O Yohanes4
1Ma oraha Yesus wana'o'au na'o o Farisio'a yoiheno'au, na'o o nyawa manga lepe widomote'e Una'a de wo'i'ohi'i iholoi yolepe ngaro de Yohanes awi ni-nii'i.2(Ngaro o Yesus mahirete Una awo'i'ohi'ua ma duga 'a awi ni-nii'i bato.)3Ma oraha o Yesus wana'o'au na'o o Farisio'a ma nyawa yoiheno'au ma haala geena, de Una wo tagi wamada o Yudea ma daera de woma'ilio o Galilea'u.4Awi dodagi ma hidogorona'a, Una 'iani waboa o Samaria ma daera'u.5Ho womahiadoni'a o bendaro'a moi o Samaria'a nage ma ronga o Sikhar, ima'adadu'u de o tona'a nage ma hila o Yakub wo'ula-'ula awi ngoa'i'a o Yusufi'a.6Geena'a, o humu moi nage yohironga o Yakub awi humu. O Yesus wo'angela'au hababu awi dodagi ma ga'ulu, ho wogogelu'u o humu ma date'o'a. Ma oraha geena poelua o ta'o mogio'o de modidi o wange 'i'orona'a.7Ma oraha geena o Yesus awi ni-nii'i yotagio'au o bendari'a o inomo yogoo'o. Geena'a de o ngewe'a momatengo o Samariano moboa o a'ele mohiono'o, de o Yesus wotemo muna'a, <<Bilanga, tanu ma ile noiula la tao'ele?>>9O ngewe'a gumuna mopaluhu, <<Aba ngona o Yahudio'a ma nyawa, ngoi o Samaria ma nyawa, de idodoau ho nomau o a'ele nogaaho'o ngoino?>> (Muna 'ogeena motemo, hababu o Yahudio'a ona ayoma'ahupuohamua de o Samaria'a.)10O Yesus wopaluhu muna'a, <<Na'o ngona nana'o ma Jou ma Dutu awi cocatu ngona'a de ngoi neena naguunau nage toga-gaaho'o o a'ele ngona'a, maraio'au ngona mahirete nogaaho'o o a'ele ngoino mangale nao'ele, de ngoi aha toniula o a'ele nage yo'ihiwango-wango.>>11O Ngewe'a gumuna mopaluhu, <<Aba, o humu neena aolu'u'u, ani gu-guiti ma a'oiwa, ho iyanou nama'e o a'ele nage inahiwango-wango geena?12O humu neena mia tohora o Yakub miwi'ulano. Una mahirete neena'ou womadegehe mangale wapa'e, 'ogeenali de awi ngoa-ngoa'a de awi 'aewani. Hona'o, Aba ngona iholoi noamo'o de o Yakub?>>13O Yesus wotemo, <<O nyawa nage yao'ele o a'ele neena ona aha manga ngomaha 'aidudungohi!14Ma na'o nagonau nage aha yao'ele o a'ele nage ngoi aha to'i'ula, geena aha manga ngomaha 'aidudunguwau 'ahiado-adoni'a. Hababu o a'ele nage aha to'i'ula geena imadadi harage aoboote'e manga roehe ma doda'a, nage ma a'ele 'iuihi 'aitogu-togumua yoi'ula o wowango 'ahiado-adoni'a.>>15O ngewe'a gumuna motemo, <<Aba, noi'ulano ma a'ele geena, la ngoi uwau 'ai ngomaha idudungoli, de uwau to'ainoli neenano mangale o a'ele tohiono'o.>>16De o Yesus wotemo, <<Tagi, anio'ata nowiaho'o de na'ainoli neenano!>>17O ngewe'a gumuna mopaluhu, <<Ngoi 'a'oiwa 'ai o'ata.>> O Yesus wopaluhu, <<'iyolo 'igoungu ani demo geena.18Hababu ngona nomodo'a ma motoau de o naulu nage neena'a naga nima'apaliarano geena atongonawa anio'ata.