O Hu-hulo'o22
1<<Dea-dea de ri-riadodoto moi-moi, ngoi tomau tohingahu ma diai ngini'a mangale ngoiwa 'ai haala ho be'a nioihenohi!>>2O nyawa yolepe-lepe goona nage yoihene o paulus woma'ade-ade de o Ibranio'a manga demo, de 'iholoioli yomaliili. Ho 'o paulus wohigila-gilali awi ade-ade,3wotemo, <<Ngoi o Yahudio'a, tomaboa o Tarsus ma bendaro'a, o kilikia ma daera'a, ma ngoi toamo'o neena'a o Yerusalem ma bendaro'a. De o Gamaliel ma guru ma amo'o womatengo woidoto'o wohidi-diaio'a o hu'umu nage o Musa wihidoto-doto'o'au nanga edete de nanga dotumi'a, hiadono ngoi topeleeha tadiai ma Jou ma Dutu awi 'arajaanga, harage de nginioli neena ma wange.4De ngoi to'ihangihara hiadono to'itooma ona'a nage yodinii'i o Yesus awi do-doto'o. O ngewe'a de o naulu moi-moi to'itago'o de to'ihiohama o bui'a.5O Imam ma amo'o ma hirete de o Agama'a ma Ha'imi idadi yoha'ihi 'atoelu'uwa. Hababu onau mahirete 'ai hurata yohihupu, ma dumutu o Yahudi ma nyawa'a o Damsyiko'a. De ma hurata geena do'a, ngoi idadi to'itago'o o nyawa nage yodinii'i o Yesus awi dodoto'o, de to'iaha o Yerusalemo'a mangale yoihu'umu.>>6<<Ma oraha ngoi 'ai do-dagi ma hidogorona'a o Damsyiki'a taadonou poelua o wange 'iorona'u, 'itodo'anino o daraanga iletongo'a da'u o diwangu'u idihiwa ihigilolitino.7Geena'a de tohiduluba'u, de o ilingi moi to ihene itemo ngoino, <Saulus, Saulus! Do-doau ho noihangihara?>8De ngoi topaluhu, <Ngona nagonau Aba?> De ena ipaluhu, <Ngoi o Yesus o Nazaret ma nyawa, nage noiha-hangihara!>9O nyawa-nyawa nage mima'a-'anii'i, ona ma yama'e ma daraanga 'i leto-letongo geena, duga ma ilingi nage 'imaade-ade ngoino ona 'ayoihenuwa.10Geena'a de 'atohano'auoli, <Jou, halingou o'ia todiai?> Ma Jou wo paluhu, <Nomagoa'ie de nohi'ai'a o Damsyiki'a. 'A do'a aha nomagiihene o'ia naga moi-moi nage ma Jou ma Dutu womau nadiai.>11Ma oraha geena ngoi 'atomahima'ewau, hababu o daraanga ma letongo geena 'ai la'o'u yadaene. Ho 'ai ma-manai 'ai giama yaga-gao de 'iituda miohi'ai'a o Damsyiki'a.12O Damsyiko'a womatengo awi ronga o Ananias. De Awi hininga ma ngodumu wohingounu ma Jou ma Dutu awi hu'umu nage o Musa wohingahu-ngahu. Nage moi-moi o Damsyiko'a yomanoa-noa wihoromati una'a.13Una woboa woitaila'o, de womahigo'ono 'ai date'o'a geena de wotemo, <Ee 'ai riadodoto Saulus, oraha neena nomahima'eli!> 'Ageena ma oraha de tomagelelo de towima'e'au.14Geena'a de o Ananias wotemo ngoino, <Ma Jou ma Dutu nage nanga edete de nanga dotumu wihuba-huba, nowiili'o'au la nana'o to una awi mau, de nowima'e o Yesus guuna o Nyawa Wotitiai, de nohigihene o Yesus mahirete awi iilingi.15Ngona aha nohiha'ihi mangale nohingahu o nyawa moi-moi'a o'iau naga nage noiheno'au de nama'e'au Unano.16'A 'oneenahi uwa itaao. Nomagoa'ie, de nomahigiama ma hoata la niohi'i. Nomahigaho'o ma Jou ma Dutu'a la ani baradoha waapongo.> >>17De o Paulus wotemoli, <<Tolio'a o Yerusalemuo'a de wa'utu tomadahaubayanga ma gi-giria'a ma Jou ma Dutu awi Woa'a, de ngoi tama'e o mama'e moi.18Ma Jou Yesus towima'e de wotemo ngoino, <Itaiti'a namada o Yerusalem ma bendara, hababu o nyawa-nyawa neena'a 'ayadawonguwa ani ha'ihi mangale Ngoi.