O LUKAS10
1Ipahano geena ma Jou wo'iili'i, yaamori tumudiingoli awi ni-nii'i, de wo'ihulo'o yahimi-midi-di, yomatihila o benda-bendari'a, de o ngi 'ia'a Una aha woodagi.2O Yesus wo'itemo ona'a, <<Ma howo'o aha iutu-utu'u ilepe, ma youtu-utu'u 'ayolepewa ho niogaaho'o ma baili ma dutu'a, la wohidingotoli youtu-utu'u.3I'au nio tagiou! Ngoi tinii hulo'o ngini'a, harage 'aoduba ma ngowa'a itagi, o aewani iti-tingi'ai ma hidogorona'a.4Uwa nioaha o pipi ma ngi-ngi, e'ola o toe, e'ola o tarupa. Uwa nima hiaini o nge'omo ma goronano, de 'ao nyawa moi ma uwa ni'i tabea.5Na'o ngini nioohama o woamoi'a, ihila niotemo, <Tabea! Tanu ma Jou niwihi bara'ati o woa ma doda'u neena.>6Na'o ma nyawa goona'a yaigo o dame, niatabea ma owa geena, aha igogele dede ona; Ma na'o 'a'ouwa, nihi gilioli niatabea geena.7Nio gogele ngaro 'aowoa moio'a. Niaodomo na'o o'iau nihi diai'u, hababu o nyawa yo'arajaanga, ona 'iani yama'e o hewa. Uwa nimangali-ngali o woa moio'a de o woa moi'a.8Na'o ngini o bendara moio'a niai'a, de do'a niaha itero, ngaro'a nioodomo 'o'iau nidonoa'u.9Ni'ihiai'i o nyawa yopa-panya'e ma bendaro'a geena, de nihingahu ona'a, <Ma Jou ma Dutu wo'oanou niahidogorona'a.>10Ma na'o nioohama o Bendara moi'a de ona 'ayomahi gumadanowa, niohupu o nge'omi'a de niotemo,11<Nia Bendara ma 'a'awo mia douo'a miatatara ho'ao hi-hingina ngini'a. Ma niana'o ihorio'au ma oraha, ma Jou ma Dutu wo'oana niahidogorona'a!> >>12De o Yesus wotemoli, <<Niohi-hininga, ma oraha o dunia ma baha'a, o Sodom ma nyawahi i'ualenge manga momo'u ma Jou ma Dutuno, de o Bendara ma nyawa geena!>>13Nio bodito ngini, o Korazim ma nyawa! De nio bodito ngini, o Betsaida ma nyawa! Hababu o haa-haala ihera-heranga idadio'au nginio'a ge imadadi o Tirus de o Sidono'a, ona ma daaou yotoba de yomatoduba yomahi noa manga huha ma baju de manga hae'ie o beeto yoodatami.14Ma ma oraha o dunia ma baha'a, o Tirus de o Sidon iholoi i'ualenge manga momo'u de to ngini niamomo'u.15De ngona, o Kapernaum! Bote ngona aha nihi doa hiadono o horogade? 'Ouwa! Ngona aha nihiguti hiadono niumo o u'u ihonge-hongenuau ma doda'u!16De aha o Yesus wo'itemo awi ni-nii'i'a, <<Nagoonau nihigihene ngini'a, ona iihigihene ngoino. De nagoonau nidawongua ngini'a ona idawongua Ngoino. De nagoonau itila ngoi, ona witila Una'a, nage Woihulo-hulo'o ngoino.>>17Yamoritumudingi awi ni-nii'i geena yolio de duru yomaere, ona yotemo, <<Jou! O omaha ma di-diiha ma midomote'e ngomino, na'o ngomi mia pareta ena'a de ma Jou awi ronga!>>18O Yesus wopaluhu, <<Ngoi tama'e o to'ata ma 'oana iota'a o diwangu'u harage 'aoleletongo.19Ngini! 'Iani niana'o ngoi to'ula'au o 'uaha, la ngini o ngia de o 'a-'a'atama 'aniado'o'a, de niatobi-tobi'ie moi-moi niahaturu manga guata, 'ao'iawa nihi bodito ngini'a.20Ngaro o geena ma uwa nimaere matiti o to'ata nidomote'e ngini'a. Iholoi yaowa nimaere hababu niaronga ituliho'au da'u o horoga'a.>>21'Ama oraha geena, o Yesus womaere matiti una wiomangao'a de o omaha iofi-ofi. O Yesus wotemo, <<Aba, Jou na'u'uaha o diwanga de o tona'a! Ngoi to 'amaowa'a ngonade, matiti moi-moi geena no'idigiiyuuno'a o nyawa yobabarija'a, ma ngona no'ihi maiti o nyawa yoba-barija'awa. Geenau ani hingina yadaene Aba.22Gedau moi-moi 'ai dea wo'ula'au ngoino. 'Amoiwa wina'o, ma ngoa'i'a duga-duga 'ama Dea. De 'amoiwa wina'o ma Dea'a duga-duga 'ama Ngowa'a; de o nyawa-nyawa o nagoona'au aha wo'iili'i ma ngowa'a, wa na'o ma Dea'a.>>23De aha o Yesus wo'itaila'o'a awi ni-nii'ia, de wo'itemo ona'a, <<Duru nioutumu ngini, matiti niama'e'au nage niama'e-ma'e oraha neena.24Ho niohingina: Manga lepe o nabi de o 'oana yodabali yama'e hara'a ngini niama'e o oraha neena, ma ona 'oyama'ewa. Ona yodabali yoihene nage ngini nioihe-ihene o oraha neena ma ona 'oyoihenua.