O Yohanes7
1Geena'a de o Yesus wotagi wogiloliti o Galilea daera. Una awo'olu'u womanoa oyudea'a hababu do'a o yahudio'a ma balu-baluhu yohidaila'o la yomau wito'oma.2Ma oraha geena o Yahudio'a manga wange ma amo'o nage ihironga o da-daluhu ma 'atu o Ho'a-ho'a ma rame ihorio'au.3Geena'a de o Yesus awi do-dodoto yotemo Una'a, <<Namada'a o ngi neena de notagi o yudea'a la o nyawa nage Nini'i ma idadi yama'e Ani 'arajaanga Nadiai o haala ihera-heranga.4Na'o o nyawa womatengo womau la o nyawa wi'o'ina'o, geena o 'iau naga wadidiai geena 'aidadiwa wohigiiyunino. Na'o Ngona idadi nodiai o haala ihera-heranga, Nohimaitou o nyawa'a moi-moi manga biono'a la moi-moi o nyawa yama'e ani didiai geena!>>5(Awi do-dodoto yotemo 'ogeena hababu ona mahirete ma Awinga'uwa.)6O Yesus wotemo, <<Mangale ngoi, geena 'a ma orahuahi tomahimaiti o 'awaha'a. Ma ngini o oraha 'ihinoimi 'aidadi.7O nyawa o dunia'a neena 'aidadiwa nibuhulu ngini'a. Ma ngoino ge'ena 'Ibuhulu, hababu Ngoi 'aitauri'a tohidemo na'o manga di-diai itiiha.8Tagi 'a ngini nia'ai'a o wange ma amo'o ma rame'a. Ngoi 'atai'awa hababu Ngoi 'a ma orahuwahi tomahimaiti.>>9O Yesus 'ogeenau wotemo awi dododoti'a, de Una ma o Galilea'ahi womanoa.10Ma oraha o Yesus Awi do-dodoto yotagio'au o Da-daluhu ma 'atu o Ho'a-ho'a ma Wange ma Amo'o ma rame'a, de o Yesus 'awomahibongonino wotagi ma rame'a ge'ena 'amoiwa wina'o.11Ma rame-rame geena ma daao gee, o Yahudio'a manga balu-baluhu Wihali'i de yo'a-'ahano, <<O Yesus Una 'ia'a?>>12Manga lepe yoma'a'ahudu mangale Una. Muna'a yotemo, <<Una guuna o nyawa ma owa.>> Munu'a yotemo, <<Ouwa! 'Una wo'ihiliba o nyawa manga lepe.>>13Ma 'amoiwa yomooini yomaade-ade yohito-tobionia ma ngale Una, hababu yo'idomodongo nage o Yahudio'a manga balu-baluhi'a.14Wa'utu o rame-rame ma gigiria'a de o Yesus woohama ma Jou ma Dutu awi Woa'a de wodoto'o.15O Yahudio'a manga balu-baluhu goona duru yoherana de yotemo, <<Cara'iau ho o nyawa Nuuna awi pade, 'ena Una 'Awomadoto'uwa?>>16O Yesus wopaluhu, <<Nage Ngoi tohidoto-doto'o neena, geena 'a to Ngoiwa ma hirete 'ai do-doto'o, ma ena to ma Jou ma Dutu nage Woihulo-hulo'o.17O nyawa nage yomau yodinii'i ma Jou ma Dutu awi mau, aha yana'o 'ai do-doto'o geena 'iboa ma Jou ma Dutuno e'ola 'a Ngoino.18O nyawa nage yodoto'o de to ona mahirete manga dodoto'o, geena yomau 'a ona'a yo'ihoromati. Ma o nyawa nage yomau wihoromati ma Jou ma Dutu'a nage Wihulo-hulo'o, o nyawa goona manga demo-demo itiai de 'a ielu'uwa.19O Musa wohingahuo'au ngini'a ma Jou ma Dutu awi 'autoranga! Ma naga nginio'a 'amoiwa yodinii'i o 'autoranga geena. De idodoau ho niomau Nitooma?>>20O nyawa yolepe-lepe goona yotemo, <<Poelua o to'ata nidongohamu'u ma! Nagoonau yomau Nitooma?>>21O Yesus Wopaluhu, <<O haala 'ihera-heranga 'a o ngai moi tadiai o Sabat Wange'u, de ngini nioheranga.22Ma o Musa niwi'ula o 'autoranga ma ngale nimahuna, (ngaro o huna geena 'a o Musanowa ma mulaenge, ma 'ena 'a nanga edete de nanga dotumohi ma oraha o Musa 'awiiwahi ena.) Geenau ho o Sabat ma wange'u ma ngini nio'ihuna o nyawa.23Ngini nio'ihuna o ngoa'a o naulu o Sabat ma Wange'u geena ma ngale la uwa niapalene o 'autoranga nage o Musa wohingahu-ngahu ma ngale o huna, de idodoau ho niongamo Ngoino hababu o nyawa moi manga roehe moi-moi Tohia'i'i o Sabat ma Wange'u?24Uwa nio'iha'imi o nyawa 'imote'e 'a nage niama'e-ma'e, ma ena nio'iha'imi niohidi-diai la imote'e ma diaiha.