>19Ngoi totemo, <Jou, o nyawa-nyawa neena'a 'i'o'ina'o, na'o ngoiou nage totagi o do-doomu ma woa'a moi-moi mangale to'itago'o de to'ipoha o nyawa nage yonga'u-nga'u Ngona'a de to'ihiohama o bui'a.20O geenali ma ani ha'ihi o Stefanus witooma, ngoi ma geena'a de ngoi ma to'ihimode'e witooma. De ngoiou neena yoto-tooma nage manga pa'eanga toda-danu.>21Duga ma Jou Yesus wotemoli ngoino, <Ngaro 'anotagiou, hababu Ngoi tonihulo'o notagi o daera ia'u-a'uli'a 'a o Yahudio'awa ma nyawa'a.> >>22O Yahudio'a ma nyawa geena'a, 'ayohigihenohi o Paulus womaade-ade, ma wa'utu o Paulus wotemo ma Jou ma Dutu wihulo'o una'a la wotagi 'a o Yahudio'awa ma nyawa'a, o Yahudio'a ma nyawa geena'a yongamo de yomaorehe, <<O nyawa nuuna, powitoomau. Una 'ayadaenuwa wowangode!>>23Yomaore-orehe ma de manga pa'eanga yoma'adu-dugumo de o 'a'awo yohibarihi da'uie geena ma dumutu duru yongamo.24Ho o Roma'a manga hurudado ma baluhu ma amo'o guuna wohulo'o awi hu-hurudado o bolu moi manga baluhi'a la o Paulus wiaha manga ngii'a la wipiri'iha ma de wihangihara mangale womau wana'o o'iau ma hababu hiadono o Yahudio'a yomaore-orehe 'ogeena o Paulusi'a.25Ma nage wili'ono'au mangale wipoha, de o Paulus wotemo ma hurudado o bolu moi manga baluhi'a womatengo nage geena'a womahigo'ono, <<Bote 'aidadi? O Roma ma 'awaha moi 'apowiuruhuwahi de powihoboha ihila?>>26O hurudado o bolu moi manga baluhu guuna woihene 'ogeena, de wotagi manga hurudado manga baluhu ma amo'i'a de wotemo, <<O'iau nodiai Aba? Una neena 'a o Roma ma 'awaha!>>27Ho ma horodado manga baluhu ma amo'o guuna wai'a o Paulusi'a de wihano, <<Be'a nohingahuno, igoungu ngona o Roma'a ma 'awaha?>>
O Paulus wopaluhu, <<Igoungu, ngoi o Roma'a ma nyawa.>>28O hurodado manga baluhu ma amo'o guuna wotemoli, <<Ngoi todadi o Roma ma 'awaha geena 'a 'iete'ua tohangu!>>
O Paulus wopaluhu, <<Ma ngoi aha tomaboano ena todadio'au o Roma ma 'awaha.>>29Ma oraha yoihene na'o o Paulus geena o Roma'a ma 'awaha, de ma hu-hurudado nage yomau wipi-piri'iha de wiha-hangihara goona yomahuhu'u, de manga hurudado ma baluhu ma amo'o guuna ma wohawano'au, hababu Unau wohulo'o wili'o o Paulusi'a.30O Roma'a manga hurudado ma baluhu ma amo'o guuna womau wana'o madiai dodoau ho o Yahudio'a wihihala o Paulusi'a. Geenau ho ma dewelano de o Imam ma Amo'o de o Agama'a ma Ha'imi wo'iaho'o la yomatoomu. Geena'a de o Paulus wihihupu o hurudado manga ngiino, de wiaha wihitaali de de ona.
O Paulus wopaluhu, <<Igoungu, ngoi o Roma'a ma nyawa.>>28O hurodado manga baluhu ma amo'o guuna wotemoli, <<Ngoi todadi o Roma ma 'awaha geena 'a 'iete'ua tohangu!>>
O Paulus wopaluhu, <<Ma ngoi aha tomaboano ena todadio'au o Roma ma 'awaha.>>29Ma oraha yoihene na'o o Paulus geena o Roma'a ma 'awaha, de ma hu-hurudado nage yomau wipi-piri'iha de wiha-hangihara goona yomahuhu'u, de manga hurudado ma baluhu ma amo'o guuna ma wohawano'au, hababu Unau wohulo'o wili'o o Paulusi'a.30O Roma'a manga hurudado ma baluhu ma amo'o guuna womau wana'o madiai dodoau ho o Yahudio'a wihihala o Paulusi'a. Geenau ho ma dewelano de o Imam ma Amo'o de o Agama'a ma Ha'imi wo'iaho'o la yomatoomu. Geena'a de o Paulus wihihupu o hurudado manga ngiino, de wiaha wihitaali de de ona.
The Seed Company