O Hu-hulo'o17
1O Paulus de o Silas manga do-dagi yohidowanga yaboa o Amfipolis de o Apolonia ma bendaro'a, ho yomahiadono o Tesalonika ma bendaro'a. Geena'a dau o Yahudio'a manga do-doomu ma woa.2Ho o Paulus wotagi 'o dodoomu ma woa'a geena, hara ge biaha wodiai 'ogeena. Geena'a una de o nyawa geena'a dau nage yomahi'adibanga mangale 'o Bo'u 'Ibe-berehi ma do'u. Una wodiai 'ogeena ma haangeno o Sabata ma wange'u.3'Imote'e ma Bo'uo'a ma do'u wohimangariti de wohimaiti bali ma 'oana wohiha-halamata nage ma Jou ma Dutu wohijajio'au halingou Una wohangihara de aha womomi'oli o honengino. O Paulus wotemo, <<O Yesus nage ngoi tinihingahu ngini'a, Unau guuna ma o 'Oana Wohiha-halamata nage ma Jou ma Dutu wohijajio'au.>>4Yamuluo naga idadi yonga'u o Paulus awi do-doto'o geena, ho yoni'o'au o Paulus de o Silasi'a. De geena dau ma doda'a manga lepe o Yunanio'a ma nyawa nage ma Jou ma Dutu'a wihingou-ngounu, de manga lepeli o nge-ngewe'a nage o nyawa yo'iho-horomati.5Ma, o Yahudio'a yobu'u, ho o nyawa yoti-tingi'ai nage yopa-paradidu yohiduga yohigo'o manga do-doomu moi yoru-ruae. Geena'a de ona yaruae ma bendara geena yaluwungu'u de yodingi'a wonga'u-nga'u wo matengo awi ronga o Yason awi woa mangale yo'ihali'i o Paulus de o Silas, hababu ona yomau yo'i aha yo'ihitaali o nyawa yolepe-lepe'a.6Ma nage 'ayo'ima'ewa o Paulus de o Silas, o Yason de o nyawa munu'a yonga'u-nga'u ya muluono naga nage yo'iaha yopa-pareta'a ma bendaro'a. De yohigaho-gaho'o yotemo, <<O nyawa nage yoru-ruae 'ia'a naga bato neena naga yoboano'au to ngone nanga bendaro'a!7De o Yason woitamangino awi woa'a. Ona moi-moi yapaleno'au o Kaisar awi hu'umu, hababu yotemo bali, ma 'oana womatengohi naga Awi ronga o Yesus.>>8O geena yotemo, ho ma awaha de o nyawa yola-laagomo ma bendaro'a geena yorua.9Geena'a de yopa-pareta goona yohulo'o, o Yason de o nyawa munu'a yonga'u-nga'u geena yohangu la yo'ihihupu. Geena iduanga aha yoi'ihipidili.10Geena ma wutu'u yonga'u-nga'u o Tesalonika ma bendaro'a, yohulo'o Paulus de o Silas yo'ao'o o Berea ma bendaro'o. 'Ayomahiadono'o de yotagi o Yahudio'a manga dodoomu ma woa'a.11O nyawa-nyawa nage o Yahudio'a o Berea ma bendaro'a ona manga hininga iholoi ipelenga, ngaro 'a de o Tesalonika ma bendaro'a ma. Ona ifoloi yohigihene o habari mangale o Yesus. De o wange yohinoi-noimi'a o Bo'u 'Ibe-berehi yogelelo ma dia'i la yana'o o Paulus awi do-doto 'o geena yadaene bolo 'a 'ouwa.12O Yahudio'a nage o Berea'a yomanoa-noa manga lepe yonga'u ma Yesusi'a, de o Yunanio'a ma nau-naulu de o nge-ngewe'a nage yo'iho-horomati manga lepe yonga'u.13Ma o Yahudio'a ma nyawa nage o Tesalonika ma bendaro'a yomanoa-noa, yoihene bali ma Jou ma Dutu awi demo o Paulus wohihabarioli o Berea ma bendaro'a, de onali yoboa o Berea'a yo'i hau-hau'u o nyawa-nyawa manga hininga, ho ona ma manga hininga ihuha.14O nyawa yonga'u-nga'u o Berea'a, yomahaga o Paulus wiota'a o gahi'o ma o Silas de o Timotius 'ageena'a ma bendaro'a.15O Atena'a ma bendaro'a wihiota'ie aha de yolio, de o Paulus wobehehongo bali, o Silas de o Timotius yomataiti'e.16O Paulus wo'i da-danu'ohi o Silas de o Timotius o Atena'a, de awi hingina 'ihuha hababu wama'e ma bendaro'a geena 'ao lepe o woa nage yohuba-huba o gomangi'a.17Ho o do-doomu ma woa'a, o Paulus yomahi'adibanga de o Yahudio'a de o nyawa munu'a ma Jou ma Dutu wihuba-huba geena'a dau. O geenali o paharo'a o wange ihinoimi yomahi'adibanga, o habari mangale o Yesus de o nyawa-nyawa geena'a dau.18O Epikuros de o Stoa ma guru-guru yoma'aributu de de una. De munu'a yotemo, <<O nyawa nuuna o'ia wana'o? 