O LUKAS18
1Ipahano geena o Yesus wo'ihi ade-ade o hi'atero moi, wo'idoto'o awi ni-nii'i'a la yopeleeha yomadahaubayanga de uwa manga ngonga'u itoa'a.2O Yesus wotemo, <<Naga o bendara moio'a womatengo o hakimi awi domodongua ma Jou ma Dutu'a, de ngaro o nagoonahi moi ma 'owo'itaila'o'awa.3Ma bendaro'a geena momatengo o ngewe'a o ba-bao midi-digali'au ma hakimi'a momahi doloa, la ma hakimi geena ami para'ara watiai, muna motemo 'odo tanu noihiboa ngoino, to'idaali 'ai haturuu.4Ma oraha muluo naga ipahano ma hakimi guuna 'awoolu'u watai, de woma hi-hingina, ngaro ma Jou ma Dutu ma 'atowi domodongua de o nyawa 'ato'itaila'o'awa.5Ma, ma ba-bao numuna moigi-giliono, iholoi yaowa ngoi tomihiboa munano. Na'o 'ouwa, muna done moidi-digalino moboa, de moihiehe o diato'o.>>6De aha ma Jou wotemo, <<Niahi-hingina ma hakimi 'awoti-tiaiwa ge awi demo!7Ho maraio'au ma Jou ma Dutu 'awatiaio'a awi nyawa, na'o yomahigaho'o o wutu de o wange. Una 'awatuda-tudawa ma oraha na'o watiaio'au.8Ngaro 'anio nga'u: Una done aha watiai! Ma na'o ngoi o Nyawa ma Ngowa'a toboa, bote 'ademaena'ahi yonga'u-nga'u ngoino o dunia'a neena?>>9O Yesus wohiade-adeli o hi'atero neena o nyawa nage yamao 'aona yotiai de yo'ihitipo'o'u de o nyawa ma homoa'a,10O Yesus wotemo, <<Naga o nyawa yamidi-di yotagi ma Jou ma Dutu awi woa'a la, yomadahaubayanga. Womatengo o Farisio'a, de moi o balahiteenge wogagaaho'o.11O Farisio'a geena womao'ode womatengo'a de, womadahaubayanga wotemo, <Ya Jou ma Dutu, ngoi totemo 'amaowa'a ngonade, ma ngale ngoi 'amima'aterowa de o nyawa ma homoa, nage yoho-hori'i, yomahi do-dopolu, de yohuda-hudala. Ngoi to'amaowa'a ngonade matiti ngoi 'amimaterowa de o balahiteenge wogagaoho'o do'ae.12Ngoi topuaha o minggu moi ma modidi, de o bara'ati tadawo-dawongoge, na'o tama'e o do'u mogio'o geena tohihuba Ngona'a o do'u moi.>13Ma, o balahiteenge wogagaaho'o ge woma'a'a'uli'a de womahigo'ono womatengo'a de 'awomooinua womatawaga wa'aie. Una wanana-nauhu awi gate'o de wotemo, <Jou ma Dutu, tanu noidora ngoi, hababu ngoi neena duru to baradoha!> >>14O Yesus wotemo, <<Ngaro 'anionga'u: ma oraha o balahiteenge, woga-gaaho'o wolio'a awi woa'a 'aunahi awi hingina itiai ma Jou ma Dutu awi biono'a, ma o Farisio'awa nage. Hababu nagoonau yomahi 'a'ulie aha ma Jou wo'ihi tipo'o'u; de o nagoonau yomahi tipo'o'u aha ma Jou wo'ihi 'a'ulie.>>15Naga o nyawa-nyawa manga ngowa'a ma le-leete'e yo'iaha o Yesusino la, awi giama wo'idatami de wo'ihi bara'ati. Ma oraha awi ni-nii'i yo'ima'e o geena, ona yo'ingamo ma nyawa-nyawa'a.16Ma o Yesus wo'iaho'ino ma ngowa-ngowa'a goona de wo'itemo awi ni-nii'ia, <<Ni'i mada'a ona yoboa ngoino! Uwa ni'itaaele hababu o nyawa harage 'aona, neena toma Jou ma Dutu awi 'awaha.17Nio hingina! O nyawa yoboa ma Jou ma Dutu'a hara 'aongowa'a ma ete, ona o idadiwa ma Jou ma Dutu awi 'awaha>>.18O Yahudio'a manga baluhu moi wohano o Yesusi'a, <<Aba Guru ma owa, ngoi 'iani o 'iau todiai la tomaadama'e o wowango ma owa 'ahiado-adoni'a?>>19O Yesus wihano una'a. <<Idodoau ho notemo ngoi yaowa? 'Amoiwa yaowa duga 'ama Jou ma Dutu womatengo'a.20Ngona nana'o'au ma Jou ma Dutu awi behehongo: <Uwa nohudala, uwa notooma, uwa notohi'i, uwa nodadi o ngelu'u ma ha'ihi, de no'ihoromati ani dea de ani eha.