'O KOLOSE2
1Ngoi tomau la niana'o cara'iau ngoi tomaduhunu to'arajaanga ma ngale tiniduhunu ngini de nage yonga'u-nga'u 'o Laodikia ma bendaro'a, de 'o nyawa moi-moi nage 'omaiwahi mima'ama'e.2Ngoi 'ogeena todiai la ngini o Kolose'a de ona nage o Laodikia'a nia hininga 'i'uata, de ngini aha nima'adora moi de moi ho niorimoi. De 'ogeena ngini moi-moi aha duru nionga'u hababu igou-goungu niomangariti de niana'o 'o'iau naga nage ma hila ma Jou ma Dutu 'a wohihupuwahi geena la ma Kristus.3Hababu 'a ma Kristuso'a, naga demaena ma Jou ma Dutu awi pade de awi barija moi-moi, nage ma hila o nyawa 'ayana'owahi. Geena harage de o arataa 'ihali-hali.4Neena tohidemo ngini'a la 'uwa 'o nyawa inielu'u de 'o demo-demo nage poiheni'a harage de ma goungu ena momongo 'a ma ngelu'u.5Hababu ngaro ngone poma'atinga'i'a ma 'a tinihi-hininga. De ngoi togarago toihene ngini 'a 'o hininga moi, de nia ngo-nga'u 'i'ua-'uata ma Kristusi'a.6Ngini nionga'uo'au na'o 'o Yesus 'una geena ma Jou. Hababu geena ngini halingou niowango niorimoi de de Una,7de nia ngong'u Una'a halingou i'uata, harage de o gota o utu moi ma ngutu'u'u imahibaitu'u ma guatu'u o tona'u'u. De halingou Una geena nia guata matiti harage de woa ihigo'o o woa ma babanginu'u nage i'ua-'uato'a. Halingou 'anionga'u monga ma Kristusi'a imote'e o dodoto'o iti-tiai nage niadawongo'au. De ngini halingou aitauri'a niotemo amaowa'a.8Ri-riadodoto ngini 'iani nimahidi-diai, la 'uwa 'o nyawa nibaja de 'o di-dibanga nage ma haidaa a'oiwa ho duga 'a niaihanga. 'O di-dibanga geena 'a ma Kristusinowa ma ena 'a o nyawano manga dodoto'o nage 'a yoihenino manga edete de manga dotumino de o hagala omahino nage 'o dunia'a 'ipa-pareta.9Nimahidi-diai uwa hiadono nia'unu nibaja, hababu cara'iau nage naga ma Jou ma Dutuo'a, geena moi-moi demaena o Yesuso'a nage ma oraha Una wodadi o Nyawa.10De moi-moi nage nia paraluu naga demaena'au nginio'a, hababu ngini niorimoi de ma Kristus. 'Una wapareta 'o hagala omaha nage 'i'u-'uaha de 'ipa-pareta.11Hababu ngini niorimoio'au de ma Kristus ho ngini harage de 'a inihuna'au mangale niodadi ma Jou ma Dutu awi 'awaha. Geena ma mangaritii ngini nihipidilo'au nia wowango iba-baradohano. O huna harage de 'ogeena, geena 'a o nyawawa yodiai ma 'ena ma Kristus awi 'uaha.12Hababu ma oraha ngini niohi'i, geena ma mangariti ngini nimahidohonenge de nimahidopoohu'u de ma Kristus, de hababu niohi'i ngini ma ma Jou ma Dutu niwihimomi'oli de ma Kristus, hababu ngini nionga'u ma Jou ma Dutu awi 'uaha'a nage wihimomi'o'au ma Kristus o honengino.13Ngaro Ma hila ngini niowango, ma harage de 'a niohonengo'au, hababu niobaradoha de hababu ngini ma Jou ma Dutu awi 'awahawa. Duga ma 'oraha neena ma Jou ma Dutu niwi'ula'au 'o wowango ma hungi de ma Kristus. Ma Jou ma Dutu wohiapongo'au moi-moi nanga baradoha,14de ma Jou ma Dutu 'a wapa'ewau o nagimi ma bo'u nage 'ituli-tulihu'u nanga baradoha nage 'inahihala-hala de itemo halingou inahu'umu. O nagimi ma bo'u geena harage de yohidapa'u'o'au o salipo'o nage ma oraha o Yesus wohonenge geena ma mangariti ma Jou ma Dutu wai'ilo'au moi-moi nanga baradoha.15Ma nge'omo o Yesus awi salipi geena, ma Jou ma Dutu wa'o'itiiha'au o hagala omaha ma diiha nage 'ipa-pareta de 'i'u-'uaha. De wohimaiti wohita-taraangi'a la o nyawa o dunia'a yana'o na'o Una watiiha'u'au 'o hagala omaha ma diiha geena.16Ho 'uwa nimahigumada o nyawa nihihala ma ngale 'o'iau naga niaodomo de niao'ele, e'ola o agama'a ma rame nage 'o taunu 'ihinoimi yodiai, e'ola 'o mede ma hungi'u 'ihinoimi yohuba ma Jou'a. De ma ma ngale 'o o Sabat ma Wange.17Moi-moi geena duga 'a ma gulumini 'o'iau naga nage done aha 'iboa, ma nyonyata geena la ma Kristus.18Manga lepe o nyawa nage yomaelu-elu'u manga hininga yohitipo'o'u de ona ma o malai'ati'a yahuba-huba. Uwa nimahigumadano nihige-gegoto ngini'a la ngini ma nimadinii'i 'ogeena, ho ngini niama'ewali o hewa nage ma Jou ma Dutuno. Ona yohiere manga mama'e de yoere hababu moi-moi 'a o dunia manga di-dibanga.19Ona 'a yomahigagaowau ma Kristusi'a, geena la 'o jama'ata moi-moi ma hae'e, Unau wodiai o jama'ata po'uata de porimoi. Neena idadi pohi'atero harage de o hae'e 'idiai ma roehe idadi 'a moi hababu de ma nguroto'a de ma donga-donga'a. Ho o jama'ata manga ngo-nga'u 'aihii'a monga 'i'uata, 'imote'e ma Jou ma Dutu awi mau.20Ngini nimahidohonengo'au de ma Kristus ho 'inihipidilo'au o hagala omaha nage 'ipa-pareta o dunia'a. Na'o 'ogeena cara'iau ngini niowango imote'e o nyawa o dunia'a manga di-dibanga? Idodoau ho ngini niodomote'e 'o 'autoranga neena,21<<Uwa niaga-gao neena>>, <<Uwa niataili 'o 'inomo geena>>, <<Uwa niatigi neena>>?22'O 'autoranga moi-moi geena duga 'a 'o'iau hona nage papa'e iduanga de ma haidaa oiwau. 'O 'autoranga de 'o do-doto'o 'ogeena geena 'a 'o nyawa yodiai'u.23Ma 'autoranga moi-moi neena ngaro pama'e'a ibarija, geena ma ngale yohuba imote'e o 'autoranga nage ona yadiai'u, yomadiai harage de yomahitipo'o'u, de ma yomahangihara. Ma 'o 'autoranga moi-moi geena ma haidaa oiwa hababu 'aidadiwa yaduhunu yatato'o 'o nyawa ma nyahihuu.
The Seed Company