'O KOLOSE4
1Ngini 'o tua-tuanga, ngini halingou nio'iaha irahai 'nia gilaongo. Niohi-hininga tingini ma de nia Tuango'a da'u 'o horoga'a.2Halingou ngini moi-moi aitauri'a niohaubayanga de nimagoa-goana, ma de niotemo amaowa'a ma Jou'a.3Tanu aitauri'a nimidahaubayanga ngomi, la ma Jou ma Dutu 'o 'oraha wo'ula mangale idadi miohihabari o habari ma Jou ma Dutuno. O habari geena mangale ma Kristus nage ma hila ma Jou ma Dutu 'a wohingahuwahi. O habari geenau tohingahu ho neena ngoi tobui'a.4Ho tanu niohaubayanga la ngoi idadi tohimangariti o habari geena hiadono yomangariti itiai, hababu geenau halingou tadiai.5Nia go'oie de niagogelu'u o nyawa-nyawa'a nage 'ayonga'u-nga'uwa ma Kristusi'a, geena halingou de nia barija, de halingou niapa'e o oraha ihinoimi geena mangale niodiai yaowa-owa.6Na'o nimaade-ade o nyawa'a, geena nia demo-demo halingou niohidi-diai la o nyawa yohanaanga de yaigo yohigihene o 'iau nage niohidemo. Na'o nimaade-ade 'ogeena ngini aha niana'o cara'iau niopaluhu yadae-daene o nyawa manga ha-hano.7O Tikhikus nanga riadodoto 'a powihiboho-bohono, aha wohingahu ngini'a o 'iau hona moi-moi nage ida-dadi ngoio'a. Una geena o gilaongo idadi winga'u nage wo'a-'arajaanga de ngomi mangale wile-leani ma Jou.8Ngoi towihulo'o o Tikhikus wotagi ngini'a la wojarita ngini'a o 'iau naga ida-dadio'au ngomio'a, la niana'o de nia hininga i'uata.9O Tikhikus done aha wotagi de nanga riadodoto o Onesimus. O Onesimus una geena naga nginino, una idadi powinga'u de 'a mi wihiboho-bohono. Yamidi goona aha ya'ai'a ngini'a de yohingahu ge ida-dadio'au moi-moi nengo'a dau.10O Aristarkhus nage de de ngoi mihidubui'a, wohidingoto awi tabea ngini'a. O Markus, o Barnabas yadaene awi riado-dodoto, una ma wohidingoto awi tabea ngini'a. (Unau guuna nage ngoi tobehehongo'au ngini'a la na'o woboa ngini'a de niwidawongo.)11O Yesus ma nage wihirongali o Yustus, una ma wohidingoto awi tabea ngini'a. O Yahudio'a yonga'u-nga'u o Yesusi'a manga hidogorona'a ge, 'a ona yahaange, nage neena naga mimahida'arajaanga mangale miohingahu o Habari ma Owa mangale ma Jou ma Dutu awi pareta. Onau goona duru yohi'uata 'ai hininga.12O Epafras ma wohidingoto awi tabea ngini'a. Una guuna ma naga nginino. Una wile-leani ma Kristus Yesus, nage de awi hininga igou-goungu niwidahaubayanga ngini'a. Una wogaaho'o ma Jou ma Dutu'a la nia ngonga'u o Yesusi'a iholoioli i'uata de idadi itotomo, de ngini nia'o'idomote'e ma Jou ma Dutu awi mau.13Hababu ngoi mahirete towima'e o Epafras duru womaduhunu wo'arajaanga mangale niwiduhunu ngini'a, de o nyawa-nyawali nage o Laodikia ma bendaro'a de o Hierapolis ma bendaro'a.14Ma Dotere o Lukas nage powihiboho-bohono, de o Demas yohidingoto mangga tabea ngini'a.15Tanu niohingahu mia tabea o nyawa yonga'u-nga'u'a o Laodikia'a, de nage nanga bilangi'a momatengo nage ami ronga o ngo Nimfa de o nyawa-nyawa'a nage yoboano ami woa'a mangale yohuba ma Jou'a.16Na'o ma hurata neena niabaca'au de nio'o'iiheno'au, geena tanu o Laodikia'a ma jama'ato'a ma nio'ibaca. De ma hurata nage tohidingo-dingoto o Laodikia'a geena ngini ma halingou niabaca.17De niohingahu o Arkhipusi'a la awi 'arajaanga nage ihitatapuo'au mangale wileleani ma Jou, halingou waduanga.18Ngoi mahirete totulihi 'ai tabea neena. Uma niamongo ma oraha neena ngoi 'a o buio'ahi! Tanu ma Jou niwihibara'ati ngini'a.
Ngoi o Paulus tinitabea.
Ngoi o Paulus tinitabea.
The Seed Company