>>19O ngewe'a gumuna motemo, <<O oraha neena ngoi tana'o, Aba ngona o nabi moi.20Tongomi mia edete de mia dotumu yohuba ma Jou ma Dutu'a o de'uo'a neena. Ma Aba tongona ani nyawa yotemo, o nyawa halingou yohuba ma Jou ma Dutu'a ma dingii ao Yerusalemo'a.>>21O Yesus wotemo muna'a, <<Bilanga anonga'u bato, oiyau naga ge totemo! Ma oraha aha yaadono, o nyawa aha yohuba 'ai Dea'a ao de'uo'awauoli de 'a o Yerusalemo'awau.22Ngini o Samaria'a ma nyawa niwihuba ma Jou ma Dutu ma niwina'owa, ma ngomi o Yahudi ma nyawa miohuba ma Jou ma Dutu nage miwina'o-na'o'au, hababu o halamata 'iboa ma nge'omo o Yahudi ma nyawano.23Ma ma oraha aha iboa de naga ya adono'au, na'o 'a de ma Jou ma Dutu awi omaha ma tutuda, o nyawa aha wihuba 'ai Dea ma Jou ma Dutu, ma nge'omo iti-tiai. Hababu 'ai Dea wo'ihali'i o nyawa nage wihuba harage de 'ogeena.24Hababu ma Jou ma Dutu geena o omaha, de duga 'a de o omaha iofi-ofi ma 'uaha ho o nyawa idadi wihuba 'ai Dea'a ma Jou ma Dutu, de wina'o itiai.>>25O ngewe'a gumuna mopaluhu o Yesusi'a, <<Ngoi tana'o ma Oana o nyawa wohiha-halamata nage witehongo ma Kristus aha woboa Una aha wohingahu o 'iau hona moi-moi ngomino.>>26O Yesus wotemo, <<Una nage nowiteho-tehongo geena Ngoiou neena tomaade-ade de de ngona.>>27Ma oraha geena o yesus awi ni-nii'i yoma'ilio o bendarino, de wima'e o Yesus yoma'aade-ade de o ngewe'a momatengo ho yohenga. Ma 'amoiwa yomooini yohano ma ngewe'a'a gumuna, <<Bilanga oiau noparalu?>> E'ola yohano o Yesusi'a <<Dodoau ho Aba nima'aade-ade de o ngewe'a gumuna?>>28Geena'a de o ngewe'a gumuna mamada ma ami a'ele ma ngii de motagi o bendari'a 'amomapa-palitana mohingahu o nyawa-nyawa'a geena'a.29<<Niaino, powigelelo o nyawa nage wohidemo o 'iau hona moi-moi nage Ngoi tadi-diaio'au. Poelua Una geena ma Oana o Nyawa wohiha-halamata geena la ma Kristus!>>30Ho o nyawa-nyawa o bendaro'a geena yotagi o yesus wigelelo.31Ma oraha geena o Yesus awi ni-nii'i yotemo, <<Aba Guru, noodomohi.>>32Ma o Yesus wotemo, <<O inomo naga Ngoio'a gee ngini 'aniana'owa.>>33Ho awi ni-nii'i yoma'ahano, <<Bote naga o nyawa o inomo widagahano?>>34Geena'a de o Yesus wotemo, <<To Ngoi 'ai inomo geenala tadiai 'ai Dea ge woihulo-hulo'o o duniano awi mau, de taduanga o 'arajaanga nage wo'ula'au ngoino.35Ngini niotemo, <O gugutu'u o mede hoatohi!> Ma ngoi tinitemo: Niagelelo o bira o bailo'a 'iumu'o'au, 'iutu'ou!36Youtu-utu'u nage ma oraha neena yama'e'au manga hewa, de yatoomu ma hasili geena la o nyawa-nyawa nage yama'e o wowango 'ahiado-adoni'a. Ho nage yotudu-tudu'u de youtu-utu'u moi-moi 'ayomaga-garago.37De geena dau geena itiai nage o nyawa yotemo-temo onane: <Munu'a yotudu'u, munu'a youtu'u.