O LUKAS11
1Ma wange moi'u o Yesus womadahaubayanga o ngi moio'a. Iduangino womadahaubayanga, woma tengo awi ni-nii'i wotemo, <<Jou be'a nimi doto'o o haubayanga hara'a o Yohanes wo'idoto'o awi ni-nii'i yomadahaubayanga.>>2Ho, o Yesus wo'itemo ona'a, <<Na'o ngini niohaubayanga, niotemo 'onane,<Aba da'u o horoga'aNgona mia Jou ma Dutu no'u'uaha.Tanu ngona nimi huba de nimi horomati.Duga ngona mia'oana.Tanu ngona nopareta o tona'a ma de'u o'a3Tanu no'ula nohi wange moiTo ngomi mia inomo4Nimihi apongo mia baradoha,La ngomi ma, mi'ihi apongo o nyawaYo ba-baradoha ngomino.De uwa nimiimada'a mia ngonga'u iihanga ma oraha oda-daili mi daene.> >>5O Yesus wo'itemo awi nini'i'a, <<Ho'a na'o ngini naga womatengo o wutu go-goronano de wotagi awi manai'a, de wotemo, <Manai, noihi baunohi ani roti haange,6Hababu 'ai manai o nge'omo ma goronano wotulu 'ai woano, de 'ai inomo 'a'oiwaho.>7De na'o ani manai nowi da-dabau'a ge wopaluhu do'a awi woa ma dodano wotemo 'onane, <Uwa noihiehe o huha! 'Ai ngoana tapereehu'o'au de ngoi de aingowa-ngowa'a mimaiduo'au. Ngoi 'ai dadiwau tomomi'i la toni 'ula o inomo ngona'a.> >>8Geena'a de o Yesus wotemo wohigila-gila, <<Ho itoto'iau? Ngoi totemo, iolo! Ngaro ngona geena awi manai, una 'awo-olu'u womomi'i la o iani nowi 'ula ngona'a. Ma, matiti ngona 'ani mae'ua, ho nohi ga-ganamoto noga-aho'o ho una 'awo momi'ou de nowi 'ula noga-gaaho'o ge.9Ho Ngoi tinii temo: Nio gaaho'o ma Jou'a, la ngini aha niwi'ula; nimaadahali'i la ngini aha nimadama'e; niotolo, la o ngoana aha niwiidepelenga10Hababu o nyawa yogaaho'o aha yadawongo; o nyawa yahali'i aha yama'e, de o nyawa yotolo aha o ngoana yo'idepelenga.11Bote naga ngini na'o nia ngowa'a iga-aho'o o nao'o de ma dea wo'ula o ngia?12E'ola wo'ula o oanga, na'o yogaaho'o o gohi?13Ngaro ngini nio tingi'ai, ma 'aniana'o ni'i'ula yaowa-owa niangoa'i'a. Hongoli Una nanga dea o horoga'a! Una aha wo'i'ula awi omaha iofi-ofi yogagaaho'i'a!>>14O wange moi'u o Yesus waginii'i o to'ata, ihupu womou-mouno. Ho de ihupuo'au ma to'ata geena, una womaade-ade. O nyawa manga lepe yoheranga,15Ma ma regu yotemo, <<Una 'aidadi o to'ata waginii'i hababu una de o Beelzebul ma 'uaha, ena geena o to'ata ma 'oana.>>16Ma naga o nyawa ma regu witaili o Yesusi'a, ho yogaaho'o una wodiai o 'iani moi o yama'e-ma'ewahi la yana-na'o una woboa ma Jou ma Dutuno.17Ma Yesus wana'o manga hingina'a. Ho una wo'itemo ona'a, <<Na'o o Daera moi de ma 'awaha yoma'atitinga'a de 'ayoma'a buhulou ma Daera geena 'aitaaowa. De o woa moi yoma'atinga'o'au de 'ayoma'a buhulou moi de moi'a, done aha yoma'a ti-tinga'a.18O geenali de o to'ata ma 'oano'a, na'o o doomu moi yoma'a ngamo de o doomu moi, ma 'oana geena aha irutu'u. Ngini nio temo ngoi taginii'i, de o Beelzebul ma 'uaha.19Na'o o geena, de tonagoonau manga 'uaha 'ai ni-nii'i yaginii'i o to'ata geena? 