33Ma oraha ona yahohe o keledai geena, de ma dutu wo'itemo ona'a, <<Idodoau ho niahohe o keledai geena?>>34Ona yopaluhu, <<Ma Jou waparalu.>>35Ho ona yaaha ma keledai ma goo geena o Yesus ino. De aha ihinaode de tooana manga juba o keledai made'uo'a de wiiduhunu o Yesus wodoa o keledaide.36Ma oraha una waboa geeenano wopalenu'u o keledaio'a geena, o nyawa-nyawa manga juba yohinaoha o nge'omiha.37Ma oraha o Yesus womahiadonou o Yerusalemie ma nge'omo iuti-uti o Zaitun ma bohuo'a de yau'u, awi ni-nii'i yolepe-lepe yomaorehe-orehe wipuji ma Jou ma Dutu de yo'amaowa'a, Una'a matiti o nana'o ihera-heranga ona yama'e'au.38Ona yoma ore-orehe yotemo, <<Ma Jou ma Dutu nowihi bara'ati ngona mia 'oana noboa-boa de toma Jou awi 'uaha! 'Ao garago ma ngale ngone poma'a dame'au, de ma Jou ma Dutu ho powipuji hababu awi hingina itero!>>39Ya muluo naga o Farizio'a o nyawa manga lepe-lepe'a geena yotemo o Yesus i'a, <<Aba guru, no'i hulo'o ani ni-nii'i la yomaliili.>>40O Yesus wopaluhu, <<Ngaro'a nionga'u e! Na'o ona yomaliili, o he-heleo neena dau aha imaorehe.>>41Ma oraha o Yesus womahihorio'au o Yerusalemie, de wama'e ma bendara geena, Una woali wohigalibetongo.42Wotemo, <<Ee 'odohio'o yaowa na'o o wange neena ngona nana'o o'iau idadi la nima'a dame! Ma, o oraha neena ngona 'ona ma'ewa.43Ho ma oraha moi done, ngona aha naohana 'ia'anaga ani ha-haturuu aha yodiai o dadato'o nihi'aba'ito'a ona aha nihi dogooromo moi de moino 'ainihi'abeeto'a.44Ona done aha ni titiiha'u ngona de ani nyawa 'amamoi'u, de 'aoheleo moio ma 'oyamada'ua iretenie ma dingiio'a, hababu ngona 'anowitaila'o'awa ma oraha ma Jou ma Dutu woboa nowi hihalamatou ngona!>>45O Yesus woohami'a ma Jou ma Dutu awi woa'a de wo'iginii'i yomawu'u-wu'unu geena'a.46De o Yesus wo'ihitemo <<Naga o Bo'u iofi-ofi'u ituliho'au o onane: Ma Jou ma Dutu wotemo, <'ai woa geena o haubayanga ma ngii.> Ma ngini neena niadiai yoora-ora manga igutude!>>47Wohi wange moi o Yesus wo'idoto'o ma Jou ma Dutu awi woa'a. O imam manga hae-hae'e de o agama yodoto-doto, de o Yahudio'a manga tutuda yomau witooma,48Ma, ma nge'omo 'oihi'ama'ewa yodiai geena, hababu o nyawa 'ayomatogu-togumua wihigihene, o Yesus, de awi demo-demo duru manga hingina yadaene.
The Seed Company