O Hu-hulo'o6
1Wa'utu geena de 'ayolepe monga yonga'u-nga'u o Yesusi'a, Ona moi-moi o Yahudio'a ma nyawa. Ma oraha geena o Yahudio'a nage yopa'e-pa'e o Yunani ma demo 'ayoma'ahanaanguwau de o Yahudio'a nage yapa'e-pa'e o Ibrani ma demo. Ma o Yahudio'a nage yapa'e-pa'e o Yunanio'a ma demo goona yotemo, <<To ngomi mia nge-ngewe'a nage yomaba-babaono goona 'ayadaenua manga do'u nage yo'ihiduhunu manga paraluu o wange 'ihinoimi.>>2Mangale geenau ho o hu-hulo'o yamogio'o de modidi goona, yo'itoomuno o nyawa-nyawa nage yonga'u-nga'u de yotemo ona'a, <<Airahaiwa na'o ngomi mimatogumu mihingahu ma Jou ma Dutu awi Demo ma hababu 'a o inomo miauruhu.3Ho riadodoto, 'iholoi yaowa nio'iili'i yatumudiingi naga nginio'a nage manga ronga yaowa-owa de o Omaha 'Iofi-ofi yo'iparetano de yoba-barija, nage idadio'au mio'ihiarajaanga ma ngale yagagao o 'arajaanga geena.4La ngomi mia idadi miopeleeha mimadahaubayanga de mihihabari ma Jou ma Dutu awi demo.>>5Ona moi-moi yohimote'e o hu-hulo'o manga demo geena. Geena'a de yo'ili'i o Stefanus, una awi ngo-nga'u i'uata o Yesusi'a de o Omaha 'Iofi-ofi wiparetano. De o Filipus, o Prokhorus, o Nikanor, o Timon, o Parmenas de o Nikolaus o Antiokhia ma nyawa. O Nikolaus una 'a o Yahudio'awa ma nyawa, ma woohama'au o Yahudio'a manga agama'a.6Yatumudiingi goona yo'iaha o hu-hulo'i'a, geena'a de o hu-hulo'o yohaubayanga de manga giama yo'idatami yo'idagaaho'o ma Jou awi bara'ati.7O Habari ma Owa ma Jou ma Dutuno 'ogeenau itagi monga, de yonga'u-nga'u o Yerusalemo'a yodogo yolepe monga. De manga lepeli ma o 'imam-'imam yonga'u o Yesusi'a.8Ma Jou ma Dutu wo'ula o 'uaha 'ao lepe o Stefanusi'a, hiadono wodiai 'a olepe o haala 'ihera-heranga de o du-dunguu 'ila-laagomo o 'awaha manga biono'a.9Ma naga munu'a wiributu; ona geena o Dodoomu ma Woa ma dutu gee yohironga 'ayogi-gilaonguwau manga Do-doomu ma Woa'a. Ma Do-doomu ma Woa ma dutu ona geena o Yahudio'a ma nyawa o Kireneno de o Aleksandriano. Ona de o Yahudi ma nyawa o Kilikiano de o Asiano, yoma'aributu de o Stefanus.10Ma ona 'ayaa'unuwa yalawana o'iau naga gee o Stefanus wotemo, hababu o Omaha 'Iofi-ofi wi'ula'a o barija ma ngale womaade-ade.11Geenau ho ona yohibongonino yo'ula o pipi o nyawa'a yamuluo naga la yohidemo na'o, <<Ngomi mioihene o nyawa guuna wohohedu o Musa de ma Jou ma Dutu'a!>>12'Ogeenau ona yohihau-hau'u o nyawa-nyawa'a, de o Yahudio'a ma balu-baluhi'a, de o agama'a yodoto-doto'i'a ma. Geena'a de ona moi-moi witago'o o Stefanus ho wiaha wihitaali manga Agama'a ma Ha'imi'a.13De ma ha'ihii ma yo'ihano, ho o Stefanus wi'adengelu'u. Ona yotemo, <<O nyawa nuuna 'aitauri'a wohohedu ma Jou ma Dutu awi Woa 'Iofi-ofi, de wohohedu de o Musa awi Hu'umu.14Hababu ngomi mioiheno'au una womaade-ade na'o; O Yesus o Nazaretino aha wahoroma ma Jou ma Dutu awi Woa. Una ma wotemo na'o o Yesus guuna aha waaliti nanga adata nage o Musa wo'ula'au ngoneno!>>15O nyawa moi-moi nage yoboa-boano geena o Agama'a ma Ha'imi ma dodoomuo'a, ige-gelelo o Stefanusi'a, de o Stefanus awi biono yama'e'a 'iletongo harage de o malai'ata ma biono.
The Seed Company