'Ai ni-nii'i mahirete iihingahu ngini niahala'au!20Ma ngoi taginii'i oto'ata de ma Jou ma Dutu awi 'uaha, geena ma ngale ma Jou ma Dutu wo'oana niahidogorona'a.21Na'o o nyawa moi wopau-pau awi pa'a'aha iti-tiai, wogoana awi woa ma hirete, una awi woa done 'oyado-doawa.22Ma na'o o nyawa moi oli woboa, iholoi wopau de 'aiwi tiiha'a geena done, waehe'a awi pa'a'aha womahi ngano-ngano-no ge. De awi woa ma doda'a wa'ato'u wabo-booti'a.23O nyawa 'aihiboawa, geena itaali ngoi, de o nyawa'ai duhunua ngoi, igou-goungu yahoroma 'ai 'arajaanga!>>24<<Na'o o omaha ma diiha yo'imada o nyawa moi, ena ilo-loliti ihali'i o ngi idudu-dungu la yodogogele, ma 'aimaadama'ewa. Ho ena itemo, <Ngoi 'iani toma'ilio 'ai woa ma hila'a nage tamada-mada'au!>25Ma oraha ena imahi adonino, ma woa geena duru iberehi de itero.26Ho itagi de imagahali o omaha ma diiha tumudiingi iholoi itiiha de ena. De aha widongohama igogele geena'a. Ho ma baha'u ma nyawa geena iholoi itiiha de ma hila.>>27Ma oraha o Yesus womaade-ade o geena, momatengo o ngewe'a yolepe-lepeno geena motemo o Yesusi'a, <<Igoungu moutumu ma ngewe'a, nage nomihingoa'o'au de nomihuu-huhu ngona!>>28Ma, o Yesus wopaluhu <<Iholoi youtumu, o nyawa yoihe-ihene ma Jou ma Dutu awi demo, de yadiai!>>29Ma oraha o nyawa manga lepe wihidoomuno o Yesus, una wohigila-gila awi ade-ade wotemo, <<Duru yotiiha'au ma nyawa-nyawa o oraha neena. Ona yogaaho'o todiai o ianimoi ihera-heranga de aha inga'u, ma 'amoima 'atodiaiwa, iani'a ma nabi Yunus awi dudunguu ihera-heranga.30Harage'a ma nabi Yunus, o Niniwe ma nyawa manga bendaro'a, o geenali ma Jou awi Ngowa'a aha wodadi ihera-heranga, o nyawa-nyawa'a ma oraha neena naga.31Ma oraha o hahano iboa, ma 'oana o ngewe'a o 'orehara'u aha mo-momi'i yoma'a nii'i de o nyawa ma orahu'u geena de muna aha mo'ihu'umu ona'a. Hababu ma 'oana o ngewe'a geena moboa o tona'a ma bahano la moihene o Salomo awi 'umati, de igou-goungu nena'a naga moi iholoi de ma salomo!32Ma oraha o hahano iboa, o Niniwe ma nyawa aha yomomi'i de Yoma'anii'i de o nyawa ma orahu'u geena de ona aha yo'ihu'umu. Hababu o Niniwe ma nyawa geena yotoba ma oraha yoihene o Yunus wo'ihiabari, de igou-goungu nena'a naga moi woholoi de o Yunus, ma ngini 'a niotobawa!33'A moiwa o nyawa manga hilo yatuu'ie de yanoa'u manga daha ma timio'a e'ola yatamunu'u de o tampayanga. Ona geena done yanoa o hilo ma totodengo'a la na'o o nyawa yoohama de yama'e ma daraanga.34Niala'o geena niaroehe ma hilo. Na'o nia la'o idodono, niaroehe moi-moi ibangoro. Mana'o niala'o ihomu, niaroehe moi-moi italuhu.35Ma ngale geena nimahi didiai, uwa hiadono o daranga nginio'a ge italuhu36Na'o moi-moi niaroehe i'inita, de 'oiwa o daluhu, geena moi-moi i'inita, harage 'ao hilo ma ledanga nidihiwa'a.