O LUKAS12
1Ma oraha o nyawa yoribu-ribuhu yo'ihidoomuno hiadono ma regu yoma 'a-'ado'o, o Yesus wo'iade-ade awi ni-nii'ia, <<Nimahitiari de o Farisio'a manga ragi, manga ngelu-ngelu'u nage.2O 'iau nage iiyu-iyunu 'aima'e'a, de o o'iau ihipongo-pongono 'aina'o'a.3Nage niatehongo o wutu'u aha yoihene o wange'a; de o'iau ni'ihudu o nyawa manga ngau'i'a o ngi ma doda'a, aha 'ayomahi di ihenu'u.>>4<<Nima hi-hingina, 'ai ma-manai! Uwa ni'idomodongo nage o roehe yoto-tooma ona 'ageena'a yai'a de 'ayodo-doawau.5Yaowa ngoi tinihi ngahu ngini'a nagoonau 'iani ni'idomodongo. Niwi domodongo geena 'ama Jou ma Dutu'a! Hababu iduangino wonatooma, 'amoiwa witaaele wona umo o naraka'u! Nio nga'u, 'iani 'auna niwidomodongo.6O tui-tui motoa yawu'unu ma ija 'aoheenge modidio'a ma pipi duru 'aiete'e. Bali'ua ena geena, 'aodutu moio ma, ma Jou ma Dutu o wamongowa.7Niautu niahae'o'a ma, moi-moi wadoimo'au, hababu geena uwa niohawana; ngini iholoi niwihi bohono de o tui-tui geena!>>8<<Niohi-hininga nihidi-diai: O nyawa yomanga'u, o 'awaha manga biono'ana'o ona ini'i, o Nyawa ma Ngowa'a ma Awomahipongonua ma Jou ma Dutu awi malai'ata ma biono'a.9Ma o nyawa yomahipongono yotemo 'ai na'owa o 'awaha manga biono'a, o Nyawa ma Ngowa'a ma aha womahipongono ma Jou ma Dutu awi malai'ata ma biono'a.10Na'o o nyawa yomaa ade-ade o'ianaga moi wihagata o Nyawa ma Ngowa'a, ona 'ayo'ihiapongohi; mana'o ona yohi'au'u ma Jou ma Dutu awi omaha iofi-ofi, ona 'ayo'iapongoua.11Na'o ngini iniaha o dodoomu ma woa'a la nihano-hano niahala yohali'i yopa-pareta e'ola yo'u'uaha, manga biono'a uwa niododato o'iau ngini aha niotemo e'ola o'iau ngini aha nihiade-ade.12Hababu ma oraha geena ma Jou ma Dutu awi omaha iofi-ofi aha nihi doto'o itoto'iau ngini aha nimaa ade-ade.>>13Womatengo o nyawa manga lepe-lepeno geena wiitemo o Yesusi'a, <<Aba guru, bee'a aba nowihulo'o 'ai lia'i'a la wo'ula 'ai do'u o mia dea awi arata miwihida-damadano ge.>>14O Yesus wopaluhu, <<Riadodoto, nagoonau igoa'a Ngoi toha'imi e'ola toto'u-to'u niaedete mara'i?>>15Geena'a de o Yesus wo'ihi ade-ade moi-moi o nyawa'a geena, wotemo, <<Nima hi-hingina de nimahitiari uwa hiadono ngini niotopo'ana. Hababu o nyawa nanga wowango aumahi gagaowa awi 'aya'a, ngaro manga arata ipohude ma.>>16De aha o Yesus wohiade-ade o hi'atero neena, <<Naga ma nyawa moi wo 'aya. Una awi tona'a ma hasili itero de iamo'o.17Ma nyawa o 'aya guuna womatibanga awi hingina ma doda'a, wote 'a'oiwau o ngi la taiyunu 'ai tona'a ma hasili. Itoto'iau tohi'ahali'i o oraha neena?18Geena'a de una womatibangoli de 'a awi roehi'a mahirete waade-ade, e igoungu tamaa'e'au ma a'ala; 'ai gudanga moi-moi 'iani tohulo'o yahoroma de aha tohigo'o ma duulu iholoi iamo'ie. La geena'a tonoa moi-moi 'ai bira de ma homoahi geedau.19De aha toma temo ngoino: Ngona duru noutumu! Moi-moi yaowa-owa ngona naeheno'au de 'aibotuau de ma tau-taunu. Ma oraha neena nomahi ainou! 