O Hu-hulo'o16
1O Paulus de awi ma-manai yogila-gila o Derbe ma bendari'a, dei'a o Listra ma bendari'a. Geena'a womatengo wonga'u-nga'u o Yesusi'a awi ronga o Timotius. Ma eha o Yahudio'a ma nyawa, muna monga'uo'au o Yesusi'a. Ma dea una o Yunanio'a.2O nyawa yonga'u-nga'u geena'a o Listra'a de o Ikoniumo'a, moi-moi wina'o o Timotius una geena o nyawa ma owa.3O Paulus womau o Timotius winii'i una'a, ho wohulo'o la wihunahi. Una 'ogeena wodiai hababu o Yahudi ma nyawa geena'a moi-moi yana'o bali o Timotius ma dea guuna o Yunani ma nyawa.4O bendara yaadono ma noimi ona yohingahu o nyawa yonga'u-nga'u'a mangale o 'iau naga nage o hu-hulo'o de o jama'ata ma balu-baluhu yaputuho'au o Yerusalemo'a. Ona yohingahu o nyawa'a nage yonga'u-nga'u'a la yodinii'i o butuhu geena.5Ho ma jama'ata goona ma, manga ngo-nga'u iholoioli 'i'uata de 'ayolepemonga o wange ihinoimi.6O Omaha Iofi-ofi 'ihigumadawa o Paulus de o Silas yohingahu ma Jou awi demo geena o Asia ma daera'a. Ho ona yohigila-gilali manga dodagi yaboa o Firgia de o Galatia ma daerano.7Ho nage yaadono o Misia ma daera'a ma batingu'u, de yohitaili 'o Bitinia ma daeraha yohi'aiha, duga o Yesus awi Omaha 'ihigumadawa.8Hababu geenau ho ona yotagi, 'a yapalene o Misia ma daera de ayogila-gila o Troas ma bendari'a.9Italuhu'u geena o Troaso'a, de o Paulus o mama'e moi ma Jou ma Dutuno wama'e o Makedonia ma nyawa womatengo womahigo'ode geena awi biono'a. De wogaaho'o wohigou-goungu una'a la wohi'ai'a do'a o Makedonia'a la wo'iduhunu.10Geena iduangino, moigila-gila mimahidiai mangale ngomi miotagi o Makedonia'u. Hababu ngomi miamao igoungu ma Jou ma Dutu wohulo'o mihingahu o Habari ma Owa geena'a dau.11O Troaso'a mimagoa'a de miohidete amiogila-gila o Samotrake ma nuuhi'a, ma dewelano'aha de o Neapolisi ma bendari'a o Makedonia ma daera'a.12Geena'a de aha miotagi o Filipi ma bendaro'a, o bendara ma amo'o moi o Makedonia ma daera'a. O Filipi ma bendaro'a geena o Roma'a ma nyawa. Geena dau ngomi mia wange muluono.13O Sabat ma wange'u, ngomi oa'ele ma date-date'o'a mimadagi, o bendara ma ngoana ma amo'o ma duduno'a, hababu mimangitu geena'a de ma ena 'o Yahudio'a manga haubayanga ma ngi. Geena'a de miogogeli'e mima'aade-ade de ma nge-ngewe'a nage yomato-to'omuno geena 'a.14Geena'a yomato-to'omuno momatengo 'o moha ma ungu momawu'u-wu'unu ami ronga ongo Lidia, 'o Tiatira ma nyawa. Muna o Yahudio'awa ma mohuba-huba ma Jou ma Dutu'a, ho ma Jou ma Dutu ami hininga wapelenga, la idadi maehe de madawongo, o Paulus awi dodoto'o geena.15Geena'a de ongo Lidia de ami wo'a ma doda'u yo'iohi'i. Yo'iohi'i iduangino, muna mogaaho'o mio'ai'a ami woa'a. Motemo, <<Na'o nihima'eno igou-goungu tonga'uo'au ma Jou Yesusi'a, geena niaino la nimahidodogumu 'ai woa'a.>> De mogaaho'o mohigegoto hiadono miomode'e miodinii'i ami mau.16Ma moi'u geena nage o Yahudio'a manga haubayanga ma ngio'a miotagioli, ho mima'ama'e de o ngewe'a momatengo muna geena o gilaongo moi hababu migoo'o'au. Muna 'o to'ata imiparetano ho muna idadi momai-maihi mangale geena 'amana'o'a o 'ianaga idadi nanga bioni'a. Muna mohimai-maihi o nyawa manga wowango ho maamo'o ho ami hasili 'ao amo'o ma ami tuanga yaehe ami tuanga nage migoo-goo'o'au.17Ngomi de o Paulus 'ia'a naga miotagi, muna 'amoni-ni'i, de 'amohigaho-gaho'o mo temo, <<Ona neena ma Jou ma Dutu Wo'a-'a'ulie awi gilaongo! Ona yaino yohingahu ngini'a mangale cara'iau la idadi niohalamata!>>18O wange muluono naga 'amohigaho-gaho'oli. Geenau ho o Paulus womatongohonu'au de womalelo de wo temo'au ma to'ati'a nage midongohami'a, <<De ma Yesus Kristus awi uaha, ngoi toni hulo'o nohupu geena muna'a.