>>37Iduangino o Yesus womaade-ade, o Farisio'a womatengo wiiaho'o o Yesus woodomo awi woa'a. Ho o Yesus wotagi woodomo geena'a.38Ma Farisi ma nyawa geena woheranga, o Yesus awi giama 'owaiho'ua de 'awoodomou, awamote'ua manga agama.39Matiti geena ho ma Jou wiitemo una'a, wotemo <<Itiai ngini o Farisio'a niahilahi niaiho'o nia hawo'o de niahude ma dateino, ma niadoda'a yaomango'a de o go-goora de o diiha.40He! O huma ma nyawa, ma Jou wadiaio'au niaroehe de wodiai niahingina ma doda'a?41Ho, duga 'iani nio'ula niahawo'o de niahude ma doda ni'i'ula yohu-huha'a. Halingou o geena ma dodagi aha ngini niawowango itiai.42Ma nio bodito ngini, nage o Farisio'a ma nyawa, hababu ngini niataila'o'awa ma Jou ma Dutu awi diai de awi dora, ngini itiai o hulahi de o uge ma dogo gedau nihihuba'au, ma niataila'o'awa ma Jou ma Dutu awi adili de awi dora. Ena mo-mongo genau 'iani niadiai de ma reguohi uwa niamada'a.43Nio bodito ngini, he o Farisio'a, hababu ngini niaigo niogogele o diingi 'ama bioniha niodadu o dodoomu ma woa'a, de niaigo o paharo'a o nyawa nihoromati.44Nio bodito ngini, hababu ngini harage 'aoboohu'u ma dudunguu 'a'oiwa, hiadono o nyawa 'ayana'owa ho yo'a'agido'u ma de'uo'a.>>45O Yahudio'a womatengo o agama'a wodoto-doto'o wopaluhu de wotemo o Yesusi'a: <<Aba guru ani ade-ade geena ngomi ma nimihi 'au'u.>>46Ma o Yesus wopaluhu: <<Nginio ma niobodito, o agama'a niodoto-doto'o, hababu ngini ni'idonoa o gina itu-tubuho nage o nyawa 'ayaa'u-a'unua yamo'u, ma ngini mahirete 'aniara-raga moi ma o yatigiwa.47Niobodito ngini, hababu niadiai o nabi-nabi manga boohu'u ma ona geena niaede-edete de nia dotumu yo'itooma'u.48De o geena niodiai, ngini mahirete niohimote'e de niohigoungu niaedete de nia dotumu yo'itooma o nabi-nabi geena, de ngini niadiai manga boohu'u.49Hababu geena ma Jou awi barija itemo: Ngoi aha to'ihidingoto ona'a o nabi-nabi de 'ai hu-hulo'o; ma ma regu o nabi-nabi de o hu-hulo'o geena aha yo'itooma de yo'ihi'angela.50La ma oraha nena'a naga o nabi moi-moi manga aunu i'o'opoa'au, ma gorehau yo'idaene 'aodunia aha idadi'u de imahi'aino.51'Ao Habel awi auno'a de yaino hiadono o Zakharia awi aunino ona yo'itooma ma Jou awi woa'a de o huba ma daha'a ma hidogorona'a. Ho ngoi tiniitemo ngini'a: moi-moi geena aha manga dengehono yo'idaene ma oraha nena'a naga.52Niobodito ngini, o agama'a niodoto-doto'o! Hababu ngini niaiyuno'a o Cawaro ma 'uci; ma ngini mahirete 'anioolu'u nioohama, niohali'i o barija geena de ilelono, ni'itato'o o nyawa yooha-ohama.>>53De o Yesus wocobou, o agama'a yodoto-doto'o de o Farisio'a 'aitoba'i'a wigana'ete de widurupa'a de o hahano.54De ona wipu-pu-puda o Yesus, la na'o awi demo itupele ona witago'o.
The Seed Company