O Hu-hulo'o12
1Poelua ma oraha 'ageenali ma, ma 'oana o Herodes womulaenge wo'ihangihara o jama'ata yamuluo naga.2Una wohulo'o o Yakobus o Yohanes ma lia'a ma dutu guuna ma witooma de o dia.3Nage wo'ima'e o Yahudi ma nyawa yaigo 'ogeena wodiai, de una wohulo'oli la o Petrus ma witago'o. Ma haala geena idadi o Roti 'airagi-ragiwa ma wange ma amo'u'u.4O Petrus witago'ino de o Herodes wohulo'o wihiohama o bui'a, de wohulo'o o hurudado o bolu hoato'a geena'a yoma'a-'aliti o Petrus wigoana, o bolu moi yahoa-hoato'a. O Herodes awi hininga ma doda'a, o Yahudio'a manga wange ma amo'o nage ihironga o Paska 'ipaha'ahi, de aha wi'uruhu o Petrus o 'awaha manga biono'a.5Ho o Petrus wibui'a ena o jama'ata 'aitogu-togumua widahaubayanga ma Jou ma Dutu'a.6Wa'utu geena, nage tanu ma dewelano, o Herodes wiahau Petrus o 'awaha manga bioni'a. Ma wutu'u geena, o Petrus wiidu de o hurudado yamididi manga hidogorona'a. Awi giama yarante de ma yohidili'o de o hurudado yamididi goona manga giami'a. Geena ma bui ma ngoano'a ma munu'a yogoanu'u.7'Itodo'anino, ena ma Jou wi malai'ata 'imahigo'ode'au o Petrus awi date'o'a, de ma ngii ge'ena 'idihiwa 'a ma moi'u. Ma malai'ata ge'ena o Petrus witomanga wigiwi-giwi de 'itemo, <<Ee, itaiti nomomi'i!>> 'Ageena ma oraha de awi giama ma li-li'o o rante geena ma 'ipidili de iota'a.8Geena'a de ma malai'ata 'itemo una'a, <<Nomabaju'u de ani tarupa nomahinoa.>> Ho o Petrus womabaju de awi tarupa womahinoa. Geena'a de o malai'ata 'itemoli, <<Ani baju i'a-'a'ulu'u nomasinoa'u la noinii'i.>>9Ho wapa'e awi baju i'a-'a'ulu'u de ma malai'ata geena wanii'i, ma dingiio'a geena de yohupu. Ma o Petrus 'awana'owa o'iau naga o malai'ata 'idiai 'ogeena, geena ma gou-goungu idadi. Una wotemo bali 'a wama'e o mama'e moi.10Nage ona yaboa yogoa-goana manga ngii ma didihila'a de ma modidi'a de aha ya'adono o ngoana 'iamo-amo'o o behi nage na'o yotagi o bendari'a geena yaboa geena'a, de ma ngoana 'iamo-amo'o o behi geena 'aenau 'ipelenga de yotagi o nge'omo ma iete-ete'e'i'a yaboa. 'Itodo'anino ena ma malai'ata geena 'imaihango'au ho o Petrus 'awomatengo'au geena'a.11Geena aha de womana'o, de awi hingina'a wotemo, <<Neena geena ma Jou ma Dutu wahulo'o awi malai'ata ho ya'aino 'ihipidili ngoi o Herodes awi giama ma hoato'a, de 'okia sonaa moi-moi done o Yahudio'a yodiai ngoino.>>12Geena moi-moi wa'o'ina'o'a geena, de wotagi o ngo Maria ami woa'a o Yohanes ma eha. O Yohanes guuna ma witehongo o Markus. Wai'a ena o nyawa manga lepe gigiria'a yomapoluno yohaubayanga.13Woboa de o ngoana 'iamo-amo'o ma bionino gee wotolo, ho manga gilaongo momatengo ami ronga ngo Rode tanu mapelengau ma ngoana geena.14De mana'o'au na'o geena o Petrus awi 'ilingi, ho mapelengawahi ma 'amoohamoli hababu duru momagarago. Geena'a de motemo ona'a, <<Ucehehe o Petrus do'au una!>>15De ona yotemo o ngo Rode'a, <<Nitogohanga poelua!>> De moma'uata motemo, <<I goungu o Petrus do'a una!>> De ona yotemoli, <<Geena awi malai'ata nage wigoa-goana.>>16Ena ma Petrus una do'a o ngoano'a wotolo-tolo. Ho gee yai'a yapelenga 'ena geena'a una de yo'itodo'ana ma de duru yoheranga.17De o Petrus wo'ipoma ona'a la yomaliili. Geena'a de wohijarita cara'iau ma Jou ma Dutu wihihupu o buio'a. Aha de wotemo, <<Niohingahu'a o Yakobusi'a de nanga riadodoto maregu'a ma ngale neena.>> Geena ipaha'a de wohupu geena'a ho wotagi o ngii ma homoa'a.18Ma dewelano, de ma hurudado o bui yogoa-goana duru yo'itodo'ana de yoma'a-'ahano. 'O'iau idadio'au o Petrusi'a.19Geena'a de o Herodes wohulo'o o nyawa wihali'i o Petrus, ma 'awima'ewa. Ho ma awi hurudado goona ma wohulo'o yo'ipiri'iha de yo'itooma'au.
