O Yohanes6
1Geena 'ipahano o wange muluo naga de o Yesus womahingootili wohi'aiha o Galilea ma talaga ma honongaha, geenala o Tiberias ma talaga'a2O nyawa manga lepe winii'i hababu yama'e'au o haala ihera-heranga wodiai geena la o nyawa yopa-panya'e wo'ihiai'i.3O Yesus de Awi ni-nii'i yohawu o de'ude de yogogelu'u.4Ma oraha geena o Yahudio'a manga Wange ma Amo'o nage ihironga o Paskah 'ihorio'au.5Nage o Yesus womagelelo Awi date'ino, de wo'ima'e o nyawa manga lepe 'ayotuo-tuono yoboa Unano, ho wotemo o Filipusi'a, <<Ee Filipus, bei'a 'ia'a idadi pogoo'o o inomo la o nyawa moi-moi noona idadi yoodomo?>> (6O Yesus wana'o'au 'o'iau nage aha wodiai, ma wotemo 'ogeena hababu womau witaili o Filipusi'a.)7De o Filipus wopaluhu, <<Ma roti ma 'ija ngaro o pipi o hala'a ma amo'o o ratuhu modidi ma 'ayo'idagaadonua o nyawa-nyawa noona, ngaro o nyawa moi 'a ma ile-ilewa ma.>>8De o Yesus awi ni-nii'i womatengoli geena la o Andreas, o Simon Petrus ma dodoto, wotemo,9<<Nengo'a o ngoa'a womatengo awi roti o ngodumu motoa'a, de awi nao'o o ngai modidio'a. Ma geena ma faedaa 'a'oiwa ma mangale o nyawa manga lepe'a noona.>>10O Yesus wotemo Awi ni-nii'i'a, <<Ni'ihilo'o la o nyawa goona yogogelu'u.>> Geena'a dau de ma ubuto'a ho o nyawa-nyawa goona moi-moi yogogelu'u geena'a, poelua yaribuhu motoa'a 'a o nau-naulohi.11Geena'a de o Yesus waeheno ma roti geena de wotemo 'amaowa'a ma Jou ma Dutude, aha de wo'ihi'a-'ado'u o nyawa yolepe-lepe'a goona. 'Ogeenali ma de o nao-nao'oli ma wodiai harage de 'ogeenali, ho moi-moi yoodomo hiadono yo'ipunuhu.12Nage yo'ipunuho'au de o Yesus wotemo awi ni-nii'i'a, <<O inomo ma boloi geena niatoomu la uwa hiadono 'ihalibiru.>>13Ho ma roti o ngodumu motoa nage o nyawa geena manga lepe yoodomo'a, geena ma boloi yatoomuno o karanjanga mogioo'o de modidi ya'oma-'omangie!14O nyawa yolepe-lepe yama'e o Yesus wodiai o haala 'ihera-heranga de yotemo, <<I goungu Nuuna o Nabi ma Amo'o nage o Bo'u 'Ibe-berehio'a 'itemo na'o aha woboa o duniano!>>15O Yesus wo'ina'o ona yomau yaino wipa'ihaa wodadi to 'ona manga oana. Hababu geena Una wotagi o daeraa 'ide'u-de'u'a awomatengo'a.16Nage ma oraha o wutuou de o Yesus awi ni-nii'i youti o talaga'u.17Geena'a de o ngootilu'u yopalene yohi'ai'a ma talaga ma hongona'a do'a o Kapernaumi'a. 'Italuhou 'ena o Yesus 'awoboawahi onano.18Ma oraha geena o talaga'a 'imulaenge o mo'u-mo'u hababu o dado'o 'i'uata.19Gee 'ona yohidete poelua o kilo motoa e'ola butangau, de wima'e o Yesus woboa waadonou manga ngootilino, Wotagi-tagi o a'ele ma de'uo'o. Ho ona duru yohawana.20Ma o Yesus wotemo ona'a, <<Ngoi neena o Yesus, ho uwa niohawana!>>21Geena'a de ona 'ayoga-garago Wihulo'o manga ngootilu'u Wopalene, de 'ageena ma oraha de manga ngootili geena 'itota'au nage manga dumuti'a.22Ma dewelano, o nyawa yolepe-lepe nage 'a o talaga ma hongona'ahi do'a, yana'o na'o 'aano o ngootili 'a o ngai moio'a do'a. Ona yana'o na'o o Yesus awi ni-nii'i yotagio'au de o ngootili geena, ma o Yesus 'a wonii'uwa.23Geena'a de o ngootili ngai muluo naga iboa do'aino o Tiberias ma bendarino, de yomahidutu'u o ngii nage o nyawa yolepe-lepe o roti yoodo-odomo ma dateo'a nage ma Jou Yesus wotemo 'amaowa'a ma Jou ma Dutude.24Nage yolepe-lepe yana'o na'o o Yesus de awi ni-nii'i 'ayo'iiwau geena'a, de ona ma yo'o'idoa o ngootilu'u geena'a nage, de yotagi o Kapernaumi'a o Yesus wihali'i.25O nyawa-nyawa goona nage yoma'ama'eno de o Yesus do'a o talaga ma hononga'a, de yohano Una'a, <<Aba Guru, 'awuluo Nomahiadono neenano?