O Hu-hulo'o7
1Geena'a de ma Imam ma Amo'o wohano o Stefanusi'a, <<Bote ge yotemo nage igoungu?>>2De una wopaluhu wotemo, <<Riadodoto de o dea-dea, nioihene nihididiai e! O Abraham to ngone nanga edete de nanga dotumu 'awomatoo'auwahi o Harani'a, ma oraha geena 'a o Mesopotamia'ahi womanoa, de ma Jou ma Dutu nage duru womu-mulia woboa womahimaiti una'a.3De wotemo, <Ani tona'a de ani lia'a de dodoto na'o'imada, de notagi o daera'a nage aha Ngoi tonihimaiti.>4Ho o Abraham wamada o Kasdim ma nyawa manga daera de womatooa'a o Harani'a. O Abraham awi dea wohonengo'au, geena'a de ma Jou ma Dutu wohulo'o o Abrahami'a womatoo'a neena ma daerano, nage ngini riadodoto de o dea-dea ma moi-moi niodogogele neena naga.5Ma oraha geena o daera neena 'a o do'u moi ma, ma Jou ma Dutu 'awo'ulawahi o Abrahami'a mangale idadi awi puha'a. Ma ma Jou ma Dutu wojaji aha wo'ula o tona'a geena o Abrahami'a de awi guti'u mangale to onau manga puha'a. Ngaro 'a oraha geena o Abraham awi ngoa'a 'a 'oiwahi.6Ma onane ma Jou ma Dutu wotemo o Abrahami'a: <Ani guti'u aha yomanoa o nyawa manga daera'a harage de o nyawa yoboa-boano. O daera ma dutu aha yo'idiai ona'a o gilaongo de yo'ihangihara ma daao o taunu o ratuhu hoatino.7Ma goona ge yo'ihigi-gilaongo aha To'ihu'umu de ani guti'u goona aha yohupu ma daerano geena de done yohuba Ngoino ma dingiio'a neena.>8Ma Jou ma Dutu yoma'ajaji de o Abraham de ma jaji geena wohi'uata de hunata. Ho o Abraham awi ngoa'a o Ishak womaboa'u o wange tuangele, de o Abraham wihuna. 'Ogeenali ma o Ishakoli wihunata awi ngoa'a o Yakub. Aha de o Yakub wo'ihunata awi ngoa'a yamogio'o de modidi nage yodadi to ngone o Yahudio'a nanga edete de nanga dotumu.9Naga nanga edete de nanga dotumo'a goona womatengo awi ronga o Yusuf. Una awi lia-lia'a yobu'u hiadono ona wiwu'unu wodadi o gilaongo o Mesiro'a. Ma ma Jou ma Dutu 'a wimada'awa,10ho wihipidili o hangihara 'iini-ini'o'a. De ma Jou ma Dutu widiai wobarija ma oraha wa'ai'a o Firauni'a o Mesiro'a manga 'oana, ho o Firaun wihibohono una'a, hiadono una wigoa'a wodadi baluhu o Mesiro'a ma tona'o'a de o Firaun awi 'adato'a.11Geena'a de idadi o baulaco ma amo'o, moi-moi o Mesir de Kanaano'a ma tona'o'a ho duru yohangihara. Nanga edete de nanga dotumu o Kanaano'a 'ayomadama'ewau o inomo.12Ho nage o Yakub woihene o Mesiro'a o inomo demaena, de wo'ihulo'o awi ngoa-ngoa'a nage to ngone nanga edete de nanga dotumu yotagi do'ai'a aha ma didihila'a.13Nage ona ya'ai'a yogilio ma modidi'a, de o Yusuf wo'ihingahu awi riadodoti'a na'o una geena o Yusuf. Geenau ma oraha aha de o Mesiro'a manga 'oana wana'o mangale o Yusuf awi nyawa-nyawa.14Geena'a de o Yusuf wobehehongo la ma dea o Yakub de awi riadodoto la yomatooa'inou o Mesirino. Ona moi-moi yamoritumudingi de motoa'a.15Ho o Yakub womatooa'a o Mesiri'a. Geena'a de wohonenge geena'a, 'ogeenali ma de to ngone nanga edete de nanga dotumu.16De manga honenge yohigilio o Sikhemi'a o Kanaan ma tona'o'a. Ona yo'ipoohu'u o tona'o'a nage o Abraham wagoo-goo'ino o Hemor awi guti'u de o pipi o hala'a o ngai muluo naga.17Nage ma oraha hali'i yaadonou ma Jou ma Dutu awi jaji o Abrahami'a wohitotomo, to ngone nanga nyawa o Mesiro'a 'ayolepe monga yodogo.18De aha ma oana womatengo wopareta o Mesiro'a una awana'owa mangale o Yusuf.19Ma oana guuna 'ika de wo'ida'angelu'u de wo'ido'o-do'o to ngone nanga edete de nanga dotomi'a. Una wo'ipa'iha manga ngoa'a ma giau aha yomaboa'u ya'o'iumo la ihonenge.20Geenau ma oraha, de o Musa womaboa. Una o ngoa'a ma giau duru