Geena'a de ma Herodes wotagi o Yudea ma daera'a de waino de wohi'au'u o Kaisarea ma bendaro'a, de womanoa geena'a.20O Herodes duru witootaha o nyawa-nyawa'a nage Tirus de o Sidon ma bendarino. Mangale geena yomahi'aduga ona yotagi yomatuo-tuono widaali. 'Idi-dihila'a yomadabaja o Blastusi'a wo'iduhunu, una geena Herodes awi leleani manga baluhu awi 'adato'a. Geena'a de yotagi widaali o Herodesi'a de yogaaho'o yomahi'alooaha, hababu na'o to 'ona manga daeraa'a geena o 'inomo yomahinganono 'a to Herodes awi daeraano.21Ma moi gee ma wange yohitatapuo'au, o Herodes una awi 'oana ma baju womahinoa'u de o 'oana ma go-gogelo'a wogogelu'u, o 'awaha manga biono'a de aha womaade-ade.22De ma 'awaha goona gee yohigaho-gaho'o, <<Neena 'a o gomanga ma ilingi, o nyawawa ma ilingi ma!>>23'Ageena ma oraha de ma Jou awi malai'ata wipo'a o Herodesi'a, hababu 'a wihoromatiwa ma Jou ma Dutu'a de wadawongo o nyawa wihilamo nage halingou ma Jou ma Dutu'a. Ho o 'u-'ulubitanga wiodomo hiadono wohonenge.24De ma Jou ma Dutu awi demo 'aitagi monga, ho o nyawa yonga'u-nga'u o Yesusi'a 'ayolepe monga.25Ma oraha o Barnabas de o Saulus manga 'arajaanga yaduanga o Yerusalemo'a, ona yoma'ilioli o Antiokhia'a de o Yohanes nage witehongo Markus ma wiaha.
Geena'a de ma Herodes wotagi o Yudea ma daera'a de waino de wohi'au'u o Kaisarea ma bendaro'a, de womanoa geena'a.20O Herodes duru witootaha o nyawa-nyawa'a nage Tirus de o Sidon ma bendarino. Mangale geena yomahi'aduga ona yotagi yomatuo-tuono widaali. 'Idi-dihila'a yomadabaja o Blastusi'a wo'iduhunu, una geena Herodes awi leleani manga baluhu awi 'adato'a. Geena'a de yotagi widaali o Herodesi'a de yogaaho'o yomahi'alooaha, hababu na'o to 'ona manga daeraa'a geena o 'inomo yomahinganono 'a to Herodes awi daeraano.21Ma moi gee ma wange yohitatapuo'au, o Herodes una awi 'oana ma baju womahinoa'u de o 'oana ma go-gogelo'a wogogelu'u, o 'awaha manga biono'a de aha womaade-ade.22De ma 'awaha goona gee yohigaho-gaho'o, <<Neena 'a o gomanga ma ilingi, o nyawawa ma ilingi ma!>>23'Ageena ma oraha de ma Jou awi malai'ata wipo'a o Herodesi'a, hababu 'a wihoromatiwa ma Jou ma Dutu'a de wadawongo o nyawa wihilamo nage halingou ma Jou ma Dutu'a. Ho o 'u-'ulubitanga wiodomo hiadono wohonenge.24De ma Jou ma Dutu awi demo 'aitagi monga, ho o nyawa yonga'u-nga'u o Yesusi'a 'ayolepe monga.25Ma oraha o Barnabas de o Saulus manga 'arajaanga yaduanga o Yerusalemo'a, ona yoma'ilioli o Antiokhia'a de o Yohanes nage witehongo Markus ma wiaha.
The Seed Company