O Yohanes3
1Naga womatengo o Farisino awi ronga o Nikodemus, una geena wohidadi baluhu o Yahudio'a manga agama'a.2Ma moi geena, o wutu'u de wa'aino o Yesusino, de wotemo onane, <<Aba Guru, ngomi miana'o ngona o guru moi ma Jou ma Dutu nowihulo'ino, hababu 'amoiwa idadi yadiai o haala 'ihera-heranga harage de Ngona nadiai na'o de ma Jou ma Dutuwa.>>3O Yesus wopaluhu, <<Noihene nohidi-diai nage totemo neena, 'a moiwa yodadi ma Jou ma Dutu awi awaha, na'o inahingoa'uwali.>>4Geena'a de o Nikodemus wotemo o Yesusi'a, <<Ae, cara'iau ho o nyawa moi yomaboa na'o yobaluho'au de? Marai 'aidadiwa manga eha manga po'o'o yoohamoli aha de yomaboali.>>5O Yesus wopaluhu, <<Duru igoungu totemo neena, na'ola o nyawa womatengo 'awomaboawauoli de o a'ele de o Omaha 'iofi-ofi geena ona 'aidadiwa ma Jou ma Dutu awi 'awaha.6Ngone o nyawa mangale nanga baluhu ho pomaboa, ma na'o o wowango ma hungi geena o Omaha 'Iofi-ofino.7Uwa noherana na'o Ngoi totemo, ngini halingou nimaboali.8O dado'o itagi ia'a naga geena imote'e ma mau, ngone poihene ma luluhu ma 'apana'owa ia'a de yaino de ia'a itagi. 'Ogenali ma o nyawa-nyawa nage yomaboa de Omaha 'iofi-ofi.>>9O Nikodemus wohano, <<Cara'iau ho hiadono o haala geena idadi?>>10O Yesus wopaluhu, <<Ngona noguru o Israelo'a de idodoau ho 'ana na'owa?11Ngoi tohidemo neena, duru igoungu ngomi miotemo-temo o i'au hona nage miana'o'au, de mihijarita harage de oiau nage miama'e'au, ma ngini 'aniadawongua o 'iau naga ge mihingahu-ngahu.12Ngini 'anionga'uwa nage Ngoi tohijarita o 'iau hona o dunia'a neena, ho done marai 'anionga'uwa, na'o ngoi tohijarita o 'iau hona o horoga'a.13Amoiwahi o nyawa yodoa o horogade, duga 'a Ngoi o Nyawa ma Ngoa'a nage o horoga'a touti o dunia'u.14Harage de o Musa nage o tona'a 'i'a-'a'aha'a o ngia ge o tambaga yadi-diai'u o gota'a wohidoade, 'Ogenali ma o Nyawa ma Ngoa'a ma wihiiye harage de 'ogeenali.15La o nyawa moi-moi ge yonga'u-nga'u Una'a yama'e o wowango 'ahiado-adoni'a.>>16Hababu ma Jou ma Dutu wo'idora o nyawa o dunia'a neena, hiadono wo'ula Awi ngoa'a womatengo-tengo'a guuna, la nagoonau yonga'u Una'a geena 'ayobinahawa ma yama'e o wowango 'ahiado-adoni'a.17Hababu ma Jou ma Dutu wohulo'o Awi Ngoa'a o dunia'u mangale awo'ihu'umua o nyawa o dunia'a neena, ma Una wo'ihihalamata.18Nagoonau yonga'u ma Jou ma Dutu awi Ngoa'i'a, ona geena wo'ihu'umua. Ma nage 'ayonga'u-nga'uwa Una'a, ona geena wo'ihu'umo'au, hababu ona 'a winga'uwa ma Jou ma Dutu Awi Ngoa'a nage 'awomatengo-tengo'a.19Ona yo'ihu'umu ma hababu onane: O daraanga ma Jou ma Dutuno iboa'au o duniano, ma o nyawa 'ayadawongua o daraanga de iholoi yaigo 'a o wuwutu'a hababu manga didiai itiiha.20Hababu