>> Ho 'ageena ma oraha ma to'ata de mimada'au.19Ge migoo-goo'o'au goona yana'o na'o yomahinganono mangale o tiwi yama'e ma nge'omo o ngewe'a gumuna 'a'oiwau! Yo'itago'o o Paulus de o Silasi'a de yo'iaha o bibini 'iamo-'amo'i'a o paharo'a yo'ihitaali yopa-pareta'a.20Yo'iaha'au yopa-pareta'a o bendaro'a geena'a de yotemo'au, <<Noona o Yahudio'a. Ona neena nanga bendara yaruae.21Ona yohidoto'o la o nyawa yamote'e to ona manga 'autoranga nage ngone o Roma'a 'aidadiwa podinii'i.>>22O nyawa yolepe-lepe ma o Paulus de o Silasi'a yo'ingamo, de yopa-pareta o bendaro'a geena yo'ido-doba'a hiadono o Paulus de o Silas manga baju nage yomahinoa-noa'u ma yaraca-racangie de yohulo'o yo'ipoha de o boboha.23Yo'ihoboha wohidi-digali aha de yo'ibuio'au. De o pamareta yohulo'o o bui yogoa-goana manga baluhi'a guuna la wo'igoana wo'ihidi-diai.24Hababu wihulo'o 'ogeena, o bui yogoa-goana manga baluhu guuna wogila-gila wo'ihiohama ona yamidi-di goona o bui'a naga ma ngi 'i'o-'orona'a, manga dou o balaka ngai modidi wohibilatu'u.25Poelua o wutu goronano, o Paulus de o Silas yohaubayanga de yonyanyi ma Jou ma Dutu wipuji. O nyawa-nyawa nage yobui-bui'a ma yoihene ona yonyanyi.26De 'ai horogano o ohu ma muguata, hiadono ma bui ma woa geena ma 'aigiwi-giwi, ho ma ngoana ma moi-moi 'ipelenga de o nyawa yobui-bui'a o rate yo'ihi rangi-rangino ma ma rate geena 'i'o'itoa'a.27O bui yogoa-goana manga baluhu guuna witodo'ana ho womomi'i. Womomi'ie ena wama'e o ngoana ma 'i'o'ipelenga'au de una wote bali o nyawa yobui-bui'a yoloa'au moi-moi. Ho wojai-jai awi dia waai'i womau womaho-honenge.28De o Paulus womaorehe wa'ua-'uatie wotemo, <<Ee! Uwa noma ho-honenge. Ngomi moi-moi 'a neena'ahi!>>29Ma bui yogoa-goana manga baluhu guuna o poci wogaaho'o, de woma papalitana do'ai'a ho wai'a o Paulus de o Silas manga biono'a womatilabu'u'u de woto-towoworo.30Geena'a de wo'ihihupu, de wotemo'au, <<Dea-dea, o 'iau halingou tadiai la o halamata tama'e?>>31O Paulus de o Silas yotemo'au, <<Halingou nonga'u ma Jou Yesusi'a de ngona aha no halamata! 'Ogeenali de ani woa ma doda'u.>>32Geena'a de o Paulus de o Silas yohingahu o Habari ma owa mangale ma Jou Yesus awi demo o bui yogoa-goana manga baluhi'a de awi woa ma doda'u moi-moi.33'Ageena ma wutu ma goronano de o bui yogoa-goana manga baluhu wo'iaha wo'ihihupu de manga dabo waberehi. 'Ageena ma oraha de una de wi woa ma doda'u nage yo'iohi'i.34Geena iduangino de una wo'iaha o Paulus de o Silas to una wi woa'a, ho wo'ihiodomo. Una de awi woa ma doda'u yogarago hababu ona neena yonga'uo'au ma Jou ma Dutu'a.35Ma dewelano de yopa-pareta o bendaro'a geena yohulo'o manga hu-hurudado'a, yai'a yohulo'o o bui yogoa-goana ma baluhi'a la bali o Paulus de o Silas yo'ihihupunou o bui'oa.36Ho o bui yogoa-goana manga baluhu geena o Paulus de o Silasi'a wotemo ona'a, <<Dea-dea, yopa-pareta yohulo'o'au tinihihupu. Ho niotagiou. Nimahidi-diai!>>37Ma o Paulus wotemo o nyawa'a goona <<Ngomi neena o Roma ma nyawa. Imihanowahi ena mihoboha'au o awaha manga biono'a de o bui'a imihiohama. De neena yohulo'o mio tagiou 'amimalii-liilou. Ngomi mioolu'u! Mada'ala ona mahirete yo'aino neenano de ona mahirete imihihupu!>>38Ma hu-hurudado goona yo'ai'a de yohingahu nage yopa-pareta'a, ho yoiheno'a bali o Paulus de o Silas goona 'a o Roma ma nyawa, ho yohawana.39Ho yai'a yomahilooaha o Paulus de o Silasi'a geena'a de yo'iaha yo'ihihupu o buio'a. Yo'ihihupuno aha de yogaaho'o ona'a la yamada ma bendara geena.40O paulus de o Silas yamada ma bui geena de ongo Lidia ami woa'a yotagi'oahi ho yomalomu ohi de o nyawa yonga'u-nga'u, de manga hingina yohi'uata aha de yotagi.
The Seed Company