>>25Geena'a de o Yerusalem ma nyawa yamuluo naga yotemo, <<Maraio'au Nuunau nage neena naga wihali-hali'i yomau witooma!26Niwima'e Una womaade-ade imote'e 'a de to una awi mau o 'awaha manga biono'a, de nanga balu-baluhu 'a moi ma 'ao'iyawa yotemo Una'a! Poelua to ngone nanga balu-baluhu yana'o'au na'o Una neena ma Oana o Nyawa Wo'ihiha-halamata.27Duga na'o ma Oana o Nyawa Wo'ihiha-halamata guuna woboa, geena 'amoiwa yana'o awi 'ahala! Ma neena ngone pana'o o nyawa Nuuna awi ahala.>>28Geena'a de, nage o Yesus wodoto'o ma gi-giria'a ma Jou ma Dutu awi Woa'a de womaade-ade Awi ilingi 'a da'uo'o wotemo, <<Igoungu, ngini niana'o Ngoi neena naguunau, de 'ai 'ahala 'iano? Ngaro 'ogeena ma Ngoi toboa geena 'a to Ngoiwa ma hirete 'ai mau. Ma Ngoi toboa hababu ma Jou ma Dutu Woihulo'o. Una nage woti-tiai de nage 'a Niwina'owa.29Ngoi towina'o Una, hababu Ngoi 'ai ahala Unano, de Unau woihulo'ino.>>30Ma oraha geena ona yomau o Yesus witago'o, ma 'amoiwa yomooini wigagao, hababu ma oraha 'aya'adonuawahi.31Naga o nyawa yolepe-lepe'a goona manga lepe yonga'u Una'a, de yotemo, <<Maraio'au nuunau ma Oana o Nyawa Wo'ihiha-halamata Guuna. Hababu 'amoiwa idadi yadiai o haala 'ihera-heranga iholoi ilepe de Una wodiai.>>32O Farisio'a yamuluo naga yoihene na'o naga o nyawa yolepe-lepe'a goona yamuluo naga yoma'ahudu 'ogeena mangale o Yesus, geenau ho o Farisio'a de o 'imam ma hae-hae'e yohulo'o ma Jou ma Dutu awi Woa ma go-goana yamuluo naga ya'ai'a o Yesus witago'o.33O Yesus wotemo o nyawa yolepe-lepe'a goona ma Jou ma Dutu awi Woa'a, <<'Aitaaowa Ngoi de de nginiohi. Geena ipaha de Ngoi aha tolio Una'a nage woihulo-hulo'o.34Ngini aha nihali'i Ngoi, ma 'anima'ewau Ngoi, hababu ngini 'aidadiwa nia'ai'a o ngii'a nage 'ia'a ngoi tomanoa.>>35Geena'a de o Yahudio'a manga balu-baluhu yomatemo moi de moi, <<O nyawa nuuna wotagi o 'ia'a ho ngone 'aidadiwa powima'e? E'ola Una womau wotagi o Yahudi ma nyawa'a nage yomanoa o daeraa ma homoa'a naga o Yunanio'a, de wo'idoto'o o Yunani ma nyawa?36O'iau Awi dumutu wotemo na'o aha ngone powihali'i Una ma 'a powima'ewau, de ngone 'aidadiwa potagi nage 'ia'a naga Una womanoa?>>37O da-daluhu ma 'atu o ho'a-ho'ano ma rame nage ma wange ma du-du'uluo'au, ge'ena la o wange gee 'iholoioli yohilamo-lamo'o, o Yesus womahigo'ode de womaade-ade 'ada'uo'o wotemo, <<O nyawa nage manga ngomaha 'idudu-dudungu, ya'aino Ngoino la yoo'ele.38Nagoonau yonga'u Ngoino, o Bo'u 'Ibe-berehi'u naga 'ihitulihu'u onane: <Manga hininga ma dodano do'a o a'ele nage o nyawa 'inahiwango-wango 'iuihi 'aitogu-togumua.> >> (39O Yesus womaade-ade ma ngale o Omaha 'Iofi-ofi, nage aha iboa o nyawa'a nage yonga'u-nga'u Una'a. Hababu ma oraha geena o Omaha 'Iofi-ofi 'ayo'i'ulawahi, hababu o Yesus 'a Wihiiiewahi.)40Ma oraha o nyawa manga lepe yoihene o 'iau nage o Yesus wotemo, de yamuluo naga yotemo, <<O nyawa Nuuna maraio'au o Nabi ma amo'o nage powida-daama!>>41Munu'ali yotemo, <<Nuuna ma Oana Wohiha-halamata!>>