nagoonau yodiai o haala ma diiha, yabuhulu o daraanga. Ona 'ayoolu'u ya'ai'a o daraangi'a la manga di-diai iti-tiiha geena uwa ihupu.21Ma o nyawa nage yadi-diai ma Jou ma Dutu awi mau, ona ya'ai'a o daraangi'a la 'ihinyata o 'iau hona yadiaio'au geena 'imote'e ma Jou ma Dutu awi mau.22Geena ipaha'a de o Yesus de awi ni-nii'i yotagi o Yudea ma tona'i'a. Do'a yai'a o Yesus de awi ni-nii'i manga wange muluo naga de o nyawa wo'iohi'i.23Ma oraha geena o Yohanes 'awobuiwahi. Ho o Yohanes o nyawa wo'iohi'i o Ainon ma hoano'a, o Salim ma Date'o'a, hababu geena'a ma a'ele ilamo'o ho yolepe o nyawa ya'ai'a geena'a la yo'iohi'i.25Ho o yohanes awi ni-nii'i de o Yahudio'a womatengo yoma'aributu, mangle yomaiho'o la bali yoofi ma Jou ma Dutu awi biono'a imote'e o Yahudio'a manga adata.26Ona yotagi o Yohanesi'a de yohano, <<Aba Guru, 'anowidanganonohi? O nyawa nage dede Ngona o Yordan ma ngaili ma hongona'a, de ma hila nohimaiti ngomino! Neena Una ma o nyawa wo'iohi'i, de o nyawa duru manga lepe ya'ai'a una'a!>>27O Yohanes wopaluhu, <<Na'o 'a ngone o nyawa, geena 'apomadama'ewa harage de 'ogeena, na'o ma Jou ma Dutuwa wona'ula.28Ngini ma hirete nioiheno'au ngoi totemo onane: <Ngoi 'a ma Oanua o nyawa wonahiha-halamata. Ngoi ma Jou ma Dutu woihulo'o tohila o duniano aha de Una.>29Maraio'au o nyawa aha yo'ai'a una'a hababu ona geena to Una harage de o ngewe'a momomodo'a geena to ma o'ata. Ma womomodo awi manai 'awomahigo'ode awi date'o'a wohigihene de una wogarago na'o woihene womomodo'a awi ilingi. 'Ogenali ma ngoi. Neena ngoi duru togarago.30Halingou Una 'aihii'a monga wihilamo'o, de ngoi 'a ihii'a monga 'aihiamo'ua.>>31<<Una nage o horoga'u woboa'u, una wodaduie de o nyawa moi-moi o dunia'a. Ma o nyawa o duniano, ona geena o dunia ma nyawa, de yomaade-ade o dunia ma 'iau hona. Una nage da'uu'u o horoga'u woboa-boa'u, una wodaduie de o hagala moi-moi.32Una wohingahu o 'iau nage wama'e'au de woiheno'au o horoga'a, ma o nyawa 'ayonga'uwa o 'iau nage wohingahu-ngahu geena.33Ma o nyawa nage yonga'u awi demo geena, ona geena yomanga'u na'o ma Jou ma Dutu awi demo geena 'igou-goungu itiai.34Hababu o Nyawa nage ma Jou ma Dutu wihulo'o, Unau guuna wohingahu ma Jou ma Dutu awi demo, hababu ma Jou ma Dutu wo'ula o Omaha 'iofi-ofi ma batingi 'oiwa.35Nanga Dea ma Jou ma Dutu wihibohono awi ngoa'i'a, wo'ula'au o hagala moi-moi una waparetano.36O nyawa nage yonga'u de yomahiga-gao ma Jou ma Dutu awi Ngoa'i'a guuna, ona yama'e o wowango 'ahiado-adoni'a. Ma o nyawa nage 'awihigihenua ma Jou ma Dutu awi Ngoa'i'a guuna, ona 'ayama'ewa o wowango 'ahiado-adoni'a. Ona ma Jou ma Dutu tatapu wo'ihu'umu 'ahiado-adoni'a.>>
The Seed Company