O Hu-hulo'o11
1Wa'utu geena, o hu-hulo'o de o nyawa yonga'u-nga'u o Yudea ma daera'a moi-moi yoihene na'o o nyawa-nyawa o Yahudio'awa ma yadawongo'au ma Jou ma Dutu awi Demo.2Geena'a de wa'utu o Petrus wotagi o Yerusalemie, de o Yahudio'a yonga'u-nga'uo'au ge wihihala o Petrusi'a. Ona 'ayodiinii'ohi o Yahudio'a manga agama ma 'autoranga mangale o hunata.3Ona yotemo o Petrusi'a, <<Dodoau ho ngona notagi o nyawa'a nage 'ayomahuna-hunawa manga woa'a? De nimahidoodomoli!>>4Woihene 'ogeena, de o Petrus moi-moi wohijarita ona'a, o'iau naga ge 'ida-dadio'au, ma mulaenge hiadono wohi'aino. Wotemo onane,5<<Ma moi, ngoi tomadahaubayanga o Yope ma bendaro'a de o ma-ma'e moi tama'e. Ngoi tama'e harage o moha 'ingoa-ngoata moi 'iuti o diwangu'u 'ihideli'a ili'o'a ma libu'u hoato'a, geena'a de 'ai biono'au imatogumu.6De ma doda'a tagelelo ma diai ena o hagala 'aewani nage ma dou o ngai hoato'a, o hagala 'aewani nage 'apapa-paliarawa, de o hagala 'aewani nage itagi 'imatoba-toba'a. De o hagala namo o ginita'a.7Ge'ena'a de toihene o 'ilingi moi itemo ngoino, <Ee Petrus, i'au natoa'a ma 'aewani geena de naodomo!>8Ma ngoi topaluhu, <Ouwa Jou! Ngoi omaiwahi taodomo o inomo nage mia bohono de mia emo-emono imote'e o Yahudio'a mia agama ma 'autoranga.>9Geena'a de ma 'ilingi da'u o diwangu'u geena 'itemoli, <O'iau naga gee ma Jou ma Dutu wotemo'au 'aidadi naodomo, geena uwa notemo na'o ani bohono.>10Ma haala geena idadi 'igilio ma haangeno, geena'a de moi-moi geena 'ihidoa'auoli o horogade.11'Ageena ma oraha de yahaange o Kaisareano nage yo'ihulo-hulo'o iaho'o ngoino, yomahigo'ono o woa'a ma biono'a 'ia'a nage ngoi tomahido-dogumi'a.12Geena'a de o Omaha 'Iofi-ofi 'ihulo'o ngoino na'o, uwa 'ai hininga 'ilio-lio totagi to'inii'i ona. Nanga riadodoto yabutanga noona ma yonii'i de de ngoi o Kaisarea'u, de ngomi mio'o'iohama o Kornelius awi woa'a.13Geena'a miai'a, de o Kornelius wohijarita ngomino cara'iau una wama'e o malai'ata moi 'imahigo'ode awi woa ma doda'a de 'itemo una'a, <No'ihulo'o o nyawa yotagi da'uie o Yope ma bendarie wiaho'o o Simon nage witehongo o Petrus.14Una aha wohingahu ngona'a o habari nage aha done ngona de ani woa ma doda'u nihihalamata.> >>15O Petrus wotemoli, <<Ma oraha ngoi 'imulaenge tohingahu o habari geena, de o Omaha 'Iofi-ofi yo'iiduguti harage de ma hila ge idadi ngone'a.16Geena'a de tomadanganono ma Jou wotemo'au, <O Yohanes o nyawa woohi'i de o a'ele, ma ngini aha niohi'i de o Omaha 'Iofi-ofi.>17Ho na'o ma Jou ma Dutu wo'i'ula'au o Omaha 'Iofi-ofi ona'a harage de wo'ula ngone'ali ma oraha pomulaenge ponga'u ma Yesus Kristusi'a, de cara'iau ngoi idadi towiituumungu ma Jou ma Dutu?>>18Ma oraha yoihene ma haala geena, ona 'ayomalii-liilo'au. Geena'a de ma Jou ma Dutu wihilamo'o yotemo, <<Ho o nyawa-nyawa 'a o Yahudio'awa ma ma Jou ma Dutu wo'ula o wa'utu mangale yotoba yodiai o baradoha la yama'e o wowango ma dutu.>>19O Stefanus witooma'au de o nyawa yonga'u-nga'u o Yesusi'a imulaenge yo'ihangihara ho yomahi'abarihi. Munu'a yoloa o Fenisia ma daera'a yaadono, de munu'a hiadono o Siprus ma pulo'a de o Antiokhia ma bendari'a. Ona yohihabari o habari ma Jou ma Dutuno 'a o Yahudi'a ma nyawa'a duga.20Ma o nyawa yonga'u-nga'uo'au goona nage yomahi'abarihi'a yamuluo naga o Siprusino de o Kireneno, naga ona goona yotagi o Antiokhia'a de yohihabari o Habari ma Owa mangale ma Jou Yesus, naga o nyawa-nyawa'a nage o Yahudio'awa ma.21Ma Jou awi 'uaha naga de de ona ho manga lepe yonga'u de imulaenge yodinii'i ma Jou Yesus awi dodoto'o.22O'iau naga ge 'ida-dadio'au neena, ma jarita yaadono'au o Yerusalemo'a ma jama'ati'a. Ona wihulo'o o Barnabas wotagi o Antiokhia'u.23Woomahiadonu'u, de wama'e cara'iau ma Jou ma Dutu wo'ula'au awi hininga ma owa ona'a, de duru womagarago. Geena'a de wo'ihitiari la yohigou-goungu'u tatapu yotohono ma Jou Yesusi'a.24O Barnabas nuuna awi hingina yaowa de o Omaha 'Iofi-ofi wiparetano, de wonga'u ma gou-goungu ma Jou'a hiadono o nyawa manga lepe yomulange yonii'i ma Jou Yesusi'a.25De aha o Barnabas wotagi o Tarsus ma bendaru'u o Saulus wihali'i.26Nage wima'eno de o Antiokhiade wiaha. O taunu moi yapahi'u yomalomuno de do'a o jamata, de ya'idoto'o o nyawa manga lepe. O Antiokhia ma bendaro'au geena o nyawa- nyawa nage yodinii'i ma Yesus Kristus awi dodoto'o ma di-dihila'a yatehongo o Kristen.27Ma oraha geena o nabi yamuluo naga da'u o Yerusalemu'u yoboa'u geena o Antiokhia'a.28Geena dau ma doda'a womatengo awi ronga o Agabus. O Omaha 'Iofi awi hingina yaparetano, ho wamagoa'a de wotemo, moi-moi o dunia'a neena aha idadi o baulaco ma amo'o. (De geena ma idadio'au ma oraha o Kaisar Klaudius wopareta.)29Ho moi-moi yonga'u-nga'u o Yesusi'a goona yorimoi ma ngale yohidingoto o'iau hona manga riadodotie da'u o Yudea ma daera'a la yo'ihiduhunu. Moi de moi yohidingoto imote'e o'iau naga ona yaa'unu.30Ona 'ogeena yodiai ho yohulo'o o Barnabas de o Saulus yoota'a manga dingoto geena, o jamata ma balu-baluhi'a o Yudea ma daera'a.
The Seed Company