O Hu-hulo'o26
1Ma 'oana o Agripa wotemo o Paulusi'a <<Ngona nimihigumada nomaade-ade ma ngale nomadapaluhu.>> Ho o Paulus awi giama wagoa'a mangale womaade-ade de womulaenge womadapaluhu onane,2<<Tabea ma 'oana Agripa! Ngoi duru togarago hababu neena ma wange idadi tomadapaluhu ani biono'a mangale moi-moi nage o Yahudio'a 'itae.3De iholoioli togarago hababu ngona nohi'ana'o ma gou-goungu o Yahudio'a mia adata de ma 'iau hona moi-moi nage imadadi o haala. Hababu geena togaaho'o ngona'a Aba, tanu nohigihenohi 'ai ade-ade.4O Yahudio'a ma nyawa moi-moi 'ayana'o tongoi 'ai wowango ma hila 'atomadoguulunohi. Hababu 'a todoguulunohi ena tomanoa'au o Yerusalemo'a, 'ai nyawa-nyawa o Yahudio'a manga hidogorona'a.5Ma daaou 'i'o'ina'o'au, de na'o yomode'e de idadi yohiha'ihii na'o 'amahilahi ngoi neena o Farisio'a de todinii'i mia agama ma atoranga i'ua-'uata moi-moi.6De neena ngoi tomahigo'ono neena'a mangale niuruhu hababu tongano-nganono ma Jou ma Dutu aha wohitotomo awi jaji mia edete de mia dotumi'a.7O jaji geenau o Israelo'a o suku mogio'o de modidi yongano-nganono ho o wutu de o wange miwihuba ma Jou ma Dutu'a de mia hininga ma ngodumu. De ma hababu o jaji geenau tongano-nganono Aba, ho o Yahudio'a ihihala.8De idodoau ho ngini o Yahudio'a nionga'uwa na'o ma Jou ma Dutu idadi wo'ihimomi'oli o nyawa yohone-honengo'au?9Ma hila geena ngoi ma 'ai di-dibanga halingou tadiai 'iini-ini'o'a, mangale to'ilawana o nyawa-nyawa nage yohiade-ade mangale o Yesus o Nazaretino nage.10De 'ogeenau ngoi tadiaio'au o Yerusalemuo'a. De o hurata o imam ma hae-hae'ino, manga lepe o nyawa nage yodadio'au ma Jou ma Dutu awi 'awaha goona to'ihiohama o bui'a. De ngoi ma tohimode'e yo'ihu'umu yo'iho-honenge.11Manga lepe to'ihangihara o Yahudio'a manga do-doomu ma woa-woa'a, mangale to'ipa'iha la yahohedu o Yesus awi ronga. 'Ai dootaha 'irama ona'a hiadono o bendara ma homoa'a ma to'idingi'a.>>12O Paulus wotemoli onane, <<Ma dumutu 'ogeenali ma, ngoi taaha o hurata 'uaha o imam ma hae-hae'ino de totagi o Damsyik ma bendaru'u.13De nage ngoi o nge'omo ma gorona'a o wange i'orona'au, Aba ma 'Oana, ngoi tama'e o daraanga da'u o diwangu'u nage iholoiohi o 'ita-taraanga de o wange ma hiwa. O daraanga geena 'imihigilolitino ngoi de o nyawa nage inii-nii'i.14Ngomi moi-moi mio'o'iluba o tona'u'u. Geenaa de toihene o 'ilingi 'iade-ade ngoino de o Ibranio'a ma demo, <Saulus, Saulus! Dodooau ho noihangihara? Ngona ma hirete aha nomadamao 'ao hau'u, na'o 'anomatogumua nolawana 'Ai 'uaha.>15Ho ngoi totemo, <Aba, Ngona nagoonau ho?> De o ilingi geena 'itemo, <Ngoi neena o Yesus nage noiha-hangihara.16Nomagoa'ie! Ngoi tomahimaiti ngona'a hababu tomau tonigoa'a nodadi tongoi 'ai gilaongo de 'ai ha'ihi. Ngona halingou no'ihingahu o'iau naga ge nama'e'au neena ma wange mangale Ngoi, de o'iau naga ge aha tonihimaiti o oraha nanga bioni'a.17Ngoi aha toniduhunu tonihipidili o Yahudi ma nyawa'a de 'a o Yahudio'awa manga hininga ma diihano. Ngoi aha tonihulo'o notagi ona'a18la manga la'o napelenga, la yohupu o daluho'a de yoohama o darangi'a la yo'ihipidili o To'ata ma 'Oana ma paretano, de ma Jou ma Dutu wo'ipareta. Ho de yonga'u ngoino, manga baradoha aha ma Jou ma Dutu waapongo de ona aha yama'e o'iau nage ihitatapuo'au mangale o nyawa nage yodadi ma Jou ma Dutu awi 'awaha.