awi rahai ma Jou ma Dutu awi biono'a. O mede haangeno una awi baluhu wipaliara manga woa'a.21Geena'a de wiumo, ma o Firaun awi ngoa'a o ngewe'a miehe ho mipaliara midiai harage de to muna ami ngoa'a ma dutu.22O Mesiro'a manga do-doto'o moi-moi wihi'o'idoto'o, ho una o nyawa nage awi 'umati duru ma amo'o awi demo'a de awi 'arajaanga.23Ma oraha o Musa awi taunu morihoata, de womau wotagi wo'igelelo awi riadodoti'a geenala o Israelo'a ma nyawa.24De wima'e o Mesir ma nyawa wihangihara o Israel ma nyawa'a womatengo, ho o Musa wihiboa ho witooma o Mesir ma nyawa guuna.25O Musa wote bali awi riadodoto aha yomangariti na'o una ma Jou ma Dutu wipa'e mangale wo'ihipidili la 'ayogilaonguwau. Ma ona 'ayomangaritiwa.26Ma dewelano, o Musa wo'ima'eli o Israel ma nyawa yamididi yoma'apoha. Geena'a de una womau wo'ihi'adame wotemo, <E, dodoau ho nima'apoha? Ngini neena 'a o riadodoto to!>27Ma nage wopoha-poha womatengo awi didiai ihala-hala awi manai'a, o Musa'a witila de wotemo, <Ee! Nagoonau nigoa'ie nodadi baluhu de nodadi to ngomi mia ha'imi?28E'ola nomau Ngoi ma nomau noitooma harage de nowitooma o Mesir ma nyawa 'augoni'a ge?>29Ma oraha o Musa woihene o 'iau nage ge o nyawa guuna wotemo, de una o Mesiro'a de woloa o Midian ma daera'a, de do'a womanoa wowangango harage de yoboa-boano. Geena'a do'a una womodo'a ho awi ngoa'a o naulu yamididi.30Geena'a de o taunu morihoata, de o malai'ata moi 'imahimaiti o Musa'a o tona'a 'i'a-'a'aha'a o Sinai ma de'uo'a ma date'o'a. O malai'ata geena 'iboa o u'u ma to'a-to'ara ma doda'a. O u'u geena o ubutu 'ihi-hihi'ano ihupu.31O Musa woheranga wama'e geena, ho wa'ai'a womahidutu'i'a monga mangale womau wana'o o'iau geena. Geena'a de woihene ma Jou Awi ilingi wotemo,32<Ngoi neena ma Jou ma Dutu, ani edete de ani dotumu o Abraham de o Ishak de o Yakub Ihuba-huba.> O Musa wohawana woto-towoworo ho 'awomooinuwau womataila'oli geena'a.33Geenaa'a de ma Jou wotemoli, <Nataai'i'a ani tarupa hababu o tona'a nage ngona nomahigo'o-go'ode geena 'iofi hababu de Ngoio'a neena'a.34Igou-goungu Ngoi to'ige-gelelo'au 'ai 'awaha o Mesir ma tona'o'a, nage manga wowango duru 'ihangihara. De toiheno'au yomahigaho'o, ho tau'u de to'ihihupu o Mesir ma tona'ino. Ho neena nainou, Ngoi tonihulo'o nima'ilio o Mesir ma tona'i'a.>35O Musa nuunau nage ma hila o Israel ma nyawa 'awidomote'uwa de yotemo onane, <Nagoonau nigoa'ie nodadi to ngomi mia baluhu de mia ha'imi?> Ma ngaro 'ogeena ma, unau geena ma Jou ma Dutu wihulo'o la wodadi baluhu de wo'ihihalamata, ma nge'omo Awi malai'ata nage imahimaiti o Musa'a o ubutu 'ihi-hihi'a'a geena.36O Musau guuna wo'ihibaluhu o Israelo'a yohupu o Mesiro'a, de wodiai o haa-haala 'ihera-heranga de o dudunguu nage 'abiahawa o Mesiro'a, o Ngooto 'Ite-terebo'o'a, de o tona'a 'i'a-'a'aha'a ma daao o taunu moruatino.37O Musau nuuna ma wotemo o Israel ma nyawa'a, <Ma Jou ma Dutu aha niwi'ula o nabi moi nage woili'i naga nginio'a, harage Una woiili'i ngoi!>38O Musau nuuna nage naga o Israelo'a manga hidogorona'a o tona'a 'i'a-'a'aha'a, una ge o malai'ata ma hila 'itemo'au una'a o Sinai ma de'uo'a, ho una ma wohingahu nanga edete de nanga dotumi'a. Unau guuna wadawongo de wohingahu ngoneno o behehongo nage ina'ula o wowango.39Ngaro 'ogeena ma to ngone nanga edete de nanga dotumu 'a wohingounua. Ona 'awidawongua de manga hininga'a yomau yolio o Mesiri'a.40Ona yotemo o Haruni'a, <Nimidiaiou o pato-patongo nage idadi miahuba, la geenau mihibaluhu. Hababu ngomi 'amihina'owau o'iau idadi o Musa'a nage mihibaluhu miohihupu o Mesirino!