'Awoulu lepe bato, ma 'ao 'ia-'iawa wana'o!>> Munu'ali yotemo, <<Poelua una wohihabari o nyawa munu'a, manga gomanga.>> Ona o geena yotemo hababu o Paulus wohingahu o Hababari ma owa mangale o Yesus nage wohongeno'au de womomi'oli.19Geena'a de ona o Paulus wiaha o dodoomu o Areopaguso'a. Geena'a de yotemoli una'a, <<Ngomi miomau miana'o ani do-doto'o ma hungi nage nohingahu-ngahuo'au.20Hababu ngona nomihidemo 'oia nage mioiheni'a de miohera-heranga. Geena'u ho ngomi miomau miana'o ma mangale.>> (21Hababu o Atena ma nyawa de o nyawa ma dudunino yomanoa-noa geena'a, ona yamatogumua yohigihene de yomahi'adibanga mangale o'iau nage ma hungi.)22Ma oraha o Paulus womahigo'ono nage o nyawa yomato-toomu manga himango'a 'o Areopaguso'a de wotemo, <<Ee, o Atena'a ma nyawa! O hagala moi-moio'a ngoi tama'e ngini duru niopeleeha nio huba o gomangi'a.23Hababu gee to'a-'adagi nia bendaro'a de tage-gelelo o ngii-ngii nage nio huba-huba o gomangi'a, de ngoi ma tama'e o huhuba ma ngii moi ma dingiio'a geena ihitulihi'a, <Neena'a ma dingii pohuba-huba o gomangi'a nage 'apana'owahi.> Ee, o gomanga nage niwihuba-huba ma 'aniwina'owahi geena, Guunau ma Jou ma Dutu nage tinihingahu ngini'a la niwina'o.24Ma Jou ma Dutu nage wohida-dadi o dunia de ma doda'a moi-moi, Guunau ma Jou nage wo'u-'uaha o horoga'a de o dunia'a. Una 'awomanoawa o ngii nage yohuba-huba nage o nyawa yadi-diai'u.25Una woparaluwa o nyawa widuhunu hara gee wihidu'uranga, enamomongo nanga wowango de nanga ngomaha, de o 'ianaga moi-moi geena Una'a de yaino.26Ma nge'omo o nyawa womatengo, ma Jou wohidadi o bangiha moi-moi la yomanoa ia'a naga bato o dunia'a. Unau geena waaturu o wa'utu de o di-dingii nage iya'a ona yomanoa.27Ma Jou ma Dutu 'o geena wodiai, la o nyawa wihali'i una'a. Tanu ona yohigou-goungu wihali'i hiadono wina'o Una'a, ena momongo Una wo'a'uli'awa de dengone moi-moi.28Hara gee o nyawa yotemo'au, <Ngone powango, poma'elu de pomanoa o dunia'a neena, hababu to una awi 'uaha.> Aimatero yamuluo naga nia dora bololo ma betongo yodiai. Ona yotemo,<Ngone moi-moi geena to Una awi ngoa-ngoa'a!>29Hababu ngone neena ma Jou ma Dutu awi ngoa-ngoa'a, ho ngone 'aidadiwa potemo bali ma Jou ma Dutu 'aimatero de o patongo nage o gurahino, e'ola o hala'ano bolo o heleono nage o nyawa yadiai'u imote'e toona manga barija.30Ma Jou ma Dutu woda-danganonuau o nyawa manga baradoha nage yadiai wa'utu ona yana'owa Awi mau. Ma oraha neena Una wohulo'o o nyawa'a moi-moi o dunia'a yotoba o baradoha yodiai.31Hababu Una wihitatapuo'au ma oraha moi mangale waha'imi o nyawa o dunia'a neena mote'e madiai. Ma 'arajaanga geena aha Womatengo wadiai nage ma Jou ma Dutu wiili-ili'o'au. Ma Jou ma Dutu wohinyonyata'au mangale ma haala geena ma nge'omo Wihimomi'i o Nyawa guuna o honengino!>>32Ma oraha o nyawa-nyawa goona yoiheno'a na'o o nyawa yohonengo'au de yowangoli, ma munu'a wihiiete o Paulusi'a. De munu'ali yotemo, <<Ma moi aha ngomi mioihenoli ani ade-ade, manai, mangale ma haala neena.>>33Geena'a de o Paulus wohupuo'au o dodoomuo'a geena.34Ma munu'a widomote'e o Paulusi'a de yonga'u o Yesusi'a, ona geena la: o Dionisius, o Areopagus ma ha'imi moi, de momatengo ami ronga ongo Damaris, de yamuluo nagahi.
The Seed Company