O Hu-hulo'o27
1Geena'a de yaputuho'au, na'o ngomi halingou miohidete o Italia ma daera'a, de o Paulus de o nyawa nage yobui-bui'a maregu yamuluo naga yo'ihigiama ma hoata o Roma manga hurudado ma baluhi'a womatengo awi ronga o Yulius. Una geena o hurudado o bolu moino nage ma ronga, <<Ma Kaisar awi Hurudado.>>2Ngomi miobalene o 'apade nage aha iboa o Andramitiumino, geena'a de miotagi de ma 'apa geena nage 'itagiou 'itulu-tulu o ba-baleni'a o Asia ma daera'a. O Aristarkhus, o Makedonia ma nyawa, o Tesalonika ma bendarino woboa, wohidete de de ngomi.3Ma dewelano ngomi miotulu o Sidono'a, o Yulius wiaha wihidi-diai o Paulusi'a. Una wihigumada o Paulus wai'a awi ma-manai'a la ona idadi yo'ula o'ia naga awi paraluu.4Geena'a de ngomi mihigila-gilali miohidete, ma o rato mia bioniha ho miogila-gila miaboa o Siprus ma nuuhiha nage 'oyadaenuwa o rato.5Geena'a de miatoa'a o ngooto nage ima'adaali de o Kilikia de o Pamfilia ma daera'a ho miotota o Mira ma bendari'a o Likia ma daera'a.6Geena'a de o Yulius ma hurudado ma baluhu guuna wama'e o 'apa moi o Aleksandriano ihidetou o Italia'a, ho wohulo'o moi-moi miomangali ma 'apade geena de aha miohidetoli.7O wange muluono naga miohidete, ma ma 'apa geena itagi duru 'a ihime-meneoho hababu o rato miodaali. Miohidete mamuhangihara, hiadono o Knidus ma bendara ma biono'a miadono. Geena'a 'a iratohi, ho mimapa'iha miohidotobi'i o Salmone ma doto o Kreta ma nuuhi'a la uwa o rato imidaene.8Ho miohidete miani'i o doto geena, duru miohangihara! Iduangino de, mimahiadono o ngii moi'a, ma ronga o Ba-balene Ira-rahai. Ma ba-balene geena ima'adate'e de o Lasea ma bendara.9Ngomi mia oraha ma amo'ou miohigu-guule, hiadono ma oraha geena o Yahudio'a Yoma'adame ma Wange ma Amo'o iduango'au. Ma wa'utu geena o mo'u-mo'u de o loo'o ma orahu'u, ho miohidete 'a ihanaangua. Hababu geena o Paulus wo'ihitiari onane,10<<Riadodoto, ngoi tamao'u na'o pohigila-gila pohidete geena poboditou. Ngone aha porugi ma amo'o, done ma 'apa ilutu de ma gina ma 'iihanga, de done ngone ma po'o'ihonenge.>>11Duga o Yulius ma hurudado ma baluhu guuna, 'awohigihenua o'iau nage o Paulus awi ade-ade; una iholoi wo'inga'u o 'apa woaha-aha de o 'apa ma dutu'a.12O ba-balene geena'a igou-goungu itiiha na'o o loo'o de o rato ma orahu'u geena, ho 'aidadiwa itaao yomatapu. Hababu geena o 'apa'a yo'a-'arajanga manga lepe yohimode'e yohidetoli yamada ma ba-balene geena, hababu yomau yomatapu o Feniks ba-baleno'a wa'utu o loo'o ma orahu'u, ho yomaduhunu. O Feniks geena ma o Kreta ma nuuho'a, de ma ba-balene geena o rato hali'i 'ayadaenuwa hababu itaali o orehara de o wange ma dumunu ma hidogorona'a de o 'oremie de o wange ma dumunu ma hidogorona'a.13Ma oraha geena o dado'o o 'orehara 'aihime-meneoho. Ho o 'apa'a yo'a-'arajanga ona yotemo idadio'au yohidetoli. Ho manga tapu yagoa'a de yohidete yanii'i o Kreta ma nuuhu.14Ma 'itaaowa de 'irato o dudungo'a de yao'o nage yohironga, <<O wange ma hiwa'o de o oremie ma hidogorona'a ma dado'o>>15de mia 'apa'o yadaene. Hababu 'idadiwa o dado'o miadaali, ho 'amiohimote'e mia 'apa o dado'o yaaha.16Ngomi mimahidutulu'u ma ube, geena nage miaboa o Kauda ma nuuhu ma ete'o'a 'oreharade 'idadu. Geena'a ngomi ma hangihara'a miatoba'a mia ngootili nage miaaha-aha o 'apa'a.17Ma ngootili geena o 'apade miohidoa, ma 'apa geena ihi'uata 'aoguminou ihirangi ihigilolito'a. De yohidodato o 'apa itirii 'ioa-oahu'u nage ma ronga o Sirtis, ho ma 'apa ma hidete yohiguti de 'ayohidipidili'a ma 'apa o dado'o yanii-nii'i.18Duru 'imidarato, ho ma de-dewelano o 'apa ma gina yaumo o ngootu'u.19O wange modidi ipahano, o nyawa-nyawa o 'apa'a ma hirete yaumo o 'apa ma pa'a-'aha.20Ma daao o wange muluono naga o wange de o mamanga miama'ewa, de o rato 'aiogorua. Ho miomanganonuwau.21O wange muluo nagau, moi-moi o nyawa o 'apa'a geena 'a yoodomua. Mangale