'Anoodomou de 'anoo'elou de ngaro'ano ma idu-iduou!20Ma ma Jou ma Dutu wiitemo una'a he fuma! 'A o wutu neena ngona nohongene, de o nagoonau done aha yodaene ani arata nomaa do-dopoluno'au ge?21O geenau done aha idadi o nyawa'a nage yohali'i 'amanga roehe mahirete i'aya ma yahali'ua ma Jou ma Dutu awi biono'a yo'aya.>>22De aha o Yesus wo'i ade-ade awi ni-nii'i'a, <<Hababu geena ngoi totemo, uwa niododato de niawowango, o'iau done aha niaodomo, e'ola o'iau done aha niapa'e.23Hababu nanga wowango iholoi ibaraguna de o inomo, de o roehe iholoi ibaraguna de o pa'eanga.24Bee'a niataila'o o wogono! Ena 'aima dutudu'ua, de 'aima dugutu'ua, ma tila-tila ma oiwa. Ma ma Jou ma Dutu wapaliara! Ngini duru iholoi niwihibohono de o namo-namo geena!25Neena'a naga nagoonau yododato ho idadi yadogo manga umuru ngaro 'amaube-ubewa?26Na'o 'ageena ma ete-ete'e ma 'aidadiwa niadiai, idodoau ho niododato de o'iau naga ma homoahi?27Niataila'o gota ma huri ihupu; de iwango ena 'aima da'arajangaua, de 'aima didiniwa. Ma ma 'oana o Salomo awi 'aya o geenau ma awi baju womahi noa-noa ayaohonua ma tero de o huri-huri geena!28O ubutu o godoa'a iwango o wange neena de ma dewelano itu-u'u ibo-boti'a. Ma, ma Jou ma Dutu wohi'adiai ma ubutu o geena ma tero. De hongoli ngini! Ma ngini hali'i 'anionga'ua!29Ho uwa niododato de niatibanga o'iau done aha niaodomo de niao'ele.30O ge-geena yodidiai geena o nyawa awi na'o-na'owa ma Jou ma Dutu. Mo-mongo niadea 'awana'o o'iau moi-moi ngini nia paparalu ge.31Ma ngini 'iani nio hali'i la ma Jou ma Dutu wopareta niawowango'a, geena ma homoahi aha niwihidogo ngini'a.>>32Ngini 'aniolepe'awa, ma uwa niohawana! Hababu nia Dea done niwi'ula o bara'ati awi paretano.33Niawu'unu niaarata de ni'i'ula ma pipi yohu-huha'a. Nimadiai'a o po-poje 'aingo-ngootomua, geenalah o araata o horoga'a. O araata geena 'aiihanguau hababu yotohi-tohi'i 'aidadiwa yaehe de o butete'e 'aidadiwa yahoroma.34Hababu 'ia'a niaaraata imanoa niahingina ma, geena'a imanoa!35<<Nima goana nio daali geena moi-moi. De halingou nima pa'engu'ou de niahilo uwa ihongene.36De halingou ngini harage 'aonyawa wigoa-goana manga tuanga woboa o rameno ho na'o de o ngoana wotolo itaiti'a niwidapaata o ngoana.37Duru youtumu yolele-leani manga tuanga woboa de wo'ima'eno 'ayota-tamaahi. Nio nga'u: ma tuanga geena aha wo'ihulo'o wilele-leani yogogelu'u de aha wo'ileleani ona'a.38Duru youtumu yolele-leani, na'o manga tuanga woboa de wo'ima'eno ona yota-ta-ama, ngaro una woboa o wutu go-gorona e'ola i'initau!39Nio hingina neena! Na'o ma woa ma dutu wana'o o ta'o muluo yotohi-tohi'i yoboa, Una done womaa goa-goana la yotohi-tohi'i uwa yoohama awi woa ma dodano.40Hababu geena ngini ma nimagoa-goana, matiti o Nyawa ma Ngowa'a aha woboa ma oraha ngini 'oniana'owa.