>38Ngoi tinihulo'o ngini niotagi o nyawa'a ge yo'ihingahuo'au o Habari ma Owa harage de 'atinihulo'o nioutu'u o bailo'a nage o nyawa ma homoa manga gangela. O nyawa ma homoa yo'arajaanga, ma ngini nimadugutu'u ma hasili.>>39De manga lepe o Samaria ma nyawa ma bendarino geena winga'u o Yesus mangale ma ngewe'a gumuna, motemo, <<Una wohingahu moi-moi oiau naga ge todi-diaio'au.>>40Ma oraha o Samaria ma nyawa yoma'ama'e de Yesus, de wibaja la womanoahi de de ona. Ho o Yesus womanoa geena'a o Wange modidi.41Geena'a de o nyawa-nyawa 'a yolepe monga yonga'u o Yesusi'a, mangale Awi demo-demo.42De ona yotemo ma ngewe'a'a gumuna: <<Ma oraha neena ngomi mionga'u geena ma hababu 'a ngonawau nage naga notemo ngomino, ma ena hababu ngomi mahirete mioiheno'au Una womaade-ade de miana'o Una geena 'igoungu o nyawa o Wohiha-halamata o dunia.>>43O Yesus o Shikaro'a awi wange modidio'a de wotagi wohi'au'u o Galilea ma daera'u.44O Yesus ma hirete wotemo'au, <<O nabi moi na'o to una awi hoano'a geena 'awihoromatiwa.>>45Ma oraha o Yesus womahiadono o Galilea'a, o nyawa-nyawa geena'a widawongo 'ayoga-garago, hababu ma oraha o Yahudio'a manga wange ma amo'o nage ihironga o Paska ona o Yerusalemo'a, de yama'e'au moi-moi nage o Yesus wodi-diaio'au.46Geena'a de o Yesus woma'ilioli o Kana'a o Galilea ma daera'a, nage 'ia'a naga o a'ele Wadiai idadi o angguru. De o Kapernaumo'a womatengo o 'adato'a wo'a-'arajaanga awi ngoa'a wopanya'e'u.47Ma oraha woiheno'au o Yesus woboa'au o Galileano o Yudea'a de waino, de una wa'ai'a o Yesusi'a wogaaho'o, la o Yesus wohi'ai'a o Kapernaumi'a la wihiai'i awi ngoa'a nage hali'i wohonenge.48O Yesus wotemo una'a, <<Na'o ngini aniama'ewa o haala 'ihera-heranga, ngini 'anionga'uwa.>>49De una wopaluhu, <<Aba, tanu nomataiti'a la 'ai ngoa'a 'awohonenguahi ena noboa'au la nowihiai'o'au.>>50O Yesus wotemo, <<Notagiou, ani ngoa'a awi panya'e geena 'iai'i.>> O nyawa guuna wonga'u o Yesus awi demo geena, geena'a de wotagio'au.51O nge'omo ma gorona'a de awi loleleani yoboa de yohingahu una'a, <<Aba, ani ngoa'a awi panya'e 'iai'o'au.>>52Geena'a de una wohano ona'a o ta'o muluo de woai'i? Ona yopaluhu, <<'Agoni'ahi poelua o ta'o moi o wange 'i'orona'o de awi gogama 'iai'i.>>53De o ngoa'a ma dea guuna womadanganono na'o ma oraha geenau o Yesus wotemo una'a, <<Ani ngoa'a awi panya'e 'iai'o'au.>> Ho una de awi woa ma doda'u moi-moi yonga'u o Yesusi'a.54Geenau o haala 'ihera-heranga o Yesus wodiai ma modidiou ma oraha o Galilea'a nage woboano o Yudea'a de waino.
The Seed Company