>>25Geeena'a de aha womatengo o agama'a wodoto-doto'o woboano wiitaili o Yesus. Una wohano, <<Aba guru, ngoi 'iani o'iau todiai la ngoi tama'e o wowango 'ahiado-adoni'a?>>26O Yesus wopaluhu, <<O'iau ituliho'au o Bo'u ibe-berehi'u? Itoto'iau tongona ani mama'e?>>27Ma nyawa guuna wopaluhu, <<Powidora nanga ma Jou ma Dutu de nanga hininga ma ngodumu, de nanga wowango, de nanga guata moi-moi, de nanga a'ala moi-moi, de aha poma'adora pomahinyawa-nyawa'a 'aimatero de padora nanga roehe mahirete.>>28O Yesus wotemo <<Ani ba-baluhu itiaio'au. Nadiai geena la ngona aha nowango.>>29Ma, o agama wodoto-doto'o geena awi mae'e wotato'o. Ho una wohano, <<nagoonau geena mimahinyawa-nyawa'a?>>30O Yesus wopaluhu, <<Naga womatengo o naulu wouti o yerusalemo'a de o Yerikho'u. O nge'omo ma hidogoronano yoora-ora widoboano de awi hagala moi-moi yaehe'au, de wipoha ho hali'i wohonengou, de wimada'a o nge'omo'a woleotie de awi dabo dabo'a.31Womatengo o imam ma wanii'i, ma nge'omo geena. De wiima'e ma nyawa guuna, ma imam guuna womahi lehene ho wibee'e o nge'omo ma honongaha waboa, de woma gila-gila'a.32O geenali de o Lewio'a ma nyawa moi waboa geenano; Una geena 'awihidobeno ma nyawa wodabo-daboge, de womaagila-gila'ali.33'A itaaowa womatengoli o Samaria'a ma nyawa geenano wa'aino, ma oraha wima'e una duru widora34Ho o Samaria'a ma nyawa wo'ai'a una'a de aha waiho'o awi dabo, de o angguru de wahoulu de o gooro, de aha warangi awi dabo-dabo geena de wigoa'a awi keledaide, geena'a de wiaha o woa'a moi ho wihoulu.35Ma dewelano una wo'ula o pipi o haa'a o ngai modidi ma woa ma dutu'a de wotemo, niwihoulou, na'o ma bobangu ma holoiohi toma'iliono aha tohangu.>>36De aha o Yesus wohibobaha awi ade-ade geena de o ha-hano neena, <<O nyawa yahaange neena nagoonau imote'e ngini, yodiai o owa pomahi nyawa-nyawa'a de o nyawa wipoha-pohano geena?>>37O agama wodoto-doto'o wihano-hano una'age wopaluhu, <<Ma nyawa widuhu-duhunu ge.>>
O Yesus wotemo <<'A na'o o geena notagiou, de nodiai hara o geenali!>>38Ma oraha o Yesus de awi ni-nii'i yohigila-gila manga dodagi, ona yomahi adono o hoana moi'a. Momatengo o ngewe'a ami ronga o ngo marta miiaho'o o Yesus ami woa'a.39Ma ngewe'a geena ma do-doto momatengo, ami ronga o ngo Maria. O ngo Maria muna mogogelu'u o Yesus awi dou ma date'o'a, de mohigihene o Yesus awi demo-demo.40Ma o ngo Marta 'amotadi'ua mohi'adiai manga inomo. Ma ohonuau, muna momahihori'a o Yesusi'a de motemo; <<Jou, idodoau ho nomi mada'a 'ai dodoto 'amoi duhunua? Ho 'atoma tengo neena, tanu nomi hulo'o la muna moi duhunuho.>>41Ma ma Jou wopaluhu muna'a: <<Marta, Marta! Ngona nododato de nohihuha nanga roehe, hiadono ma lepe noleleani,42Duga 'amoi iholoi yaowa. O ngo Maria ma ili'o'au yaowa-owa, de geena 'amoiwau yaehe muna'a.>>
O Yesus wotemo <<'A na'o o geena notagiou, de nodiai hara o geenali!>>38Ma oraha o Yesus de awi ni-nii'i yohigila-gila manga dodagi, ona yomahi adono o hoana moi'a. Momatengo o ngewe'a ami ronga o ngo marta miiaho'o o Yesus ami woa'a.39Ma ngewe'a geena ma do-doto momatengo, ami ronga o ngo Maria. O ngo Maria muna mogogelu'u o Yesus awi dou ma date'o'a, de mohigihene o Yesus awi demo-demo.40Ma o ngo Marta 'amotadi'ua mohi'adiai manga inomo. Ma ohonuau, muna momahihori'a o Yesusi'a de motemo; <<Jou, idodoau ho nomi mada'a 'ai dodoto 'amoi duhunua? Ho 'atoma tengo neena, tanu nomi hulo'o la muna moi duhunuho.>>41Ma ma Jou wopaluhu muna'a: <<Marta, Marta! Ngona nododato de nohihuha nanga roehe, hiadono ma lepe noleleani,42Duga 'amoi iholoi yaowa. O ngo Maria ma ili'o'au yaowa-owa, de geena 'amoiwau yaehe muna'a.>>
The Seed Company