O Hu-hulo'o21
1Iduangino mimahilooaha o Efesus manga jama'ata ma balu-baluhi'a, aha de miotagi. Geena'a de mio hidete miogila-gila o Kos ma nuuhi'a, de ma dewelano o Rodos ma nuuho'a miotota. Geena'a de 'amiohideto'ali o Patara ma bendari'a.2O Patara'a de miama'e, o 'apa itagiou o Fenisia ma daera'a. Ho, ngomi geena'ou ma 'apa'a miopalene de miocobo,3wa'utu miohidete ngomi miama'e 'o Siprus ma nuuhu mia gubalio'a; ma ngomi 'amiohidetohi mio gila-gila o Siria ma daera'a. Ngomi miouti o Tirus ma bendaro'a, hababu o 'apa geena nage miopale-palene ma gina duga yohiguti geena'a o Tirus ma bendaro'a.4Geena'a ngomi mio'iadono nyawa yonga'u-nga'u o Yesusi'a de mimanoa de de ona ma daao o wange tumudiingino. De o Omaha 'Iofi-ofi ma 'arajaanga ho o nyawa yonga'u-nga'u idadi yana'o mangale o'iau aha done o Paulus waohana o Yerusalemo'a da'u. Hababu geena, ona wihitiari o Paulusi'a bali uwa wotagi o Yerusalemie.5Ma ma oraha mia wa'utu do'a 'ibooto'au, de mio tagi miohigila-gila mia dodagi. Ona moi-moi de manga we'a-we'ata, de manga ngoa-ngoa'a 'imihiota'a hiadono o bendara ma duduni'a. Do'a o ngooto ma date'o'a mimahiadono de mimatilabu'u'u ho mio haubayanga.6Geena iduangino de mimahilooaha, aha de o 'apade mio palene de ona ma yo'o'ilio manga woa'a.7Geena o Tiruso'a de miohigila-gila o Ptolemais ma bendari'a. Geena'a mio'itutumohi o nyawa yonga'u-nga'u, mangale mia tabea mihiadono, de ngomi mimanoa o wange moi de de ona.8Ma dewelano, de mio tagioli ho mimahiadono o Kaisarea ma bendari'a. Geena'a miai'a womatengo awi ronga o Filipus, Una geena wohiha-habari o habari ma owa mangale o Yesus. De mimanoa awi woa'a. Unau geena womatengo nage yo'iili-ili'i yatumudiingi o Yerusalemo'a mangale yoleleani.9O Filipus awi ngoa'a o moholehe yahoato'a, ma Jou ma Dutu wo'i'ula'au o guata mangale yohingahu o behehongo ma Jou ma Dutuno.10Mia wange muluo'a naga da'u, de naga womatengo nage woboa o Yudea ma daerano, awi ronga o Agabus. Una geena ma nabi moi, ma Jou ma Dutu wipa'e la wohingahu Awi behehongo.11Woboano ngomino de o Paulus awi bulu waehe. Waeheno de wohipuhu'u awi dou de wi giamino ma hirete de wotemo, <<'Oneena o Omaha 'Iofi-ofi itemo, <Ma bulu ma dutu neena, o Yahudio'a aha wipuhu'u harage oneena o Yerusalemuo'a, iduangino de wihigiama ma hoata o Yahudio'awa ma nyawa'a.> >>12Iduangino mioihene o Agabus wotemo na'o o Paulus aha wihangihara, ngomi de moi-moi o nyawa yonga'u-nga'u nage yomanoa-noa o Kaisarea ma bendaro'a geena miogaaho'o de mihigali-gali o Paulusi'a la uwau wotagi o Yerusalemie.13Ma una wopaluhu, <<Riadodoto ngaro uwa nioali, niodiai 'ogeena geena 'ai hininga ihuha. Ngoi tomadonoa'u'au ngaro uwa 'aili'o, ma ngaro 'iho-honenge hababu tohihabari mangale ma Jou Yesus geena'a dau 'aido-doawa.>>14O Paulus 'amihingounua. Ho ngomi miwihidugumada'a de miotemo, <<Mamada'a la ma Jou Awi mau idadi.