O Hu-hulo'o18
1Geena'a de iduangino, o Paulus womagoa'a o Atena ma bendaro'a, de wotagi o Korintuso'o.2Geena'a una yoma'ama'e de o Yahudio'a womatengo awi ronga o Akwila o Pontus ma ma daerano. O Akwila de ma we'ata ongo Priskila aha yoboano o Italiano. Ona yaino o Korintusino hababu ma kaisar o Klaudius woihulo'o o Yahudio'a ma nyawa moi-moi yo'ihihupu o Roma ma bendarino. O Paulus wai'a wotulu ona'a.3Geena'a de ona'a womanoa, de yomahida'arajanga hababu moi-moi manga 'arajaanga aimatero, o woa-woa yodidiai.4Pomahiaini ma wange 'ihinoimi o Paulus wotagi yoma'ade-ade o Yahudio'a manga dodoomu ma woa'a, ma dumutu la o Yahudio'a de o Yunanio'a yonga'u o Yesusi'a.5Ma oraha o Silas de o Timotius yomahiadonino o Makedoni'a de yaino, o Paulus 'a wo'arajaangua ma homoa duga wohingahu o habari nage ma Jou ma Dutuno o Yahudi ma nyawa'a. Ma habari geenala Yesus guuna ma Oana Wohiha-halamata nage ma Jou ma Dutu wohijajio'au.6Ma o nyawa-nyawa geena'a yomatogumua wiributu de wihohedu o Paulusi'a ho awi pa'eanga ma 'a'awo wohitatara geena ma dungu 'a wo'idaali'awau. Una wotemo, <<Na'o niobodito geena ngini mahirete nia baradoha! Uwa nihi haala ngoino! Ma oraha neena ngoi totagi 'a o Yahudio'awa ma nyawa'a.>>7Geena'a de o Paulus wo'imada ona geena'a, de wohi'ai'a o woa moi'a nage ma do-doomu ma woa geena ma hononga'a. O woa geena una womatengo o Yahudio'awa, ma una wohuba Jou ma Dutu'a. Una awi ronga o Titus Yustus.8Ma o Krispus o do-doomu ma woa ma baluhu guuna, una de awi woa ma doda'u moi-moi yonga'u ma Jou Yesusi'a. De manga lepehi o Korintus ma nyawa yoihene o habari nage o Paulus wo'ihingahu, ho yonga'u de yo'iohi'i.9Ma moi geena o wutu ma gorona'a, o Paulus wama'e o ma-ma'e. Awi ma-ma'eo'a ma Jou wotemo una'a, <<Paulus uwa nohawana! De uwa nomatogumu nohihabari 'ai demo.10Hababu manga lepe ma bendaro'a neena tongoi 'ai nyawa. De ngoi atonimadawa, ho 'amoiwa idadi yodiai iti-tiiha ngona'a.>>11Ho o Paulus womanoa o Korintuso'a ma daao o taongo moi de ma hononga, de wo'ihidoto'o ma Jou ma Dutu awi demo.12Wa'utu o Galio wodadi o gubernur o Akhaya ma daera'a, de o Yahudio'a yorimoi o Paulus wilawana geena'a de aha wiaha o gubernuri'a mangale wiuruhu.13Ona wi'ala'i oneena, <<Una wo'ibaja o nyawa yolepe-lepe la yohuba ma Jou ma Dutu'a, ma nge'omo nage 'ima'adaenua de to Musa awi hu'umu!>>14Ma o Paulus tanu woma'ade-ade, de o Galio wotemoli o Yahudi ma nyawa- nyawa'a, <<Ee o Yahudio'a ma nyawa-nyawa! Na'o niwitae o nyawa nuuna o haala bolo o diiha wadiai, geena yadaene halingou tauruhu.15Ma neena 'ao di-dibanga nimalimodi ma hababu o demo-demo 'ao ronga de tingini ma hirete nia agama'a ma atoranga, ho 'anginiou ma hirete nimahi'atiai'a. Ngoi 'a toolu'u tauruhu ma haala geena!>>16De aha wo'igini'i ho yohupu ima'a-'auruhu ma ngiino geena.17De ona witago'o o Sustenes o do-doomu ma woa ma hae'e guuna, de wipoha o ha'imi ma meja ma biono'a. Ma ma gubernur ma ube ma wo'idaali'awa.18Geena iduangino o Paulus o wange muluono nagahi womanoa o Korintuso'a. Geena'a de womahilooahohi o nyawa yonga'u-nga'u'a aha de una de o Akwila de ongo Priskila yohidete manga dumutu o Siria ma daera'a. Wa'utu ona yohidetuahi o Paulus woma'ulu awi utu o Kengkrea ma bendaro'a, una woma'ulu geena ma dungu una waduango'au wodiai awi go-goboto ma Jou ma Dutu'a. Geena'a de yohigila-gila yohidete manga dumutu o siria'a.19Ma oraha yomahiadono o Efesus ma bendaro'a, de o Paulus womahilooaha ongo Priskila de o Akwila'a de yoma'atinga'a. Geena'a de wotagi woohama o Yahudio'a manga do-doomu ma woa'a de yomahi'adibanga de o Yahudio'a ma nyawa geena'a.20Ona yogaaho'o la wotaao womanoa de de ona, ma una wo'ihimote'ua.21Ma gee womahilooaha de wotemoli, <<Na'o ma Jou ma Dutu wohigumada geena aha tainoli neenano.>> O geena wotemo de womagoa'a o Efesuso'a.22O Kaisarea'a wouti'u de o Yerusalemie wo'itabea'ahi o jama'atie o aha de wogila-gila o Antiokhia'u.23Awi wutu muluono naga geena o Antiokhia'a, de aha wohi'au'u o Galatia, de o Frigia ma daera'u, mangale wohi'uata o nyawa yonga'u-nga'u manga ngonga'u.24Geena ma oraha o Yahudio'a womatengo nage womaboa o Aleksandria'a, woboa o Efesusino awi ronga o Apolos. Una womaade-'ade wopade de duru wana'o o Bo'u 'Ibe-berehi ma doda'a,25de wihidoto'o 'au o dodoto'o ma ngale o Yesus. Duru wopeleeha wodoto'o wohidi-diai o do-doto'o mangale o Yesus.26Una duru womooini 'i'a'ulie woma ade-ade o dodoomu ma woa'a. De nage o ngo Priskila de o Akwila yoihene awi do-doto'o, de wiaha manga woa'a. Do'a de iholoi yadaene yohimaiti o Apolosi'a ma ngale cara'iau ma Jou ma Dutu wo'ihihalamata o nyawa ma nge'omo o Yesus.27Geena de o Apolos womau o Akhaya'a wotagi. Ho o Efesuso'a nage yonga'u-nga'u o Yesusi'a o hurata yohidingoto manga raidodoti'a yonga'u-nga'u o Akhaya'a, la yomode'e o Apolos widawongo. Gee o Apolos womahiadono o Akhaya'a de duru wo'iduhunu o nyawa-nyawa'a nage hababu ma Jou ma Dutu awi hininga ma owa ona'a.28Una duru wo'iduhunu hababu o Apolos womooini waa'unu yoma'aributu de o Yahudio'a o awaha manga himango'a. De wohinyonyata wapa'e o bo'u 'ibe-berehi ma do'uo'a, mangale o Yesus geena la ma 'oana o nyawa wohihahalamata gee ma Jou ma ma Dutu wohijajio'au.
The Seed Company