'O KOLOSE3
1Ma Kristus wohonengo'au ma wihimomi'o'auloli, de ngini ma inihimomi'o'auoli de ma Kristus. Hababu geena halingou niahali'i 'o'iau naga nage da'u 'o horoga'a, 'ia'a ma Kristus wopareta de ma Jou ma Dutu.2Halingou nioda-danganono 'o'iau hona nage da'u 'o horoga'a, uwa duga a nage 'o dunia'a.3Hababu ngini nimahidohonengo'au de ma Kristus de neena ngini nio wango'u de ma Kristus ma Jou ma Dutu awi biono'a de nia wowango ma hungi naga ma Kristuso'a. De nia wowango ma hungi geena 'a wohimaituwahi.4Tingini nia wowango ma dutu geena la ma Kristus. Ho done aha nage Una woboali o duniano, ngini ma aha nima'e de de Una awi 'umati ma hidogorona'a.5Hababu geena, halingou ma gou-goungu niamada nage o haa-haala harage de o nyahihuu ma diiha nage naga nginio'a, geenala: Nage nima'apa'e 'itimaronga, nionyahihuu, niodahawini niodiai o baradoha, de niomau nimadolomu o 'arataa. Hababu na'o niomau nimadolomu o 'arataa, geena 'imatero de o gomangi'a niahuba.6'O nyawa nage geena moi-moi yadi-diai aha ma Jou ma Dutu wo'ihu'umu.7Ma hila ngini ma niodi-diai 'o 'ogeena, nage ma 'oraha ngini niparetano 'o nyahihuu ma diiha geena.8Ma neena ngini nionga'uo'au ma Kristusi'a, halingou nimatogumu niodiai iti-tiiha, geena la 'uwau niotabangamo, niotootaha, nio'ibuhulu o nyawa de nio'ironga ma diiha e'ola niohihupu 'o demo-demo nage 'oyadaenua niohihupu.9'Uwau nima'aelu'u moi de moi, hababu nia wowango de nia go'o'ie de nia gogelu'u nage iti-tiiha ma hila ge niamada'au.10Neena ngini niama'e'au o wowango ma hungi. Ma Jou ma Dutu wodiaio'au ngini o nyawa ma hungi, de a'itoa-toa'ua wadiai la nia hininga de nia didibanga iholoioli 'irahai harage de Una. Geena ma dumutu la ngini niwina'o de niwimangariti itiai ma Jou ma Dutu.11Ngini 'nia wowango ma hungiou, geenau ho 'aihi'a-'atinga'uwau nage a 'o Yahudio'awa e'ola 'o Yahudio'a, yomahuna-huna'a e'ola 'ayomahuna-hunawa. 'Ihi'a-'atinga'uwau o nyawa ma dudunino e'ola nage 'o bongano'a yomanoa-noa, 'o gilaongo e'ola a 'o gilaogua. Moi-moi geena imatero hababu porimoi de ma Kristus de 'unau 'iholoi wodaduie de 'o hagala moi-moi.12De ngini geena ma Jou ma Dutu niwiili'o'au. Ma Jou ma Dutu niwidiaio'au niodadi awi 'awaha, niwihibohono ngini'a. Geenau ho ngini halingou niohimaiti nia dora o nyawa-nyawa'a, nia hininga 'irahai, nia hininga itipo'o'u, nia hininga imaai, de niotongohono.13Ngini halingou niotongohono moi de moi'a, na'o o nyawa yahala'au ngini'a, geena halingou nio'iapongo. Ma Jou waapongo'au tingini nia baradoha, ho ngini ma halingou nio'iapongo o nyawa'a.14De 'iholoiohi 'iparaluu geena la ngini halingou nima'adora, hababu de 'o dorau geena ho ngini moi-moi ma igou-goungu niorimoi.15Halingou 'nia butuhu ihitatapu de o dame ma Kristusino nage naga 'nia hininga'a. Hababu ma Jou ma Dutu niwiaho'o'au ngini moi-moi niodadi harage de a 'o roehe moi, la niowango nima'aaha irahai. De halingou aitauri'a niotemo 'amaowa'a ma Jou ma Dutu'a.16Halingou nioda-danganono ma Kristus awi do-doto'o de nianoa nia hininga'a, la niowango imote'e o do-doto'o geena. De ngini halingou de nia barija nio'idoto'o moi de moi, de nimahi'adaaele moi de moi. Niwihuba ma Jou ma Dutu'a de niohinyanyi 'o mazmur, de nionyanyi niwihilamo'o, de o nya-nyanyi nage o Omaha 'Iofi-ofi ini'ulano.17De 'o'iau naga bato niadiai e'ola 'o iau hona nimaade-ade, geena moi-moi halingou imote'e cara'iau naga 'o nyawa yonga'u-nga'u ma Jou Yesusi'a. Niotemo amaowa'a ma Jou ma Dutu'a to ngone nanga Dea guuna, ma ngale 'o'iau naga nage 'o Yesus wodiaio'au ngini'a.18'O nge-ngewe'a nage niomo-modo'a'au, halingou nioihene nia o'ati'a, harage de yadaene o nyawa nage yorimoio'au de ma Jou.19De o nau-naulu nage niomo-modo'a'au, ngini halingou nio'ihihibohono nia we'ati'a de uwa nio'irohu-rohu.20Ngini o ngoa-ngoa'a halingou nioihene nia baluhi'a o hagala moi-moio'a, hababu nage ogeena-ena ma Jou ma Dutu waigo.21De ngini o dea-dea, nia ngoa'a manga hininga 'uwa niahau'u, 'uwa hiadono manga hininga 'iota'a.22Ngini o gilaongo, geena naga 'o hagala moi-moio'a halingou nioihene nia tuangi'a o dunia'a neena. Uwa nio'iihene duga a ma 'oraha to ona manga biono'a la manga hininga ihanaanga ngini'a, ma 'ena nio'iihene de nia hininga 'igou-goungu hababu niwihoromati ma Jou.23'O'iau naga bato nihi'arajaanga, halingou nia'arajaanga niohigou-goungu'u harage de 'a niwileleani ma Jou Yesus, ho duga a 'o nyawawa nio'ileleani.24Ngini niana'o'au na'o duga 'a ma Jou aha wo'ula nia hewa, geenala o 'iau hona nage Una wohitatapuo'au Awi 'awaha'a. Ngini niwileleani ma Kristus, Una geena tingini nia Tuanga ma dutu.25De nagoona bato yodiai 'o baradoha, 'ona aha yamo'u manga baradoha nage ma oraha ma Jou ma dutu wohigilio ona'a, hababu ma Jou ma Dutu 'a woili-ili'ua.
The Seed Company