> >>21Una wopaluhu, <<O behehongo geena moi-moi tadiai'o'au 'atomadoguulunohi.>>22O Yesus woihene geena, de wotemo'ali, <<Naga moiohi 'iani nadia geenala: Nawu'unu moi-moi ani araata, dema pipi no'i'ula o nyawa yohuu-huha'a, geena aha ngona nama'e o araata o horoga'a. Iduangino geena aha naino lanoinii'i ngoi.>>23Ma, ma oraha woihene geena, una awi hingina duru ihuha hababu una wo'aya.24O Yesus wana'o ma nyawa guuna awi hingina ihuha, Una wotemo, <<Duru ao huha'a o nyawa yo 'aya de yodadi ma Jou ma Dutu awi nyawa!25Iholoi igapanga o unta iohama o huhumu ma pidahi'a, pohitero de o nyawa o 'aya yoohama ma Jou ma Dutu awi dunia ma hungi'a.>>26O nyawa nage yoihe-ihene o Yesus wotemo o geena de ona yohano, <<Ho done 'a nagoonau aha yohalamata?>>27O Yesus wopaluhu, <<Na'o 'aonyawa mahirete 'aidadiwa niohalamata ma na'o de ma Jou ma Dutu! Geena aha niohalamata.>>28De aha o Petrus wotemo, <<Ngomima neena mia mada'au mia hagala moi-moi, ma ngale nimi-nii'i ngona Aba.>>29O Yesus wotemo, <<O nyawa nage yamada'au manga woa, e'ola manga we'ata, e'ola awi riadodoto e'ola ma dea de ma eha e'ola manga ngowa-ngowa'a matiti ma Jou ma Dutu wi leleani,30ma nyawa goona aha ilape-lape'a manga hewa o oraha neena, de ma oraha aha iboa-boa, ona aha yo'i'ula o wowango 'ahiado-adoni'a.>>31O Yesus wo'ipoluno awi ni-nii'i yamogioo'o de yamididi, de wo'itemo, <<Nioihene niohididiai! Neena ngone nanga dumutu o Yerusalemie. Da'ueena'a, aha imadadi o nabi-nabi yatuli-tuliho'au mangale o Nyawa ma Ngowa'a.32Una aha wihilapahi o Yahudio ma nyawa'awa de done aha witeba-teba, wihohedu de wiobili.33Ona aha wihangihara de witooma, ma ao wange haange Una wowango'ali.>>34Ma, moi-moi o Yesus awi ni-nii'i geena 'amaube ma 'ayomahina'owa. Ma ngale awi demo-demo geena, hababu una wo'ihipongono. Ho ona 'ayana'owa o'iau woade-ade.35Ma oraha o Yesus yomahiadonou o Yerikho'a, womatengo wopilo-pilo'o wogogelu'u o nge'omo madate'o'a de wogagaho'o.36Wa'utu woihene o nyawa yolepe-lepe yaboa geenano una wohano, <<Yododoau gena'anaga?>>37Ona wihingahu una'a, <<O Yesus o Nazaretino ge, waboa neenano.>>38De wopilo-pilo'o ge womaorehe wotemo, <<Yesus, o Daut awi ngowa'a! Tanu noi dora!>>39Ma nyawa yohila-hila ge, wingamo de wihulo'o womaliili. Ma, unaage'au wapau uma orehe, wotemo, <<Daut awi ngowa'a! Tanu noidora!>>40O Yesus womatogumu'u de wo'ihulo'o la wopilo-pilo'o ge wiaha o Yesusi'a. Ho de wihiadoni'a, o Yesus wihano,41<<O'iau naigo ngoi todiai ngona'a?>>
Una wopaluhu, <<Tuanga ngoi todabali tomahi ma'e.>>42Geena'a de o Yesus wotemo una'a, <<Na'o o geena, nomahima'e'au!
Mangale noi nga'u ho, ngona noai'i.>>43'Ama oraha geena una womahima'e'au. Geena'a de una winii'i o Yesus de wo'amaowa'a ma Jou ma Dutu'a. Ma oraha o nyawa yolepe-lepe yama'e o geena, ona moi-moi wipuji ma Jou ma Dutude.
Una wopaluhu, <<Tuanga ngoi todabali tomahi ma'e.>>42Geena'a de o Yesus wotemo una'a, <<Na'o o geena, nomahima'e'au!
Mangale noi nga'u ho, ngona noai'i.>>43'Ama oraha geena una womahima'e'au. Geena'a de una winii'i o Yesus de wo'amaowa'a ma Jou ma Dutu'a. Ma oraha o nyawa yolepe-lepe yama'e o geena, ona moi-moi wipuji ma Jou ma Dutude.
The Seed Company