O Hu-hulo'o20
1O Efesuso'a irua iduangino de o Paulus wo'itoomu o jama'ata de manga hingina wohi'uata. Geena'a de womahilooahohi aha de wotagi o Makedonia'a.2O Makedonia ma daera'a una wo'iadono o nyawa yonga'u-nga'u o hoa-hoano'a de wo'ihitiari o nyawa manga lepe mangale wohi'uata manga hininga. Geena'a de woma'ilioli o Yunani ma daera'a. 3Awi mede haange geena'a dau. Ma oraha una wohidetou o Siriaha, de womagiihene bali o Yahudio'a yomau witooma. Hababu geena waputuhu woma'ilioli waboa o Makedonia'a.4Yamuluo naga winii'i o Paulusi'a geena la o Sopater o Pirus awi ngoa'a o Berea ma bendarino, de o Aristarkhus de o Sekundus, o Tesalonika ma bendarino. De o Gayus o Derbe ma bendarino, de o Tikhikus de o Trofimus o Asia ma daerano, de o Timotius.5Ona yatumudiingi yohila de midamaa o Troaso'a .6O Roti 'Airagi-ragiwa ma wange maamo'o iduanga aha de geena o Filipio'a ngomi mimagoa'a, miotagi miohidete ho o wange motoa aha de mimahiadono o Troaso'a de mimatoomuoli de de ona geena'a mia minggu moi.7O Yahudio'a manga hiaini ma wange italuhu'u, de ngomi de o nyawa yonga'u-nga'u ma regu mimalomu miodiai o Ngodomo 'ibe-berehi. Hababu ma dewelano o Paulus wotagiou, ho womaade-ade hiadono o wutu 'i'oronano.8Ngomi mimalomu o ngiio'a moi 'idaduie. Geena'a ma hilo 'ao lepe'a yatuu'ie.9O doguulu womatengo awi ronga o Eutikhus, o jendela'a wogogelu'u wohigihene o Paulus womaade-ade. Hababu o Paulus womaade-ade itaao, ho ma doguulu guuna duru wonihu'u, hiadono wonihu'o'a geena'a de woota'a da'u'u. Ma oraha wigoa'a ena wohonengo'au hababu ma ngii geena 'i'a'ulie hiadono 'iretene haangede.10Ma o Paulus wouti'u de womaiduha geena ma doguuluo'a de wi'oo'u. De wotemo, <<Uwa niohawana! Una 'awowangohi.>>11Geena'a de moi-moi yodoali da'uie, ho o Paulus o roti wohi'ado'u de moi-moi yoodomo. Yoodomo iduangino de ma daaohi womaade-ade hiadono iinita'a, geena'a de aha wotagi.12O doguulu guuna awi woa'a wihigilio 'awowango-wango, ho duru 'ayoga-garago.13Ngomi miotagi o 'apa'a de miohila miohidete o Asos ma bendarie miwihobo'o o Paulus o 'apa'a la mima'ama'e de o Paulus geena'a. Una waaturo'au 'ogeena hababu una ma wo'ai'a 'awomadagi.14Mima'ama'e geena o Asos ma bendaro'a, de o Paulus wopaleno'au o 'apade ho geena'a de miohideto'au o Mitilene'a ma bendari'a.15Geena'a de miohidetoli, ho ma dewelano ena miotota'au o ngii moio'a ima'adaalino de o Khios ma nuuhu. De ma dewelanoli de miotota'ali o Samos ma nuuhie, geena de o wange moiohi aha de mimahiadono o Miletus ma bendari'a.16O Paulus waputuho'a bali 'awotuluwau o Efesusi'a, la uwa o wa'utu wohigu-guule o Asia ma daera'a. Ho una womahaga womau na'o 'aidadi de o Yerusalem womahiadono ena wadaene o Yahudio'a manga gugutu'u ma ngodomo wange nage yohironga o Pentakosta.17O Paulus o Miletuso'a de wobehehongo o Efesusi'a bali o jama'ata ma balu-baluhu yaino la yoma'ama'ehi.18Wa'utu yomahiadono o Miletuso'a, de o Paulus wotemo ona'a, <<Riado-doto, ngini niana'o'au 'ai go'oie de 'ai gogelu'u wowango niahidogorona'a, aha toboano o Asia ma daera'a hiadono neena.19De 'ai hininga ma tipo'o'u tohigali-gali taga-gao ma Jou ma Dutu awi 'arajaanga o hangihara ma doda'a hababu o