Ma munu'ali yotemo, <<Wae, ma Oana o Nyawa Wo'ihiha-halamata de Awi ahala o Galileano?42Hababu naga o Bo'u 'Ibe-berehi'u 'ihitulihu'u na'o ma Oana o Nyawa Wohiha-halamata geena Awi ahala o Daut awi guti'u de aha woboa o Betlehemino, geena la o Dautu awi hoanino.>> 43Ma baha'u o nyawa-nyawa yoma'aributu moi de moi ma ngale o Yesus.44Yamuluo naga yomau Witago'o, ma 'amoiwa yomooini wiga-gaao.45Ma oraha ma Jou ma Dutu awi Woa ma go-goana nage yo'ihulo-hulo'o yotagi o Yesus witago'o goona yoboanoli, o 'imam ma hae-hae'e de o Farisio'a goona yohano ona'a, <<Idodoau ho 'aniwiahanowa neenano?>>46Ma Jou ma Dutu awi Woa ma go-goana goona yopaluhu, <<Ayoyai, oma'iwahi o nyawa yomaade-ade ma rahai harage 'a Una!>>47O Farisio'a goona yotemo, <<E'ola ngini'a ma niwihiliba'au?48Naga bote de ma 'ena'a? To ngone nanga balu-baluhu e'ola o Farisio'a yonga'uo'au Una'a?49Ma o nyawa yolepe-lepe noona, ona 'a yana'owa ma Jou ma Dutu awi 'autoranga, maraio'au ma Jou ma Dutu wa'o'ihu'umu.>>50O Farisio'a womatengo geena la o Nikodemus nage ma moi wo'ai'a o Yesusi'a. Una wotemo o Farisi ma nyawa ma regu'a nage,51<<'Imote'e nanga Jou ma Dutu awi 'autoranga, 'aidadiwa po'ihu'umu o nyawa moi na'o 'apo'ihenuawahi oiau yotemo de manga didiai 'apataila'owahi ma diai.>>52Ona yopaluhu, <<Ngona ma o Galileano? Bee'a nataila'o nohidi-diai o Bo'u 'Ibe-berehi! Ngona aha nama'e 'a'oiwa o nabi ma 'ahala o Galileano!>> O ngewe'a momatengo mihidatago'o mohowono
[53Geena'a de o nyawa moi-moi yo'o'ilio moi-moi manga woa'a.
Ma munu'ali yotemo, <<Wae, ma Oana o Nyawa Wo'ihiha-halamata de Awi ahala o Galileano?42Hababu naga o Bo'u 'Ibe-berehi'u 'ihitulihu'u na'o ma Oana o Nyawa Wohiha-halamata geena Awi ahala o Daut awi guti'u de aha woboa o Betlehemino, geena la o Dautu awi hoanino.>> 43Ma baha'u o nyawa-nyawa yoma'aributu moi de moi ma ngale o Yesus.44Yamuluo naga yomau Witago'o, ma 'amoiwa yomooini wiga-gaao.45Ma oraha ma Jou ma Dutu awi Woa ma go-goana nage yo'ihulo-hulo'o yotagi o Yesus witago'o goona yoboanoli, o 'imam ma hae-hae'e de o Farisio'a goona yohano ona'a, <<Idodoau ho 'aniwiahanowa neenano?>>46Ma Jou ma Dutu awi Woa ma go-goana goona yopaluhu, <<Ayoyai, oma'iwahi o nyawa yomaade-ade ma rahai harage 'a Una!>>47O Farisio'a goona yotemo, <<E'ola ngini'a ma niwihiliba'au?48Naga bote de ma 'ena'a? To ngone nanga balu-baluhu e'ola o Farisio'a yonga'uo'au Una'a?49Ma o nyawa yolepe-lepe noona, ona 'a yana'owa ma Jou ma Dutu awi 'autoranga, maraio'au ma Jou ma Dutu wa'o'ihu'umu.>>50O Farisio'a womatengo geena la o Nikodemus nage ma moi wo'ai'a o Yesusi'a. Una wotemo o Farisi ma nyawa ma regu'a nage,51<<'Imote'e nanga Jou ma Dutu awi 'autoranga, 'aidadiwa po'ihu'umu o nyawa moi na'o 'apo'ihenuawahi oiau yotemo de manga didiai 'apataila'owahi ma diai.>>52Ona yopaluhu, <<Ngona ma o Galileano? Bee'a nataila'o nohidi-diai o Bo'u 'Ibe-berehi! Ngona aha nama'e 'a'oiwa o nabi ma 'ahala o Galileano!>> O ngewe'a momatengo mihidatago'o mohowono
[53Geena'a de o nyawa moi-moi yo'o'ilio moi-moi manga woa'a.
The Seed Company