O Hu-hulo'o23
1O Paulus wo'ige-gelelo o Agama ma ha'imi'a de wotemo, <<Riadodoto! Hiadono o wange neena, ngoi tatapu towango yaowa hiadono tamao 'ai hingina 'aibe-berehi ma Jou ma Dutu Awi biono'a.>>2Wa'utu o Paulus wotemo o geena, de ma Imam ma Amo'o o Ananias wo'ihulo'o o nyawa'a nage o Paulus awi dateo'a womahigo'ono, wapo'a o Paulus awi ulu'o.3Ho o Paulus wotemo ma Imam ma Amo'i'a, <<Maraio'au aha ma Jou ma Dutu nowipo'a, ngona notabaelu'u nomadiai harage de o nyawa ma owa! Geena'a no'iuruhu 'imote'e ma Jou ma Dutu Awi hu'umu nage o Musa wohingahuo'au, ena momongo ngona ma hirete nohulo'o o nyawa 'ipo'a. Geena ma mangariti napaleno'au o hu'umu geena!>>4O nyawa -nyawa nage de o Paulus yoma'adate-date'u'u yotemo, <<Cara 'animooino'a ma Jou ma Dutu awi Imam ma Amo'i'a de nowihohedu.>>5O Paulus wopaluhu, <<Ee riadodoto, ngoi 'atana'owa na'o una geena o Imam ma Amo'o. Igoungu o Bo'u ibe-berehio'a naga ihituliho'au onane: <Uwa nio'ihohedu niabalu-baluhu!> >>6O Paulus wana'o ma Agama'a ma Ha'imi goona munu'a o Sadukio'a de munu'a o Farisio'a. Ho wotemo waamo-amo'ie ona'a, <<Ria dodoto! Ngoi neena o Farisio'a, hababu 'ai baluhu ma o Farisio'a. Ngini niuruhu ngoi neena'a hababu ngoi tonganono maraio'au o nyawa yohone-honengo'au aha yowangoli.>>7Nage una 'ogeena wotemo, de ma Farisio'a de o Sadukio'a yoma'aributu ho manga do-doomu geena idadi o bolu modidio'au.8Hababu o Sadukio'a yotemo bali na'o o nyawa yohonengo'au geena 'ayomomi'uau, de yotemo bali o malai'ata de o Omaha ma a'oiwa, ma o Farisio'a yonga'u moi-moi geena de maena.9Hiadono 'iholoioli yoma'aributu. Ho o Farisio'a nage o agama'a yodoto-doto'o yamuluo naga yomagoa'ie de duru yoma'aributu. Ona yotemo, <<Imote'e ngomi, o nyawa nuuna awi hala 'amaube ma 'a'oiwa! Poelua igou-goungu o omaha e'ola malai'ata 'iade-ade una'a!>>10Iduangino yomaade-ade 'ogeena, de 'iholoioli yoma'angamo ho o Roma'a manga hurudado manga baluhu ma amo'o guuna wohawana uwa hiadono o Paulusi'a wi'agoora ho wohonenge. Ho wohulo'o awi hurudado yai'a o Paulus wiehe nage o nyawa yolepe-lepe'a de wiaha o hurudado manga ngii'a.11Ma wutu'u, de ma Jou Yesus womahigo'ono o Paulus awi date'o'a de Wotemo, <<Ani hininga na'ua-'uata! Ngona nohiha'ihio'au mangale Ngoi o Yerusalem ma bendaro'a. Ani ha'ihi geena halingou nohingahuoli o Roma'a ma.>>12Ma dewelano, de o Yahudio'a yomahi'aduga. Ona yo'oboto'au bali na'o la o Paulus 'awitoomawahi geena 'ayoodomua de 'ayoo'elua.13Ona naga yamoruata yoholoi nage yomahi'aduga mangale geena.14Ona yotagi o imam ma hae-hae'i'a de o Yahudio'a manga balu-baluhi'a de yotemo, <<Ngomi mio'oboto'au na'o o Paulus 'amiwitoomawahi geena 'a mioodomua de 'amioo'elua.15Ho o oraha neena Ri-riadodoto, ngini de o Agama'a ma Ha'imi munu'a, tanu o hurata niohidingoto o Roma'a manga hurudado o bolu moi manga baluhu ma amo'o, mangale niogaaho'o la o Paulus wiahali neenano wotaali ngini'a, niotemo una'a bali ngini niomau niauruhu awi haala 'iholoioli nihidi-diai. De ngomi aha mimahidiai'u'au la 'awomahiadonuwahi neenano ena miwitooma'au.>>16Ma o Paulus awi bilanga ami ngoa'a womatengo woihene manga niata 'ogeena. Ho wotagi o hurudado manga ngii'a de o Paulusi'a wohingahu mangale geena.17Geena'a de o Paulus wiaho'ino o hurudado manga baluhu womatengo de wotemo, <<Tagi o doguulu nuuna nowiaha nia baluhu ma amo'i'a, una womau wohingahu o 'iani moi.