>>15Mia wange muluo'a naga geena'a aha de mimahidiai mia 'iau hona de aha miohi'aie o Yerusalem ma bendarie.16Yamuluo naga nanga ria dodoto o Kaisareano mimahidatagi, ona ma 'imihiota'a o Manason awi woa'a, hababu to una awi woa'a mimanoa. O Manason geena o Siprus ma nyawa, ma daanou wonga'u 'o Yesusi'a.17Ma oraha o Yerusalemie mimahiadono, de mia ma-manai geena'a midawongo ngomino 'ayoga-garago.18Ma dewelano o Paulus de ngomi miotagi o Yakobusi'a, miai'a ena o jama'ata ma balu-baluhu ma moi-moi geena'a.19O Paulus wo'itabea'ahi ona'a, aha woihijarita o'iau hona nage ma Jou ma Dutu Wodiaio'au 'a o Yahudio'awa ma nyawa'a ma nge'omo una.20Yoiheno'au o Paulus awi jarita geena de Wipuji de Wihoromati ma Jou ma Dutu'a. Geena'a de yotemo o Paulusi'a, <<Aba, halingou nana'o o Yahudio'a yoribuho'au yonga'u o Yesusi'a. 'Ona moi-moi geena yopeleeha de yohingounu ma Jou ma Dutu Awi hu'umu o Musa wohingahu-ngahu.21De neena yogiihene bali no'idoto'o o Yahudio'a nage yomanoa-noa o Yahudio'awa manga daera'a, la yamada o Musa awi do-doto'o. Yotemo bali ngona no'itemo la manga ngoa-ngoa'a uwa yo'ihuna bolo uwa yodini'i o Yahudio'a manga 'autoranga.22Ma oraha neena o Yahudio'a nage yonga'u-nga'uo'au ma raio'au aha nigiihene na'o ngona neena'a. Ho cara'iau na'o imote'e ngona?23Mangale geena nodomote'ou o'iau naga nage minitemo neena. Neena naga ngone'a yahoata yodiaio'a o go-goboto ma Jou ma Dutu'a.24Ho i'au notagiou no'iaha la de de ona niodiai o adata de o aturanga mangale nioberehi ma Jou ma Dutu awi himango'a, de ngona no'idahangu manga hu-huba ma hewa la manga utu idadi ya'ulu. Geena de aha o nyawa moi-moi yana'o na'o o'iau naga nage yoihe-iheno'au geena 'a ma goungua, hababu ngona ma nohidagi ma Jou ma Dutu awi hu'umu nage o Musa wohingahu-ngahu.25Ma mangale o Yahudio'awa nage yonga'u-nga'uo'au o Yesusi'a, mio'iduhurato'au ona'a mangale miohingahu mia butuhu geena. Ma butuhu geena, geenala 'aidadiwa yaodomo o inomo 'ihihuba'au o gomangi'a, 'aidadiwa yaodomo o aunu, bolo o 'aewani nage ihongene 'ayahori'i ho ma awunu 'aiuihuwa; de 'aidadiwa yoma'apa'e ngaro itimaronga.>>26Ho ma dewelano de o Paulus de yahoata goona yotagi yadiai o adata de o aturanga mangale yoberehi ma Jou ma Dutu awi himango'a. Geena'a de yoohama ma Jou ma Dutu awi Woa'a ma bibino'a de yohingahu muluo'a aha de iduanga yomaberehi, de muluo'a aha ihihuba moi-moi manga hu-huba o 'aewani geena.27Ho ona yodiai o adata de o aturanga mangale yoberehi ma Jou ma Dutu awi himango'a o wange tumudingino. Ho nage hali'i iduangou, de o Yahudio'a yamuluo naga o Asia ma daerano wima'e o Paulus ma Jou ma Dutu awi Woa ma bibino'a. Geena'a de yoda-daha'a o nyawa yolepe-lepe'a de witago'o.28De yomaore-orehe yotemo, <<Ee! O Israelo'a ma nyawa, nia ino nimiduhunu! Nuunau nage 'ia'a naga bato wohidoto'o o nyawa-nyawa'a o do-doto'o nage inaho-hohedu ngone o Israelo'a, una ma wodoto'o la ngone uwa padini'i o Musa awi hu'umu, de wohidi-diiha ma Jou ma Dutu awi Woa neena. Aha de neena o Yahudio'awa wo'ihiohaminou ma Jou ma Dutu awi Woa'a waperee'e o Ngii 'Iofi-ofi neena hiadono 'iofiwau!