>>41O Petrus wohano <<Jou ma ani dodoto'o neena ma dumutu ngomino bolo o nyawa moi-moi'a?>>42Ma Jou wopaluhu, 'onane: <<Nagoonau yolele-leani yopeleeha de yobarija, aha awi tuanga wo'igoa'a yodadi manga hae'e geena'a, la una wo'i'ula o inomo 'iani ma orahu'u?43Duru youtumu yolele-leani, na'o awi tuanga woliono de wima'eno yadiaio'au moi-moi!44Nio nga'u: Ma tuanga geena aha wo'ihiga-gao awi arata moi-moi yolole-leani'a ge.45Ma na'o yoloole-leani manga hingina'a itemo, 'ai tuanga ma daaohi aha wolio, ho una wo'imoma moi-moi yolele-leani'a de woodomo de woo'ele hiadono wieto,46de 'awana'owa awi tuanga woboa o ta'o muluo, de o wange o'iau. Done woloole-leani geena aha womaadama'e awi tungino o boboha duru awi doohau'o'a de aha wi wohgini'i wohupu, de wiidiai harage 'aonyawa 'awo'ina'owahi ma tuanga geena.47Ma naga ma regu yolele-leani yana'o manga tuanga awi mau, ma 'awoma goa-goanua de wadiaiwa ma tuanga awi mau, geena aha yo'ipoha 'aodohau'u.48Mana'o yolele-leani 'oyana'owa manga tuanga awi mau, de yodiai ihala hiadono 'iani yo'ipoha, geena yo'ipoha ma 'oitoohau'ua. Hababu o nyawa yo'i'ula'au iamo'o, ona'a aha yo'idagaaho'o iamo'o. De o nyawa nage yo'ihigagao'au iamo'o, aha yo'idagaaho'o mai amo'o.>>49<<Ngoi toboa harage 'aou'u totaulu o tona'a ma de'uo'a neena. Duru 'aotero na'o ma u'u geena ito'aro'au!50De nagahi o gangela itu-tubuho 'iani tamo'u. De 'ai hingina duru ihuha na'o geena 'aidadiwahi.51Bote ngini nio temo ngoi toboa toaha o dame o dunia'u? 'Ouwa, 'aodamewa, ma 'aoganamoto.52Hababu neena'a de imahii'a, o woa moi yaamotoa'a aha yoma'a ganamoto, yahaangeno de yamididino, e'ola yamididino de yahaangeno.53Ma dea aha waganamoto awi ngoa o nauli'a de ma ngowa'a o naulu aha wiganamoto ma dea'a. O eha aha miganamoto ami ngowa'a o ngewe'a'a de ma ngowa'a o ngewe'a aha mi ganamoto ma eha'a. Ma dunungu aha miganamoto ami modo'a'a de ami modo'a aha miganamoto ma dunungi'a.>>54O Yesus ma wo'itemoli o nyawa yolepe-lepe'a, <<Na'o ngini niama'e o lobi idoa o wange ma dumuno'o idadu, 'aodataiti nio temo <Neena o beha'ou.> De igou-goungu o beha'a.55Na'o ngini niamao o 'orehara itado'o, ngini niotemo, <Neena o hiwau.> De igoungu ihiwa.56Ngini o nyawa ma diiha de nihihohomoa! Ngini'ai dadi niata'ihiiri ma oraha, de niataila'o o diwanga de o tona'a. Idodoau ho o oraha neena ngini 'aniadadiwa niata'ihi-iri 'o'iau aha idadi?>>57<<Idodoau ho ngini mahirete 'aidadiwa niaputuhu 'ia'a itiai?58Na'o naga de o nyawa moi nima'a aha o ha'imi'a, nihi'ahali'i itoto'iau hiadono 'aonge'omo ma goronanohi de nimahi 'alooaho'au. Na'o 'ouwa, done una niwi do-doba'a o ha'imi manga bioni'a de ma ha'imi geena niwihilapahi o polisi'a, de o polisi nihi ohama ngini o bui'a.59Nio nga'u! Ngini done 'a niohupuwa o buino na'o niabobangu ibootuahi nio hangu.>>
The Seed Company