geena, o Paulus womagoa'ie o nyawa-nyawa manga hidogorona'a o 'apa'a geena de wotemo, <<Riadodoto, na'o ma moi'u nihigihene la uwa pohidete o Kreta ma nuuhino, oneena o huha 'a paohanua de 'a porugiwa harage de oneena.22Duga pohuha'au oneena ma, ngoi togaaho'o ngini'a, nia hininga nia'uatu'u de uwa niohawana, hababu ngone 'amoiwa done pohonenge, duga nanga 'apa neena done 'ihoroma.23Ngoi tana'o o'iau nage aha idadi ngoneno, hababu ma Jou ma Dutu nage towihuba-huba de nage wo'uaha 'ai wowango'a wohingahuo'au ngoino. Awutu'a awi malai'ata iboa imahigo'ono 'ai date'o'a.24O malai'ata geena itemo onane, <Paulus, uwa nohawana! Ngona maraio'au aha notaali o Roma'a ma Kaisari'a la wauruhu ani haala. De mangale ma Jou ma Dutu awi hininga ma rahai ngona'a, ho ngona de o nyawa moi-moi o 'apa'a neena 'anioboditowa.>25Ho riadodoto, nia hininga nia'uatu'u, hababu ngoi tonga'u, moi-moi nage ma Jou ma Dutu wohingahu-ngahu ngoino geena, maraio'au idadi.26Ngone 'apohonenguwa, ma ngone aha potirii o nuuhu moi'a.>>27Mia wutu mogioo de hoata 'a mioahi-ahini o Adria ma ngooto'a. Poelua o wutu 'i'oronano de ma 'apa'a yo'a-'arajanga yamao o 'apa ihorio'au o dudungiha.28Ho o heleo yahia mangale yatuga ma ngooto ma lu'u. Ma ngooto geena ma lu'u poelua o metere moruatu'u. Itaaowa de yatugali ena poelua 'a o metere moruange'u'ahi.29Ona yododato manga 'apa itirii o heleo'u, ho manga tapu o ngai hoata yaumo ma 'apa ma dudunu'u. De manga hininga'a tanu itaiti i'inita.30O 'apa'a yo'a-'arajanga yomaduhunu yomau yoloa yamada ma 'apa'a geena. Ona yohiguti manga ngotili 'iete-ete'e, bali yomau o tapu yaumo ma 'apa ma bionu'u.31Duga o Paulus wana'o-na'o, de wogila-gila wohingahu o hurudado manga baluhi'a guuna de o hu-hurudado munu'a'a, <<Na'o ma 'apa'a yo'a-'arajaanga yamada'au ma 'apa neena, ngini moi-moi neena 'aniohalamatua.>>32Yoihene 'ogeena, de o hu-hurudado goona yodigila-gila yatoa'a o ngootili 'iete-ete'e ma lili'o geena ho 'iahino'au.33'I'initau de o Paulus wo'ibaja ona'a moi-moi o 'apa'a la yoodomo. Una wotemo ona'a, <<O wange mogio'o de hoatou neena ngini moi-moi nioodomua, hababu 'anioda-damaau de 'aniohidiliili'a.34Ho totemo ngini'a 'iholoi yaowa nioodomohi, la nio'uatoli. Ngini moi-moi aha niohalamata, de 'ao 'ia-'iawa idadi ngini'a.> >>35Iduangino wotemo 'ogeena, o Paulus waehe o roti de wotemo 'amaowa'a ma Jou ma Dutude manga biono'a. O roti wo'ihi-'ado'u de aha una ihila woodomo.36Ho ona ma manga hininga 'i'uato'ali de ona ma yoodomo.37Ngomi moi-moi o 'apa'a geena miratuhu modidi de moritumudingi de butanga.38Ma oraha moi-moi yo'ipunuho'au, o nyawa-nyawa o 'apa'a goona o gina nage o gandumu yaumo ngootu'u la o 'apa geena i'ualenge.39Nage 'inita'au, de yo'a-'arajaanga o 'apa'a yama'e o dudungu, ma 'ayohi'ana'owa o dudungu o 'iau geena. De yama'e o gorua moi de dowongio'a ho manga hininga'a na'o idadi manga 'apa yohidutu'u geena'a.40Ho manga tapu moi-moi ma gumini ya'o'itoa'a de manga tapu geena 'ayamada'au dau o ngooto ma doda'a. De ya'o'ipidili o gumini nage ma ulini'a ihi'apuhu-puhui'a. Geena'a de ma hidete yohidoa ma 'apa ma biono'a la o dado'o yaaha ma 'apa geena ihi'aiha o 'ahaneha.41Duga 'ayomahiadonuahi o dudungiha ena ma 'apa 'itiriio'au o pahio'a ho ma bioniha 'ai'eluwau, ena ma duduno'a 'ihoroma'u'au hababu o mo'u-mo'u i'ua-'uata yapo'a ho.42Ma hurudado o 'apa'a nage, yomau yo'itoomau o bui ma nyawa'a moi-moi, hababu yododato uwa hiadono munu'a yomahoo o dudungiha de yoloa'au.43Duga o Yulius ma hurudado ma baluhu guuna 'awo'ihigumadawa hababu una womau o Paulus uwa witooma. Una wohulo'o nage yana'o-na'o yomahoo yohila yomatebulu de yomahoo yohi'aiha o dudungiha,44de munu'ali nage halingou yotuulu o 'apa ma papa-papana e'ola o 'apa ma bela-bela'a yomahihoo. Ma nge'omo geenau ho ngomi moi-moi 'amiododoawa hiadono miotota o dudungiha.
The Seed Company