>41Geena'a de yodiai o patongo moi harage de o hapi ma ngoa'a, de yo'ula manga huhuba aha de yodiai o rame mangale o patongo nage ona mahirete yadiai'u'au.42Ho ma Jou ma Dutu wo'idaali'awau de 'a wo'idumada'a yohuba o ma-mamanga o diwango'a. Geena 'ima'adaene harage de naga ihitulihu'u o nabi-nabi manga bo'uo'a onane:<Ee, Israel ma nyawa!Ngini niatoa'a o 'aewani de niohihuba ma daao hiadono o taunu moruatino o tona'a 'i'a-'a'aha'a geena ma dumutu 'a Ngoinowa niohuba.43Nia gomanga o Mulokh ma woa geena niaha-aha,niohida-daaha de nia gomanga o patongo harage de o mamanga geena la o Refan.Geenau niadiai'u mangale niahuba.Mangale geena Ngoi aha tiniumo o ngii 'i'a-'a'uli'a do'a o Babel ma Daera'a.>44O woa-woa nage ma Jou ma Dutu woboa-boa o nyawano ma ngii, nage tongone nanga edete de nanga dotumu yaaha-aha o tona'a 'i'a-'a'aha'a, o woa-woa geena yodiai 'imote'e ma jou ma Dutu awi pareta o Musa'a. De 'imote'e ma dulada nage ma Jou ma Dutu wohidumuto'au o Musa'a.45Geena'a de o woa-woa geena nanga edete de nanga dotumu yaahali ma oraha ona de o Yosua yotagi yaehe o daera'a nage ngone pomanoa-noa'a. Ona yaehe o nyawa ma homoa manga giama ma hoato'a, nage ma Jou ma Dutu wo'igini'i nanga edete de nanga dotumu manga biono'a. O woa-woa geena, geena'a dau hiadono o Dautu wopareta.46O Dautu ma Jou ma Dutu awi hininga wahananga. De una wogaaho'o ma Jou ma Dutu'a la wihigumada o woa-woa moi wohigo'o, mangale to ma Jou ma Dutu nage o Yakub wi huba-huba.47Ma 'a o Salomo wodiai ma woa geena, mangale to ma Jou ma Dutu.48Duga ma Jou ma Dutu Wo'a-'a'ulie 'awomanoawa o woa'a nage o nyawa yodi-diai'u, harage naga o nabi manga bo'uo'a ihituliho'au onane:49Ma Jou ma Dutu wotemo,<O diwanga geena 'ai go-gogele 'imu-mulia,de o dunia geena 'ai dou ma ba-bangini.O woa o'ia nage idadi nidiai tomanoa?'A'oiwa o ngii nage yadaene tomahiaini.50Hababu, moi-moi nage naga o dunia'a neena, Ngoi tadiai'u!> >>51De o Stefanus wotemoli o Yahudio'a ma balu-baluhu, <<Riadodoto cara niapihio'a, de 'anioolu'u niwina'o ma Jou ma Dutu'a. Nimapongo'au ma Jou ma Dutu awi demo'a! Ngini harage de nia edete de nia dotumu nage 'aitauri'a nialawana o Omaha 'Iofi-ofi.52Bee'a niotemono, o nabi naguunau nage nia edete de nia dotumu 'ayo'ihangiharawa? Nia edete de nia dotumu goona yo'itooma o nabi-nabi nage yohingahu na'o o Yesus, guuna o nyawa wotitiai, done aha woboa. Una woboa'au de neena naga niwihigiama ma hoato'au de niwitooma'au.53O ma-malai'ata 'i'ula'au ngini'a o ma Jou ma Dutu awi Hu'umu, ma 'aniodinii'uwa.>>54Ma oraha Agama'a ma Ha'imi goona yoiheno'au nage o Stefanus womaade-ade moi-moi geena, de yomahiehe mangale ho manga dootaha irama.55Ma o Stefanus o Omaha 'Iofi-ofi wiparetano, womatawagade o diwangie de wama'ede ma Jou ma Dutu awi daranga de o Yesus womahigo'ode o ngiio'a nage 'iho-horomatio'a ma Jou ma Dutu awi guidao'a.56O Stefanus wotemo, <<Wae niagelelohi! O horoga 'ipelenga de towima'e o Nyawa ma Ngoa'a womahigo'ode ma Jou ma Dutu awi guidao'a!>>57De yoha'i-ha'imi goona manga ngau'u yatamunu de yoore-orehe, de 'awidigila-gila wididiwa.58Ona wihihupu'a o bendara ma duduni'a, aha de wiheleo. O nyawa yoha-ha'ihi goona manga baju i'a-'a'ulu'u yanoa'u o doguuluo'a wi ronga o Saulus.59O Stefanus wiheleo ma gigiria'a, de womahigaho'o womahaubayanga, <<Jou Yesus 'ai 'omaha nadawongo!60Geena'a de watilabu'u'u de womaorehe wa'ua-'uatie, Jou o baradoha neena uwa no'ihidaene ona'u!>> 'A 'ogeena wotemo de wohongeno'au.
The Seed Company