> >>19O Paulus wotemoli ma 'oani'a, <<Hababu geena aba ma 'oana Agripa, ngoi tomatogumua tohingounu o'iau naga nage tama'e'au o ma-ma'e ma Jou ma Dutuno.20Ngoi tohingahu ma didihila'a o Yahudi ma nyawa-nyawa'a o Damsyiko'a na'o, halingou yotoba o baradoha yodiai de yoma'ilio ma Jou ma Dutu'a de halingou yodiai yaowa-owa mangale 'ihimaiti na'o igou-goungu yotoba'au. Geena'a de aha ngoi ma tohingahu o haala geena o Yahudio'a ma nyawa'a o Yerusalemo'a, hiadono o Yudea ma daera'a de ngoi tohingahuoli o Yahudio'awa ma nyawa'a.21Geenau ho o Yahudio'a ma nyawa 'itago'o ma Jou ma Dutu awi Woa'a de yomau 'itoomau.22Ma hiadono neena ma Jou ma Dutu Woiduhunu, ho neena tomahigo'ode neena'a mangale tohiha'ihi ngini'a moi-moi o nyawa yola-laagomo de o nyawa biaha'a. O'iau naga nage tohiade-ade neena geenala 'aimatero de ma nabi Musa de ma nabi-nabi ma regu nage yohingahuo'au ma didihila'a.23Geenala ma 'Oana o Nyawa Wohiha-halamata nage ma Jou ma Dutu wohijajio'au nage halingou wohangihara de wohongene, ma Una guuna aha ihila wowangoli o honengino la una idadi wohingahu o habari ma owa o Yahudio'a ma nyawa'a de o Yahudio'awa ma nyawa'a la ona idadi yohalamata. Geena harage de Wo'ula o daranga manga hininga'a.>>24Wa'utu o Paulus womaade-adehi mangale womadapaluhu, de o Festus wibaranata, <<Paulus, nitogohango'au marai e! Ani do-doto'o ilepeli hiadono nohitogohango'au!>>25Ma o Paulus wopaluhu, <<Aba gubernur Festus toniho-horomati. Ngoi 'a itogohangua. O ade-ade nage tohihupuo'au geena ma goungu itiai de ihupu 'ai di-dibanga ma owano.26Ma 'oana o Agripa ma hirete ma wana'o moi-moi nage tohiade-ade, Ho ngoi tomooini tomaade-ade tohito-tobioni'a awi biono'a. Ngoi tana'o moi-moi geena 'oiwa moi 'awana'owahi, hababu geena moi-moi idadi o nyawa yolepe-lepe manga biono'a.>>27O Paulus wotemoli ma 'oani'a, <<Aba ma 'oana Agripa, bote nonga'u o'iau naga ge ma nabi yohiade-ade'au? Ngoi tana'o ngona nonga'u Aba!>>28Geena'a de o Agripa wotemo o Paulusi'a, <<Notemo 'aigapanga? Noiharani ma oraha mamujapati oneena? >>29O Paulus wopaluhu, <<Ma oraha 'ijapati e'ola itaao, ngoi aha tohaubayanga la ngona aba de ngini moi-moi nage nioboa-boano neena'a niohigihene 'ai demo nage, tanu niodadi harage de ngoioli, ma ngini uwa nili'o harage de ngoi ili'o'a neena!>>30Ho 'ageena ma oraha de ma 'oana, de ma gubernur, de ongo Bernike, de moi-moi nage geena'a yomagoa'o'au.31Nage yohupu'a de yoma'atemo moi de moi, <<O nyawa nuuna 'oiwa wadiai nage yadaene powihu'umu powiho-hongene e'ola powibui.>>32Geena'a de o ma 'oana o Agripa wotemo ma gubernur Festusi'a, <<O nyawa nuuna ngaro 'apowipidili'au, na'o la awogaaho'uwa awi haala geena ma Kaisar wauruhu.>>
The Seed Company