>>26O Yesus wopaluhu, <<I gou-goungu, ngini nihali'i ngoi, geena 'a ma hababuwa niomangaritio'au o haala 'ihera-heranga todi-diai ma dumutu, ma hababu 'a o roti niaodomo'au hiadono nipunuhu.27Nio'arajaanga 'uwa duga 'aniomau niama'e o 'inomo gee 'aibooto'ahi de 'aitiihahi. Ma 'nio'arajaanga ma ngale niama'e o inomo ge 'aiti-tiihawau de nihiwango 'ahiado-adoni'a. O inomo geena aha ngoi o Nyawa ma Ngoa'a tini'ula, hababu duga 'a Ngoi nage 'ai Dea ma Jou ma Dutu woitumutu mangale tini'ula ngini'a.>>28Geena'a de ona yohano o Yesusi'a, <<Ho o 'iau halingou miadiai mangale mianii'i ma Jou ma Dutu awi mau?>>29O Yesus wopaluhu, <<Ma Jou ma Dutu womau ngini nionga'u Ngoino nage Woihulo-hulo'ino.>>30Ona yotemo, <<Na'o 'ogeena, 'aidadi Aba nohimaiti ngomino o haala 'ihera-heranga la miama'e de niminga'u Ngona'a? O'iau aha Aba nodiai?31Ma hila mia dotumu de mia tohora o manna yaodomo'au o tona'a 'i'a-'a'aha'a, harage ihitulihu'u'au o Bo'u 'Ibe-berehi'u, <Una wo'i'ula'au o roti o horoga'u.> >>32Geena'a de o Yesus wotemo ona'a, <<Tinitemo neena, 'a o Musawa wo'ula o roti ma dutu nage o horoga'u, ma 'ena 'ai Dea.33Hababu o roti nage ma Jou ma Dutuno geena la o roti o horoga'u mangale yo'i'ula o wowango 'ahiado-adoni'a o nyawa'a o dunia'a.>>34De ona yotemo, o Yesusi'a, <<Aba, tanu tatapu no'ula ngomino o roti geena.>>35O Yesus wotemo ona'a, <<Ngoi neena harage de o roti nage o nyawa yo'ihiwango-wango. Ho nagoonau yaino ngoino de Inga'u, ona aha 'ayo'ihawinuwau de manga ngomaha 'aidudunguwau 'ahiado-adoni'a.36Ma nage harage Totemo'au ngini'a, ngaro ngini nima'e'au Ngoi, ma ngini 'anionga'uwa.37O nyawa moi-moi nage 'ai Dea wo'ula'au Ngoino, aha yoboa Ngoino. Ngoi aha to'idawongo nagoonau bato yoboa ngoino.38Hababu Ngoi o horogaa'a de touti, geena 'a to Ngoiwa ma hirete 'ai mau tadiai, ma to Una nage Woihulo-hulo'o Awi mau tadiai.39De neenau nage Woihulo-hulo'o Awi mau: Una womau la o nyawa moi-moi nage Wo'ula'au Ngoino, 'a moi ma uwa yoihanga. La aha to'ihimomi'i o dunia ma baha'a.40'Ai Dea waigo ge'ena la o nyawa moi-moi nage 'Ima'e de Inga'u ngoino Awi Ngoa'a, 'ona yama'e o wowango 'ahiado-adoni'a, de To'ihimomi'oli o dunia ma baha'a.>>41O Yahudio'a yabuhulu de yo'ulubungu hababu Una wotemo, <<Ngoi neena o roti da'u o horogaa'u.>>42Ona yotemo, <<Wae, ma Nuuna o Yesus o Yusuf awi ngoa'a! Ngone po'ina'o Awi dea de Awi eha! De cara'iau ho neena wotemo na'o Una o horoga'u wouti'u?>>43Geena'a de o Yesus wotemo ona'a, <<Uwau nio'ulubungu.44'A moi ma 'aidadiwa yoboa de yonga'u ngoino, na'o 'ai Dea nage woihulo-hulo'o 'awo'iahawa Ngoino, de nagoonau yoboa, ona aha to'ihimomi'i o dunia ma baha'a.45O nabi manga bo'uo'a 'ihitulihu'u onane: <O nyawa moi-moi aha ma Jou ma Dutu wo'idoto'o.> Ho nagoonau nage yohigihene de yomadoto'o 'ai Dea'a, aha yoboa Ngoino.46Geena 'a mamangaritiwa na'o naga o nyawa wima'e'au 'ai Dea. Duga 'a Ngoi nage ma Jou ma Dutuo'a de taino geena Towima'e'au 'ai Dea.47Nioda-danganono: Nagoonau bato yonga'u Ngoino, ona yama'e'au o wowango 'ahiado-adoni'a.48Ngoiou neena o roti nage o nyawa yo'ihiwango-wango.49O tona'a 'i'a-'a'aha'a nia edete de nia dotumu o manna yoodo-odomo ma 'ayohonengo'a.50Ma o roti nage da'uu'u o horoga'u geena 'aimaterowa de o manna. Nagoonau yaodomo o roti geena, ona ayohonenguwau.51Ngoiou neena o roti o horoga'u, o roti nage o nyawa yo'ihiwango-wango. O nyawa nage yaodomo o roti neena, aha yowango 'ahiado-adoni'a. O roti nage aha to'ula mangale o nyawa o dunia'a ya'ihiwango, geena la 'ai roehe.