Yahudio'a manga hininga itiiha yomau 'itooma.20Riadodoto, ngini ma niana'o, ngoi tomatogu-togumuwa tinihingahu o'ia naga nage de ma faeda'a mangale ngini. Ngoi tinidoto'o naga o nyawa yolepe-lepe manga biono'a de o woa-woa'a.21O Yahudi ma nyawa'a e'ola 'a o Yahudio'awa, itauri'a to'ihidanganono la yomatogumu o baradoha yodiai, yoma'ilio ma Jou ma Dutu'a de yonga'u ma Jou Yesusi'a.22Neena o Omaha 'Iofi-ofi ma pareta tamote'e, ho o Yerusalemie totagi. De ngoi 'atana'owa o'iau done idadi ngoino da'u.23Ngoi duga tana'o naga o bendaro'a ihinoi-noimi nage taadono'au, o Omaha Iofi-ofi 'itemo'au bali ngoi aha toohama o bui'a de tohangihara.24Ma ngoi 'a tohido-doawa de 'ai wowango, iti tohiduanga 'ai 'arajaanga nage ma Jou Yesus woi'ula-'ulano. Ma 'arajaanga geenala tohihabari o Habari ma Owa, geena la ma Jou ma Dutu awi hininga ma rahai.25Ngini moi-moi tiniadono'au de tinihingahuo'au mangale cara'iau ma Jou ma Dutu wo o 'Oana, neena tana'o, ngone aha 'apoma'ama'ewau.26Geenau ho neena ma wange tinitemo, na'o hiadono nginio'a naga nio honenge ma niwinga'uwahi ma Jou Yesusi'a, geena 'a ngoiwa 'ai hala.27Hababu, ngoi aitauri'a tinihingahu mangale ma Jou ma Dutu awi niata moi-moi.28Mangale geena riadodoto, ngini mahirete 'iani nimagoana, de nio'igoana o jama'ata moi-moi, nage o Omaha 'Iofi-ofi ini'ula ngini'a mangale nio'igoana de nio'ipaliara. Tanu nio'igoana ma Jou ma Dutu awi jama'ata harage o duba yogoa-goana wagoana awi duba. O jama'ata goona to ma ma Jou ma Dutuou, hababu Awi Ngoa'a ma Yesus Awi awunu 'iuiho'au o salipo'a mangale Wonatuuhu.29Ngoi tana'o na'o ngoi tinimada'au, marai o nyawa-nyawa manga hininga harage de o 'aewani 'iti-tingi'ai yoboa niahidogorona'a, de ona yohidaila'o yohidadi diiha o jama'ata nage nio'igoa-goana goona.30De 'anginio'a mahirete naga aha yohidoto'o o do-doto'o 'aiti-tiaiwa la o nyawa-nyawa nage yonga'u-nga'u ma Jou Yesusi'a yonga'uwau ho ona'a yo'inii'i.31Ho, ngini 'iani nimahidi-diai, de uwa niamongo, o taongo haangeno, o wutu de o wange tomatogu-togumuwa tinidoto'o, hiadono 'ai ongo ma itiwa.32Ho neena, togaaho'o ma Jou ma Dutu Niwigoana de niduhunu ma nge'omo Awi demo mangale Awi hininga ma owa ngini'a. Ma Jou ma Dutu de awi 'uaha mangale wohi'uata niangonga'u, de niwi'ula ngini'a moi-moi nage Woja-jajio'au aha wo'ula o nyawa-nyawa'a nage Wadiaio'au to Una awi 'awaha mahirete.33'Omaiwahi totaleana nagoona'au bato manga pipi bolo manga pa'eanga.34Ngini mahirete niana'o, to ngoi mahirete 'ai gaahau'ino ngoi de 'ai ma-manai inii-nii'i miapa'e mangale o 'iau naga nage mia paraluu.35Naga o hagala moi-moio'a ngoi tohimaito'au 'ai wowango ma higorona'a na'o poma'uata po'arajanga oneena, geena halingou po'iduhunu o nyawa nage yola-lamaana de manga 'ia-'iawa. Hababu ngone halingou poda-danganono o'ia naga ma Jou Yesus wotemo'au, <Padawongo de po'ula 'iholoi ihanaanga po'ula.> >>36O Paulus womaade-ade iduangino, de moi-moi yotilabu'u'u aha de yohaubayanga.37Ona moi-moi yoali wi'oo o Paulusi'a (Hababu yoma'atinga'ou de de una).38Ona manga hininga duru ihuha 'iholoioli hababu o Paulus wotemo bali aha yoma'ama'ewau. Geena'a de ona wihiota'a hiadono o 'apa'a.
The Seed Company