>>29Ona 'ogeena yotemo, hababu o Trofimus o Efesus ma nyawa guuna wima'e'au o bendaro'a de o Paulus, ho ona yomangitu o Paulus wiaha'au una'a ma Jou ma Dutu awi Woa'a.30Ho o Yerusalem ma bendaro'a moi-moi geena irua'au ma moi'a, de o nyawa yomapa-palitana yohi'ai'a yomatoomu. Ona witago'o o Paulus de wihihupu ma Jou ma Dutu awi Woa ma bibinino'a. 'Ageena ma oraha de o ngoana moi-moi o teraso'a nage ma Jou ma Dutu awi Woa'a ya'o'ibeno'au.31Ma oraha yohirua-rua goona yomau o Paulus witoomau, de o Roma'a manga hurudado manga baluhu ma amo'o guuna woihene bali o Yerusalemuo'a do'a irua'au ma moi'u.32Ho o hurudado manga baluhu ma amo'o guuna wo'iaha awi hu-hurudado ma baluhu yamuluo naga de 'ayomatai-taiti yomahidatagi de de una 'irua-rua ma ngii'a. O nyawa yolepe-lepe nage wima'e'a o hurudado manga balu guuna de awi hu-hurudado ma homoa yoboa, de yomatogumu wipoha o Paulusi'a.33Ma hurudado manga baluhu guuna wai'a o Paulus witago'o de wohulo'o wili'o de o rate o behi modidio'a. Geena'a de ma hurudado manga baluhu ma amo'o guuna wohano-hano o nyawa'a o Paulus geena naguunau, de o'iau wodiaio'au.34Ma yolepe-lepe nage munu'a yotemo 'oneena, de munu'a yotemo oneenali. Hababu 'aiholoioli irua ho wohi'ana'owau ma goa o'ia hiadono idadi 'ogeena. Ho wohulo'o o Paulus wiaha o hurudado manga ngii'a.35Ma oraha yaadono o ngute'a o hurudado manga ngiio'a, de yoru-ruae goona iholoioli yongamo ho munu'a yomau iwipoha. Ho ma hu-hurudado goona iwimo'u o Paulus hiadono o ngute ma baha'a ipahi o ngoanu'u.36Ona yo'ihidu-duulu yoru-ruae goona yohigaho-gaho'o, <<Una neena halingou niwitooma!>>37Ma oraha o Paulus wihiohamou o hurudado manga ngii'a, de o Paulus wotemo ma hurudado manga baluhu ma amo'i'a, <<Aba bote 'aidadi tomaade-ade ma ile-ile ngona'a?>>
O hurudado manga baluhu ma amo'o guuna wopaluhu, <<'Ae, ho ngona o Yunani ma demo 'anana'o?38Na'o 'ogeena, ngona neena 'ao o Mesirinowa womatengo nage ma duulu neena yoda-daha'a o Roma'a ma pamareta'a de wo'ihiloa o nyawa yohirua-rua yaribuhu hoata de manga dae'a wo'iaha o tona'a 'i'a-'a'aha'a?>>39O Paulus wopaluhu, <<'A'ouwa, ngoi neena o Yahudio'a o Tarsisino o bendara ma amo'o moi o Kilikia ma daera'a. Tanu noihigumada tomaade-ade o nyawa-nyawa'a goona.>>40O Paulus wihigumada womaade-ade, de womahigo'ode o ngute'a de wagoa'a awi giama la yomaliili. Ho o nyawa moi-moi yoliilo'a. Geena'a de womaade-ade ona'a de o Ibranio'a manga demo. Wotemo,
O hurudado manga baluhu ma amo'o guuna wopaluhu, <<'Ae, ho ngona o Yunani ma demo 'anana'o?38Na'o 'ogeena, ngona neena 'ao o Mesirinowa womatengo nage ma duulu neena yoda-daha'a o Roma'a ma pamareta'a de wo'ihiloa o nyawa yohirua-rua yaribuhu hoata de manga dae'a wo'iaha o tona'a 'i'a-'a'aha'a?>>39O Paulus wopaluhu, <<'A'ouwa, ngoi neena o Yahudio'a o Tarsisino o bendara ma amo'o moi o Kilikia ma daera'a. Tanu noihigumada tomaade-ade o nyawa-nyawa'a goona.>>40O Paulus wihigumada womaade-ade, de womahigo'ode o ngute'a de wagoa'a awi giama la yomaliili. Ho o nyawa moi-moi yoliilo'a. Geena'a de womaade-ade ona'a de o Ibranio'a manga demo. Wotemo,
The Seed Company