>>18O hurudado manga baluhu guuna wiaha o doguulu guuna manga baluhu ma amo'i'a de wotemo, <<Aba, O Paulus wobui-bui'a guuna woiaho'ino de wogaaho'o la o doguulu nuuna towiaha ngonano hababu womau wohingahu o 'iani moi ngona'a.>>19Ho ma hurudado manga baluhu ma amo'o guuna wigagao ma doguulu awi giami'a de wiaha ho witinga'i'a de aha wihano, <<O'iau nomau noihingahu ngoino?>>20De una wopaluhu, <<Aba, o Yahudio'a yomahi'aduga mangale yogaaho'o ngona'a, la o dewelano nowiahali o Paulus o Agama'a ma Ha'imi'a, la bali awi halla geena yauruhu iholoioli yohidi-diai.21Ma Aba, tanu uwa nohimode'e to ona manga gogaho'o geena, hababu yamoruata yoholoi naga womaiyuni'a mangale yomau witoomau o nge'omo'a. Ona yo'oboto'au na'o 'a witoomawahi o Paulusi'a geena aha 'ayoodomua de 'ayoo'elua. Neena naga ona yomahidiai'u'au, 'a yota-tamaau to ngona ani butuhu.>>22Ma hurudado manga baluhu ma amo'o guuna wopaluhu, <<Uwa noja-jarita nagoona'au bato na'o noihingahuo'au ma haala neena ngoino,>> de wihulo'o ma doguulu geena wolio.23Geena'a de ma hurudado manga baluhu ma amo'o guuna wo'iaho'o awi hu-hurudado manga baluhu yamididi, de wotemo ona'a, <<Nio'itoomu o hurudado yaratuhu modidi nage yomadagi, o hurudado nage o kuda yapa'e yamoritumudingi, de o hurudado nage de manga 'uamo'a yaratuhu modidi. O wutu neena ipahi o ta'o hiwo ona moi-moi geena yotagi manga dumutu o Kaisarea ma bendari'a.24Ngini ma 'iani niatoba'ino o kuda muluo naga mangale o Paulus wobalene. Ho ngini moi-moi 'iani niwihiota'a niwihidi-diai hiadono ma gubernur Feliksi'a.>>25Geena'a de o hurudado manga baluhu ma amo'o guuna o hurata wotulihi ma betongo onane:26<<Tabea Aba gubernur Feliks! Ngoi o Klaudius Lisias.27O nyawa nage wiaha-aha de ma hurata neena, o Yahudio'a ma nyawa-nyawa witago'inou de tanu witoomau. Ma owa ho ngoi de 'ai hurudado mioboa miwihihalamata, hababu toihene bali una o Roma'a ma awaha.28Ngoi tomau tana'o awi hala o'iau hiadono ona wi'ala'i, ho towiaha manga Agama ma Ha'imi'a.29Ma ma nyo-nyata una 'a'oiwa wadiai nage yadaene wihu'umu wiho-hongene e'ola wihiohama o bui'a. Ona wi'ala'i duga 'atoona ma hirete manga agama ma dodoto'o.30Geena'a de, ngoi toihene o Yahudio'a yomahi'aduga yomau witooma. Ho 'a togila-gila to'ihulo'o o hu-hurudado wiota'a ngona'a aba gubernur. Ngoi ma to'ihulo'o o nyawa-nyawa'a nage witae-tae una'a, yotagi yohingahu ma haala geena ngona'a aba. 'A neena'ahi yai'a 'ai hurata. Tabea.>>31Ho ma hurudado goona yadiai toona manga 'arajaanga harage de manga baluhu ma amo'o wo'ihulo'o'au. O Paulus wi ehe de wi aha 'ageena ma wutu'u hiadono o Antipatris ma bendaro'a.32Ma dewelano de o hurudado nage 'ayomadagi yo'ihidipidili'a o horodado nage de manga kuda'a yogila-gila de o Paulus, de ona mahirete yolio manga ngiino.33O hurudado de manga kuda'a nage yomahiadono o Kaisarea'a, de yo'ula o hurata geena ma gubernuri'a, geena'a de aha o Paulus wihigiama mahoata una'a.34Iduangino ma gubernur wabaca ma hurata geena, de wohano o Paulusi'a, <<Ngona neena 'ianou?>> O Paulus wopaluhu, <<Ngoi neena o Kilikiano.>>35De ma gubernur awogila-gila wotemo, <<Aha tataila'o ma diai ani haala, na'o o nyawa 'ini'a-'ala'i nage yotota'au neena'a. >> Geena'a de wohulo'o la o Paulus wituumungohi o 'adato'a nage ma hila o Herodes wadi-diai'u.
The Seed Company