>>52O Yahudi ma nyawa yoiheno'a de moi de moi yoma'aributu yotemo, <<Cara'iau o nyawa nuuna wona'ula awi roehe la paodomo?>>53Geena'a de o Yesus wotemo ona'a, <<Tinitemo neena! Ngoi neena o Nyawa ma Ngowa'a. Ngini halingou niaodomo 'ai roehe de niao'ele 'ai aunu, la ngini aha niowowango itiai.54O nyawa nage 'ai roehe yaodomo de 'ai 'aunu yao'ele, aha yama'e o wowango 'ahiado-adoni'a de aha To'ihimomi'i o dunia ma baha'a.55Hababu 'ai roehe geena o inomo ma dutu, de 'ai 'aunu geena o anggur ma goungu.56O nyawa nage 'ai roehe yaodomo de 'ai aunu yao'ele, ona geena 'ahiado-adoni'a yorimoi de de Ngoi, de Ngoi de de ona.57'Ai Dea o wowango matiti guuna, Unau woihulo'o taino. De Ngoi towango hababu Una. 'Ogeenali ma o nyawa nage yaodomo 'ai roehe, aha o wowango yama'e hababu Ngoi.58Neenau o roti nage o horogaa'u 'i'uti'u, o roti nage 'aimaterowa de nage nia edete de nia dotumu yaodo-'odomo. Hababu nage ma roti geena yaodomo'au, ma 'ayohonengo'ahi. Ma o nyawa nage yaodomo o roti o horoga'u neena, aha yowango 'ahiado-adoni'a.>>59Geena moi-moi o Yesus wohidemo, nage ma oraha Wodoto'o o do-doomu ma woa'a o Kapernaumo'a.60Ma oraha Yoiheno'au o Yesus Awi demo-demo geena, de o nyawa nage wini-nii'o'a naga manga lepe yotemo, <<O do-doto'o neena 'ao dubuho. O do-doto'o neena 'amoiwa yaa'unu yodinii'i!>>61O Yesus ma hirete Awi hingina ma doda'a wana'o na'o o nyawa nage Wi ni-nii'i yo'ulubungu hababu Awi demo-demo geena, de wotemo, <<Dodoau, 'ania hininga 'ayadaenua hababu 'ai demo-demo geena?62Cara'iau done na'o niama'e Ngoi o Nyawa ma Ngoa'a todoali o horogade 'ai ngii ma hilade?63O nyawa powango geena hababu ma Jou ma dutu awi Omaha 'Iofi-ofi. 'A o nyawa ma guata geena 'aidadiwa powango. O demo-demo nage Tohidemo ngini'a neena, geena la ma Jou ma Dutu awi Omaha 'Iofi-ofi ma demo-demo, de o demo-demo geenau yo'ihiwango o nyawa.64Ma demaena nginio'a naga 'ayonga'uwa.>> (O wotemo 'ogeena hababu, amadi-dihilahi wo'arajaanga ena wa'o'ina'o'au nagoonau nage done aha 'ayonga'u-nga'uwa, de nagoonau aha Wiwu'unu.)65Geena'a de o Yesus wotemoli, <<Geenau ho Ngoi tohingahu ngini'a na'o 'amoiwa moi idadi yoboa Ngoino na'o 'ai Dea 'awotemowa na'o ngini niodadi to Ngoi 'ai ni-nii'i.>>66'Imulaenge ma oraha geena, o nyawa nage Winii-nii'i manga lepe Wimada'au de 'a Winii'uwau.67Geena'a de o Yesus wo'ihano Awi ni-nii'i'a yamogioo'o de yamididi, <<Bote nginioli ma Nimadau?>>68O Simon Petrus wotemo, <<Jou, nagoona'auoli ngomi miotagi? 'A to Ngona Jou Ani demo geena ho o nyawa yama'e wowango 'ahiado-adoni'a.69Ngomi mionga'uo'au de miana'o'au Jou Ngonau o hu-hulo'o Noofi-ofi ma Jou ma Dutuno.>>70O Yesus wopaluhu, <<Ngoiou tiniili'i nimogioo'o de nimididi neena. Ma womatengo nginio'a naga geena o To'ata ma Oana ma hu-hulo'o!>>71O Yesus awi dumutu geena la o Yudas, o Simon Iskariot awi ngoa'a. Hababu o Yudas ngaro o ni-nii'i moi nage yamogioo'o de yamididino, ma una aha wiwu'unu o Yesus.
The Seed Company