O Yohanes2
1O Yesus wo'iaho'o'a o Filipus de o Natanel, de ma wange modidi ipaha'a, de o modo'a ma rame yodiai o Kana ma hoano'a o Galilea ma bendaro'a geena'a. De o Yesus ma eha'a geena'a.2O modo'a ma rame'a geena, o Yesus de awi ni-nii'i ma yo'iaho'ino.3Wa'utu manga anggur 'ibooto'au de o yesus ma eha motemo o Yesusi'a, <<Manga anggur yo'idobooto'au.>>4O Yesus wopaluhu, <<E Yai de, tanu uwahi noihulo'o. Ma oraha 'oyaadonuahi mangale tohimaiti 'ai 'uaha.>>5Ma o Yesus ma eha mo'itemo o nyawa-nyawa'a ge yole-leleani o modo'a ma rame'a goona, <<'Aniodomote'e o 'iau naga bato wotemo ngini'a.>>6Geena'a o a'ele ma no-noa nage o ngai butanga'a yohi'adiai'u ma ngale yomahiiho-iho'o imote'e o Yahudio'a manga adata. O a'ele ma ngii geena moi-moi ma doda poelua o litere o ratuhu moi'u.7O Yesus wotemo yole-leleani'a goona, <<Ma a'ele ma ngi-ngii'u geena nio'o'idalihu'u o a'ele.>> Geena'a de ona yodalihi yohioma-omangie.8Geena'a de o Yesus wotemo ona'a, <<Bee'a neena niaehe ma a'ele ge'ena ma ile-ilewa de niaaha wohibalu-baluhu ma rame'a.>> Geena'a de ona yaaha ma a'ele geena wohibalu-baluhu ma rame'a,9de wohibalu-baluhu ma rame'a guuna wataili ma a'ele nage 'imadadio'au o angguru. (Una 'awana'owa 'ianou o angguru geena, yana'o duga 'a yole-leleani nage ma a'ele geena yodali-dalihi.) Ho wohibalu-baluhu ma rame'a guuna wiaho'ino o naulu nage womo-modo'a,10de wotemo, <<'Ae biaha, o nyawa yohihupu o angguru geena 'ihila nage 'iholoi yaowa-owa de na'o o nyawa yoboa-boano nage yo'iduga'au aha de ge biahali. Ma ngona nadaoti'a o angguru ge 'iholoi yaowa-owa hiadono neena.>>11Neenau o haala 'ihera-heranga ma di-dihila'a o Yesus wodiai. Una wodiai geena o Kana ma bendaro'a o Galilea ma daera'a. De o haala 'ihera-heranga genau Una wohimaiti Awi 'uaha duru 'iamo'o ho Awi ni-nii'i winga'u.12Geena iduangino de o Yesus de ma eha, de awi do-dodoto, de awi ni-nii'i yotagi o Kapernaum ma bendaro'a. Ona geena'a manga wange muluo'naga.13Wa'utu o Yahudio'a manga wange ma amo'o nage ihironga o Paska yaadonou, de o Yesus de awi ni-nii'i yotagi o Yerusalemie.14O Yerusalemo'a ma Jou ma Dutu awi woa'a ma bibino'a, o Yesus wo'ima'e yomawu'u-wu'unu o hapi, o duba de o namo daraa , de o pipi yohiali-aliti yogogelu'u geena'a.15O Yesus wodiai o boboha moi o gumini de geenau wo'ihiginii'i yomawu'u-wu'unu goona de manga hapi de ma duba moi-moi ge ma Jou ma Dutu awi Woa ma bibino'a. O pipi yohiali-aliti manga meja wapaga leoto ho manga pipi ma imahibarihi'a.16Geena'a de Una wotemo o namo dara yomawu'u-wu'uni'a, <<Niopilingana, niagoa'a moi-moi neena'a dau. 'Ai Dea awi Woa uwa niodiai nimawu'u-wu'unu ma ngii!>>17Ho awi ni-nii'i yomadangonono o Bo'u 'Ibe-berehi'u ma reguo'a itemo onane, <<Ngoi taigo Ani woa Jou ma dutu, taigo 'ai hininga ma doda'a harage 'ao u'u 'ito'a-to'ara.>>18O Yahudio'a manga balu-baluhu ya'ai'a de yotemo o Yesusi'a, <<Bee'a nodiai o haala 'ihera-heranga ma ngale ihimaiti ngomino na'o ngona ma Jou ma Dutu nowi'ula o hak nodiai oneena.>>19O Yesus wopaluhu, <<Niahoroma'a ma Jou ma Dutu Awi Woa neena, de 'a o wange haange ena tohigo'o'auli!>>20De ona yopaluhu, <<O taunu moruata de butangano yodiai ma Jou awi Woa neena, de ngona notemo nomau nohigo'oli 'a o wange haange?>>21Ma o Yesus awi dumutu ma Jou ma Dutu awi Woa, geena to Una awi roehe ma hirete.22Ho geena'a de gee o Yesus womomi'i o honengo'a, de awi ni-nii'i yomadanganono na'o ma haala geena, wa'ihingahuo'au. Ho yonga'u 'o'iau naga nage 'itulihu'u'au o Bo'u 'Ibe-berehio'a de nage 'o'iau naga o Yesus wohidemo'au.23O Yesus 'a o Yerusalemo'ahi ma oraha o Yahudio'a manga wange ma amo'o nage ihironga o Paska ma wange'u, de o nyawa manga lepe yonga'u una'a hababu wadiai o haala ihera-heranga.24Ma o Yesus ma hirete 'awo'inga'uwa, hababu una wo'ina'o o nyawa moi-moi.25Ma ngale o nyawa manga hingina, 'aiparaluuwa o nyawa yohingahu una'a, hababu una wana'o 'o'iau naga o nyawa manga hingina ma doda'a.
The Seed Company